Si Jehova​—Usa ka Diyos nga Motudlo

“Silang tanan tudloan ni Jehova.”​—JUAN 6:45.

1. Unsay ginabuhat ni Jesus sa Capernaum niadtong tungora?

SI Jesu-Kristo bag-o pang naghimog mga milagro ug niadtong tungora nakit-an nga nagtudlo sa usa ka sinagoga sa Capernaum, duol sa Dagat sa Galilea. (Juan 6:1-21, 59) Daghan ang nagpahayag sa pagkadili-makatuo sa miingon siya: “Ako nanaog gikan sa langit.” Sila mibagutbot: “Dili ba mao man kini si Jesus nga anak ni Jose, kansang amahan ug inahan atong nailhan? Naunsa ba nga siya karon nagaingon, ‘Ako nanaog gikan sa langit’?” (Juan 6:38, 42) Nga mibadlong kanila, si Jesus mipahayag: “Walay tawo nga makaari kanako gawas kon ang Amahan, kinsa nagpadala kanako, magkabig kaniya; ug pagabanhawon ko siya sa kataposan nga adlaw.”​—Juan 6:44.

2. Unsa ang pasikaranan sa pagtuo sa saad ni Jesus mahitungod sa pagkabanhaw?

² Pagkakahibulongang saad​—nga pagabanhawon sa kataposang adlaw, inigmando na sa Gingharian sa Diyos! Makatuo kita niining saara tungod kay kini gipasaligan sa Amahan, si Jehova nga Diyos. (Job 14:13-15; Isaias 26:19) Sa tinuoray, si Jehova, kinsa nagtudlo nga ang mga patay mobangon, mao “ang kinadak-ang magtutudlo sa tanan.” (Job 36:22, Today’s English Version) Nga mitumong sa pagtagad ngadto sa pagpanudlo sa Amahan, si Jesus sunod miingon: “Nahisulat kini diha sa mga Propeta, ‘Ug silang tanan tudloan ni Jehova.’”​—Juan 6:45.

3. Unsang mga pangutana ang atong hisgotan?

³ Sa pagkamatuod, mahimong usa ka pribilehiyo nga mahilakip niadtong bahin kanila ang propetang si Isaias misulat: “Ang tanan nimong mga anak mao unyay mga tawo nga tinudloan ni Jehova.” (Isaias 54:13) Mahimo ba kitang ingon? Kinsa ba ang mahisamag iyang mga anak ug makadawat sa iyang mga pagtudlo? Unsa ang hinungdanong mga pagtulon-an ni Jehova nga kita angay nga masayod ug molihok sumala niana aron makadawat sa iyang panalangin? Sa unsang paagi si Jehova nagtudlo sa nangagi, ug siya ba nagtudlo sa samang paagi karong adlawa? Kini sila maoy mga pangutana nga atong hisgotan.

Amahan, Magtutudlo, Bana

4. Kinsa ang una sa mga anak ni Jehova nga modawat sa iyang mga pagtulon-an?

⁴ Si Jehova sa sinugdan nahimong Amahan ug Magtutudlo sa dihang gilalang niya ang iyang bugtong Anak, ang una-tawhanong Jesus. Kini siya gitawag ug “ang Pulong” tungod kay siya mao ang Pangulong Tigpamaba ni Jehova. (Juan 1:1, 14; 3:16) Ang Pulong nag-alagad “tapad [sa Amahan] isip usa ka batid nga magbubuhat,” ug nakakat-on siyag maayo gikan sa pagtudlo sa iyang Amahan. (Proverbio 8:22, 30) Ngani, nahimo siyang ang Ahente, o galamiton, nga pinaagi kaniya ang Amahan naglalang sa tanang ubang butang, lakip ang espiritung “mga anak sa Diyos.” Pagkadako tingali ang ilang kalipay nga gitudloan sa Diyos! (Job 1:6; 2:1; 38:7; Colosas 1:15-17) Sa ulahi, ang unang tawo, si Adan, nalalang. Siya usab maoy usa ka “anak sa Diyos,” ug gipadayag sa Bibliya nga siya gitudloan ni Jehova.​—Lucas 3:38; Genesis 2:7, 16, 17.

5. Unsang bililhong pribilehiyo ang giwala ni Adan, apan kinsay gitudloan ni Jehova, ug ngano?

⁵ Ikasubo, si Adan, tungod sa iyang tinuyong pagkadili-masinugtanon, nawad-an sa pribilehiyo nga magpadayong anak sa Diyos. Busa, ang iyang mga kaliwat dili makapangangkon sa relasyon sa pagkaanak sa Diyos pinasukad lamang sa pagkatawo. Bisan pa, gitudloan ni Jehova ang dili-hingpit nga mga tawo nga nagsalig kaniya alang sa giya. Pananglitan, si Noe napamatud-ang “usa ka tawong matarong” nga “naglakaw uban sa matuod nga Diyos,” ug busa si Noe gitudloan ni Jehova. (Genesis 6:9, 13–Ge 6:13 hangtod sa 7:5)) Tungod sa iyang pagkamasinugtanon, gipamatud-an ni Abraham ang iyang kaugalingon nga “higala ni Jehova,” ug busa siya usab gitudloan ni Jehova.​—Santiago 2:23; Genesis 12:1-4; 15:1-8; 22:1, 2.

6. Kinsa ang naisip ni Jehova nga iyang “anak,” ug unsang matanga sa magtutudlo siya ngadto kanila?

⁶ Sa ulahi pa gayod, sa adlaw ni Moises, gipahigayon ni Jehova ang usa ka relasyong may pakigtugon uban sa nasod sa Israel. Ingong resulta, kanang nasora nahimong iyang piniling katawhan ug naisip nga iyang “anak.” Ang Diyos miingon: “Ang Israel maoy akong anak.” (Exodo 4:22, 23; 19:3-6; Deuteronomio 14:1, 2) Pinasukad nianang relasyong may pakigtugon, ang mga Israelinhon nakaingon, sumala sa gitala sa propetang si Isaias: “Ikaw, Oh Jehova, mao ang among Amahan.” (Isaias 63:16) Gidawat ni Jehova ang iyang responsabilidad sa pagkaamahan ug mahigugmaong gitudloan ang iyang mga anak, ang Israel. (Salmo 71:17; Isaias 48:17, 18) Ngani, sa dihang sila nahimong dili matinumanon, sa pagkamaluluy-on siya mihangyo kanila: “Balik kamo, Oh kamong mabudhiong mga anak.”​—Jeremias 3:14.

7. Unsang relasyon ang naangkon sa Israel uban kang Jehova?

⁷ Ingong usa ka sangpotanan sa relasyong may pakigtugon uban sa Israel, si Jehova usab sa masambingayong paagi nahimong Bana sa nasod, ug kini nahimong iyang masambingayong asawa. Bahin kaniya ang propetang si Isaias misulat: “Ang imong Dakong Magbubuhat mao ang imong tag-iya ingong bana, si Jehova sa mga panon mao ang iyang ngalan.” (Isaias 54:5; Jeremias 31:32) Bisan tuod si Jehova madungganong nagtuman sa iyang papel isip Bana, ang nasod sa Israel nahimong maluibong asawa. “Ingon sa usa ka asawa nga sa pagkamaluibon mibiya sa iyang kauban,” si Jehova miingon, “sa ingon ikaw, Oh balay sa Israel, nagmaluibon kanako.” (Jeremias 3:20) Si Jehova nagpadayon sa paghangyo sa mga anak sa iyang dili-maunongong asawa; siya nagpadayon nga ilang “Dakong Instruktor.”​—Isaias 30:20; 2 Cronicas 36:15.

8. Bisan pag ang Israel isip usa ka nasod gisalikway ni Jehova, unsang antitipikal masambingayong asawa ang nabatonan pa niya?

⁸ Sa dihang ang Israel nagsalikway ug nagpatay sa Iyang Anak, si Jesu-Kristo, sa kataposan ang Diyos nagsalikway kaniya. Busa kadtong Hudiyong nasod dili na usa ka masambingayong asawa alang kaniya, ni siya mao ang Amahan ug Magtutudlo sa iyang masupilong mga anak. (Mateo 23:37, 38) Hinuon, ang Israel mao lamay mahulagwayon, o simboliko, nga asawa. Ang apostol nga si Pablo nagkutlo sa Isaias 54:1, nga naghisgot bahin sa usa ka “babayeng landay” nga lahi ug lain sa “babayeng may tag-iya isip bana,” ang nasod sa kinaiyanhong Israel. Gipadayag ni Pablo nga ang dinihogang mga Kristohanon maoy mga anak sa “babayeng landay,” nga iyang gitawag ug “Jerusalem sa itaas.” Kining antitipikal masambingayong babaye gilangkoban sa langitnong organisasyon sa Diyos sa espiritung mga linalang.​—Galacia 4:26, 27.

9. (a) Kinsa ang gitumong ni Jesus sa naghisgot siya mahitungod sa ‘imong mga anak nga gitudloan ni Jehova’? (b) Pinasukad sa unsa nga ang mga tawo mahimong espirituwal nga mga anak sa Diyos?

⁹ Busa, sa sinagoga sa Capernaum, sa gikutlo ni Jesus ang tagna ni Isaias: “Ang tanan nimong mga anak mao unyay mga tawong tinudloan ni Jehova,” siya naghisgot niadtong mahimong “mga anak” sa “Jerusalem sa itaas,” ang samag-asawang langitnong organisasyon sa Diyos. Pinaagi sa pagdawat sa mga pagtulon-an sa hawas sa Diyos nga gikan sa langit, si Jesu-Kristo, kadtong Hudiyong mga mamiminaw mahimong mga anak sa langitnong babaye sa Diyos nga sa nangagi landay ug mahimong “usa ka balaang nasod,” ang espirituwal nga “Israel sa Diyos.” (1 Pedro 2:9, 10; Galacia 6:16) Sa pagbatbat sa dakong higayon nga gitanyag ni Jesus aron mahimong espirituwal nga mga anak sa Diyos, si apostol Juan misulat: “Siya nahiabot sa kaugalingon niyang panimalay, apan ang iyang kaugalingong katawhan wala magpadayon kaniya. Bisan pa niana, kon unsa kadaghan ang midawat kaniya, ngadto kanila siya mihatag ug awtoridad nga mahimong mga anak sa Diyos, tungod kay sila nanagpasundayag man ug pagtuo sa iyang ngalan.”​—Juan 1:11, 12.

Hinungdanong mga Pagtulon-an ni Jehova

10. Dihadiha human sa rebelyon sa Eden, unsay gitudlo ni Jehova mahitungod sa “binhi,” ug kinsa ba ang maong Binhi?

¹⁰ Si Jehova, isip usa ka mahigugmaong Amahan, nagpahibalo sa iyang mga anak sa iyang mga katuyoan. Busa, sa dihang usa ka rebeldeng manulonda nagdani sa unang tawhanong magtiayon aron mosupak, dihadiha gipahibalo sila ni Jehova kon unsay iyang himoon aron tumanon ang iyang katuyoan nga himoong paraiso ang yuta. Siya miingon nga iyang ibutang ang panagdumot tali sa “unang bitin,” kinsa mao si Satanas nga Yawa, “ug sa babaye.” Unya iyang gisaysay nga ang “binhi” sa babaye magsamad kang Satanas nga ikamatay, “sa ulo.” (Genesis 3:1-6, 15; Pinadayag 12:9; 20:9, 10) Sumala sa among napamulong na, ang babaye​—nga sa ulahi nailhan nga “Jerusalem sa itaas”​—mao ang langitnong organisasyon sa Diyos sa espiritung mga linalang. Apan kinsa ba ang iyang “binhi”? Siya mao ang Anak sa Diyos, si Jesu-Kristo, ang usang gipadala gikan sa langit ug ang usa nga maoy molaglag sa kataposan kang Satanas.​—Galacia 4:4; Hebreohanon 2:14; 1 Juan 3:8.

11, 12. Giunsa pagpatin-aw ni Jehova ang iyang hinungdanong pagtulon-an mahitungod sa “binhi”?

¹¹ Gipatin-aw ni Jehova sa dugang ang maong hinungdanong pagtulon-an mahitungod sa “binhi” sa dihang siya misaad kang Abraham: “Akong padaghanon gayod ang imong binhi ingon sa mga bituon sa mga langit . . . Ug pinaagi sa imong binhi ang tanang nasod sa yuta magapanalangin gayod sa ilang kaugalingon.” (Genesis 22:17, 18) Gigamit ni Jehova si apostol Pablo sa pagpatin-aw nga si Jesu-Kristo mao ang gisaad nga Binhi ni Abraham apan ang uban mahimo usab nga bahin sa “binhi.” “Kon kamo iya ni Kristo,” si Pablo misulat, “kamo sa pagkamatuod maoy binhi ni Abraham, mga manununod maylabot sa usa ka saad.”​—Galacia 3:16, 29.

¹² Gipadayag usab ni Jehova nga si Kristo, ang Binhi, magagikan sa harianong kaliwatan ni Juda ug kaniya “ang pagkamasinugtanon sa mga katawhan maiya.” (Genesis 49:10) Mahitungod kang Haring David sa tribo ni Juda, si Jehova misaad: “Sa pagkamatuod akong pagatukoron ang iyang binhi sa walay kataposan ug ang iyang trono ingon sa mga adlaw sa langit. Ang iyang binhi mismo mapamatud-ang mao bisan sa panahong walay tino, ug ang iyang trono ingon sa adlaw sa akong atubangan.” (Salmo 89:3, 4, 29, 36) Sa dihang ang manulondang Gabriel nagpahibalo sa pagkatawo ni Jesus, iyang gipatin-aw nga ang bata mao ang tinudlo sa Diyos nga Magmamando, ang Binhi ni David. “Kini siya mahimong dako ug pagatawgong Anak sa Labing Hataas,” miingon si Gabriel, “ug igahatag ni Jehova nga Diyos kaniya ang trono ni David nga iyang amahan, . . . ug walay kataposan ang iyang gingharian.”​—Lucas 1:32, 33; Isaias 9:6, 7; Daniel 7:13, 14.

13. Aron madawat ang panalangin ni Jehova, kinahanglang unsay atong sanong ngadto sa iyang pagtulon-an?

¹³ Aron madawat ang panalangin ni Jehova, kinahanglang kita masayod ug molihok sumala niining hinungdanong pagtulon-an mahitungod sa Gingharian sa Diyos. Kinahanglang motuo kita nga si Jesus nanaog gikan sa langit, nga siya mao ang tinudlo sa Diyos nga Hari​—ang harianong Binhi nga maoy magdumala sa pagpasig-uli sa Paraiso sa yuta​—ug nga iyang banhawon ang mga patay. (Lucas 23:42, 43; Juan 18:33-37) Sa Capernaum sa dihang si Jesus naghisgot sa pagbanhaw sa mga patay, nadayag gayod unta ngadto sa mga Hudiyo nga siya nagsulti sa kamatuoran. Aw, pila ra ka semana nga nangagi, lagmit didto mismo sa Capernaum, iyang gibanhaw ang 12-anyos nga anak babaye sa usa ka magdudumalang opisyal sa sinagoga! (Lucas 8:49-56) Seguradong kita usab adunay igong katarongan sa pagtuo ug paglihok nga kaharmoniya sa makapadasig-sa-paglaom nga pagtulon-an ni Jehova mahitungod sa iyang Gingharian!

14, 15. (a) Unsa ka hinungdanon ang Gingharian ni Jehova alang kang Jesus? (b) Unsay kinahanglang atong masabtan ug ikapatin-aw mahitungod sa Gingharian ni Jehova?

¹⁴ Gideboto ni Jesus ang iyang yutan-ong kinabuhi sa pagtudlo mahitungod sa Gingharian ni Jehova. Kana iyang gihimo nga tema sa iyang ministeryo, ug gitudloan gani niya ang iyang mga sumusunod nga iampo kana. (Mateo 6:9, 10; Lucas 4:43) Ang kinaiyanhong mga Hudiyo nahilinya aron mahimong “mga anak sa gingharian,” apan tungod sa kakulang sa pagtuo, ang kadaghanan kanila wala makabaton sa maong pribilehiyo. (Mateo 8:12; 21:43) Gipadayag ni Jesus nga usa lamang ka “gamayng panon” ang makadawat ug pribilehiyo nga mahimong “mga anak sa gingharian.” Ang maong “mga anak” mahimong “kaubang mga manununod ni Kristo” diha sa iyang langitnong Gingharian.​—Lucas 12:32; Mateo 13:38; Roma 8:14-17; Santiago 2:5.

¹⁵ Pila ba ang mga manununod sa gingharian nga dad-on ni Kristo sa langit aron magmando kauban niya ibabaw sa yuta? Usa ka gatos kap-atan ug upat ka libo lamang, sumala sa Bibliya. (Juan 14:2, 3; 2 Timoteo 2:12; Pinadayag 5:10; 14:1-3; 20:4) Apan si Jesus miingon nga siya adunay “ubang mga karnero,” kinsa mahimong yutan-ong mga sakop sa pagmando sa maong Gingharian. Kini sila magpahimulos ug hingpit nga panglawas ug kalinaw sa walay kataposan sa usa ka paraisong yuta. (Juan 10:16; Salmo 37:29; Pinadayag 21:3, 4) Kinahanglang atong masabtan ug ikapatin-aw ang pagtulon-an ni Jehova mahitungod sa Gingharian.

16. Unsang hinungdanong pagtulon-an ni Jehova ang kinahanglang atong makat-onan ug ipadapat?

¹⁶ Si apostol Pablo nagpaila ug laing hinungdanong pagtulon-an ni Jehova. Siya miingon: “Kamo mismo gitudloan sa Diyos sa paghigugma sa usag usa.” (1 Tesalonica 4:9) Aron pahimut-an si Jehova, kinahanglang ipasundayag nato ang maong gugma. “Ang Diyos gugma,” nag-ingon ang Bibliya, ug kinahanglang atong sundogon ang iyang panig-ingnan sa pagpasundayag sa gugma. (1 Juan 4:8; Efeso 5:1, 2) Ikasubo, kadaghanang tawo napakyas gayod sa pagkat-on sa paghigugma sa ilang isigkatawo sumala sa gitudlo kanato sa Diyos nga buhaton. Komosta man kita? Gituman ba nato ang maong pagtulon-an ni Jehova?

17. Kansang tinamdan ang angay natong sundogon?

¹⁷ Hinungdanon nga kita madinawaton sa tanang pagtulon-an ni Jehova. Hinaot ang atong tinamdan mahisama sa iya sa mga salmista sa Bibliya nga misulat: “Ipaila kanako ang imong kaugalingong mga dalan, Oh Jehova; tudloi ako sa imong kaugalingong mga alagianan. Palakta ako sa imong kamatuoran ug tudloi ako.” “Tudloi ako sa imong mga kalagdaan. Tudloi ako sa pagkamaayo, pagkamasinaboton ug kahibalo mismo . . . Tudloi ako sa imong kaugalingong hudisyal nga mga desisyon.” (Salmo 25:4, 5; 119:12, 66, 108) Kon ang imong mga pagbati maoy sama sa iya sa mga salmista, ikaw mahilakip sa usa ka dako kaayong panon nga gitudloan ni Jehova.

Dakong Panon sa mga Tinudloan

18. Unsay gitagna ni propetang Isaias nga mahitabo sa atong panahon?

¹⁸ Si propetang Isaias mitagna kon unsay mahitabo sa atong panahon: “Mahitabo gayod sa kataposang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa mga bukid . . . Ug ang daghang mga katawhan mangadto gayod ug magaingon: ‘Umari, kamong katawhan, ug manungas kita ngadto sa bukid ni Jehova, ngadto sa balay sa Diyos ni Jacob; ug siya magatudlo kanato mahitungod sa iyang mga dalan.’” (Isaias 2:2, 3; Miqueas 4:2) Kinsa ba ang maong mga tawo nga tinudloan ni Jehova?

19. Kinsa karong adlawa ang nalakip niadtong gitudloan ni Jehova?

¹⁹ Sila naglakip sa uban pa gawas niadtong magmando sa langit uban ni Kristo. Sumala sa gipamulong ganina, si Jesus miingon nga siya adunay “ubang mga karnero”​—yutan-ong mga sakop sa Gingharian​—gawas pa sa “gamayng panon” sa mga manununod sa Gingharian. (Juan 10:16; Lucas 12:32) Ang “dakong panon,” nga makalabang-buhi sa “dakong kasakitan,” mao ang ubang mga karnero nga matang, ug pahimuslan nila ang inuyonang baroganan atubangan ni Jehova pinasukad sa ilang pagtuo diha sa giulang dugo ni Jesus. (Pinadayag 7:9, 14) Bisan pag ang ubang mga karnero dili laktud nalakip sa “mga anak” nga gihisgotan sa Isaias 54:13, sila nabulahan tungod kay gitudloan ni Jehova. Busa, tukma nilang gitawag ang Diyos nga “Amahan” tungod kay siya, sa pagkamatuod, mahimong ilang Apohang-Lalaki pinaagi sa “Amahang Dayon,” si Jesu-Kristo.​—Mateo 6:9; Isaias 9:6.

Kon Giunsa Pagtudlo ni Jehova

20. Sa unsang mga paagi si Jehova nagtudlo?

²⁰ Daghang paagi ang pagtudlo ni Jehova. Pananglitan, siya nagtudlo pinaagi sa iyang mga buhat sa kalalangan, nga nagpamatuod sa iyang paglungtad ug sa iyang dakong kinaadman. (Job 12:7-9; Salmo 19:1, 2; Roma 1:20) Dugang pa, siya nagtudlo pinaagig direktang komunikasyon, sama sa iyang gihimo sa pagtudlo sa una-tawhanong Jesus. Sa susama, sa tulo ka natalang okasyon, siya direktang nakigsulti sa mga tawo sa yuta gikan sa langit.​—Mateo 3:17; 17:5; Juan 12:28.

21. Kinsa ang manulonda nga gigamit ilabina ni Jehova ingong iyang hawas, apan sa unsang paagi nahibaloan nato nga gigamit usab ang uban?

²¹ Si Jehova naggamit usab ug mga hawas nga manulonda aron magtudlo, lakip ang iyang Panganay, “ang Pulong.” (Juan 1:1-3) Bisan pag si Jehova makasulti untang direkta ngadto sa iyang hingpit tawhanong anak, si Adan, didto sa tanaman sa Eden, lagmit iyang gigamit ang una-tawhanong Jesus aron mosulti ilis Kaniya. (Genesis 2:16, 17) Kadto siya lagmit mao “ang manulonda sa matuod nga Diyos nga maoy nag-una sa kampo sa Israel” ug mahitungod kaniya si Jehova misugo: “Sunda ang iyang tingog.” (Exodo 14:19; 23:20, 21) Walay duhaduhang ang una-tawhanong Jesus mao usab ang “prinsipe sa panon ni Jehova” nga nagpakita kang Josue aron pagpalig-on kaniya. (Josue 5:14, 15) Gigamit usab ni Jehova ang ubang mga manulonda aron ipahayag ang iyang mga pagtulon-an, sama sa mga gigamit niya aron ihatod ang iyang Kasugoan kang Moises.​—Exodo 20:1; Galacia 3:19; Hebreohanon 2:2, 3.

22. (a) Kinsa sa yuta ang gigamit ni Jehova aron magtudlo? (b) Unsa ang pangunang paagi nga si Jehova nagtudlo sa mga tawo karong adlawa?

²² Dugang pa, gigamit ni Jehova nga Diyos ang tawhanong mga hawas aron pagtudlo. Ang mga ginikanan sa Israel mao ang magtudlo sa ilang mga anak; ang mga propeta, mga saserdote, mga prinsipe, ug mga Levihanon nagtudlo sa Kasugoan ni Jehova ngadto sa nasod. (Deuteronomio 11:18-21; 1 Samuel 12:20-25; 2 Cronicas 17:7-9) Si Jesus mao ang pangunang Tigpamaba sa Diyos sa yuta. (Hebreohanon 1:1, 2) Si Jesus sagad miingon nga ang iyang gitudlo mao sa tukma ang iyang nakat-onan gikan sa Amahan, busa ang iyang mga mamiminaw maoy, sa pagkamatuod, gitudloan ni Jehova. (Juan 7:16; 8:28; 12:49; 14:9, 10) Gipasulat ni Jehova ang iyang mga gipamulong, ug sa atong adlaw siya nagtudlo sa mga tawo sa panguna pinaagi niining dinasig nga Kasulatan.​—Roma 15:4; 2 Timoteo 3:16.

23. Unsang mga pangutanaha ang hisgotan sa sunod artikulo?

²³ Kita nagpuyo gihapon sa hinungdanong kapanahonan, sanglit ang Kasulatan nagsaad nga ‘sa kataposang bahin sa mga adlaw [nga atong ginapuy-an] ang daghang mga katawhan pagatudloan mahitungod sa mga dalan ni Jehova.’ (Isaias 2:2, 3) Sa unsang paagi kining instruksiyona gitagana? Unsay kinahanglang atong buhaton aron makabatog kaayohan gikan, ingon man sa pagpakig-ambit, sa dakong programa sa pagtudlo ni Jehova nga nagpadayon na karon? Hisgotan nato ang maong mga pangutana sa sunod artikulo.

Unsaon Nimo Pagtubag?

◻ Sa unsang paagi si Jehova nahimong Amahan, Magtutudlo, ug Bana?

◻ Unsay gitudlo ni Jehova mahitungod sa “binhi”?

◻ Unsang hinungdanong pagtulon-an sa Diyos ang kinahanglang atong sundon?

◻ Sa unsang paagi si Jehova nagtudlo?

[Hulagway sa panid 10]

Ang pagbanhaw sa anak babaye ni Jairo mitaganag pasikaranan nga motuo sa saad ni Jesus sa pagkabanhaw