Ang Pagmando sa Kalibotan Nagakausab

KON papilion ka, unsang matanga sa kagamhanan ang imong gusto nga ikaw magkinabuhi? Ang kadaghanan kanato tingali mopili ug malig-ong kagamhanan nga mohatag ug igong personal nga kagawasan. Gusto kitag kagamhanan nga makakontrolar sa krimen, makapalambo sa kalinaw, makapausbaw sa hustisya sa katilingban, ug makaugmad ug materyal nga kauswagan. Siyempre, gusto kitag kagamhanan nga dili malupigon o daotan.

Makasubo, ang kadaghanang mga kagamhanan dili sama niini. Kon atong palandongon ang kalibotan sa kahimtang niini sa ulahing bahin niining ika-20ng siglo, unsay atong nakita? Ang kakabos, pagkadunot, kawalad-on, panglupig, inhustisya sa katilingban, krimen, ug internasyonal nga tensiyon. Kini maoy gisangpotan sa libolibong mga tuig sa tawhanong kagamhanan.

Tinuod, ang pipila ka indibiduwal nga mga magmamando makataronganon ug may katakos. Ug ang ubang mga sistema sa kagamhanan may igong kalig-on ug epektibo sa usa ka higayon. Apan ang kapakyasan sa kagamhanan sa tawo sa katibuk-an sa pagbuhat nga sa kinaiyanhon atong gibating angay himoon niini alang sa katawhan nagapamatuod sa kamatuoran sa pulong sa Bibliya: “Ang dalan sa tawo wala diha sa iyang kaugalingon. Kini wala sa tawo nga molakaw aron sa pagtultol sa iyang mga lakang.” (Jeremias 10:23) Sa laing pagkasulti, ang tawo wala lalanga sa pagmando sa iyang kaugalingon nga walay tabang sa gawas.

Maoy hinungdan nga maayong masayran nga ang pagmando sa kalibotan nagakausab. Unsay buot namong ipasabot niining ekspresyona? Ang among buot ipasabot mao nga ang adlaw-adlaw nga pagmando sa mga kinabuhi sa katawhan sa dili madugay modangat sa mga kamot sa usa ka bug-os nga porma sa kagamhanan nga bug-os malamposon. Kining radikal nga kausaban sa kagamhanan gitagna sa Diyos. Sa pagkatinuod, mao gayod kini ang mismong tema sa Bibliya.

Ang Pagtagad sa Diyos Bahin sa Kagamhanan

Ang Diyos nagatagad sa tanang panahon bahin sa kagamhanan sa katawhan. Iyang gibantayan pag-ayo ang sukod nga matuman sa tawhanong mga kagamhanan ang ilang responsibilidad, ug usahay iyang panubagon sila. Sa pagkatinuod, ang mga kasaysayan sa pipila ka tagsaong mga sistema sa kagamhanan sa miaging 2,500 ka tuig sa kasaysayan gitagna sa Bibliya. Diha sa basahon ni Daniel, nga gisulat kapin sa 500 ka tuig sa wala pa matawo si Kristo, ang mga tagna girekord nga nagtagna sa pagkapukan sa karaang Babilonya, ug sa pagtungha ug sa pagkapukan sa Medo-Persia, Gresya, ug Roma. Gitagna pa gani ang kaugmaran sa Anglo-Amerikanong Gahom sa Kalibotan sa atong adlaw. Ang mubong paghisgot sa pipila niining mga tagnaa makatabang kanato sa pagsabot kon unsay kahulogan sa mga pulong nga ang pagmando sa kalibotan nagakausab.

Ang una niining katingalahang mga tagna maoy usa ka dinasig nga damgo nga diin ang politikal nga mga gahom sa kalibotan gikan sa mga adlaw ni Daniel hangtod sa atong panahon gihulagwayan sa dakong larawan. Dayon, usa ka bato nga gisapsap, dili pinaagi sa mga kamot, mihapak ug midugmok niini nga larawan. Gipulpog sa bato kining mga gahom sa kalibotan, “sama sa tahop gikan sa giukanan sa panahon sa ting-init, ug sila gipadpad sa hangin nga sa ingon walay nabiling lama pa kanila.”—Daniel 2:31-43.

Ang mao gihapong kapitulo sa Daniel nagbatbat kon unsay kahulogan niini. Kini nagpakita nga ang nangapakyas nga mga kagamhanan sa tawo pulihan sa usa ka kagamhanan nga mas labaw. Kini nagapahibalo kanato: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gahom niana dili mahibilin sa lain nga katawhan. Kini magadugmok ug magaut-ut niining tanang [tawhanong] mga gingharian, ug kini molungtad sa walay kataposan . . . Ug ang damgo matuod, ug ang kahulogan dili kaduhaduhaan.”—Daniel 2:44, 45.

Apan dili kana ang kataposan bahin ning butanga. Diha sa ikaduhang panan-awon, ang nagsunodsunod nga mga gahom sa kalibotan gihulagwayan sa mga dagkong mananap nga may kinaiyahan sa gahom nga gihawasan niana. Si Daniel gitugotan sa pagkakita hangtod sa kahitas-an sa makalilisang nga trono sa langit sa “Tigulang sa mga Adlaw,” ug siya gipakitaan ug usa ka butang nga mahitabo, dili sa iyang mga adlaw, kondili sa panahon sa pagmando sa Anglo-Amerikanong Gahom sa Kalibotan sa atong panahon. Iyang nakita ang hamiling langitnong Hukmanan ni Jehova sa langit nga naglingkod sa paghukom niining mga gahom sa kalibotan. (Daniel 7:2-12) Sumala sa gipakita sa sunod nga mga bersikulo, ang balaod sa Diyos giluwat sa pagbag-o sa pagmando. Ngadto kang kinsa gihatag kining maong pagmando?

Sa Usa nga Sama sa Anak sa Tawo

Si Daniel mihatag ug makapaukyab nga tubag:

“Nakita ko diha sa panan-awon sa kagabhion, ug ania karon! may usa nga miabot uban sa mga panganod sa langit nga sama sa anak sa tawo; ug siya miduol sa Tigulang sa mga Adlaw, ug ilang gidala siya sa haduol sa Iyang atubangan. Ug may gihatag kaniya nga pagmando ug himaya ug gingharian, aron ang tanang mga katawhan, mga nasod, ug mga pinulongan manag-alagad kaniya. Ang Iyang pagmando maoy pagmando nga walay kataposan nga dili umalagi, ug ang iyang gingharian dili gayod malumpag.”—Daniel 7:13, 14.

Busa gigamit si Daniel sa pagtagna nga ang “Tigulang sa mga Adlaw,” si Jehova nga Diyos mismo, magapapha sa dili-maayong pagmando sa malupigong mga kagamhanan sa tawo. Iyang pulihan kini sa pagmando sa usa ka kagamhanan nga mas maayo kay sa mahanduraw sa katawhan—usa ka dili makitang Gingharian nga mogamit ug gahom ug awtoridad nga gikan sa langit. Apan kinsa kining “usa nga sama sa anak sa tawo” nga maoy modawat sa Gingharian?

Kita wala hatagig pagduhaduha. Gipaila ni Jesus ang iyang kaugalingon nga mao ang “Anak sa tawo.” Iyang gibatbat ang iyang presensiya ingong panahon sa dihang “ang Anak sa tawo moabot uban sa iyang himaya, ug ang tanang mga manulonda uban kaniya.” (Mateo 25:31) Sa dihang mihangyo ang Hudiyong labaw nga saserdote kang Jesus sa pagsulti sa hukmanan kon siya mao ba “ang Kristo ang Anak sa Diyos,” si Jesus mitubag: “Sumala sa giingon mo, mao ako. Apan sultihan ko kamo nga, Makakita ra unya kamo sa Anak sa tawo nga magalingkod sa tuo nga kamot sa gahom ug magaanhi nga sinapwang sa mga panganod sa langit.”a—Mateo 26:63, 64.

Ang Kataposang Tawhanong Gahom sa Kalibotan

Duolan sa 600 ka tuig human sa mga adlaw ni Daniel, gisulat ni apostol Juan ang basahon sa Bibliya nga Pinadayag ilalom sa pagdasig sa Diyos. Gihisgotan nianang basahona kining mga gahom sa kalibotan ingong gamhanang “mga hari,” nga nagaingon: “Ug adunay pito ka hari: ang lima kanila nangapukan na, ang usa mao siya karon, ug ang usa wala pa moabot, nga sa moabot na siya kinahanglang magapabilin lamag siyag makadiyot.”—Pinadayag 17:10.

Ang lima nga nangapukan na sa dihang gisulat ni Juan kini mao ang Ehipto, Asirya, Babilonya, Medo-Persia, ug Gresya. Ang Imperyo sa Roma ‘siya mao niadto.’ Sa matin-aw, ang ikapito, ang Anglo-Amerikanong Gahom sa kalibotan sa atong panahon, wala pa moabot. Sumala sa Pinadayag, wala nay gahom sa kalibotan nga mosunod sa ikapito—ang usa nga naglungtad karon. Kini mao ang kataposan. Wala nay mosunod pa niini.

Apan, dili kana angay makapalisang sa hunahuna—makalipay hinoon kini! Kini nagkahulogan nga ang daotan, nag-awayay nga pagmando sa tawo haduol na sa iyang kataposan. Nagkahiusa ang mga tagna sa paghisgot bahin usa ka halandomong kausaban sa paagi sa pagmando sa kalibotan—usa ka kausaban gikan sa hakog nga kagamhanan sa tawo ngadto sa usa ka matarong langitnong kagamhanan, ang Gingharian sa Diyos.

Ang Kagamhanan sa Gingharian

Apan unsa kana nga Gingharian? Labaw pa kini kay sa usa lamang ka impluwensiya sa kaayohan diha sa mga kasingkasing ug sa mga kinabuhi sa mga tawo. Labaw pa usab kini sa kinabuhi sa gitawag nga Kristohanong iglesya. Ang Gingharian sa Diyos maoy usa ka tinuod nga kagamhanan. Kini dunay hari, kaubang mga magmamando, teritoryo, ug mga ginsakopan. Ug ipatungha niini ang katingalahang mga panalangin nga gihisgotan sa sinugdan.

Gipaila si Jesus nga mao ang Hari sa Gingharian. Iyang gipaamgid ang iyang kaugalingon sa usa ka tawo nga may hamiling kagikan kinsa “mipanaw sa halayong yuta aron sa pagdawat ug harianong gahom alang sa iyang kaugalingon ug sa pagpauli tapos niini.” Bahin nianang umaabot nga panahon siya miingon: “Inig-abot sa Anak sa tawo uban sa iyang himaya, ug ang tanang mga manulonda uban kaniya, siya molingkod diha sa iyang mahimayaong trono.”—Lucas 19:12; Mateo 25:31.

Kanus-a moabot “ang Anak sa tawo”? Dili na kinahanglang tag-anon pa nato ang tubag. Ang mga pulong ni Jesus dinhi maoy bahin sa iyang tubag sa pangutana: “Unsa may ilhanan sa imong presensiya ug sa konklusyon sa sistema sa mga butang?” (Mateo 24:3, 30) Sumala sa ginapakita kanunay sa mga tudling niining magasina, kanang “presensiya” nagsugod nga dili-makita sa langit sa kataposan sa “tinudlong mga panahon sa kanasoran” sa 1914.b—Lucas 21:24.

Sumala sa gihisgotan sa Pinadayag kapitulo 12 nga maoy mahitabo, gikuha ni Jesus ang iyang gahom ug gitambog si Satanas gikan sa langit dinhi sa yuta. Ang usa ka tingog sa langit nag-ingon: “Karon nahiabot na ang kaluwasan ug ang gahom ug ang gingharian sa atong Diyos ug ang pagbulot-an sa iyang Kristo, kay gikatambog na ang magsusumbong batok sa atong kaigsoonan.” Kini ang nakaingon sa nagakagrabeng mga kahimtang sa kalibotan sukad niadtong panahona. Busa, ang tingog sa langit mipadayon: “Alaot ang yuta ug ang dagat, kay diha kaninyo nahilusad ang Yawa, nga puno sa dakong kapungot, sanglit nasayod man siya nga hamubo na lamang ang iyang panahon.”—Pinadayag 12:9-12.

Kanang hamubong panahon sa dili madugay matapos na. Diha sa pipila ka ulahing mga kapitulo, ang gihimayang Jesus nakita nga nagkabayo sa puting kabayo. Siya gitawag nga mao “Ang Pulong sa Diyos,” ug iyang “tigbason ang kanasoran” ug “magabantay kanila pinaagi sa olisi nga puthaw”—sama sa gipakita ni Daniel nga pagalaglagon ang kanasoran sa samag-bato nga Gingharian sa Diyos nga motubo ug molukop sa tibuok yuta.—Pinadayag 19: 11-16; Daniel 2:34, 35, 44, 45.

Dili na gayod lupigon pa sa samag-mananap nga tawhanong politikal nga mga gahom ang katawhan!

Kaubang mga Magmamando

Apan dunay daghan pa. Gidasig si Daniel sa pagsulti nga ang Gingharian ihatag dili sa “usa nga sama sa anak sa tawo” lamang kondili ngadto “sa katawhan nga mao ang mga balaan sa Halangdon Uyamot.”—Daniel 7:27.

Kinsa sila? Ang Pinadayag naghisgot bahin sa Kordero, si Jesu-Kristo: “Gilukat mo ang mga tawo alang sa Diyos gikan sa tanang kabanayan ug pinulongan ug katawhan ug kanasoran, ug gihimo mo sila nga usa ka gingharian ug mga saserdote ngadto sa atong Diyos ug sila magahari sa ibabaw sa yuta.” Kini dugang nag-ingon nga sila mahimong “mga saserdote sa Diyos ug ni Kristo, ug uban kaniya magahari sila sa usa ka libo ka tuig.” Ang ilang gidaghanon maoy 144,000.—Pinadayag 5:9, 10; 14:1; 20:6.

Kini sila mao ang gipili sa Labing Hataas nga Diyos aron makaambit sa kagamhanan sa kalibotan uban sa iyang Anak, si Jesu-Kristo. Ang atong kaugmaon mabutang pa ba sa mas luwas nga kahimtang kay sa nianang gipili sa Diyos? Dili, kini nga Gingharian mao ang labing posibleng kagamhanan—nga mas superyor kay sa nailhan sa tawo. Ilalom sa pagmando niini ang tibuok yuta himoong Paraiso nga maoy katuyoan sa Diyos sa sinugdan.

Basaha ang sunod nga artikulo ug tan-awa kon kini bang matanga sa kagamhanan nga imong pilion nga ikaw magpuyo.

[Mga footnote]

[Kahon sa panid 4]

“Ang Dugokang Tema sa Pagtulon-an ni Jesus”

“Ang tema sa gingharian sa Diyos mao ang dugokang tema sa pagwali ni Jesus.”—New Catholic Encyclopedia.

“[Ang Gingharian sa Diyos] sa katibuk-an giisip nga mao ang dugokang tema sa pagtulon-an ni Jesus”—Encyclopaedta Britannica.

Apan kanus-a pa nga nadunggan nimo ang “dugokang tema sa pagtulon-an ni Jesus” nga gihisgotan diha sa simbahan?

[Kahon sa panid 5]

Kalibog Bahin sa Gingharian sa Diyos

Ang ubang mga tawo naghunahuna nga “ang iglesya sa yuta” mao ang Gingharian sa Diyos, samtang ang uban nagtuo nga ang kalibotan karong panahona “mougmad ilalom sa Kristohanong impluwensiya hangtod nga mahimo kini nga Gingharian.” Ang uban nag-ingon nga ang Gingharian sa Diyos mao ang “pagmando sa Diyos diha sa kasingkasing ug kinabuhi sa indibiduwal.”

Apan mao ba lamang kini ang Gingharian sa Diyos—usa ka relihiyosong sistema, anam-anam nga politikal nga kausaban, o usa ka espirituwal nga kahimtang diha sa mga kasingkasing sa mga tawo?