Kalinaw sa Kalibotan—Sa Unsang Paagi ug Kanus-a?
ANG kalinaw sa kalibotan maoy usa sa labing minahal nga mga damgo sa katawhan. Apan ang paghunahunang kini makab-ot sa tawhanong mga gobyerno maoy usa ka panghanduraw. Ang mga pagtulon-an sa kasaysayan mouyon sa gipamatud-an sa Bibliya: “Dili iya sa tawo nga nagalakaw ang pagtultol sa iyang lakang.”—Jeremias 10:23.
Ang labing gamhanan lamang nga Maglalalang sa uniberso, si Jehova nga Diyos, ang makapatunghag malungtarong kalinaw. Ug iyang gihatag ang iyang saad nga kana iyang buhaton. Sa unsang paagi? Dili pinaagi sa tawhanong mga paningkamot kondili pinaagi sa butang gihimo ni Jesu-Kristo nga tema sa tanan niyang pagtulon-an—ang langitnong Gingharian sa Diyos. (Mateo 6:9, 10) Ang Magmamando nianang Ginghariana, si Kristo Jesus, gitawag diha sa tagna ang matuod nga “Prinsipe sa Pakigdait.” (Isaias 9:6) Ug ang saad sa Diyos mao nga ilalom sa pagmando sa Gingharian aduna unyay “kadagaya sa pakigdait” sa tibuok yuta.—Salmo 72:7.
Ugaling, ang Bibliya tin-awng nagapakita nga, sa dili pa kini mahitabo, kining naggubatay nga sistema sa mga butang karon kinahanglang wagtangon. (1 Juan 2:15-17) Ug ang tagna sa Bibliya nagapailang haduol na ang kalaglagan niini.—Mateo 24:3-14, 22, 34; Lucas 21:25-28; 1 Timoteo 3:1-5.
Busa, kini mao ang dili-mausab nga katuyoan sa Diyos “nga dili makabakak.” (Tito 1:2) Sa ingon, dili ba angay nga ang relihiyosong mga pangulo, ilabina kadtong iya sa Kakristiyanohan, nagtanyag untag mga pag-ampo nga nahiuyon sa maong katuyoan? Dili ba angay usab nga sila molihok nga nahiuyon nianang katuyoana? Bisan pa niana, walay mausa niadtong relihiyosong mga hawas sa Assisi ang naghisgot bahin sa haduol nga kalaglagan niining sistemaha ug ang umaabot nga pagmando sa Gingharian sa Diyos, ang pangunang mensahe ni Jesus ug sa Pulong sa Diyos.
Kini dili katingad-an kay kadtong mga relihiyon wala magtudlo sa ilang mga sumusunod sa kamatuoran mahitungod sa mga katuyoan sa Diyos. Hinunoa, sila maoy bahin niining kalibotana ilalom kang Satanas, ug sila nagahatag sa bug-os nga pagtagad sa ilang mga paningkamot sa pagpatunhay niini. Ingong sangpotanan, ang ilang katawhan nabahinbahin, nga nagbutang ug labawng pagtuo sa nasyonalismo inay kay sa Gingharian sa Diyos. Kini mihatod kanila ngadto sa pagpinatyanay sa usag usa diha sa mga away niining kalibotana. Busa, kining mga pulonga mapadapat ngadto sa maong mga relihiyon: “Mga mananapaw, wala ba kamo mahibalo nga ang pagpakighigala sa kalibotan maoy pagpakig-away sa Diyos? Busa, si bisan kinsa nga buot mahimong higala sa kalibotan nagahimo sa iyang kaugalingon nga kaaway sa Diyos.”—Santiago 4:4.
Busa, ang mga hangyo alang sa kalinaw sa maong mga relihiyon dili pamatian. Kana nagapahinumdom sa kahimtang sa panahon sa propetang Jeremias. Balik niadto ang bakak relihiyosong mga propeta mipahayag: “Adunay kalinaw! Adunay kalinaw!” Apan, sa pagkamatuod, ‘walay kalinaw’ alang kanila.—Jeremias 6:14.
Tibuok-Kalibotang Edukasyonal nga Buluhaton
Bisan pa niana, ang katuyoan sa Diyos mamatuman. (Isaias 55:11) Busa karong adlawa nagapadayon ang tibuok-kalibotang buluhaton sa pagtudlo sa Bibliya. Kini nahiuyon sa tagna sa Mateo 24:14, nga nagaingon: “Ug kining maayong balita sa gingharian igawali sa tibuok gipuy-ang yuta alang sa usa ka pamatuod ngadto sa tanang nasod; ug unya ang kataposan moabot.”
Sanglit kadtong bahin niining tibuok-yutang kalihokan sa matuod nga pagsimba nagapasakop ngadto sa mga kinahanglanon sa Diyos, ilang nahanaw ang makapabahin nga impluwensiya sa nasyonalismo sa ilang taliwala. Sila nahimong malinawong kapunongan sa mga tawo nga nahigugma sa usag usa ug nagakinabuhi dapig sa Gingharian sa Diyos. Ingong sangpotanan, sila nagatuman sa makalipayng tagna sa Miqueas 4, nga nagaingon:
“Ug mahitabo gayod sa kataposang bahin sa mga adlaw nga ang bukid sa balay ni Jehova [iyang matuod nga pagsimba] matukod nga malig-on ibabaw sa tumoy sa kabukiran [tanang ubang matang sa pagsimba], . . . ug niana magaganayan ang mga katawhan. Ug daghang kanasoran moadto ug moingon: ‘Umari kamo, kamong katawhan, ug manungas kita ngadto sa bukid ni Jehova ug ngadto sa balay sa Diyos ni Jacob; ug kita iyang pagatudloan mahitungod sa iyang mga dalan, ug kita magalakaw sa iyang mga alagianan, . . . Ug ilang pagasalsalon ang ilang mga espada ngadto sa mga punta sa daro ug ang ilang mga bangkaw nga mga galab. Sila dili na mobakyaw sa espada, ang nasod batok sa nasod, ni makakat-on pa sila sa gubat.”—Miqueas 4:1-3.
Tin-aw kaayo nga kining tagnaa wala gayod matuman sa panagkatigom sa Assisi. Ang mga tawong nagaganayan ngadto sa simbolikong bukid sa maputli nga pagsimba maoy mga tawong ginatudloan sa mahigugmaon-sa-pakigdait nga mga paagi ni Jehova ug si kinsa nagalakaw sumala sa iyang katuyoan ug mga kinahanglanon. Sila dili katawhan nga nagapabilin sa ilang unang mga relihiyon, nga nabahin sa nagkasumpakiayng mga doktrina ug mga tulomanon. Hinunoa, sila natigom sumala sa gitagna sa Miqueas 2:12: “Sa panaghiusa sila akong igapahimutang, sama sa usa ka panon sa toril.”
Ang resulta sa maong edukasyonal nga buluhaton mao nga kapin sa tulo ka bilyong katawhan sa tibuok yuta nahimong mga magmamantala sa “maayong balita sa Gingharian.” Sila nahimong mga tawong malinawon, ug ilalom sa bisan unsang kahimtang sila dili mohunos sa kinabuhi sa ilang isigkatawo. Sumala sa gitagna ni Miqueas, sila nakasalsal na sa “ilang mga espada ngadto sa mga punta sa daro . . . ; ni sila makakat-on pa sa gubat.” Ug ilang ginatudloan ang minilyong ubang interesadong tawo sa tibuok yuta.
Ang mga Saksi ni Jehova nagatan-aw sa unahan sa may panaghiusang bag-ong kalibotan nga niana ang Miqueas 4:4 mamatuman ngadto sa tanang tawo: “Sila magalingkod gayod, ang matag usa ilalom sa iyang kahoy nga parras ug ilalom sa iyang kahoy nga igira, ug walay mausa ang magahadlok kanila; kay ang baba mismo ni Jehova sa [langitnong] mga panon ang nagsulti niini.” Sunod, sa bersikulo 5, si Miqueas nagapalahi niadtong nagasimba sa daghang bakak nga mga diyos ug niadtong nagasimba sa usa ka matuod nga Diyos, nga nagaingon: “Ang tanang katawhan, sa ilang bahin, magalakaw sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos hangtod sa panahong walay katinoan, bisan sa walay kataposan.” Dayag, ang ngalan sa Diyos wala gani hisgoti didto sa Assisi. Bisan pa niana, dili ba nimo buot mahibalo bahin niining Diyos sa Bibliya? Ang mga Saksi ni Jehova malipay sa pagtabang kanimo niini.
[Letrato sa panid 12]
Kinsa ba gayod ang nagsalsal sa ilang mga espada ngadto sa mga punta sa daro?