Ang Ipasabot sa mga Balita

Ang Sayop nga Sinyal

“Unsay imong sinyal?” Alang sa milyonmilyong mga tawo nga nagakonsulta sa mga tsart sa “sinyal sa bitoon” nga giandam sa mga astrologo, kanang pangutanaha dakog kahulogan. Sila nagtuo nga ang posisyon sa mga bitoon, sa mga planeta, sa adlaw, ug sa bulan may kalabotan sa mga balalatik sa zodiac sa adlaw sa pagkatawo direktang makaimpluwensiya sa kinabuhi sa tawo. Apan, sumala sa mantalaan sa London nga Independent, ang mga astrologo naghatag sa mga tawo ug sayop nga sinyal. Ang mga tsart sa “sinyal sa bitoon” nga gigamit alang sa mga horoskopyo gibase sa “mga balaod” sa astrolohiya nga gihimo duolan sa 2,000 ka tuig kanhi.

Nag-ingon ang Independent: “Sultihan sa astrologo ang mga ginikanan sa bag-ong natawong bata karong panahona nga siya maoy usa ka Cancer.” Apan, ang taho nag-ingon: “Apan kon motan-aw sila sa posisyon sa adlaw diha sa panganod, ilang makita nga ang adlaw sa pagkatinuod anaa ilalom sa Gemini.” Unsay hinungdan niini? Gitawag kadto sa mga astronomo nga “precession of equinoxes,” usa ka katingad-anan nga niini ang ehe sa yuta, sa epekto, motuwangtuwang sama sa kasing dihang mopahinay kini. Kompletohon niining precession, kun “pagtuwangtuwang,” ang 360-grado ngs siklo matag 25,800 ka tuig, nga nagkahulogan nga ang mga equinox moabante ug 50 segundos sa arko kada tuig, kun usa ka grado sa 72 ka tuig. Busa, sa milabayng 2,000 ka tuig, ang posisyon sa adlaw sa panganod nairog ug usa ka bug-os nga sinyal sa zodiac. Ingong resulta, “ang horoskopyo sa adlawng natawhan dili mao ang tinuod nga larawan sa langit sa yugto sa pagkatawo sa usa,” misaysay si Richard F. Smith diha sa iyang librong Prelude to Science. “Ang kadaghanan nga ilalom sa sinyal nga Scorpio ning kalibotana,” siya miingon, “sa tinuod natawo dihang ang adlaw anaa sa Libra, ang kadaghanan sa nangatawo ilalom sa Leo sa tinuod ilalom sa Cancer, ang mga Cancer ilalom sa Gemini, ug padayon.”

Ang pagkadili-kasaligan sa mga tsart sa bitoon ug sa mga horoskopyo nagapasiugda lamang sa kaalam sa paglantaw sa Maglalalang alang sa pagtultol ug dili sa mga butang nga iyang gilalang. (Roma 1:24, 25) Apan, ang labi pang dakong katarongan sa paglikay sa paggamit sa mga horoskopyo mao nga kini motultol sa paghatag pagsimba “sa adlaw o sa bulan o sa tanang panon sa kalangitan, usa ka butang nga wala [isugo sa Diyos.”—Deuteronomio 17:2-5.

Walay Tubig—Walay Kinabuhi

Mao kini ang konklusyong naabot ni Propesor Norman H. Horowitz, usa ka siyentipiko nga nalangkit sa mga misyon sa 1965-76 sa Mariner ug Viking ngadto sa Mars.

Diha sa iyang librong To Utopia and Back: The Search for Life in the Solar System, si Propesor Horowitz miingon nga ang mga nadiskobrehan gikan niining mga misyona dayag nga nakasulbad sa pangutana kon duna bay kinabuhi sa Mars o sa ubang planeta sa atong sistema solar. Ang “Mars,” matud pa niya, “kulang sa tagsaong mga bahin nga nangibabaw sa palibot sa atong kaugalingong planeta, ang kadagatan sa tubig nga bug-os naladlad sa adlaw.” Napamatud-an sa pagdukdiuki ang kakulang ug tubig sa planeta.

Tapos sa mainampingong mga eksperimento nakuha ang tanang posibilidad sa pagkaadunay kinabuhi sa Mars, si Horowitz midawat: “Ang pagkawalay kalamposan sa pagkakitag kinabuhi sa Mars maoy usa ka kapakyasan, apan usa usab kadto ka kapadayagan. Sanglit ang Mars nagatanyag nga mao ang labing masaarong puy-anan sa mga dili-kalibotanong linalang sa sistema solar, karon natino na nga ang yuta mao lamang ang may kinabuhing planeta sa atong rehiyon sa galaksiya.”

Pagkatukma nga, dihang nagsulat bahin sa yuta, ang karaang propetang Isaias miingon nga ang Magbubuhat niini “nagporma niini aron pagapuy-an”! (Isaias 45:18) Sayo nga gihisgotan ang tubig diha sa asoy sa Bibliya sa paglalang. Sa matin-aw, gitagana pag-una ang tubig sa wala pa lalanga ang bisan unsang porma sa kinabuhi sa yuta. Ingon sa gipamatud-an sa mga misyon sa Mars: Gawas sa gingharian sa espiritu, kon walay tubig, wala gayoy kinabuhi.—Genesis 1:1-10.

[Hulagway sa panid 7]

Ang walay-kinabuhing nawong sa Mars, nga nakita gikan sa salakwanang “Viking II”

[Credit Line]

NASA photo