“Ayawg Kahadlok, Gamayng Panon”

“Ayawg kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.”​—LUCAS 12:32.

1. Unsay gibasehan sa mga pulong ni Jesus: “Ayawg kahadlok, gamayng panon”?

“PANGITAANG mapinadayonon ang gingharian [sa Diyos].” (Lucas 12:31) Sa dihang gisulti ni Jesus kining maong mga pulong ngadto sa iyang mga tinun-an, mipahayag siyag prinsipyo nga migiya sa panghunahuna sa mga Kristohanon sukad sa iyang adlaw hangtod sa atong panahon. Ang Gingharian sa Diyos kinahanglang mokuha sa kinaunahang dapit sa atong mga kinabuhi. (Mateo 6:33) Hinunoa, sa asoy ni Lucas, si Jesus mipadayon sa pagsultig mahigugmaon ug makapalig-ong mga pulong ngadto sa usa ka linaing pundok sa mga Kristohanon. Siya miingon: “Ayawg kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.” (Lucas 12:32) Ingong Maayong Magbalantay, si Jesus nasayod nga moabot ang malisod nga mga panahon diha sa iyang suod nga mga tinun-an. Apan walay hinungdan nga sila mahadlok kon padayon nilang pangitaon ang Gingharian sa Diyos. Busa, ang tambag ni Jesus maoy dili mapiotong mando. Hinunoa, kadto maoy mahigugmaong saad nga nagsilbi aron dasigon ang pagsalig ug kaisog.

2. Kinsa ang naglangkob sa gamayng panon, ug nganong sila adunay linaing pribilehiyo?

² Si Jesus nagkigsulti sa iyang mga tinun-an, ug iyang gitawag sila ug “gamayng panon.” Siya nagkigsulti usab kanila nga ‘pagahatagan ni Jehova sa gingharian.’ Kon itandi sa dako kaayong panon nga modawat kang Jesus sa ulahing mga panahon, kining maong pundok diyutay ra gayod sa gidaghanon. Sila giisip usab nga bililhon tungod kay sila gipili alang sa talagsaong umaabot, aron pagagamiton sa harianong pag-alagad. Ang ilang Amahan, ang Dakong Magbalantay, si Jehova, nagtawag sa gamayng panon aron nga madawat nila ang langitnong panulondon may kalabotan sa Mesiyanikong Gingharian ni Kristo.

Ang Gamayng Panon

3. Unsang mahimayaong panan-awon bahin sa gamayng panon ang nakita ni Juan?

³ Nan, kinsa ang gisakpan niining maong gamayng panon nga adunay ingon niana ka kahibulongang paglaom? Ang mga sumusunod ni Jesu-Kristo nga nakadawat ug pagdihog pinaagi sa balaang espiritu. (Buhat 2:1-4) Nakakita kanila ingong langitnong mga mag-aawit nga nagdalag mga alpa sa ilang mga kamot, si apostol Juan misulat: “Nakita ko, ug, tan-awa! ang Kordero nga nagabarog diha sa Bukid Zion, ug may uban kaniya nga usa ka gatos ug kap-atag-upat ka libo nga nagabaton sa iyang ngalan ug sa ngalan sa iyang Amahan nga nahisulat diha sa ilang mga agtang. Kini sila mao ang wala maghugaw sa ilang kaugalingon sa mga babaye; sa pagkatinuod, sila mga ulay. Kini sila ang padayong nagasunod sa Kordero bisan diin siya moadto. Kini sila gipalit gikan sa katawhan ingong mga unang-bunga ngadto sa Diyos ug ngadto sa Kordero, ug walay kabakakan nga nakaplagan sa ilang mga baba; sila walay lama.”​—Pinadayag 14:1, 4, 5.

4. Unsang posisyon ang nabatonan sa gamayng panon karon sa yuta?

⁴ Sukad niadtong Pentekostes 33 K.P., kining mga dinihogan, nga mga gianak-sa-espiritu nakaalagad ingong mga embahador ni Kristo sa yuta. (2 Corinto 5:20) Karon, usa ka salin na lamang kanila ang nahibilin, nga magkaubang nag-alagad ingong matinumanon ug maalamong ulipon nga matang. (Mateo 24:45; Pinadayag 12:17) Ilabina sukad sa tuig 1935, sila giduyogan sa “ubang mga karnero,” nga mga Kristohanon nga adunay yutan-ong paglaom, nga karon mokabat na sa minilyon. Kini sila nagtabang sa pagwali sa maayong balita sa tibuok yuta.​—Juan 10:16.

5. Unsay tinamdan sa nanghibilin sa gamayng panon, ug nganong dili sila angay mahadlok?

⁵ Unsay tinamdan sa mga nanghibilin niining gamayng panon nga ania pa sa yuta? Kay nasayod nga sila makadawat ug ‘usa ka Gingharian nga dili matay-og,’ sila naghalad sa ilang balaang pag-alagad uban sa diyosnong kahadlok ug kataha. (Hebreohanon 12:28) Sa kamapaubsanon ilang nasabtan nga bililhon kaayo ang ilang pribilehiyo nga moresulta sa walay kinutobang kalipay. Ilang nakaplagan ang “usa ka perlas nga taas ug bili” nga gihisgotan ni Jesus sa dihang naghisgot siya bahin sa Gingharian. (Mateo 13:46) Samtang nagsingabot ang dakong kasakitan, ang mga dinihogan sa Diyos nagabarog nga walay kahadlok. Bisan pa sa modangat unya sa kalibotan sa katawhan sa panahon sa “dako ug bantogang adlaw ni Jehova,” sila walay daotan nga kahadlok sa umaabot. (Buhat 2:19-21) Unsa may ilang kahadlokan?

Nagkakunhod nga Gidaghanon

6, 7. (a) Nganong ang gidaghanon sa gamayng panon nga ania pa sa yuta diyutay ra? (b) Unsaon paglantaw sa matag indibiduwal ang paglaom nga iyang gihuptan?

⁶ Niining ulahing katuigan ang gidaghanon sa gamayng panon nga ania pa sa yuta nagkadiyutay na. Tataw kini sumala sa 1994 nga taho sa Memoryal. Sa mga 75,000 ka kongregasyon sa katawhan ni Jehova sa tibuok kalibotan, 8,617 lamang ang nagpasundayag sa ilang pagkamembro sa nanghibilin pinaagi sa pag-ambit sa mga emblema. (Mateo 26:26-30) Sa pagtandi, ang total nga gidaghanon sa mitambong sa katibuk-an maoy 12,288,917. Ang dinihogang mga Kristohanon nasayod nga mao kini ang malaoman. Natino na ni Jehova ang limitadong gidaghanon, 144,000, nga molangkob sa gamayng panon, ug iyang gitigom sila sukad pa sa Pentekostes 33 K.P. Makataronganon, ang pagtawag sa gamayng panon matapos na sa dihang ang ilang gidaghanon hapit nang mabug-os, ug gipakita sa ebidensiya nga ang kinatibuk-ang pagpanigom niining sa linain mga binulahan natapos na niadtong 1935. Hinunoa, ang ubang mga karnero sa panahon sa kataposan gitagna nga motubo aron mahimong “usa ka dakong panon, nga walay tawong makaihap, gikan sa tanang kanasoran ug tribo ug katawhan ug mga dila.” Sukad niadtong 1935 ang kinatibuk-ang pagpanigom ni Jehova maoy sa dakong panon, kansang paglaom sa kinabuhing walay kataposan maoy sa paraisong yuta.​—Pinadayag 7:9; 14:15, 16; Salmo 37:29.

⁷ Kadaghanan niadtong sakop sa gamayng panon nga ania pa sa yuta maoy mga 70, mga 80, ug mga 90 na ang edad. Ang pipila kanila nakalabang na sa ilang ika-100 nga tuig. Kining tanan, bisag pilay ilang edad, nasayod nga pinaagi sa langitnong pagkabanhaw, ngadtongadto mahiusa sila uban kang Jesu-Kristo ug magamando uban kaniya sa iyang mahimayaong Gingharian. Kadtong sakop sa dakong panon mahimong yutan-ong mga sakop ni Kristo ang Hari. Pasagding ang matag usa magmaya sa gitagana ni Jehova alang niadtong nahigugma kaniya. Dili alang kanato ang pagpili kon unsang paglaom ang atong pagahuptan. Si Jehova na ang mohukom. Ikalipay sa duha ka grupo ang ilang paglaom alang sa usa ka malipayong umaabot, sa langitnong Gingharian man o sa paraisong yuta ilalom sa maong Gingharian.​—Juan 6:44, 65; Efeso 1:17, 18.

8. Unsa ka dugay ang pagtimbri sa 144,000, ug unsay mahitabo sa dihang kini makompleto na?

⁸ Ang gidaghanong 144,000 nga gamayng panon mao “ang Israel sa Diyos,” nga maoy mipuli sa kinaiyanhong Israel diha sa mga katuyoan sa Diyos. (Galacia 6:16) Busa, ang nanghibilin naglangkob sa salin nianang maong espirituwal nga nasod nga ania pa sa yuta. Ang maong mga nanghibilin gitimbrihan alang sa kataposang pag-uyon ni Jehova. Diha sa usa ka panan-awon, nakita kini ni apostol Juan nga nahitabo, ug siya mitaho: “Nakita ko ang laing anghel nga mikayab gikan sa subanganan sa adlaw, adunay timbri sa buhing Diyos; ug sa makusog nga tingog siya misinggit ngadto sa upat ka anghel nga gitugotan sa pagdaot sa yuta ug sa dagat, nga nag-ingon: ‘Ayawg daota ang yuta o ang dagat o ang mga kahoy, hangtod nga amo nang mahuman ug timbri ang mga ulipon sa atong Diyos sa ilang mga agtang.’ Ug nadungog ko ang gidaghanon niadtong mga gitimbrihan, usa ka gatos ug kap-atag-upat ka libo, nga gipangtimbrihan gikan sa matag tribo sa mga anak nga lalaki [sa espirituwal nga] Israel.” (Pinadayag 7:2-4) Sanglit kining maong buluhaton sa pagtimbri sa espirituwal nga Israel dayag nga hapit nang makompleto, ang kulbahinam nga mga panghitabo nga sa dili madugay mahitabo gitagna na. Sa usa ka katarongan, “ang dakong kasakitan,” sa dihang buhian na diha sa yuta ang upat ka hangin sa kalaglagan, haduol na gayod.​—Pinadayag 7:14.

9. Giunsa paglantaw sa gamayng panon ang nagatubong gidaghanon sa dakong panon?

⁹ Kadtong sakop sa dakong panon nga natigom mikabat na ug minilyon. Pagkadakong kalipay ang nahatag niini sa mga kasingkasing sa nanghibilin! Bisan tuod padayong nagakunhod ang gidaghanon niadtong sakop sa gamayng panon nga ania pa sa yuta, sila nakabansay ug nakaandam na ug kuwalipikadong mga lalaki gikan sa dakong panon sa pagpas-an sa mga responsabilidad may kalabotan sa nagadako nga yutan-ong organisasyon sa Diyos. (Isaias 61:5) Ingon sa gipaila ni Jesus, aduna unyay mga makalabang-buhi sa dakong kasakitan.​—Mateo 24:22.

“Ayawg Kahadlok”

10. (a) Unsang pag-atake ang igalansad sa umaabot batok sa katawhan sa Diyos, ug ngadto sa unsa kini mosangpot? (b) Unsang mga pangutana ang gisukna sa matag usa kanato?

¹⁰ Si Satanas ug ang iyang mga demonyo gitambog dinhi sa yuta. Siya ug ang iyang panon gimaneobra aron mohimo sa ilang bug-os nga pag-atake sa katawhan ni Jehova. Kining maong pag-atake, nga gitagna sa Bibliya, gihubit ingong pag-atake ni Gog sa Magog. Kang kinsa ilabina itumong sa Yawa ang iyang atake? Dili ba sa nanghibiling membro sa gamayng panon, ang espirituwal nga Israel sa Diyos, nga nagpuyo nga malinawon “sa sentro sa yuta”? (Ezekiel 38:1-12) Oo, apan ang nanghibilin sa maunongong dinihogang matang, uban sa ilang matinud-anong mga kauban, ang ubang mga karnero, makasaksi kon sa unsang paagi ang atake ni Satanas magpadali sa usa ka madulaong pagsanong sa bahin ni Jehova nga Diyos. Siya mangilabot aron panalipdan ang iyang katawhan, ug kini maoy mopahinabo sa pagsugod sa “dako ug makapukawg-kahadlok nga adlaw ni Jehova.” (Joel 2:31) Karon, ang matinumanon ug maalamong ulipon nga matang nagahimog hinungdanon, nagaluwas ug kinabuhi nga pag-alagad, nga nagapasidaan bahin niining umaabot nga pagbalda ni Jehova. (Malakias 4:5; 1 Timoteo 4:16) Aktibo ka bang nagasuportar sa maong pag-alagad, nga nakig-ambit sa pagwali sa maayong balita sa Gingharian ni Jehova? Magpadayon ka ba sa paghimo niana ingong maisogong magmamantala sa Gingharian?

11. Nganong ang maisogong tinamdan hinungdanon karon?

¹¹ Tungod sa presenteng kahimtang sa kalibotan, tukma gayod sa panahon nga patalinghogan sa gamayng panon ang mga pulong ni Jesus nga gitumong kanila: “Ayawg kahadlok, gamayng panon”! Ang maong maisogong tinamdan hinungdanon may kalabotan niining tanang ginahimo karon nga nahiuyon sa katuyoan ni Jehova. Ingong indibiduwal, ang matag usa sa gamayng panon nakasabot sa panginahanglan sa paglahutay hangtod sa kataposan. (Lucas 21:19) Ingon nga si Jesu-Kristo, ang Ginoo ug Agalon sa gamayng panon, milahutay ug magpabiling matinumanon hangtod sa kataposan sa iyang yutan-ong kinabuhi, mao usab ang matag usa sa nanghibilin kinahanglang molahutay ug magpabiling matinumanon.​—Hebreohanon 12:1, 2.

12. Sa unsang paagi si Pablo, sama kang Jesus, nagtambag sa dinihogang mga Kristohanon nga dili magkahadlok?

¹² Kinahanglang batonan sa tanang dinihogan ang samang panglantaw ni apostol Pablo. Tan-awa kon sa unsang paagi ang iyang mga pulong ingong usa ka dinihogang publikong magmamantala sa pagkabanhaw nahiuyon sa tambag ni Jesus sa dili pagkahadlok. Si Pablo misulat: “Hinumdomi nga si Jesu-Kristo gibangon gikan sa mga patay ug maoy binhi ni David, sumala sa maayong balita nga akong ginawali; nga may kalabotan niini ako nagaantos sa daotan. Bisan pa niana, ang pulong sa Diyos dili ginapos. Gumikan niini padayon kong ginalahutay ang tanang butang tungod ug alang sa mga pinili, aron nga sila usab makabaton sa kaluwasan kahiusa kang Kristo Jesus uban ang walay-kataposang himaya. Kasaligan ang pamulong: Tinong kon kita magkauban nga mamatay, kita usab mabuhi nga magkauban; kon kita padayong molahutay, kita usab magkaubang magmando ingong mga hari; kon kita molimod, siya usab molimod kanato; kon kita dili-kasaligan, siya magpabiling kasaligan, kay siya dili man makalimod sa iyang kaugalingon.”​—2 Timoteo 2:8-13.

13. Unsang halalom nga mga pagtuo ang gihuptan sa mga membro sa gamayng panon, ug unsay nagpalihok kanila sa paghimo niini?

¹³ Sama kang apostol Pablo, ang nanghibiling membro sa dinihogang gamayng panon andam sa paglahutay sa kasakitan samtang ilang ginapahayag ang kusganong mensahe nga natala sa Pulong sa Diyos. Ang ilang mga pagtuo nakagamot ug lalom samtang magpadayon sila sa pagsalig sa mga saad sa Diyos sa kaluwasan ug tungod kay sila mao ang gihatagan sa “purongpurong sa kinabuhi” kon sila magpabiling matinumanon hangtod sa kamatayon. (Pinadayag 2:10) Pinaagi sa pagkasinati ug dihadihang pagkabanhaw ug pagkausab, sila pagadalhon nga mahiusa uban kang Kristo, aron magamando uban kaniya ingong mga hari. Pagkadakong kadaogan alang sa ilang nagahupot-ug-integridad nga kurso ingong mga magdadaog sa kalibotan!​—1 Juan 5:3, 4.

Usa ka Talagsaong Paglaom

14, 15. Sa unsang paagi talagsaon ang paglaom sa pagkabanhaw sa gamayng panon?

¹⁴ Ang paglaom sa pagkabanhaw nga gilaoman sa gamayng panon maoy talagsaon. Sa unsang mga paagi? Sa usa ka katarongan, mag-una kini sa katibuk-ang pagkabanhaw sa “mga matarong ug mga dili-matarong.” (Buhat 24:15) Sa pagkamatuod, ang pagkabanhaw sa mga dinihogan nahan-ay sumala sa importansiya, ingon sa tin-awng gipakita niining mga pulonga nga mabasa sa 1 Corinto 15:20, 23: “Si Kristo gibangon na gikan sa mga patay, ang unang-bunga kanilang kinsa nahikatulog sa kamatayon. Apan ang matag usa sa kaugalingong han-ay: Si Kristo ang unang-bunga, pagkahuman kadtong mga iya sa Kristo panahon sa iyang pakaanaa.” Pinaagi sa pagbaton sa matang sa paglahutay ug pagtuo nga gipasundayag ni Jesus, ang gamayng panon nasayod kon unsay naghulat kanila samtang ilang taposon ang ilang yutan-ong kurso, ilabina sukad nga miabot ang matuod nga Ginoo sa iyang templo alang sa paghukom sa 1918.​—Malakias 3:1.

¹⁵ Gihatagan kita ni Pablo ug dugang katarongan aron lantawon kining maong pagkabanhaw ingong talagsaon. Sumala sa natala sa 1 Corinto 15:51-53, siya nagsulat: “Tan-awa! Sultihan ko kamog usa ka sagradong tinago: Dili kitang tanan mangatulog sa kamatayon, apan kitang tanan mangausab, sa daklit, sa pagpamilok sa mata, sa panahon sa kataposan nga trumpeta. . . . Kay kini nga madunoton angay magsul-ob ug pagkadili-madunoton, ug kini nga may-kamatayon angay magsul-ob ug pagkawalay-kamatayon.” Kining maong mga pulong mapadapat ngadto sa membro sa gamayng panon nga namatay sa panahon sa presensiya ni Kristo. Dili na kinahanglang matulog pa ug dugay diha sa kamatayon, sila pagasul-oban ug pagkawalay-kamatayon, “sa daklit, sa pagpamilok sa mata.”

16, 17. May kalabotan sa ilang paglaom sa pagkabanhaw, sa unsang paagi ang dinihogang mga Kristohanon karon ilabinang nabulahan?

¹⁶ Sumala sa kahayag niining maong pagsabot, masabtan nato ang diwa sa mga pulong ni apostol Juan nga mabasa sa Pinadayag 14:12, 13. Siya nagsulat: “‘Dinhi niini nagakahulogan ug pag-agwanta alang sa mga balaan, kadtong mga nagasunod sa mga sugo sa Diyos ug sa pagtuo kang Jesus.’ Ug nadungog ko ang usa ka tingog gikan sa langit nga nag-ingon: ‘Isulat: Malipayon ang mga patay nga namatayng kahiusa sa Ginoo sukad niining panahona padayon. Oo, nagaingon ang espiritu, papahulaya sila gikan sa ilang mga kahago, kay ang mga butang nga ilang gibuhat mahiuban kanila.’”

¹⁷ Pagkatalagsaong ganti ang naghulat sa nanghibilin sa gamayng panon! Ang ilang pagkabanhaw moabot dayon, inigkatulog dayon nila diha sa kamatayon. Pagkatalagsaong kausaban ang ilang maeksperyensiyahan samtang ilang dawaton ang ilang asaynment sa espirituhanong kalibotan! Tungod niining nagapadayong paghimaya sa gamayng panon ug uban sa katumanan sa dagkong mga tagna sa Bibliya nga hapit nang makompleto, ang kataposang nahibiling membro sa gamayng panon ‘dili angayng mahadlok.’ Ug ang ilang pagkawalay-kahadlok nagsilbing pagpadasig sa sakop sa dakong panon, kinsa angay nga mag-ugmad ug samang tinamdan sa pagkawalay-kahadlok samtang ilang gipaabot ang kaluwasan panahon sa kinadak-ang kasamok sa yuta nga wala pa sukad mahitabo.

18, 19. (a) Nganong ang panahon nga kita nagakinabuhi dinalian? (b) Nganong kinahanglan nga ang dinihogan ug ubang karnero dili magkahadlok?

¹⁸ Ang pagrepaso sa mga kalihokan sa gamayng panon nagpaarang kanila ug sa dakong panon sa pagpadayon sa pagkahadlok sa matuod nga Diyos. Ang takna sa iyang paghukom miabot na, ug ang nahibiling maayong panahon bililhon kaayo. Sa pagkatinuod, limitado ang panahon alang sa uban sa paglihok. Hinunoa, kita dili mahadlok nga mapakyas ang katuyoan sa Diyos. Kini molampos gayod!

¹⁹ Gani karon, ang makusog nga langitnong mga tingog nadungog na nga nagaingon: “Ang gingharian sa kalibotan nahimong ang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.” (Pinadayag 11:15) Sa walay duhaduha, ang Dakong Magbalantay, si Jehova, nagagiya sa tanan niyang karnero diha sa “mga alagianan sa pagkamatarong alang sa iyang ngalan.” (Salmo 23:3) Ang gamayng panon sa walay-pagkasayop ginaagak ngadto sa ilang langitnong ganti. Ug ang ubang mga karnero pagaluwason latas sa dakong kasakitan aron tagamtamon ang kinabuhing walay kataposan diha sa yutan-ong bahin sa mahimayong Gingharian sa Diyos ubos sa pagmando ni Kristo Jesus. Busa, samtang ang mga pulong ni Jesus gitumong ngadto sa gamayng panon, sa tino ang tanang alagad sa Diyos sa yuta adunay katarongan sa pagpatalinghog sa iyang mga pulong: “Ayawg kahadlok.”

Makapatin-aw Ka Ba?

◻ Nganong makadahom kita nga ang nanghibiling gidaghanon sa gamayng panon mokunhod?

◻ Unsay kahimtang sa dinihogang nanghibilin karon?

◻ Nganong ang mga Kristohanon dili mahadlok, bisan pa sa umaabot nga pag-atake ni Gog sa Magog?

◻ Nganong ang paglaom sa pagkabanhaw sa 144,000 talagsaon, ilabina karon?