Mga Pagtulon-an Gikan sa Kasulatan: Joel 1:1–3:21
Sangpita ang Ngalan ni Jehova ug Ikaw Pagaluwason!
“KON ang hampak dili mapugngan, mokaylap kini sa Sidlakang Aprika ug sa Duol nga Silangan. Usa unya kini ka katalagman.” Matud pa sa usa ka opisyal sa UN Food and Agriculture Organization bahin sa kusog mokaong insekto nga mihugpa sa amihanang-kasadpan sa Aprika sa binilyon—ang dulon.
Sa mga tuig 820 W.K.P., ang propeta sa Diyos si Joel naghisgot bahin sa samang hampak. Diha sa tin-aw kaayong mga pulong nga dili-hilabwan sa pagkatukma ug sa pagkatinuod, iyang gibatbat kon sa unsang paagi ang nasod sa Juda hugpaan sa pag-atake sa insekto. Apan, kadtong maong hampak maoy larawan sa usa ka butang nga labi pang makahuloganon kay sa hulga sa ekolohiya. Kadto maoy pagmantala sa “adlaw ni Jehova”! Ang atong kaliwatan nagaatubang nianang “makalilisang nga adlaw” ug uban sa malalagong kapungot niini. Unsa may paglaom nga maluwas? Ug unsang mga pagtulon-an ang atong makat-onan gikan sa matagnaong basahon ni Joel?
Makalilisang nga Pag-asdang sa Insekto
Ang paghinulsol gikinahanglan aron maluwas sa panahon sa makalilisang nga adlaw ni Jehova. Pinaagi sa mga mata ni Joel, atong makita ang usa ka katalagman samtang ang yuta gihukasan sa tanaman tungod sa duot sa mga ulod nga dangaw-dangaw, sa mga dulon, sa lukton, ug sa mga ok-ok. Ang mga saserdote, mga tigulang, ug ang ubang mga molupyo sa Juda giawhag sa paghinulsol “ug sa pagpangayo kang Jehova ug panabang.” Ang mga kamalig gibiyaan, mga dapa nangalumpag tungod sa pagkawalay sulod. Ang mga hayop nangalibog nga nagalaaglaag, nga nangita sa walay kapuslanan ug sibsibanan. Pagkaalaot nga adlaw sa kalumpagan nga gikan sa Usa nga Labing Gamhanan!—1:1-20.
Ang kaduol sa adlaw ni Jehova angay mopalihok nato sa pakig-ambit sa balaang mga buhat ug sa diyosnong mga binuhatan. (2 Pedro 3:10-12) Gitabangan kita ni Joel sa pagtan-aw niini ingong usa ka adlaw sa kangitngitan, sa mga panganod, ug sa mabaga nga kangitngit. Ang mga dulon mao ang makalilisang nga timailhan nianang adlawa. Human sa ilang paghugpa, ang samag-Eden nga talan-awon sa Juda nahimong kagun-obang kamingawan. Tilimad-on, usab, mao ang mismong tingog sa mga dulon, kay kini sama sa karro ug sa nagdilaab nga kalayo nga nagalamoy sa balili. Sa miabante ang mga dulon nga “sama sa tawong gamhanan, nga nangandam alang sa gubat,” ilang gipangatkat ang mga kuta, nanghasmag sa mga siyudad, ug nanulod sa mga balay. Bisan ang adlaw, bulan, ug mga bitoon mongitngit sa ‘makalilisang nga adlaw ni Jehova.’—2:1-11.
Ang Dalan sa Kaluwasan
Aron maluwas, kinahanglang atong ilhon nga si ‘Jehova mao ang Diyos ug wala nay lain.’ “Bumalik kamo kanako uban sa bug-os ninyong kasingkasing,” mitambag ni Jehova. Ang mga tigulang ug ang mga batan-on giawhag sa pagtigom diha sa solemneng panagtigom aron sa pagpangayog kahimuot sa Diyos. Ang Diyos mopakitag kaluoy, mobalos sa kalumpagang nahimo sa insekto, ug panalanginan ang iyang katawhan sa kadagaya. Kadtong moila sa posisyon ni Jehova nga mao lamang ang bugtong matuod nga Diyos ug Tuboran sa kaluwasan dili maulawan.—2:12-27.
Ang atong kaluwasan nagadepende usab sa pagsangpit sa ngalan ni Jehova diha sa pagtuo. Sa dili pa ang “dako ug makalilisang nga adlaw ni Jehova,” ang Diyos ‘mobubo sa iyang espiritu diha sa tanang matang sa unod.’ Ang mga batan-on ug tigulang, lalaki ug babaye, mohimo sa buluhaton sa pagpanagna. Busa, daghan ang makakat-on nga ang ‘tanang mosangpit sa ngalan ni Jehova pagaluwason.’—2:28-32.
Paghukom sa Kanasoran
Luwason ni Jehova ang iyang matinumanong katawhan sa dihang mopakanaog siya sa paghukom sa kanasoran. (Itandi ang Ezekiel 38:18-23; Pinadayag 16:14-16.) Ang Tiro, Sidon, ug Pilistia kinahanglang mobayad sa pagdagmal sa katawhan sa Diyos ug sa pagbaligya kanila ngadto sa pagkaulipon. Kuhaon ni Jehova ang mga binihag sa Juda ug sa Jerusalem, ug iyang hagiton ang iyang mga kaaway, nga nagaingon: “Balaana ang gubat!” Apan sila dili makadaog sa Diyos, kinsa nagahatag paghukom diha kanila sa simbolikong “walog ni Jehosaphat.” Bisan pa nga mouyog ang langit ug yuta, si Jehova maoy dalangpanan sa iyang katawhan. Ang matinumanon maluwas sa paghukom batok sa kanasoran ug magapahimulos sa kinabuhi ilalom sa samag paraisong mga kahimtang.—3:1-21.
Pagtulon-an nga hinumdoman: Kinahanglan una ang paghinulsol aron maluwas ang tawo sa panahon sa makalilisang nga adlaw ni Jehova. Ang pagkaduol niadtong adlawa angay mopalihok kanato sa paghimog balaang mga buhat ug diyosnong mga binuhatan. Siyempre, ang atong kaluwasan nagadepende sa pagdawat nga si Jehova lamang ang Diyos. Ug kon kita mosangpit sa iyang ngalan diha sa pagtuo, kita iyang luwason sa dihang ipakanaog niya ang paghukom sa kanasoran.
Ang tagna ni Joel mohatag kanato ug dugang pagkaon alang sa hunahuna. Gani, “ang dako ug ang makalilisang nga adlaw ni Jehova” duol na! Ang katawhan kinahanglang pasidan-an. Sama sa mga dulon sa tagna ni Joel, ginalaglag sa mga Saksi ni Jehova ang Kakristiyanohan pinaagi sa walay-hunong nga pagyagyag sa iyang espirituwal nga pagkawalay-bungang kahimtang. Kini ang nakapukaw sa kasuko ug pagbatok sa iyang mga pangulo, apan ang bisan unsang samag-kuta nga kababagan nga ilang iali sa dalan sa simbolikong mga dulon walay kapuslanan. Gibubo na ni Jehova ang iyang espiritu diha sa iyang katawhan, nagasangkap kanila sa pagsibya sa iyang mga paghukom. Busa, sa nahibiling panahon una pa sa makalilisang nga adlaw sa Diyos, kita kinahanglang bug-os makigbahin sa pagtabang sa uban sa ‘pagsangpit sa ngalan ni Jehova aron pagaluwason.’
[Kahon sa panid 30]
MGA TEKSTO SA BIBLIYA GITUKI
o 1:2—Mihatag pakigpulong si Joel sa “mga tigulang” nga nakapahisalaag sa nasod. Tungod kay “ang mga molupyo sa yuta” misunod niadtong bakak nga pagtultol, sila may tulobagon usab sa mga mata ni Jehova. Karong adlawa, ang relihiyosong mga lider sa Kakristiyanohan sa samang paagi nagapahisalaag sa ilang mga panon. Sama kang Joel, gitumong sa mga Saksi ni Jehova ang mga mensahe ngadto nianang klero nga matang. Bisan pa, ang mga tawo sa katibuk-an kinahanglang pagasangyawan sa Pulong sa Diyos tungod kay sila usab manubag kang Jehova.—Isaias 9:15-17; Roma 14:12.
o 2:1-10, 28—Ang mga Isrealinhon gipasidan-an nga kon sila mosupak sa Diyos, ang mga dulon ug ubang mga mananap mokaon sa ilang mga abot sa uma. (Deuteronomio 28:38-45) Sanglit wala man irekord sa Kasulatan ang insekto nga mihugpa sa Canaan sama sa gidaghanon nga gihisgotan ni Joel, ang hampak nga iyang gibatbat sa dayag maoy mahulagwayon. Sa tin-aw, ang tagna misugod sa pagkatuman sa Pentekostes 33 K.P., sa dihang misugod si Jehova sa ‘pagbubo sa iyang espiritu’ diha sa mga sumusunod ni Jesus, kinsa nagsakit sa mini nga mga relihiyonista pinaagi sa ilang hinatag sa Diyos nga mensahe. (Buhat 2:1, 14-21; 5:27-29) Ginahimo karon sa mga Saksi ni Jehova ang samang malaglagong buluhaton.
o 2:12,13—Sa karaang panahon, ang paggisi sa sapot maoy panggawas nga ekspresyon sa kaguol. (Genesis 37:29, 30; 44:13) Apan mabuhat kini sa walay katim-os, sa minaut. Gitin-aw ni Joel nga ang panggawas nga mga ekspresyon sa kaguol kulang pa. Ang mga tawo kinahanglang ‘mogisi sa ilang kasingkasing’ pinaagi sa pagpakitag kinasingkasing nga paghinulsol.
o 2:31,32—Si Jehova mohatag kaikyasan gikan sa kalaglagan alang sa mga matinumanon sama sa panahon ni Joel. Karong adlawa, niining “kataposang mga adlaw,” gipaposible sa Diyos ang kaluwasan pinaagi kang Jesu-Kristo. (2 Timoteo 3:1; Roma 5:8, 12; 6:23) Apan, pinaagi sa ngalan ni Jehova nga ang mga tawong makasasala magasangpit alang sa walay kataposang kaluwasan. Kini nagkahulogan sa pagkaila sa balaang ngalan, sa pagtahod niana sa bug-os, ug sa bug-os nga pagsalig sa Usa nga nagdala nianang ngalana. Busa kadtong nagasangpit sa ngalan ni Jehova diha sa pagtuo “pagaluwason” sa dihang ipakanaog sa Diyos ang iyang paghukom diha sa mga nasod sa panahon sa iyang “dako ug makalilisang nga adlaw.”—Sofonias 2:2, 3; 3:12; Roma 10:11-13.
o 3:2, 14—Ang simbolikong dapit sa pagpakanaog sa balaang paghukom sa “adlaw ni Jehova” gitawag “walog sa pagpakanaog sa paghukom.” Giterminohan usab kinig “ang walog ni Jehosaphat.” Kini tukma, kay ang ngalang Jehosaphat nagkahulogang si “Jehova Mao ang Maghuhukom.” Sa panahon sa pagmando ni Haring Jehosaphat, giluwas sa Diyos ang Juda ug Jerusalem gikan sa mga kasundalohan ni Moab, Ammon, ug sa bukirong dapit sa Seir, nga nagpalibog kanila ug sa pagpatay sa usag usa. (2 Cronicas 20:1-30) Sa atong adlaw, “ang walog ni Jehosaphat” nag-alagad ingong simbolo sa pig-anan sa parras nga diin ang mga nasod pug-on samag mga parras tungod sa pagdagmal sa katawhan ni Jehova.
o 3:6—Ang Tiro, Sidon, ug Pilistia sad-an sa pagbaligya sa katawhan sa Juda ug sa Jerusalem sa pagkaulipon ngadto sa mga Grego. Tingali, ang ubang mga Hudiyo nga nadakpan sa ubang mga nasod midangat sa mga kamot sa mga taga Tiro, Sidon, ug Pilistia nga magbabaligyag mga ulipon. Labi pang grabe, tingali kining mga nasora naghimo sa mga Hudiyo nga mga ulipon kinsa mikalagiw gikan sa ilang mga kaaway. Bisan unsa pay kahimtang, panubagon sa Diyos kadtong nagnegosyog tawhanong kinabuhi tungod sa pagdagmal sa iyang katawhan. Kini nagpakita kon unsay naghulat sa mga nasod nga naglutos sa mga alagad ni Jehova karong adlawa.
[Kapsiyon sa panid 31]
Pictorial Archive (Duol sa Sidlakang Kasaysayan) Est.