Balaang mga Panalangin Alang sa “May Panabot”

“Ang mga may panabot modan-ag ingon sa kahayag sa hawan sa kalangitan; ug niadtong nagadala sa daghan sa pagkamatarong, sama sa mga bituon sa panahong walay katinoan, bisan sa walay kataposan.”—DANIEL 12:3.

ANG tagna sa manulonda ngadto kang Daniel nagdala kanato sukad pa gayod sa ikaupat nga siglo W.K.P. hangtod sa Armageddon. Kini nagapakita nga si Miguel mopatunghag pakigdait sa yuta sa bugtong posibleng paagi: pinaagi sa paglaglag sa mga tighulhog sa gubat. Karon, tapos nianang talagsaong pagsusi sa abanteng kasaysayan, ang manulonda nagatagna sa pipila sa tugob nga mga panalangin nga pahimuslan sa katawhan sa Diyos “sa kataposang bahin sa mga adlaw.”​—Daniel 10:14.

Usa ka Panahon sa mga Pagkabanhaw

2. Sa unsang paagi ang pipila nga namatay “nahigmata” panahon sa “kataposang bahin sa mga adlaw”?

² Ang manulonda nagsulti kang Daniel: “Ug daghan niadtong nangatulog sa abog sa yuta mahigmata, kini sila ngadto sa kinabuhing molungtad sa panahong walay katinoan ug kadto sila ngadto sa mga kaulawan ug sa pagkadulumtanan nga molungtad sa panahong walay katinoan.” (Daniel 12:2) Dayag, “ang kataposang bahin sa mga adlaw” maoy usa ka panahon sa mga pagkabanhaw, sa pagbanhaw niadtong “nangatulog sa abog sa yuta.” Usa nianang maong pagkanahigmata nagsugod dayon tapos mahimong hari si Jesus niadtong 1914. (Mateo 24:3) Sa paglantaw nianang panahona, si apostol Pablo misulat: “Kita nga mga buhi nga nabuhi pa hangtod sa presensiya sa Ginoo dili magauna niadtong nangatulog sa kamatayon . . . Kadtong nangamatay nga nahiusa kang Kristo mobangon pag-una.” (1 Tesalonica 4:15, 16; Pinadayag 6:9-11) Nan, dayag nga wala madugay tapos sa 1914 gibanhaw ni Jesus ngadto sa espiritung kinabuhi sa mga langit kadtong sakop sa “Israel sa Diyos” nga nangamatay nang matinumanon. (Galacia 6:16) Alang kanila, ang pagkahigmata maoy hangtod sa “kinabuhing molungtad sa panahong walay katinoan.”

3, 4. Sa unsang paagi ang usa ka pundok sa matinumanong mga alagad sa Diyos nahimong ‘patay’ sa 1918?

³ Apan ang mga pulong sa manulonda pihong nagaapil sa laing pagkabanhaw. Sulod sa mga 40 ka tuig una sa 1914, ang gamayng pundok sa mga Kristohanon nagpasidaan nga kanang tuiga magtimaan sa kataposan sa Hentil nga mga Panahon sumala sa gitagna ni Jesus. (Lucas 21:24) Giinkorporar sa maong mga Kristohanon ang Zion’s Watch Tower Society niadtong 1884, ug ilang gipatik ang sangpotanan sa ilang panukiduki sa Bibliya diha sa usa ka magasing gitawag Zion’s Watch Tower and Herald of Christ’s Presence.

⁴ Niadtong 1914 ang kamatuoran sa ilang mensahe gilig-on sa dramatikanhon sa dihang mibuto ang unang gubat sa kalibotan, ug misugod ang “mga kasakitan” nga gitagna ni Jesus. (Mateo 24:7, 8) Bisan pa niana, gigamit sa ilang relihiyosong mga kaaway ang kaguliyang sa gubat aron sa paglutos kanila hangtod sa kataposan, niadtong 1918, ang ilang buluhaton sa pagwali halos nahunong, ug ang pangunang mga alagad sa Watch Tower Society gibilanggo nga dili makataronganon. Nagpahinabo kadto ug dakong pagmaya sa pipila ka pundok. Kadto nagtuman usab sa tagna nga nahitala sa basahon sa Pinadayag: “Ug sa nakatapos na sila sa ilang pagpamatuod, ang mapintas nga mananap nga mogula sa bung-aw sa kahiladman makiggubat kanila ug iyang pagadag-on sila ug pamatyon sila.”​—Pinadayag 11:7.

5, 6. Sa unsang paagi ang mga kasinatian sa maong pundok sa 1919 nagatagana sa katumanan sa tagna nga “daghan niadtong nangatulog sa abog sa yuta . . . mahigmata”?

⁵ Hinuon, sumala sa tagna sila dili magpabiling ‘patay.’ “Ug tapos sa tulo ka adlaw ug tunga ang espiritu sa kinabuhi gikan sa Diyos misulod kanila, ug sila nanindog ug giabot ug dakong kahadlok kadtong nakakita kanila. . . . Ug sila misaka ngadto sa langit sa panganod ug ang ilang mga kaaway nakakita kanila.” (Pinadayag 11:11, 12; Ezekiel 37:1-14) Ang ilang pagkabanhaw dayag simboliko, sanglit ang literal nga pagkabanhaw ngadto sa espiritung kinabuhi sa langit dili man makita sa ilang mga kaaway. Hinunoa, sila pagabanhawon gikan sa samag-patayng kahimtang sa pagkawalay-kalihokan ngadto sa buhi nga kahimtang sa madasigong kalihokan nga bug-os makita niadtong naglaraw sa ilang kalaglagan. Niadtong 1919 ang mga hawas sa Watch Tower Society gipagawas sa bilanggoan, giorganisar pag-usab ang buluhatong pagwali, ug nakita sa kalibotan ang sinugdanan sa labing dakong pagpamatuod bahin sa Gingharian sa kasaysayan.​—Mateo 24:14.

⁶ Sa maong simbolikong diwa, ‘daghan niadtong nangatulog sa abog sa yuta nahigmata.’ Unya, sugod sa 1919, kadtong gamay, nahigmatang pundok sa mga Estudyante sa Bibliya nagsugod sa pagpangita ug pagtigom sa mga nahibilin sa mga igsoon ni Jesus aron mapatikan ang bug-os nga gidaghanon sa 144,000. (Mateo 24:31; Pinadayag 7:1-3) Samtang misanong ang mga indibiduwal, sila nagpahinungod sa ilang kaugalingon ngadto sa Diyos pinaagi ni Kristo ug nahimong mga membro sa makitang organisasyon ni Jehova sa yuta. Kay nagdawat sa walay-bayad nga gasa sa balaang espiritu, sila gipahayag nga matarong pinasukad sa ilang pagtuo sa halad lukat ni Jesus ug gisagop ingong mga anak sa Diyos sa espirituwal nga paagi.​—Roma 8:16; Galacia 2:17; 3:8.

7. Alang sa daghan kanila, sa unsang paagi kini magpamatuod nga pagkanahigmata “ngadto sa kinabuhing molungtad sa panahong walay katinoan”?

⁷ Kadtong nagapabiling matinumanon hangtod sa kataposan sa ilang kinabuhi sa yuta may lig-ong palaaboton nga makabaton sa ilang dapit sa langit uban kang Jesu-Kristo. (1 Corinto 15:50-53) Busa, ang ilang pagkanahigmata sa espirituwal maoy ngadto sa kinabuhing walay kataposan. Samtang buhi pa sa yuta, ilang nasinati ang pakigdait sa ilang taliwala bisan pag nagapuyo sa nagabugnoay nga kalibotan. (Roma 14:19) Apan labi pang hinungdanon, sila nagapahimulos sa pakigdait uban kang Jehova nga Diyos mismo, “ang pakigdait sa Diyos nga molabaw sa tanang hunahuna.”​—Filipos 4:7.

Pagkanahigmata “Ngadto sa mga Kaulawan”

8, 9. Sa unsang paagi kining espirituhanong pagkanahigmata maoy “ngadto sa mga kaulawan ug sa pagkadulumtanan sa panahong walay katinoan”?

⁸ Nan, nganong ang pipila “mahigmata . . . ngadto sa mga kaulawan ug sa pagkadulumtanan sa panahong molungtad sa walay katinoan”? Ang kamatuoran mao, dili tanan niadtong nagadawat sa pagdapit nga mahimong bahin nianang Gingharianong matang magpabiling matinumanon. Gitugotan sa pipila nga maluya ang ilang pagtuo ug sila wala makaantos. (Hebreohanon 2:1) Ang pipila nahimo ganing apostata ug kinahanglang palagpoton sa Kristohanong kongregasyon. (Mateo 13:41, 42) Kana sila gibatbat ni Jesus ingon nga “kadtong daotang ulipon” nga gisilotan sa Agalon “sa labihang kagrabe,” nga ginatudlo siya kauban sa mga salingkapaw. “Didto na unya mahitabo ang iyang paghilak ug pagpangagot sa iyang ngipon.”​—Mateo 24:48-51; Efeso 4:18; 5:6-8.

⁹ Pagkamakasubo, ang pagdawat sa kinatas-ang pribilehiyo nga sukad gitanyag sa dili-hingpit nga mga tawo ug unya pagbatok niana! Bahin niadtong milihok sa ingon, si apostol Pablo miingon: “Bahin niadtong nalamdagan na unta, ug nakatilaw sa langitnong walay-bayad nga gasa, ug nahimong umalambit sa balaang espiritu, ug nakatilaw sa maayong pulong sa Diyos ug sa mga gahom sa umaabot nga sistema sa mga butang, apan mibulag, dili na gayod mahimo ang pagpabalik kanila sa paghinulsol, tungod kay ilang ginalansang pag-usab ang Anak sa Diyos sa ilang kaugalingon ug ginapadayag sila sa kaulawan sa katilingban.” (Hebreohanon 6:4-6) Niining paagiha, ang ilang pagkanahigmata misangpot nga maoy “ngadto sa mga kaulawan ug ngadto sa pagkadulumtanan sa panahong molungtad sa walay katinoan.” Sila wala nay palaabotong kinabuhing walay kataposan.

“Pagdan-ag Ingong mga Kahayag”

10. Kinsa ang “mga may panabot,” ug sa unsang paagi sila ‘nagadan-ag ingong mga kahayag’?

¹⁰ Apan alang niadtong nagapabiling matinumanon, ang tagna nagaingon: “Ug ang mga may panabot modan-ag ingon sa kahayag sa hawan sa kalangitan; ug sila nga nagakabig sa daghan ngadto sa pagkamatarong sama sa mga bituon sa panahong walay katinoan, bisan sa walay kataposan.” (Daniel 12:3) “Ang may panabot” tin-awng mao ang matinumanong nahibiling membro sa dinihogang Kristohanong kongregasyon, nga ‘napuno sa tukmang kahibalo sa iyang kabubut-on sa bug-os nga kaalam ug sa espirituhanong pagpanabot.’ Kay gilig-on ni Jehova, sila ‘nagaantos sa bug-os ug nagapailob uban ang kalipay, nga nagapasalamat sa Amahan nga naghimo kanilang takos alang sa ilang pagpakig-ambit sa panulondon sa mga balaan diha sa kahayag.’ (Colosas 1:9, 11, 12) Bisan sukad 1919, bisan pag ‘ang kangitngit nagatabon sa yuta, ug ang bagang kangiob sa nasodnong mga pundok,’ sila “nagadan-ag ingong mga kahayag” taliwala sa katawhan. (Isaias 60:2; Filipos 2:15; Mateo 5:14-16) Sila “nagasidlak sama sa adlaw sa gingharian sa ilang Amahan.”​—Mateo 13:43.

11. Sa unsang paagi “ang mga may panabot” napamatud-ang mao “kadtong nagadala sa daghan sa pagkamatarong”?

¹¹ Giunsa nila pagpamatuod nga mao “kadtong nagakabig sa daghan sa pagkamatarong”? (Daniel 12:3) Salamat sa ilang matinumanong pagsangyaw, ang kataposang mga sakop sa espirituwal nga Israel natigom na ug gipahayag nga matarong alang sa kinabuhi sa mga langit. Dugang pa, ang usa ka dakong panon sa “ubang mga karnero” nagpadayag sa kaugalingon, nga mihugop ngadto sa kahayag gikan ni Jehova ingon nga gibanaag sa ‘katawhan ni Daniel.’ (Juan 10:16; Zacarias 8:23) Kining “ubang mga karnero” kinabubut-ong miduyog sa mga dinihogan sa ilang buluhaton sa pagwali sa “maayong balita.” (Mateo 24:14; Isaias 61:5, 6) Sila, usab, nagtuo sa inula nga dugo ni Jesu-Kristo, mao nga sila gipahayag nga matarong aron magpahimulos sa pakighigala sa Diyos. (Pinadayag 7:9-15; itandi ang Santiago 2:23.) Kon sila magpabiling matinumanon hangtod sa kataposan, ang ilang mga ngalan magpadayong “hikaplagang nahisulat sa basahon.” Busa, sila makalaom sa paglabang-buhi sa labing daotang panahon sa kasakitan nga sukad mohampak sa kanasoran.​—Daniel 12:1; Mateo 24:13, 21, 22.

“Sila Modan-ag . . . sa Walay Kataposan”

12, 13. (a) Sa unsang paagi “ang mga may panabot” makahimo sa “pagdan-ag . . . sa walay kataposan”? (b) Sa unsang paagi, sa laing paagi, sila mapamatud-ang mao “kadtong nagadala sa daghan sa pagkamatarong”?

¹² Ang manulonda nagsulti kang Daniel: “Ang mga may panabot modan-ag ingon sa kahayag sa hawan . . . , sama sa mga bituon sa panahong walay katinoan, bisan sa walay kataposan.” (Daniel 12:3) Sa unsang paagi ang mga dinihogan makadan-ag sa walay kataposan, sanglit ang matag usa sa kataposan mamatay man? Sa pagkaaging sila mopadayon sa “pagdan-ag” bisan tapos sa pagkamatay. Sa pagbatbat kanila diha sa ilang langitnong kahimtang, si Jesus nagatug-an kanato diha sa basahon sa Pinadayag: “Ang trono sa Diyos ug sa Kordero anaa unya sa siyudad, ug ang iyang mga ulipon magahatag kaniya sa balaang pag-alagad; ug ilang makita ang iyang nawong, ug ang iyang ngalan mahianha sa ilang mga agtang. Gawas pa, wala na unyay gabii, ug dili na kinahanglan ang kahayag sa lamparahan ni may kahayag sila sa adlaw, tungod kay si Jehova nga Diyos magadan-ag ibabaw kanila, ug sila magamando ingon nga mga hari hangtod sa kahangtoran.”​—Pinadayag 22:3-5.

¹³ Oo, ang maong mga gibanhaw magamando ingong mga hari sama sa mga bituon sa mga langit, “hangtod sa kahangtoran.” Ang ilang espirituwal nga kadan-ag mopatunghag dagkong mga panalangin sa katawhan. (Pinadayag 14:13) Sa pagbatbat kanila ingong ang “Bag-ong Jerusalem,” ang basahong Pinadayag nagtaho: “Ug ang siyudad wala na magkinahanglan ug adlaw o bulan aron sa pagdan-ag niini, ug ang suga niini mao man ang Kordero. Ug ang mga nasod magalakaw pinaagi sa kahayag niini, ug ang mga hari sa yuta magadala sa ilang himaya nganha niini.” (Pinadayag 21:2, 9, 23, 24) Ang mga binanhaw motabang sa pagpadapat sa mga kaayohan sa halad lukat “alang sa pag-ayo sa kanasoran.” (Pinadayag 22:2) Dihang, sa pagkatapos sa Usa ka Libo ka Tuig nga Pagmando, si Jesus ug ang iyang 144,000 ka kaubang hari ug saserdote nakapasig-uli na sa matinumanong mga tawo sa kahingpitan, sila gayod nakadala “sa daghan sa pagkamatarong.” Tapos sa kataposang pagsulay nianang panahona, ang napasig-uling katawhan magalangkob sa hingpit tawhanong kapunongan nga magapuyo sa paraisong yuta sa panahong walay kataposan. (Pinadayag 20:7-10; Salmo 37:29) Niining paagiha, ang makitang sangpotanan sa langitnong himaya sa ‘katawhan ni Daniel’ molungtad usab “sa panahong walay katinoan, bisan sa walay kataposan.”

Laing Pagkabanhaw

14. Ang tagna nga “daghan niadtong nangatulog sa abog sa yuta . . . mahigmata” magaapil unya kang kinsa pa?

¹⁴ Busa, ang mga pulong sa manulonda nagadala kanato saylo sa panahon sa ‘pagtindog’ ni Miguel ug sa walay-ingong “panahon sa kasakitan” hangtod gayod sa bag-ong sistema sa mga butang. Dugang pa, ang mga panalangin nga gidala niining nagadan-ag “sama sa mga bituon” dili limitado ngadto niadtong makalabang-buhi sa “panahon sa kasakitan.” Si Jesus, samtang usa pa ka tawo sa yuta, miingon: “Ang takna nagasingabot diin ang tanang anaa sa handumanang mga lubnganan makadungog sa iyang tingog ug manggula, kadtong nagbuhat sa maayong mga butang ngadto sa pagkabanhaw sa kinabuhi, kadtong nagbuhat sa daotang mga butang ngadto sa pagkabanhaw sa paghukom.” (Juan 5:28, 29) Kining mga pulonga nagatumong sa literal nga pagkabanhaw sa namatay nga katawhan, ug pihong kini nga pagkabanhaw, usab, maoy sumpay nga katumanan sa mga pulong sa manulonda: “Daghan niadtong nangatulog sa abog sa yuta . . . mahigmata.”​—Daniel 12:2.

15. Alang niadtong banhawon unya, sa unsang paagi kana mahimong usa ka pagkahigmata “ngadto sa kinabuhi sa panahong walay katinoan”?

¹⁵ Apil niadtong naapil niining linaing pagkanahigmata mao si Daniel mismo. Siya giingnan sa manulonda: “Mahitungod sa imong kaugalingon, magpadayon hangtod sa kataposan; ug ikaw mopahulay [matulog sa kamatayon], apan ikaw motindog alang sa imong bahin sa kataposan sa mga adlaw.” (Daniel 12:13) Kadtong sama kang Daniel nga banhawon unya ug mosanong sa ministeryo ni Jesus ug sa iyang mga igsoon gikan sa langit pagabanhawon ngadto sa tawhanong kahingpitan. Kon sila makapasar sa kataposang pagsulay, ang ilang mga ngalan isulat nga permanente diha sa basahon sa kinabuhi. (Pinadayag 20:5) Alang kanila, usab, ang pagkanahigmata mao unyay “sa kinabuhing molungtad sa panahong walay katinoan.”

16. Alang kang kinsa ang pagkahigmata sa bag-ong sistema sa mga butang mapamatud-ang maoy “ngadto sa pagkadulumtanan sa panahong walay katinoan”?

¹⁶ Hinuon, dili tanan mosanong sa ingon. Ang pipila pihong mosulay sa pagpabalik sa mga buhat nga naghikaw sa tawo sa pakigdait sa hataas nga panahon. Kana sila may matarong nga pasidaan sa Bibliya: “Mahitungod sa mga talawan ug kadtong walay pagtuo ug kadtong dulumtanan sa ilang kahugawan ug mga mamumuno ug mga makihilawason ug kadtong nagabuhat sa espiritismo ug mga tigsimbag diyosdiyos ug tanang bakakon, ang ilang bahin mao unyay sa linaw nga nagadilaab sa kalayo ug asupre. Kini nagkahulogan nga ikaduhang kamatayon.” (Pinadayag 21:8) Kining “ikaduhang kamatayon” maoy usa ka laktud nga paghukom ni Jehova nga gikan niana wala nay pagkabanhaw. Kini maoy dumalayon, walay-kataposang pagkalimot. Kadtong gibanhaw nga magpamatuod nga walay pagpabili makaagom niining ikaduhang kamatayon; busa, ang ilang pagkanahigmata maoy “ngadto sa mga kaulawan ug sa pagkadulumtanan sa panahong walay katinoan.”​—Daniel 12:2.

“Ang Matuod nga Kahibalo Modagaya”

17. Sa unsang paagi kita nahibalo nga ang tagna bahin sa hari sa amihanan ug sa hari sa habagatan nahitala alang ilabina sa atong kaayohan karong adlawa?

¹⁷ Unya ang manulonda mihatag kang Daniel sa mga pulong sa tambag: “Ug bahin kanimo, Oh Daniel, himoang tinago ang mga pulong ug takpi ang basahon, hangtod sa panahon sa kataposan. Daghan ang magngadto-nganhi, ug ang matuod nga kahibalo modagaya.” (Daniel 12:4) Kining mga pulonga nagakuha sa atong pagtagad. Bisan tuod ang tagna sa manulonda mahitungod sa duha ka hari nagsugod pagkatuman mga 2,300 ka tuig nga miagi, ang pagsabot niana nabuksan ilabina sulod sa “panahon sa kataposan,” ilabina sukad 1919. Karong mga adlawa, “daghan . . . nagangadto-nganhi” sa Bibliya, ug ang matuod nga kahibalo tinuod nga midagaya. Karon mao ang panahong si Jehova naghatag ug kahibalo sa mga may panabot.

18. (a) Unsang dagkong mga bahin sa tagna ang karon ginatuman o hapit nang matuman? (b) Unsang timbang nga tinamdan ang ginahatag niini kanato?

¹⁸ Ang kamatuorang ang ubay-ubayng bahin sa tagna natuman daghang siglo nga miagi nagalig-on sa atong pagtuo sa mga bahin sa tagna nga mamatuman pa. (Josue 23:14) Ang kalibotan karong adlawa nagahimo sa pagbirahanay tali sa hari sa amihanan ug sa hari sa habagatan, sumala sa gitagna sa manulonda. Dugang pa, ang tagna nagapasidaan mahitungod sa labi pang peligrosong kapanahonan sa unahan. Busa kita gitabangan sa paghupot sa atong panimbang ug likayan nga madani sa propaganda sa bisan haing hari. Karon mao ang panahon sa paglig-on sa atong pagsalig kang Jehova. Ayaw gayod kalimti nga “si Miguel . . . ang dakong prinsipe” “nagatindog” alang sa katawhan sa Diyos. Ang atong bugtong tinong kaluwasan maoy sa pagpasakop sa Gingharian sa Diyos ilalom ni Kristo Jesus.​—Buhat 4:12; Filipos 2:9-11.

19. Unsa ang kahulogan sa mga pulong sa manulonda ngadto kang Daniel alang sa matag usa kanato?

¹⁹ Nan, magpabiling suod ngadto sa “mga may panabot,” kinsa ‘nagadan-ag ingon sa kahayag sa hawan sa kalangitan.’ Magpabiling aktibo sa pagbuhat alang sa Gingharian sa Diyos. (1 Corinto 15:58; Roma 15:5, 6) Palaloma ang imong gugma sa kamatuoran sa Pulong sa Diyos, ug mahala pag-ayo ang pakigdait nga nagalungtad bisan karon sa organisasyon sa Diyos. (Salmo 119:165; Efeso 4:1-3; Filipos 2:1-5) Unya, dihang si Miguel ‘motindog’ sa pagdugmok sa mga kaaway ni Jehova, hinaot ikaw maluwas, kauban sa tanang katawhan sa Diyos kansang mga ngalan “hikaplagang nahisulat sa basahon.”

Makatubag Ka Ba?

◻ Sa unsang paagi “daghan niadtong nangatulog sa yuta” nahigmata na?

◻ Sa unsang paagi ang maong ‘pagkanahigmata’ mosangpot nga maoy “ngadto sa mga kaulawan”?

◻ Sa unsang paagi ang “mga may panabot” nagadan-ag ingong mga kahayag ug nagadala sa daghan sa pagkamatarong?

◻ Unsang umaabot nga katumanan ang mabatonan sa pagkahigmata ‘niadtong nangatulog sa yuta’?

◻ Sa unsang paagi natuman ang Daniel 12:4?

1. Tapos sa pagbatbat sa panahon sa kasakitan diha sa mga tighulhog sa gubat, ang manulonda sunod nagliso sa iyang pagtagad sa unsa?

[Hulagway sa panid 23]

Sukad 1919 kadtong may panabot nagadan-ag sa mohatag-kinabuhing kamatuoran

[Tinubdan]

Letrato sa NASA