KARAAN SA MGA ADLAW

Usa ka hubad sa Aramaikong ekspresyon nga ʽat·tiqʹ yoh·minʹ, nga nagpaila sa “usa nga taas na (o tigulang) ug panuigon.” Kini nga titulo ni Jehova makita lamang sa Daniel 7:​9, 13, ug 22 ug gigamit nga pulipuli uban sa titulo nga “Supremong Usa.” (Dan 7:​18, 22, 25, 27) Ang esena maoy usa ka korte diin ang Karaan sa mga Adlaw milingkod aron sa paghukom sa mga gahom sa kalibotan, nga gihubit pinaagig mga simbolo sa dagkong mga mananap. Ang gitugot kanila nga pagmando ibabaw sa yuta gikuha gikan kanila, ug ang “pagmando ug dignidad ug gingharian” gihatag ngadto sa usa nga “sama sa anak sa tawo” nga kaniya ang tanang katawhan gisugo nga magmasinugtanon.​—Dan 7:​10-14.

Ang titulo nga “Karaan sa mga Adlaw” haom nga nagpalahi sa walay kataposang Diyos gikan sa sunodsunod nga mga gahom sa kalibotan nga mitungha ug nahanaw, ug kini naglarawan kang Jehova diha sa iyang papel ingong halangdon ug talahoron kaayong Maghuhukom sa tanan.​—Sal 90:2; 75:7.