SEBA

1. Usa sa unom ka anak nga lalaki ni Cus.​—Gen 10:​7, 8; 1Cr 1:​9, 10.

2. Usa ka yuta sa S sa Aprika. Diha sa Isaias 43:3 ang Seba gihisgotan uban sa Ehipto ug Etiopia (Cus) nga gihatag ingong lukat puli kang Jacob. Diha sa susamang talaan, gihisgotan sa Isaias 45:14 ang “mga Sabeanhon” inay ang “Seba,” nga nagpakita nga ang katawhan sa Seba gitawag nga mga Sabeanhon. Kini nga mga bersikulo nagpasabot nga ang Seba maoy utlanan o sakop sa Etiopia. Gipaluyohan kini ni Josephus, kinsa miingon nga ang “Saba” nagtumong sa siyudad sa Meroë daplin sa Nilo ug sa dakong luna (Pulo sa Meroë) taliwala sa mga suba sa Nilo, Asul nga Nilo, ug Atbara. (Jewish Antiquities, II, 249 [x, 2]) Ang paghisgot bahin sa mga Sabeanhon ingong “tag-as nga mga tawo” (Isa 45:14) gipamatud-an ni Herodotus (III, 20) nga naghisgot sa mga Etiopianhon ingong “ang kinatas-an ug labing ambongan sa tanang tawo.”​—Tan-awa ang CUS Num. 1 ug 2.

Ang Meroë dugay na nga usa ka hinungdanong dapit sa patigayon. Lakip sa halayong mga dapit nga gihisgotan sa Salmo 72 sa dihang gihubit ang dominyo ug gahom sa usa nga itudlo ni Jehova ingong Hari, ang Seba ug Sheba gihinganlan ingong mga dapit kansang mga hari motanyag ug gasa.​—Sal 72:10; Joe 3:8.