Kon Unsa si Jesus Karon

SAMTANG makapaikag kon unsay hitsura ni Jesus, labi pang hinungdanon ang pagtino kon unsa siya karon ug kon hain siya. Unsang bahina ang iyang gialagaran diha sa katuyoan sa Diyos alang sa tawhanong pamilya?

Ang sekular nga kasaysayan dili makatubag kanato. Makaplagan lamang kini diha sa dokumento nga ang Diyos maoy awtor alang sa kaayohan sa mga nangita sa kamatuoran. Ug kana mao ang Balaang Bibliya, o ang Sagradong Kasulatan, ang labing kaylap nga napanagtag nga tomo sa kasaysayan sa kalibotan.

Ang Bibliya dili lamang laing basahon nga ang mga tawo maoy awtor. Bisag gigamit ang mga tawo ingong iyang mga tigsulat, ang Diyos mao ang tinuod nga awtor: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong, aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.”​—2 Timoteo 3:16, 17.

Giila ni apostol Pablo kon unsa ang Kasulatan, kay siya misulat: “Sa nadawat ninyo ang pulong sa Diyos, nga inyong nadungog kanamo, inyong gidawat kini, dili ingong pulong sa mga tawo, kundili, ingon gayod sa kon unsa kini sa pagkamatuod, ingong ang pulong sa Diyos.”​—1 Tesalonica 2:13.

Ang Diyos mao ang labing gamhanang Maglalalang sa uniberso, uban ang bilyonbilyong galaksiya ug bilyonbilyong bituon diha sa matag galaksiya niini. Pagkamakalilisang ang nabatonan niyang gahom aron sa paglalang nianang tanan! Sa pagkatinuod ang Labing Gamhanang Usa, nga maoy naghimo sa katingalahang uniberso, makaarang nga mahimong awtor sa usa ka libro nga mahimong kasaligang giya alang ni bisan kinsa nga nagapangita sa kamatuoran.

Kon Unsay Ginaingon sa Bibliya

Ang Pulong sa Diyos nagyagyag sa walay kinutobang mga teoriya ug mga banabana bahin kang Jesus. Matikdi ang pipila ka detalye nga gihatag niini bahin kaniya:

• Si Jesus mao ang una ug bugtong nga direktang linalang sa Diyos sa langit sa di-maihap nga kapanahonan kanhi, una pa ang mga manulonda ug ang pisikal nga uniberso. Mao nga siya gitawag nga “bugtong-gianak nga Anak” sa Diyos. Ang tanang ubang linalang gihimo pinaagi niini nga Anak, ang “batid nga magbubuhat” sa Diyos, sa iyang una-tawhanong paglungtad.​—Juan 3:16; 6:38; 8:58; Proverbio 8:30; Colosas 1:16.

• Mga 2,000 ka tuig kanhi, gibalhin sa Diyos ang kinabuhi ni Jesus ngadto sa tagoangkan sa usa ka Hudiyong ulay, aron mahimugso ingong usa ka tawo. Bisan karon, pinaagi sa proseso sa artipisyal nga pagpasulod sa binhi, ang mga tawo makahimog butang nga sa pipila ka paagi ikatandi niana.​—Mateo 1:18; Juan 1:14.

• Si Jesus labaw pa kay sa pagkahimong usa ka maayong tawo lamang. Ingon nga hamtong hingpit niyang gibanaag ang mahigugmaon, mabination, matarong nga personalidad sa iyang langitnong Amahan, si Jehova nga Diyos.​—Juan 14:9, 10; Hebreohanon 1:3; 1 Juan 4:7-​11, 20, 21.

• Ingong hawas sa Diyos dinhi sa yuta, giatiman ni Jesus ang mga panginahanglan sa kabos ug sa dinaogdaog, apan wala siya magpihig batok sa adunahan. Uban ang pagpaluyo sa gamhanang balaang espiritu sa Diyos, si Jesus milagrosong nag-ayo sa masakiton ug nagbanhaw pa gani sa patay. Pinaagi sa paghimo sa maong katingalahang mga buhat, iyang gipasundayag diha sa gamayng sukod kon unsay iyang buhaton sa tibuok kalibotan human nga siya gibanhaw gikan sa patay ngadto sa langitnong kinabuhi ug nahimong Hari sa langitnong Gingharian sa Diyos.​—Mateo 11:4-6; Lucas 7:11-​17; Juan 11:5-​45.

• Kanang langitnong Gingharian sa Diyos mao ang gitudlo ni Jesus nga iampo sa iyang mga sumusunod ug unahon diha sa ilang mga kinabuhi. Sa dihang bug-os nga matukod, “kini magdugmok ug magtapos sa tanan niining mga gingharian [nga naglungtad karon], ug kini mismo mobarog sa panahong walay kataposan.” Dayon, ang Gingharian mahimong bugtong kagamhanan sa yuta. Kini ang bugtong paglaom sa masulub-ong katawhan.​—Daniel 2:44; Mateo 6:9, 10.

• Ang Diyos mao ang Amahan ni Jesus, ug matinumanon si Jesus sa Diyos. Busa, sa dihang si Jesus gipatay, siya usa ka hingpit nga tawo. Kinabubut-on niyang gitanyag ang iyang hingpit nga kinabuhi ngadto sa Diyos ingong usa ka halad lukat aron sa pagbawi sa nawala ni Adan sa dihang siya mirebelde batok sa Diyos. Sa pagbuhat sa ingon, gibuksan ni Jesus ang dalan ngadto sa kinabuhing walay kataposan alang sa tanan nga motuo kaniya.​—Juan 3:16; Roma 3:23, 24; 1 Juan 2:2.

• Ingong tinudlong langitnong Hari sa Diyos, tumanon ni Jesus ang katuyoan sa Diyos sa pagwagtang sa pagkadaotan gikan sa nawong sa yuta ug sa pagtuboy sa masinundanong katawhan ngadto sa kahingpitan sa hunahuna ug lawas. Ang katawhan magpuyo unya diha sa pakigdait ug kalipay sa usa ka paraisong yuta, nga may maayong pamalay ug dagayang pagkaon alang sa tanan. Mahanaw na sa dayon ang sakit, kasubo, ug kamatayon. Bisan ang patay banhawon ug hatagag kahigayonan nga mabuhi sa walay kataposan sa yuta.​—Genesis 1:26-​28; 2:8; Salmo 37:10, 11, 29; Proverbio 2:21, 22; Isaias 25:6; 65:21-​23; Lucas 23:43; Buhat 24:15; Pinadayag 21:3, 4.

Busa, ang Bibliya tin-aw nga nagtug-an kanato nga si Jesus mao ang pangunang persona diha sa katuyoan sa Diyos aron sa pagtukod ug usa ka bag-ong kalibotan sa pagkamatarong dinhi sa yuta. Tungod sa hinungdanong papel nga iyang gidula, si Jesus tukmang makaingon: “Ako ang dalan ug ang kamatuoran ug ang kinabuhi. Walay usa nga makaadto sa Amahan gawas kon pinaagi kanako.”​—Juan 14:6; 2 Pedro 3:13.

Usa ka Mabinationg Magmamando

Buot sa mapainubsanong katawhan nga si Jesus mao ang ilang magmamando sa bag-ong kalibotan, ug pagkalahi, pagkamakapalipayng matang sa magmamando unya siya! Usa ka paagi nga iyang gipakita kini maoy pinaagi sa katingalahang mga buhat sa pagpang-ayo nga iyang gihimo samtang dinhi sa yuta. (Mateo 15:30, 31) Apan matikdi, usab, kon unsang matanga siya nga magmamando unya.

Tagda una ang rekord sa mga magmamando niining kalibotana. Ang kasaysayan nagpakita nga latas sa kapanahonan, sila sagad nga mabangis ug walay kaluoy, nga nagtultol sa ilang katawhan ngadto sa di-maihap nga mga gubat, kabangisan, inkwisisyon, ug mga masaker. Niining ika-20ng siglo lamang, mikabat sa kapin sa 100 ka milyong tawo ang gipamatay sa mga gubat.

Itandi ang tinamdan ug rekord sa mga magmamando niining kalibotana nianang tinamdan ug rekord ni Jesus sa iyang mga pakiglabot uban sa kabos, sa dinaogdaog, sa walay kapaingnan: “Sa nakita ang mga panon sa katawhan mibati siya ug kaluoy kanila, tungod kay sila pinanitan ug binalibag samag mga karnero nga walay pastol.” Busa iyang giingnan sila: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.”​—Mateo 9:36; 11:28-30.

Pagkamabination ni Jesus sa mga tawo! Niini iyang gisundog ang iyang langitnong Amahan. Si Jesus mao ang personipikasyon sa gugma, ug iyang gitudloan ang iyang mga tinun-an sa pagbaton ug tinuod, de-prinsipyong gugma sa usag usa. Busa dili nila tugotan ang rasa, nasyonalidad, kahimtang sa panginabuhi, kanhing relihiyon, o bisan unsa nga makabalda sa ilang internasyonal nga panaghiusa. (Juan 13:34, 35; Buhat 10:34, 35) Sa pagkatinuod, si Jesus nahigugma pag-ayo sa mga tawo nga iyang gihatag ang iyang kinabuhi alang kanila. (Efeso 5:25) Siya ang matang sa magmamando nga gikinahanglan ug mabatonan niining kalibotana.

Si Jesus Karon Maoy Usa ka “Ambongan” nga Hari

Ang matagnaong Pulong sa Diyos nagtabang kanato sa pagsabot nga si Jesus karon maoy usa ka gamhanang langitnong Hari. Bahin kaniya ang salmista nagtagna: “Ikaw sa pagkatinuod labi pang ambongan kay sa anak nga mga lalaki sa mga tawo. . . . Sa imong kahalangdon padayong magmalamposon; sakay diha sa kawsa sa kamatuoran ug pagkamapainubsanon ug pagkamatarong . . . Imong gihigugma ang pagkamatarong ug gidumtan ang pagkadaotan. Mao nga ang Diyos, ang imong Diyos, nagdihog kanimo sa lana sa kalipay.”​—Salmo 45:2, 4, 7.

Ingong usa ka langitnong Hari nga dinihogan sa Diyos, gimandoan si Jesus nga molihok aron ipahayag ang iyang gugma sa pagkamatarong ug ang iyang pagdumot sa pagkadaotan. Busa, siya gihubit diha sa Bibliya ingong dili mamatay nga mananaog, ang “Hari sa mga hari,” nga sa dili madugay magpatay sa tanang kaaway sa Diyos. Dugang pa, iyang ipasig-uli ang yuta ngadto sa usa ka paraisong kahimtang ug magtuboy sa malukat nga katawhan ngadto sa kahingpitan.​—Pinadayag 19:11-​16.

Ang bag-ong papel ni Jesus dili iya nianang sa usa ka ‘nagaantos nga Mesiyas’ nga giyagayagaan, gibunalan, ug gipatay sa mga magsusupak. Hinunoa, ang iyang bag-ong papel maoy iya nianang sa usa ka “Gamhanang Diyos,” ang magmamando sa yuta. (Isaias 9:6) Dili kini makapalipayng balita sa kadaghanang tawhanong mga magmamando, kay ang ilang mga gingharian sa di madugay dugmokon sa pagkahanaw, segun sa gitagna sa Daniel 2:44. Nga naggamit kang Kristo ingong iyang tigpahamtang sa paghukom, ang Diyos “magdugmok gayod sa mga hari sa adlaw sa iyang kasuko. Ipakanaog niya ang paghukom taliwala sa mga nasod.”​—Salmo 110:5, 6.

Si Isaias nagtagna nga sa pagbuhat niini, si Kristo “magpahingangha sa daghang nasod. Kaniya ang mga hari managhilom.” Ngano? “Tungod kay ang wala gikasugilon kanila [sa ilang relihiyosong mga piniyalan] ila gayong makita, ug ang wala nila hidunggi ila gayong tagdon.”​—Isaias 52:15.

‘Pag-ani ug Alimpulos’

Si Isaias nagtagna ug tinuyong pagbiya sa katungdanan sa bahin sa relihiyosong mga pangulo. Pananglitan, wala sila magtudlo sa kamatuoran sa Bibliya apan nagtudlo sa ilang mga panon ug dili-kasulatanhong mga doktrina maylabot sa walay kataposang pagsakit diha sa kalayonhong impiyerno, trinidad sa tulo ka diyos diha sa usa, ug pagkadi-mamatay sa kalag​—ang tanan dunay paganong sinugdanan. Ug ang klero misuportar sa tanang gubat sa ilang mga nasod, bisan pag nagkahulogan kanag pagpatay sa mga tawo sa ilang relihiyon mismo. Kini maoy direktang pagsupak sa mga sugo sa Diyos.​—1 Juan 2:3, 4; 3:10-​12; 4:8, 20, 21.

Usab, ang klero nagtanyag sa ilang mga panon sa makapahimuot sa mata apan, sa panan-aw sa Diyos, walay kapuslanang relihiyosong mga imahen, sotana, mahalong mga katedral, ug mga dibuhong dinayandayanan ug paganong mga ideya, lakip ang silaw sa ulo sa adlaw-diyos. Kini gihimo bisan pa sa sugo sa Diyos sa iyang mga alagad: “Pahilayo kamo, pahilayo kamo, gumula gikan diha, ayaw paghikap ug hugaw . . . , kamo nga nanagdala sa mga sudlanan ni Jehova.”​—Isaias 52:11; 2 Corinto 6:14-​18.

Kadtong kinsa nag-angkon nga naghawas sa Diyos apan naglapas sa iyang mga sugo ug nagtudlo sa uban sa pagbuhat sa sama moani sa ilang gipugas. Sila hukman ug di-maayo ug magbayad sa dihang kining sistemaha sa mga butang laglagon. Segun sa giingon ni propetang Oseas, “ilang gipugas ang hangin, ug ilang anihon ang alimpulos.”​—Oseas 8:7, King James Version; tan-awa usab ang Pinadayag 17:1-3, 15, 16.

Matinud-anog Kasingkasing Makakat-on sa Kamatuoran

Ang dili maayong pagrepresentar sa klero sa Diyos ug kang Jesus dili makapugong sa matinud-anog kasingkasing nga mga tawo sa pagkakat-on sa kamatuoran bahin kang Jesus. Sa unang siglo, kini wala makapugong, kay segun sa gisulat ni Paul Barnett diha sa The Two Faces of Jesus, “si Kristo dili tigparasyut nga miambak lamang sa kahanginan ngadto sa kasaysayan, nga wala ikapahibalo.” Oo, balik niadto ang tagna sa Bibliya tukmang ‘nagpahibalo’ sa Mesiyas, nga naghatag sa iyang maunongong mga tinun-an ug pamatuod sa iyang pag-abot. Karong adlawa dunay daghang dugang pamatuod nga nagpahibalo sa kamatuoran nga si Jesus gihatagag gahom sa Diyos sa pagmando ingong mahimayaong langitnong “Hari sa mga hari.”​—Mateo 24:3-​13; 2 Timoteo 3:1-5, 13.

Sa pagkatinuod, “kining maayong balita sa gingharian [sa Diyos uban kang Kristo ingong magmamando] igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Kana ginahimo sa mga Saksi ni Jehova, nga mikabat na sa kapin sa lima ka milyon sa tibuok kalibotan. Busa kadtong buot mahibalo sa tinuod nga Jesus makahimo gayod niana. (Juan 10:14; 1 Juan 5:20) Ug ang pagkahibalo ug pagsunod kaniya hinungdanon sa paglabang buhi latas sa “dakong kasakitan” nga sa di-madugay maghinlo sa yuta.​—Pinadayag 7:9-​14; Juan 17:3; 2 Tesalonica 1:6-​10.

Busa, ikalipay sa mga Saksi ni Jehova ang pagtabang kanimo sa pagsusi sa makapadaning hulagway sa Anak sa Diyos diha sa Bibliya.

[Hulagway sa panid 9]

Si Kristo diha sa gahom sa Gingharian magpapha sa pagkadaotan

[Hulagway sa panid 10]

Ilalom sa mahigugmaong pagmando ni Kristo, kining yutaa mahimong usa ka paraiso