Paglig-on sa Atong Pagsalig sa Pagkamatarong sa Diyos

“Aron ang imong pagsalig maanaa kang Jehova ako nagahatag kanimo ug kahibalo.”​—PROVERBIO 22:19.

1, 2. (a) Nganong ang mga Saksi ni Jehova nagpasundayag ug pagsalig kang Jehova? (Proverbio 22:19) (b) Unsay nagpaila nga kinahanglang palig-onon pa sa ubang mga tawo ang ilang pagsalig kang Jehova?

ANG matuod nga mga Kristohanon gipanalanginan ug tukmang kahibalo bahin kang Jehova ug sa iyang mga katuyoan. Ang ‘matinumanon ug maalamong ulipon’ mahigugmaong nagtagana kanila ug espirituwal nga “pagkaon sa hustong panahon.” (Mateo 24:45) Ang kahibalo nga ilang mabatonan mohatag kanila ug malig-ong pundasyon nga mahimong sukaranan sa pagsalig sa Diyos. Busa, ingong usa ka pundok, ang mga Saksi ni Jehova nagpasundayag ug talagsaong pagsalig kang Jehova ug sa iyang pagkamatarong.

² Apan, mopatim-aw nga ingong mga indibiduwal kinahanglang palig-onon pa sa ubang mga Saksi ang maong pagsalig. Ang Sosyedad usahay makadawat ug mga sulat nga nagpahayag ug pagduhaduha mahitungod sa mga pagpatin-aw nga ihatag sa mga publikasyon niini. Kini nga mga pagduhaduha tingali maoy usa ka reaksiyon sa mga pagpasibo sa pagsabot, o kaha may kalabotan kini sa mga butang nga nakaapektar sa nangutana, ilabina sa emosyonal nga paagi.​—Itandi ang Juan 6:60, 61.

3. Unsay mahimong mahitabo bisan sa matinumanong mga alagad ni Jehova, ug ngano?

³ Bisan ang tinuod nga mga alagad ni Jehova nakaeksperyensiya sa pagkatinuod sa Ecclesiastes 9:11: “Ako mibalik sa pagtan-aw ilalom sa adlaw nga ang lumba dili alang sa matulin, ni ang gubat alang sa mga mabaskog, ni ang tinapay alang sa maalamon, ni ang bahandi alang sa mga tawo sa kahibalo, ni ang kaluoy alang sa mga tawong may kahibalo; tungod kay ang panahon ug wala-dahomang mga hitabo mahinabo kanilang tanan.” Sa unsang paagi tinuod kini diha sa pinalapad, o espirituwal, nga diwa? Kita tingali may nailhang mga Kristohanon nga dali kaayong mopadapat sa tambag sa Bibliya, kusganon sa pagdepensa sa kamatuoran, maalamon sa pagpadapat sa mga prinsipyo sa Bibliya, ug madasigon sa pagtinguhag tukmang kahibalo. Apan, tungod sa “panahon ug wala-dahomang hitabo,” nakita sa uban karon ang ilang kaugalingon nga limitado tungod sa usa ka aksidente o sa pagkatigulang. Sila tingali nagduhaduha kon sila makasulod pa ngadto sa bag-ong kalibotan sa Diyos nga dili na kinahanglang mag-antos pa sa kamatayon.

4, 5. Nganong ang mga Kristohanon walay katarongan sa pagwala sa ilang pagsalig sa pagkamatarong ni Jehova?

⁴ Kon ang usa ka Kristohanon mamatyan sa iyang kapikas sa kaminyoon, ang kasakit ug ang pagbati sa pagkanamatyan grabe kaayo. Silang duha ingong magtiayon, tingali nakaalagad kang Jehova sa daghang tuig o kaha sa daghang dekada. Ang namatyang kapikas nahibalo nga ang kamatayon makaputol sa bugkos sa kaminyoon.a (1 Corinto 7:39) Karon, aron ang iyang pagsalig dili madaot, kinahanglang kontrolahon niya ang iyang mga pagbati.​—Itandi ang Marcos 16:8.

⁵ Pagkamaalamong lantawon ang kamatayon sa usa ka kapikas, ginikanan, anak, o suod nga Kristohanong higala ingong higayon sa pagpakitag pagsalig sa pagkamatarong ni Jehova! Bisan atubangan sa personal nga kapildihan, kita makasalig nga si Jehova matarong. Kita makasalig nga ang tanang makabaton ug kinabuhing dayon​—pinaagi man sa pagkalabang-buhi o pinaagi sa pagkabanhaw​—magmalipayon. Mahitungod sa Diyos, ang salmista nag-ingon: “Imong gibukhad ang imong kamot ug nagtagbaw sa tinguha sa tagsatagsa ka buhing butang. Matarong si Jehova sa tanan niyang mga dalan ug maunongon sa tanan niyang mga buhat. Si Jehova haduol sa tanang nagsangpit kaniya, sa tanan nga nagsangpit kaniya sa pagkamatinud-anon. Ang tinguha niadtong may kahadlok kaniya iyang tumanon, ug ang ilang pagtuaw ug panabang iyang patalinghogan, ug siya magaluwas kanila.”​—Salmo 145:16-19.

Kon Kita Mobati nga Nag-antos nga Wala Kinahanglana

6, 7. (a) Ngano kahang ang ubang mga Saksi nga nag-antos sa miagi karon lahi na ug pagsabot? (b) Nganong dili nato angay lantawon si Jehova ingong daotan tungod sa pagtugot sa maong pag-antos sa nangagi?

⁶ Sa nangagi, ang ubang mga Saksi nag-antos sa pagdumili sa pagpakigbahin sa usa ka buhat nga itugot na karon sa ilang konsensiya. Pananglitan, tingali mao kini ang ilang gipili sa nangaging mga tuig labot sa pipila ka matang sa serbisyo sibil. Ang usa ka igsoong lalaki tingali karon mobati nga ang iyang konsensiya motugot na sa pagbuhat sa maong butang nga walay paglapas sa iyang Kristohanong neyutralidad labot sa presenteng sistema sa mga butang.

⁷ Daotan ba sa bahin ni Jehova sa pagtugot kaniya sa pagpaantos tungod sa pagsalikway sa butang nga karon buhaton na tingali niya nga walay mga kabilinggan? Ang kadaghanan nga nakaeksperyensiya niana dili ingon niana ug paghunahuna. Hinunoa, sila nalipay nga sila nakahigayon sa pagpasundayag sa publiko ug sa dayag nga sila determinadong magpabiling malig-on bahin sa isyu sa unibersal nga pagkasoberano. (Itandi ang Job 27:5.) Unsay katarongang magbasol ang si bisan kinsa sa pagsunod sa iyang konsensiya sa pagbarog nga malig-on alang kang Jehova? Pinaagi sa maunongong pagtuboy sa Kristohanong mga prinsipyo ingon sa ilang pagsabot niini o pinaagi sa pagsanong sa mga pangagda sa konsensiya, sila nagpamatuod nga takos sa panaghigala ni Jehova. Sa pagkatinuod, maalamong likayan ang usa ka dalan nga makatugaw sa konsensiya o nga lagmit makapandol sa uban. Kita makahunahuna may kalabotan niini sa panig-ingnan nga gipakita ni apostol Pablo.​—1 Corinto 8:12, 13; 10:31-33.

8. Nganong ang Hudiyohanong mga Kristohanon, nga kaniadto nagtuman sa Kasugoan, walay katarongan sa pagduhaduha sa pagkamatarong ni Jehova?

⁸ Aron makapahimuot kang Jehova, ang mga Hudiyo obligado sa pagsunod sa Napulo ka Sugo ug usab sa nagkalainlaing dugang nga mga balaod nga duolan sa 600. Sa ulahi, ilalom sa Kristohanong kahikayan, ang pagsugot niining mga sugoa dili na usa ka kinahanglanon sa pag-alagad kang Jehova, dili bisan alang sa unodnong mga Hudiyo. Ang mga kasugoan nga dili na kinahanglang tumanon mao kadtong may kalabotan sa sirkunsisyon, pagsunod sa Igpapahulay, pagtanyag ug mga halad nga mananap, ug pagbantay sa pipila ka gidili nga mga pagkaon. (1 Corinto 7:19; 10:25; Colosas 2:16, 17; Hebreohanon 10:1, 11-14) Ang mga Hudiyo​—lakip sa mga apostoles​—kinsa nangahimong mga Kristohanon wala na obligaha sa pagsunod sa mga kasugoan nga obligado sila sa pagtuman sa ilalom pa sila sa pakigtugon sa Kasugoan. Sila ba nagreklamo nga ang kahikayan sa Diyos daotan nga nagpaobligar kanila kaniadto sa pagtuman sa mga butang nga dili na kinahanglanon? Dili, sila nalipay sa napauswag nga pagsabot sa mga katuyoan ni Jehova.​—Buhat 16:4, 5.

9. Unsay tinuod diha sa ubang mga Saksi, apan nganong sila walay katarongang magbasol?

⁹ Sa modernong mga panahon, may pipila ka Saksi nga estrikto kaayo sa ilang panghunahuna bahin sa kon unsay ilang buhaton o dili buhaton. Tungod niana sila labawng nag-antos kay sa uban. Sa ulahi, ang nag-uswag nga kahibalo nagtabang kanila sa pagpadako sa ilang panghunahuna sa mga butang. Apan sila walay katarongang magbasol nga nakalihok sa miagi nga kaharmonya sa ilang konsensiya, bisan pag kini tingali nakahatag ug dugang pag-antos. Dalayegon gayod nga sila nagpasundayag sa ilang pagkamainandamon sa pag-antos diha sa pagkamatinumanon kang Jehova, sa ‘paghimo sa tanang butang alang sa maayong balita.’ Panalanginan ni Jehova kanang matanga sa diyosnong pagkamahinalaron. (1 Corinto 9:23; Hebreohanon 6:10) Si apostol Pedro nagsulat nga maalamon: “Kon, dihang nagahimo kamog maayo ug kamo nagaantos, kamo nagaagwanta niini, butang kini nga kahimut-anan sa Diyos.”​—1 Pedro 2:20.

Pagkat-on Gikan Kang Jonas

10, 11. Sa unsang paagi si Jonas nagpakita nga walay pagsalig kang Jehova (a) sa dihang gihatagan ug buluhaton sa pag-adto sa Nineve? (b) sa dihang wala laglaga sa Diyos ang mga taga-Nineve?

¹⁰ Sa dihang gisugo sa pag-adto sa Nineve, si Jonas nagpakitag pagkawalay-apresasyon sa pagsalig nga gipakita ni Jehova kaniya. Human sa usa ka makuyawng kasinatian nga miresulta sa iyang kaugalingong pagpanuko sa pagsugot, si Jonas naulian sa iyang maayong panimuot, nakaamgo sa iyang sayop, midawat sa iyang langyawng buluhaton, ug nagpasidaan sa mga taga-Nineve bahin sa umaabot nga kalaglagan. Dayon miabot ang wala dahoma: Tungod sa mahinulsolong tinamdan sa mga taga-Nineve, mihukom si Jehova sa dili paglaglag kanila.​—Jonas 1:1–​3:10.

¹¹ Unsay reaksiyon ni Jonas? Naglagot, nagreklamo siya sa Diyos diha sa pag-ampo. Ang diwa sa iyang pagbagulbol mao kini: ‘Daan pa ko nga mao gayod kini ang mahitabo. Mao bitaw nga dili ko gustong moadto sa Nineve sa sinugdanan pa. Karon, human sa akong tanang naagoman, apil ang kahadlok ug kaulawan sa pagkalamoy sa usa ka dakong isda, ug human sa akong paghago sa pagpasidaan sa mga taga-Nineve sa umaabot nga kalaglagan, kini lang! Ang tanan kong paghago ug pag-antos walay kapuslanan! Mas maayo pang mamatay ako!’​—Jonas 4:1-3.

12. Unsay atong makat-onan gikan sa naagoman ni Jonas?

¹² Si Jonas ba may maayong katarongan sa pagreklamo? Daotan ba si Jehova sa pagpaabot sa kaluoy ngadto sa mahinulsolong mga mamumuhat ug daotan? Sa pagkatinuod, angay untang malipay si Jonas; tinagpulo ka libong tawo ang nakalingkawas sa kalaglagan! (Jonas 4:11) Apan ang iyang dili-matinahuron, reklamador nga tinamdan nagpakita nga siya wala magpasundayag ug dakong pagsalig sa pagkamatarong ni Jehova. Sobra ra kaayo siyang nakahunahuna sa iyang kaugalingon ug wala kaayo maghunahuna sa uban. Magkat-on kita gikan kang Jonas pinaagi sa pagbutang sa atong kaugalingon ug sa atong kaugalingong mga pagbati nga ikaduha. Magmakombinsido kita nga ang pagsugot kang Jehova, pagsunod sa direksiyon nga gihatag pinaagi sa iyang organisasyon ug pagdawat sa iyang mga desisyon, mao ang hustong butang nga pagahimoon. Kita kombinsido nga “mosangpot ra kini ug maayo alang niadtong may kahadlok sa matuod nga Diyos.”​—Ecclesiastes 8:12.

Karon na ang Panahon sa Paglig-on sa Atong Pagsalig!

13. Sa unsang paagi atong mapalig-on ang atong pagsalig kang Jehova?

¹³ Ang paglig-on sa atong pagsalig kang Jehova mao ang dalan sa kaalam. (Proverbio 3:5-8) Sa pagkamatuod, kinahanglang mohimo pa kita ug labaw pa kay sa pag-ampo nga tabangan kita ni Jehova nga mahimong mas masaligon. Ang pagsalig modako pinasikad sa tukmang kahibalo, busa kinahanglang himoon nato ang personal nga pagtuon sa Bibliya, pagbasa sa Bibliya ug sa nagpatin-aw-sa-Bibliya nga literatura, nga bahin sa atong adlaw-adlawng rutina. Ang regular nga pagtambong sa Kristohanong mga tigom hinungdanon, maingon man sa maayong pagpangandam ug pagpakigbahin kutob sa maarangan. Ang pagbatasan sa pagpakigbahin sa mga kamatuoran sa Bibliya ngadto sa uban, nga mataktikanhong magbuntog sa mga pagsupak, magpalalom usab sa atong pagsalig kang Jehova ug sa iyang Pulong. Sa ingon kita mahimong mas masuod pa kaniya sa adlaw-adlaw.

14. Nganong ang katawhan sa Diyos sa dili madugay kinahanglang magpasundayag sa ilang pagsalig nga labaw pa sukad masukad kang Jehova?

¹⁴ Sa haduol nga umaabot, ang kinadak-ang panahon sa kasakitan nga sukad mohampak sa tawhanong rasa kalit nga moabot. (Mateo 24:21) Sa dihang kini moabot na, kinahanglang ang mga alagad sa Diyos magpasundayag ug pagsalig nga labaw pa sukad masukad sa pagkamatarong ni Jehova ug sa paggiya nga gitagana sa iyang organisasyon. Sa simbolikong paagi, sila sa ingon masaligong mosugot sa sugo sa Diyos: “Lakaw kamo katawhan ko, sulod ngadto sa inyong mga lawak, ug sirad-i ang inyong mga pultahan. Panago kamo sa makadiyot hangtod molabay ang kasuko.” (Isaias 26:20) Sila nakasulod na ngadto sa mapanalipdanong palibot sa kapin sa 85,000 ka kongregasyon diha sa 232 ka kayutaan. Kon unsay lain pang idugang sa sugo nga “sulod ngadto sa inyong mga lawak,” kita makasalig nga tabangan kita ni Jehova sa pagtuman niini.

15. Sa unsang paagi ang pagsalig napasiugda sa panahon sa 1998, ug nganong tukma kaayo kini?

¹⁵ Hinungdanong palig-onon nato ang atong pagsalig karon. Kon kita walay pagsalig sa atong Kristohanong mga igsoon, sa organisasyon ni Jehova ug, labaw sa tanan, kang Jehova mismo, ang kaluwasan imposible. Busa pagkatukma nga sa 1998, ang mga Saksi ni Jehova sa tibuok kalibotan sublisubling gipahinumdoman, pinaagi sa mga pulong sa ilang teksto sa tuig, nga ang “tanang nanagtawag sa ngalan ni Jehova mamaluwas”! (Roma 10:13) Maylabot niana nga kita kinahanglang magpadayong magmasaligon. Kon kita makamatikod ug bisag gamay lang nga pagduhaduha niini nga pagsalig, kinahanglang molihok kita sa pagtul-id niini karon, oo, karon.

Ang Paghukom ni Jehova Matarong Unya

16. Unsay mahitabo sa pagsalig kon kini dili ugmaron, ug sa unsang paagi atong mapugngan kining mahitabo?

¹⁶ Sa Hebreohanon 3:14, ang dinihogang mga Kristohanon gipasidan-an: “Kita sa pagkatinuod mahimong mga mag-aambit sa Kristo kon kita mangupot pag-ayo sa pagsalig nga atong nabatonan sa sinugdan nga lig-on hangtod sa kataposan.” Sa prinsipyo, kining mga pulonga aplikado usab sa mga Kristohanon nga adunay yutan-ong paglaom. Ang sinugdanang pagsalig mawala kon kini dili ugmaron. Pagkahinungdanon nga magpadayon kita sa pagpangagpas sa tukmang kahibalo, sa ingon nagpalig-on sa pundasyon nga diha niini gibase ang atong pagsalig!

17. Nganong kita makasalig nga kon bahin sa kaluwasan, si Jesus magahukom sa hustong paagi?

¹⁷ Ang tanang nasod sa dili madugay pagasusihon ni Kristo aron iyang ‘malain ang katawhan gikan sa usag usa, maingon sa usa ka magbalantay sa hayop nga naglain sa mga karnero gikan sa mga kanding.’ (Mateo 25:31-33) Kita makasalig nga si Kristo matarong sa paghukom kon kinsa ang takos sa kaluwasan. Gihatagan siya ni Jehova ug kaalam, pagsabot, ug ubang hinungdanong mga hiyas ‘sa paghukom sa gipuy-ang yuta sa pagkamatarong.’ (Buhat 17:30, 31) Himoon nato nga ang atong pagtuo mahisama nianang kang Abraham, kinsa miingon: “Halayo kanimo [Jehova] ang pagbuhat ug ingon niana nga patyon mo ang tawong matarong uban sa tawong daotan ug nga sa ingon ang tawong matarong managsama sa daotan! Kana halayo kanimo. Dili ba ang Maghuhukom sa tibuok nga yuta magabuhat sa matarong?”​—Genesis 18:25.

18. Nganong dili kita angay mabalaka kaayo bahin sa butang nga kita tingali walay nahibaloan sa pagkakaron?

¹⁸ Uban sa bug-os nga pagsalig sa pagkamatarong ni Jehova, kita dili kinahanglang mabalaka bahin sa pagpangitag mga tubag sa mga pangutana sama sa: ‘Sa unsang paagi pagahukman ang mga masuso ug gagmayng kabataan? Posible kaha nga daghan pa kaayong mga tawo ang wala pa maabot sa maayong balita sa dihang moabot ang Armagedon? Unsa kahay ikasulti bahin sa mga buang? Unsa kaha ang bahin sa . . . ?’ Tugotan ta, sa pagkakaron kita tingali wala mahibalo kon unsaon pagsulbad ni Jehova kining mga isyuha. Apan, iyang sulbaron kini sa matarong ug maluluy-ong paagi. Dili gayod kita magduhaduha niana. Sa pagkatinuod, kita tingali mahibulong ug malipay sa pagtan-aw kaniya nga sulbaron kini sa usa ka paagi nga wala gayod nato mapalandong.​—Itandi ang Job 42:3; Salmo 78:11-16; 136:4-9; Mateo 15:31; Lucas 2:47.

19, 20. (a) Nganong dili sayop ang pagpatugbaw ug makataronganong mga pangutana? (b) Kanus-a itagana ni Jehova ang gikinahanglang mga tubag?

¹⁹ Ang organisasyon ni Jehova dili kay dili magtagad sa tim-os, tukma sa panahong mga pangutana, ingon sa sayop nga gipatuo sa pipila ka mga magsusupak. (1 Pedro 1:10-12) Hinunoa, ang Bibliya nagtambag nga atong likayan ang binuang, mapangagpason nga mga pangutana. (Tito 3:9) Ang pagpatugbaw ug makataronganong mga pangutana ug pagsusi sa Pulong sa Diyos ug sa Kristohanong mga publikasyon aron makakitag mga tubag sa Kasulatan makadugang sa atong tukmang kahibalo ug busa makalig-on sa atong pagsalig kang Jehova. Ang organisasyon nagsunod sa panig-ingnan ni Jesus. Siya nagpugong sa pagkomento bahin sa mga pangutana diin ang tukmang panahon sa pagtubag wala pa moabot. Siya nagpatin-aw: “Daghan pang butang nga akong isulti kaninyo, apan kamo dili pa makadaog pagdala niini sa pagkakaron.” (Juan 16:12) Siya usab miadmitir nga adunay ubang mga butang nga siya wala mahibalo mismo nianang higayona.​—Mateo 24:36.

²⁰ Si Jehova daghan pa kaayog ibutyag. Pagkamaalamong maghulat kaniya, nga masaligon nga ang panahon sa iyang pagpadayag sa iyang mga katuyoan husto sa pagtagana sa mga panginahanglan sa higayon. Kita makasalig nga sa dihang moabot ang gitakdang panahon ni Jehova, malipay kita nga makabaton ug dugang pagsabot sa iyang mga paagi. Oo, kita pagagantihan, basta bug-os kitang mosalig kang Jehova ug sa organisasyon nga iyang gigamit. Ang Proverbio 14:26 nagpasalig kanato: “Ang pagkahadlok kang Jehova adunay malig-ong pagsalig, ug ang iyang mga anak adunay usa ka dapit nga dalangpanan.”

[Mga footnote]

Unsay Imong Hunahuna?

◻ Nganong dili maalamong tugotan ang mga pagbati nga modaot sa atong pagsalig kang Jehova?

◻ Unsay atong makat-onan gikan sa naagoman ni Jonas?

◻ Nganong ang pagtuon sa Bibliya ug pagtambong sa tigom hinungdanon kaayo?

[Hulagway sa panid 16]

Bisan atubangan sa personal nga kapildihan, kita makasalig nga si Jehova matarong

[Mga hulagway sa panid 18]

Segurado ka ba nga ang imong pagsalig anaa kang Jehova?