Usa ka Kausaban sa Pagmando—Sa Dili Madugay!

GIKALIMTAN sa kadaghanang tawo ang butang nga labing hinungdanon. Mao kini: Sa ilang pag-ilogay sa pagmando sa kalibotan, ang nag-indigay nga mga nasod napakyas sa pag-ila nga adunay mas dakong awtoridad ug gahom kay kanila. Ilang gikalimtan ang kamatuoran nga “ang Labing Gamhanan mao ang Magmamando” sa gingharian sa katawhan, ug ngadto sa usa nga iyang hing-uyonan nga hatagan niana.” (Daniel 4:25) Kinsa kining usa nga gipili sa Labing Makagagahom nga Diyos ingong Hari sa ibabaw sa tibuok yuta? Kanus-a niya madawat ang pagmando sa kalibotan?

Lain Gihapon nga Hari

Sa wala pa managna bahin sa ‘hari sa amihanan ug sa hari sa habagatan,’ may matagnaong panan-awon si Daniel mahitungod sa piniling hari sa Diyos: “Uban sa mga panganod sa langit may usa nga miabot nga sama sa anak sa tawo; ug siya miduol ngadto sa Tigulang sa mga Adlaw [Jehova nga Diyos] . . . Ug may gihatag kaniya nga pagmando ug himaya ug gingharian, aron ang tanang katawhan, mga nasod ug mga pinulongan tanan manag-alagad kaniya. Ang iyang pagmando . . . dili umalagi ug ang iyang gingharian . . . dili gayod mapukan.”​—Daniel 7:13, 14.

Kanang panan-awona naglarawan sa sunodsunod nga mga kagamhanan sa kalibotan ingong mga mananap. Ug, sa pagkatinuod, “ang tawo nagamando sa tawo alang sa iyang kadaotan” nga samag mananap nga kabangisan. (Ecclesiastes 8:9) Ang mga tawo nailalom usab sa pagmando sa mananapong pagkontrolar sa maalsahong espirituhanong mga prinsipe, diin ang ilang pangulo mao si Satanas mismo. (Daniel 7:17; 10:13; itandi sa Pinadayag 12:9; 13:2-4.) Sa kasukwahi, “may usa nga sama sa anak sa tawo” nga nakadawat sa gahom sa pagmando gikan kang Jehova nga Diyos. Kining tinudlo sa Diyos nga magmamando may mga hiyas nga angay alang sa usa ka magmamando sa tawo nga sa sinugdan gihimo “sa dagway sa Diyos.” (Genesis 1:27) Apan kinsa siya?

Giaplikar ni Jesus ang terminong “Anak sa tawo” sa iyang kaugalingon dihang dinhi pa siya sa yuta sa 1,900 ka tuig kanhi. Sanglit tawo niadtong panahona, siya sa literal maoy usa ka “anak sa tawo,” ug hingpit niyang gipakita ang maayong mga hiyas, sama sa gugma, kahangawa, ug hustisya. Iyang gihatag usab ang iyang kinabuhi sa paglukat sa katawhan, busa nagtuman sa papel ingong labing suod nga paryente sa tawo​—nga tinuod nga “Anak sa tawo.”​—Mateo 20:28; Hebreohanon 2:11-17.

Dugang gipadapat ang tagna ni Daniel, si Jesus miingon: “Ilang makita ang Anak sa tawo nga moabot nga sinapwang sa mga panganod sa langit uban ang kagahom ug dakong himaya.” Iyang gihulagway ang iyang kaugalingon sa samang larawan, sa pag-ingon: “Inig-abot na sa Anak sa tawo diha ang iyang himaya, . . . molingkod siya sa iyang mahimayaong trono.” (Mateo 24:30; 25:31) Karon si Jesus dili kay usa ka yanong tawo sa yuta. Sukad sa iyang kamatayon ug pagkabanhaw sa 33 K.P., usa na siya ka langitnong espiritu sa dagway sa Diyos. Lahi sa tawhanong mga magmamando, siya lamang ang bugtong Hari nga “dili mamatay, nga nagpuyo sa kahayag nga dili maduol, nga wala makita ug dili arang makita sa tawo.” (1 Timoteo 6:16) Ang Iyang pagmando sa Gingharian dili makabaton ug samag mananapong mga hiyas sa daotang mga espiritu nga nagaimpluwensiya sa tawhanong mga kagamhanan.

Busa si Jesus lamang ang bugtong Hari nga tinudlo sa Diyos ingong Iyang Mesiyas, kun Kristo, ug gihatagag gahom sa pagmando sa tibuok yuta. (Daniel 7:14) Kini nagkahulogan nga ang tanang tawhanong mga kagamhanan, lakip sa “hari sa amihanan” ug sa “hari sa habagatan,” moabot sa ilang kataposan ug pulihan sa Gingharian sa Diyos ilalom sa pagmando ni Kristo.​—Daniel 2:44; itandi sa Salmo 2:7, 8, 12.

“Ang Dakong Prinsipe” Nagagahom Na

Apan, si Jesus wala magsugod sa iyang pagmando ibabaw sa katawhan sa 33 K.P. Naghulat siya ug panahon. Dihang natapos kini gihatagan siyag gahom ni Jehova sa “paghari sa taliwala sa [iyang] mga kaaway.” (Salmo 110:1, 2; Buhat 2:32-36) Nagtagna niini, si Daniel miingon: “Niadtong panahona si Miguel motindog, ang dakong prinsipe . . . Ug moabot ang usa ka panahon sa kasamok nga ang ingon wala pa gayod mahitabo sukad nga may usa ka nasod bisan hangtod nianang mao nga panahon.”​—Daniel 12:1.

Kining tagnaa gisundan sa pagpadayag ni Daniel nga ang pag-ilogay sa “hari sa amihanan” ug sa “hari sa habagatan” sa “panahon sa kataposan” karon haduol na sa kinatayuktokan niini. Ning yugtoa, ang usa niining ‘mga haria’ “moadto uban ang dakong kapungot” aron sa paglaglag sa daghang mga tawo. (Daniel 11:40, 44, 45) Nianang panahona si Miguel “nga nagtindog alang sa” kaugalingong katawhan sa Diyos molihok nga mahukmanon aron dili sila makaikyas.​—Itandi sa Daniel 11:2, 3, 7, 20, 21; 12:1.

Apan, sa unsang paagi nalangkit si Jesus niini? Hinumdomi nga iyang gilakip ang tagna ni Daniel uban sa iyaha nga nagpadayag sa iyang kaugalingon ingong Hari sa umaabot. Niining bahina naghisgot usab siya bahin sa usa ka dili hitupngang “dakong kasakitan.” (Mateo 24:21, 29-31) Tin-aw niyang gipasabot ang “panahon sa kasamok” nga gihisgotan ni Daniel maylabot kang Miguel. (Itandi sa Mateo 24:15; Daniel 11:31.) Busa si Jesus nagpaila sa iyang kaugalingon nga mao si Miguel nga motindog aron sa pagmando.

Si Jesus ug si Daniel mihatag niining mga tagnaa sa ilang mga pagbatbat sa mga hitabo sa “panahon sa kataposan.” Kining mga hitaboa tagsaong natuman sukad sa 1914. Niadtong panahona misugod sa paggahom si Jesus sa langit ingong Hari, ug siya nagmando na sa taliwala sa iyang mga kaaway.​—Mateo 24:3, 7-12.

Tibuok-Yutang Paraiso—Sa Dili Madugay!

Tingali nahibalo ka nga napakyas ang mga nasod sa pag-ila sa Gingharian ni Kristo. Ilang gisalikway ang balita bahin sa pagtukod niini ug nagpadayon sa paglaban sa ilang kaugalingong mga kaharian. Kanang maong balita binuang alang kanila. Busa “walay usa sa mga magmamando niining sistemaha sa mga butang ang nakadangat sa pagkahibalo” sa kaalam sa Diyos sa pagpili kang Kristo ingong Hari. Nabutaan sa sistema nga gimandoan ni Satanas ug sa iyang rebelyosong mga prinsipeng espirituhanon, ilang nakita ang ilang kaugalingon nga nagabatok sa Mesiyanikong Gingharian.​—1 Corinto 2:8; itandi sa Lucas 4:5, 6; 2 Corinto 4:4.

Busa, sumala sa gitagna ni Jesus, kadtong matinumanong nagawali sa iyang Gingharian ginalutos. Moagi pa sila ug laing dakong pag-atake. (Mateo 24:9, 14; Daniel 11:44, 45; itandi sa Ezekiel 38:14-16.) Apan, si Jesus, mogula ingong “Hari sa mga hari ug Ginoo sa mga ginoo” sa pagpakiggubat alang sa iyang katawhan. Kining gubata motapos diha sa bug-os nga kadaogan alang sa piniling Hari sa Diyos. Ang mga tig-atake sa iyang katawhan ‘modangat sa ilang kataposan, ug sila walay magtatabang.’ Ang tanang ‘mga hari’ malaglag. ​—Pinadayag 11:15, 18; 19:11, 16, 19-21; Salmo 2:1-3, 6-9.

Nagsugod sa 1914, ang “panahon sa kataposan” dugay nang milabay. Si Jesus miingon nga ang kaliwatan nga nakakita sa sinugdanan niadtong panahona makakita usab sa kataposan niini. (Mateo 24:32-34) Busa, kita, tulin nga nagsingabot nianang mahimayaong panahon dihang si Kristo Jesus sa bug-os mao ang mopuli sa pagmando sa mga kalihokan sa yuta ug hiusahon ang tanang matinumanong katawhan ubos sa iyang usa ka kagamhanan.

Oo, adunay kausaban sa pagmando sa dili madugay. Apan unsay kahulogan niini alang kanimo? Kini mahimong magkahulogan nga ang imong umaabot matapos uban sa presente tawhanong mga kagamhanan ug sa ilang mga tiglaban. O, depende sa imong umaabot nga lihok, mahimong magkahulogan kinig kinabuhing walay kataposan ug kasegurohan diha sa usa ka yutan-ong paraiso, nga palig-onon ug mandoan sa Gingharian sa Diyos. Mapamatud-an kining tinuod kon maunongon kang magpaluyo sa pagmando ni Kristo uban sa minilyong mga Saksi ni Jehova sa tibuok kalibotan.