Kon Nganong Hinungdanon Kaayo Siya
SULOD sa 2,000 ka tuig na karon, gihatagag dakong pagtagad ang pagkatawo ni Jesus. Sumala sa usa ka doktor sa unang siglo nga si Lucas, ang batan-ong ulay nga ginganlag Maria giingnan sa usa ka manulonda: “Tan-awa! ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus.” Unsay giingon sa manulondang mensahero bahin kang Jesus? “Kini siya mahimong bantogan ug pagatawgong Anak sa Labing Hataas,” matod niya. “Magamando siya [si Jesus] ingon nga hari,” ug “walay pagkatapos ang iyang gingharian.”—Lucas 1:31-33.
Segurado nga mao kanay gikinahanglan sa katawhan—usa ka matarong nga magmamando sa kalibotan nga magdumala sa mga kalihokan sa yuta sa mahigugmaong paagi! Sa pagkatinuod, dugay pa una matawo si Jesus, ang Bibliya nagtagna: “Adunay usa ka bata nga natawo alang kanato, adunay usa ka anak nga lalaki nga gihatag kanato; ug ang kagamhanan mahipatong sa iyang abaga. Ug siya pagatawgong . . . Amahang Walay Kataposan, Prinsipe sa Pakigdait. Sa kadagaya sa iyang kagamhanan ug sa pakigdait walay kataposan.”—Isaias 9:6, 7, New International Version.
Usa ka matarong nga kagamhanan ug pakigdait—pagkanindot nga palaaboton! Apan matikdi nga kini nga kagamhanan gitagna nga mahipatong sa abaga sa usa ka prinsipe—ang “Prinsipe sa Pakigdait”—nga nagpadayag nga ang Hari ibabaw sa tanan, ang Labing Gamhanang Diyos, nagpiyal sa maong pagmando ngadto sa Iyang Anak. Busa sublisubling gitawag ni Jesus kini nga kagamhanan, diin siyay mahimong Magmamando, nga “gingharian sa Diyos.”—Lucas 9:27, 60, 62.
Sa sayong bahin sa iyang ministeryo si Jesus miingon: “Kinahanglan nga . . . ipahayag ko ang maayong balita sa gingharian sa Diyos, tungod kay alang niini gipadala ako.” (Lucas 4:43) Gitudloan pa gani ni Jesus ang iyang mga sumusunod sa pag-ampo nga moanhi ang Gingharian sa Diyos. (Mateo 6:9, 10) Ang magasing Christianity and Crisis nag-ingon nga “ang Gingharian mao ang pangunang tema sa pagpanudlo [ni Jesus],” nga midugang: “Walay laing ulohan nga kanunay niyang gihunahuna o nahimong dugokan sa iyang mensahe. Kini gihisgotan ug kapin sa usa ka gatos ka beses diha sa mga asoy sa mga Ebanghelyo.”
Mga Pangutana nga Angayng Konsiderahon
Unsay imong hunahuna kang Jesus karon? Kasagaran niining panahona sa tuig, siya gihulagway ingong masuso nga anaa sa pasungan. Ug tinuod nga sa makadiyot siya usa ka walay-mahimong masuso. (Lucas 2:15-20) Apan angay ba nga mao kanay pangunang hinumdoman nato bahin kaniya? Hunahunaa ra kini, Nganong gipakatawo man si Jesus? Sa pagkatinuod, kinsa siya?
“Si Jesus ba Anak sa Diyos, ang gisaad nga Mesiyas diha sa Hebreohanong Bibliya?” nangutana ang Encarta Yearbook sa 1996. “O siya ba usa lamang ka tawo, usa ka talagsaong tawo tingali, apan tawo ra gihapon?” Ang maong mga pangutana takos pamalandongon. Ngano? Tungod kay ang ato mismong kinabuhi ug kalipay nagdepende sa kon unsay atong paglantaw ug pagtratar kang Jesus. “Siya nga magpasundayag ug pagtuo sa Anak adunay kinabuhing walay kataposan,” nag-ingon ang Bibliya, apan “siya nga dili mosugot sa Anak dili makakita sa kinabuhi.”—Juan 3:36.
Dili Ordinaryong Tawo
Human hubita ang mga kalihokan ni Jesus diha sa templo sa Jerusalem sa dihang siya 12 anyos, ang Bibliya nag-ingon nga siya mipauli uban kang Maria ug sa bana niini nga si Jose, ug “[si Jesus] nagpadayon sa pagpasakop kanila.” (Lucas 2:51, 52) Apan sa dihang nahingkod na si Jesus, naklaro na nga siya dili usa ka ordinaryong tawo.
Sa dihang gipalinaw ni Jesus ang dagat nga gikusokuso sa bagyo, usa ka higala nga nahadlok ang mipatugbaw: “Kinsa ba gayod kini siya?” (Marcos 4:41) Sa ngadtongadto, si Jesus gitugyan ngadto sa Romanong Gobernador Poncio Pilato tungod sa bakak nga mga sumbong. Tungod kay nakaseguro siya nga inosente si Jesus ug natandog siya sa dignidad ni Jesus bisan pa sa linuog, dili-makataronganong pagtratar, agig pagdayeg gipresentar ni Pilato si Jesus ngadto sa mga panon sa katawhan, nga mipatugbaw: “Tan-awa! Ang tawo!” Apan ang mga Hudiyo mitubag: “Kami adunay usa ka balaod, ug sumala sa balaod angay siyang mamatay, tungod kay gihimo niya ang iyang kaugalingon nga anak sa Diyos.”—Juan 19:4-7.
Sa dihang nadungog ni Pilato nga gitawag si Jesus ug “anak sa Diyos,” nahadlok siya. Sayosayo pa, gipahibalo siya sa damgo sa iyang asawa bahin kang Jesus, nga gitawag niini ug “tawong matarong.” (Mateo 27:19) Busa naghunahuna si Pilato kon kinsa ba gayod si Jesus! Bisan tuod nahibaloan niya nga si Jesus taga-Galilea, si Pilato nangutana: “Diin ka ba gikan?” Sa dihang wala motubag si Jesus, sa wala madugay nahunong ang kabildohay.—Juan 19:9, 10.
Klaro nga si Jesus usa ka tawo kanhi, apan siya dili sama sa ubang mga tawo sa pagkaagi nga una pa mahimong tawo siya usa ka espiritung persona, nga nailhan sa langit ingong ang Pulong. Unya ang iyang kinabuhi milagrosong gibalhin sa Diyos ngadto sa tagoangkan ni Maria. “Ang Pulong nahimong unod,” nagpamatuod si Juan, “ug mipuyo sa atong taliwala.”—Juan 1:1, 2, 14, 18; Pinadayag 3:14.
Kon Nganong Gikinahanglan nga Ipadala sa Diyos ang Iyang Anak sa Yuta
Sa wala pa makabatog mga anak ang unang tawo nga si Adan, siya nakasala. Ang usa ka rebeldeng manulonda, nga gitawag sa ulahi ug Yawa ug Satanas, milampos sa pag-aghat kaniya sa pagsupak sa Diyos. Tungod niini, nawala ni Adan ang iyang relasyon ingong anak sa Diyos, nga maoy giingon sa Diyos nga mahitabo kon siya mosupak. Busa, giantos ni Adan ang mga sangpotanan. Siya nahimong dili hingpit, natigulang, ug sa ngadtongadto namatay.—Genesis 2:15-17; 3:17-19; Pinadayag 12:9.
Naghubit sa epekto sa pagsupak ni Adan kanatong tanan nga iyang mga kaliwat, ang Bibliya nagpatin-aw: “Ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Ikasubo nga kitang tanan nakapanunod sa sala gikan sa atong katigulangan nga si Adan, apil na ang makapasubong mga sangpotanan niini, nga mao ang pagkatigulang ug kamatayon.—Job 14:4; Roma 3:23.
Aron mahigawas nianang maong mga sangpotanan, kinahanglang mabatonan ang usa ka hingpit nga amahan, usa nga wala makapanunod sa sala ug sa makalilisang nga mga epekto niini. Tagda kon sa unsang paagi gitagana kanang bag-ong amahan, nga susama sa hingpit nga si Adan.
Gitagana ang Usa nga Gikinahanglan
Sa imong mahinumdoman, ang gisaad nga “Prinsipe sa Pakigdait” gitawag usab ug “Amahang Walay Kataposan.” (NIV) Ang pagpakatawo kaniya gitagna niining paagiha: “Ang usa ka dalaga [ulay, NIV] magmabdos, ug siya manganak ug usa ka anak nga lalaki.” (Isaias 7:14; Mateo 1:20-23) Si Jesus walay tawhanong amahan, mao man usab si Adan, ang unang tawo. Sa pagsubay sa kagikan ni Jesus ngadto sa sinugdanan sa kasaysayan sa tawo, gipakita sa historyanong si Lucas nga si Adan milungtad ingong “anak sa Diyos.” (Lucas 3:38) Apan, sa ato nang nasayran, nawala ni Adan kanang maong relasyon ingong anak sa Diyos—alang sa iyang kaugalingon ug sa tanan niyang kaliwat. Busa kitang tanan nagkinahanglan, ingnon ta, ug usa ka bag-ong amahan nga hingpit—usa nga sama kang Adan sa dihang gilalang kini.
Gipadala sa Diyos ang iyang Anak gikan sa langit aron mahimong bag-ong Adan nga mopuli sa una. Ang Bibliya nag-ingon: “‘Ang unang tawo nga si Adan nahimong buhing kalag.’ Ang kataposang Adan nahimong nagahatag-kinabuhi nga espiritu. Ang unang tawo gikan sa yuta ug hinimo sa abog; ang ikaduhang tawo gikan sa langit.” (1 Corinto 15:45, 47) Si Jesus, “ang kataposang Adan,” sama sa “unang tawo nga si Adan” sa pagkaagi nga Siya usa ka hingpit nga tawo, nga may katakos sa pagpatunghag hingpit nga mga anak, nga mahimong mabuhi sa walay kataposan sa kahingpitan dinhi sa yuta.—Salmo 37:29; Pinadayag 21:3, 4.
Si Jesus, nga walay anak, nagmatinumanon sa Diyos hangtod sa iyang kamatayon, bisan pa sa tanang pag-atake ni Satanas. Ang hingpit nga tawhanong kinabuhi nga may integridad nga gihalad, o gisakripisyo ni Jesus, gitawag ug lukat. “Atong nabatonan ang kagawasan [gikan sa sala ug kamatayon nga napanunod kang Adan] pinaagi sa lukat pinaagi sa iyang [Jesus] dugo,” nagpatin-aw ang Bibliya. Kini miingon usab: “Ingon nga pinaagi sa pagkadili-masinugtanon [ni Adan] daghan ang nahimong makasasala, sa ingon usab pinaagi sa pagkamasinugtanon [ni Jesus] daghan ang mahimong matarong.”—Efeso 1:7; Roma 5:18, 19; Mateo 20:28.
Kon kita magpasundayag ug pagtuo kang Jesus, siya mahimong atong “Amahang Walay Kataposan” ug atong “Manluluwas.” Iyang ipatuman ang iyang prinsipenhong pagmando sa kahibulongang paagi samtang siya mag-alagad ingong Magmamando sa Gingharian sa iyang Amahan. Susihon nato sa sunod artikulo kon sama sa unsa ang pagkinabuhi ilalom nianang maong pagmando ug konsiderahon nato kon kanus-a nato matagamtam kanang maanindot nga mga panalangin.—Lucas 2:8-11.
[Mga hulagway sa panid 5]
Unsay imong hunahuna kang Jesus karon?
[Hulagway sa panid 6]
Nganong si Jesus gitawag ug “kataposang Adan”?