“Panalangin Hangtod nga Wala nay Panginahanglan”

1, 2. (a) Unsang mapuslanong mga desisyon ang mahimong himoon sa matag usa kanato? (b) Ang pagkatuman sa unsang tagna nga may kalangkitan sa mga panalangin ang atong matagamtam?

ANG atong panahon karon maoy panahon sa paghukom ug sa mga panalangin. Karon maoy panahon sa pag-us-os sa relihiyon ug sa espirituwal nga kapasig-ulian. Segurado nga gusto nimo ang panalangin ug ang maayong mga resulta karon ug sa umaabot tungod sa espirituwal nga kapasig-ulian! Apan sa unsang paagi segurado nimong maangkon kanang mga butanga? Ang tubag nalangkit sa usa ka tagna nga adunay dakong katumanan pagsugod gayod sa “kataposang mga adlaw” niadtong 1914. (2 Timoteo 3:1) Si Malaquias mitagna: “‘Moabot sa Iyang templo ang matuod nga Ginoo [Jehova], nga inyong gipangita, ug ang mensahero sa pakigsaad nga inyong gikahimut-an. Tan-awa! Siya moabot gayod,’ miingon si Jehova sa mga panon.”—Malaquias 3:1.

² Ang maong tagna nga adunay dakong kahulogan diha sa imong kinabuhi makaplagan sa kataposan sa 12 ka matagnaong mga basahon. Samtang taposon nato ang atong paghisgot niini, ilabinang hinungdanon ang gisulat ni Malaquias. Nalakip sa iyang basahon ang hinungdanong instruksiyon nga maghatag kanimo ug sa ubang mga alagad ni Jehova ug kahigayonan nga makadawat ug “panalangin hangtod nga wala nay panginahanglan.” (Malaquias 3:10) Atong susihon pag-ayo ang kapitulo 3 sa basahon ni Malaquias.

ANG PANAHON SA ESPIRITUWAL NGA PAGHINLO

3. Unsang panghitabo taliwala sa katawhan sa Diyos ang misangko sa pagkapili sa “Israel sa Diyos”?

³ Paglabay ug mga lima ka siglo sukad sa panahon ni Malaquias, si Jehova, nga gihawasan ni Kristo (ang ‘mensahero sa Diyos sa Abrahamikong pakigsaad’), miabot sa literal nga templo sa Jerusalem aron sa paghukom sa Iyang katawhang may pakigsaad kaniya. Sa katibuk-an, ang maong nasod napamatud-an nga dili takos sa padayon nga pag-uyon ni Jehova mao nga iya kanang gisalikway. (Mateo 23:37, 38) Imong makita ang pamatuod niana sa nahitabo niadtong 70 K.P. Makatino ka nga ang Diyos mipili hinuon sa “Israel sa Diyos,” nga maoy usa ka espirituwal nga nasod nga gilangkoban ug 144,000 nga gikuha gikan sa tanang kanasoran. (Galacia 6:16; Roma 3:25, 26) Apan kadto dili mao ang kataposang katumanan sa tagna ni Malaquias. Gipunting usab niini ang mga panahon karon ug kini laktod nga nalangkit sa imong mga gilaoman nga “panalangin hangtod nga wala nay panginahanglan.”

4. Unsay kinahanglang matubag sa paglingkod na ni Jesus sa trono niadtong 1914?

⁴ Ang pagkatuman sa tagna sa Bibliya nagpamatuod nga niadtong 1914, si Jesu-Kristo gipalingkod ingong Hari sa langitnong Gingharian ni Jehova. Unya miabot ang panahon nga si Jesus magpaila sa grupo sa mga Kristohanon nga takos sa pag-uyon sa Diyos. Kinsay makapasar sa pagsulay sa espirituwal nga kaputli? Makaplagan nimo ang tubag nga gipasabot sa mga pulong ni Malaquias: “Kinsa ang makaantos sa adlaw sa iyang pag-abot, ug kinsa ang makabarog sa dihang siya mopakita na? Kay siya mahisama sa kalayo sa usa ka tigdalisay.” (Malaquias 3:2) Kanus-a ug sa unsang paagi miabot si Jehova sa iyang “templo” aron sa paghukom?

5, 6. (a) Sa dihang si Jehova miabot sa iyang espirituwal nga templo aron sa pagsusi niana, unsay iyang nakaplagan taliwala sa kinabag-an sa nag-angkong mga magsisimba? (b) Unsay gikinahanglan sa dinihogan-sa-espiritung mga alagad sa Diyos?

⁵ Ang Diyos dayag nga wala moabot sa usa ka templo nga binuhat sa bato ug semento. Ang kataposang literal nga templo alang sa matuod nga pagsimba nalaglag niadtong 70 K.P. Sa kasukwahi, si Jehova miabot sa espirituwal nga templo, ang kahikayan nga pinaagi niana ang mga tawo makaduol ug makasimba kaniya pinasukad sa halad lukat ni Jesus. (Hebreohanon 9:2-10, 23-28) Ang mga iglesya sa Kakristiyanohan dayag nga dili mao ang naglangkob sa maong espirituwal nga templo, kay sila bahin man sa usa ka relihiyosong sistema nga sad-an sa pag-ulag dugo ug sa espirituwal nga pagpakighilawas, usa ka sistema nga nagdasig ug bakak nga mga pagtulon-an inay sa maputling pagsimba. Si Jehova nahimong “matulin nga saksi batok” kanila, ug nahibalo ka nga makataronganon ang iyang dili-paborableng hukom. (Malaquias 3:5) Bisan pa niana, human sa pagkatukod sa Gingharian sa Diyos, dihay usa ka grupo sa matuod nga mga Kristohanon nga nag-alagad diha sa mga sawang sa espirituwal nga templo sa Diyos nga nagpasundayag sa ilang pagkamaunongon ngadto sa Diyos latas sa grabeng mga pagsulay. Bisan pa niana, bisan kadtong mga dinihogan kinahanglang dalisayon. Gihisgotan kana sa mga sinulat sa 12 ka manalagna, kay naundan kinig makapalipay nga mga saad bahin sa espirituwal ug pisikal nga kapasig-ulian taliwala sa mga alagad sa Diyos. Mitagna si Malaquias nga aduna unyay katawhan nga “ulayon [ni Jehova] . . . sama sa bulawan ug sama sa plata.” Sila “mahimong katawhan nga magahalad ug halad nga gasa diha sa pagkamatarong.”—Malaquias 3:3.

⁶ Sumala sa dakong ebidensiya nga mabatonan, gihimo ni Jehova ang gikinahanglang paghinlo sa dinihogang mga Kristohanon sukad sa 1918 paunahan, nga nagdalisay sa ilang pagsimba, mga tulumanon, ug mga doktrina.a Sila ug ang “dakong panon” nga mianib kanila sa ulahi nakapahimulos pag-ayo niana. (Pinadayag 7:9) Ingong usa ka nahiusang grupo, sila nagpadayon sa paghalad ug “halad nga gasa diha sa pagkamatarong” nga “makapalipay gayod kang Jehova.”—Malaquias 3:3, 4.

7. Unsay angay natong isukna bahin sa atong pagbarog uban sa Diyos?

⁷ Kana nahitabo sa katawhan sa Diyos sa katibuk-an, apan komosta kita sa matag usa? Mahimong mangutana ka: ‘Aduna bay mga bahin sa akong tinamdan ug mga buhat nga kinahanglan pang dalisayon? Kinahanglan ko pa bang dalisayon ang akong panggawi, ingon nga gidalisay ni Jehova ang iyang mga dinihogan?’ Atong nasabtan nga ang 12 ka manalagna nagpasiugda sa negatibong mga panghunahuna ug panggawi ingon man sa positibong mga kinaiya ug binuhatan. Tungod sa paghimo nila niana, mas nahibalo ka kon unsay “gipangayo ni Jehova kanimo.” (Miqueas 6:8) Matikdi ang “kanimo.” Kana nagpasiugda kon nganong ang matag usa kanato angayng magsusi kon gikinahanglan ba ang dugang nga pagdalisay o paghinlo sa atong personal nga kahimtang.

“SULAYI AKO, PALIHOG”

8. Unsang pagdapit ang gipaabot ni Jehova sa iyang katawhan?

⁸ Tagda kon unsay gipadayon pagsulti ni Jehova pinaagi ni Malaquias diha sa kapitulo 3, bersikulo 10. Imong makaplagan diha kining madasigong pagdapit: “‘Dad-a ang tanan nga ikapulo ngadto sa balay-tipiganan, aron adunay pagkaon sa akong balay; ug sulayi ako, palihog, niining bahina,’ miingon si Jehova sa mga panon, ‘kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.’” Ang maong pagdapit gipaabot sa katawhan sa Diyos sa katibuk-an. Imo bang gibati nga kini maoy personal usab nga pagdapit kanimo?

9. Unsang matanga sa mga halad ug ikapulo ang imong ikahatag kang Jehova?

⁹ Sa unsang paagi makahatag ka sa ‘mga ikapulo’ kang Jehova? Siyempre, dili ka obligado sa paghalad ug literal nga mga halad ug mga ikapulo, sumala sa gilagda sa Balaod. Ang espirituwal nga matang sa mga halad mao karon ang gidahom sa Diyos. Sumala sa gihisgotan sa miaging kapitulo, gibatbat ni Pablo ang imong pagsangyaw ingong usa ka halad. (Oseas 14:2) Unya ang apostol mihisgot ug laing matang sa halad, nga misulat: “Ayaw kalimti ang pagbuhat ug maayo ug ang pagpakig-ambit sa [materyal nga] mga butang sa uban, kay ang maong mga halad gikahimut-an sa Diyos.” (Hebreohanon 13:15, 16) Busa dayag nga ang ‘mga ikapulo’ nga gihisgotan sa Malaquias 3:10 nagpunting sa espirituwal ug materyal nga mga halad. Ingong bawtismadong Kristohanon, ikaw bug-os nga napahinungod kang Jehova, apan ang imong ikapulo nagtumong sa bahin sa imong gipanag-iya nga arang nimong ikahatag kang Jehova, o magamit sa pag-alagad kaniya. Naglakip kini sa panahon, kusog, kahinguhaan, ug materyal nga mga amot nga imong ihatag aron gamiton diha sa pag-alagad kang Jehova.

10. Sa unsang diwa nga ikaw ‘makasulay kang Jehova’ sa hustong paagi?

¹⁰ Pagkahaom nga imong ihatag ang maong simbolikong mga ikapulo kang Jehova uban ang pagkamahinalaron ug gugma! Kinahanglan usab nga dili ka maglangaylangay. Nakaamgo ka nga ang dakong adlaw ni Jehova tuling nagsingabot ug nga kini “makalilisang kaayo.” (Joel 2:1, 2, 11) Nameligro ang mga kinabuhi. Ang Diyos nagdapit kanimo ug ikaw makatubag sa personal. Gihangyo ka ni Jehova nga ‘sulayan siya.’ Siyempre, walay timawang tawo ang makapangahas sa pagbutang kang Jehova sa pagsulay nga samag dili kasaligan ang Diyos. (Hebreohanon 3:8-10) Apan ikaw mapaubsanong makasulay kaniya sa hustong paagi. Unsaon man? Misaad siyag panalangin. Kon imo siyang sugton, gisulayan nimo ang Diyos, nga samag nangutana ‘Panalanginan ba ko niya?’ Agig tubag, siya obligado sa pagpanalangin, sa pagtuman sa iyang saad. Busa, ang pagtugot sa Diyos nga ikaw ‘magsulay kaniya’ naglig-on sa imong pagtuo nga panalanginan ka gayod niyang madagayaon.

11, 12. Unsang mga panalangin gikan kang Jehova diha sa iyang katawhan ang imong nakita sa personal?

¹¹ Makapaniid ka nga ang katawhan ni Jehova naghatag ug daghang materyal nga mga gasa ug espirituwal nga mga halad. Ug si Jehova nagbubog “panalangin hangtod nga wala nay panginahanglan.” Mahimong ikaw nakakita nga ang maong panalangin gibubo ibabaw sa katawhan sa Diyos, ingon nga gipadayag sa talagsaong pagtubo sa gidaghanon nga nasinati sa mga Saksi ni Jehova sukad sa sayong bahin sa ika-20ng siglo hangtod karon. Nakakita ka usab ug dakong pag-uswag diha sa pagsabot sa “lawom nga mga butang sa Diyos.” (1 Corinto 2:10; Proverbio 4:18) Apan, hunahunaa kini gikan sa laing anggulo: Unsay epekto niini kanimo sa personal?

¹² Mahimong ikaw maoy membro kaniadto sa usa ka simbahan, o mahimong ikaw bag-o pang nagtambongan sa mga tigom sa mga Saksi ni Jehova. Niadtong tungora, unsa ka daghan nga paninugdang mga kamatuoran sa Bibliya ang imong nasabtan? Itandi kana karon sa imong nakat-onan sukad niadto ug laktod nga mapamatud-an gikan sa Kasulatan. O hunahunaa ang mas lalom nga mga butang nga imong nasabtan, apil ang mga tagna nga karon nagakatuman. Ug hunahunaa ang imong pag-uswag diha sa pagpadapat sa pipila ka teksto sa Bibliya diha sa imong pagkinabuhi. Pagkadako kanang kauswagan! Sa imong kahimtang mismo, makaingon ka sama ni apostol Pedro: “Among nabatonan ang matagnaong pulong nga gihimo nga labi pang tino.” (2 Pedro 1:19) Ang punto mao: Ikaw personal nga ‘natudloan ni Jehova’ ug nahiapil sa katawhan nga nagatuman sa tinuod nga Kristiyanidad ug buot moalagad kang Jehova hangtod sa kahangtoran. (Isaias 54:13) Ikaw makaingon gayod nga siya nagpanalangin pag-ayo kanimo.

IMONG NGALAN DIHA SA BASAHON SA KINABUHI

13. Sa unsang paagi posible nga ang imong ngalan masulat diha sa basahon sa handomanan sa Diyos?

¹³ Gihisgotan sa Malaquias 3:16 ang dugang nga mga panalangin gikan ni Jehova: “Niadtong panahona kadtong mga nahadlok kang Jehova nagsultihanay sa usag usa, ang matag usa sa iyang isigkaingon, ug si Jehova nagpadayon sa pagtagad ug sa pagpamati. Ug usa ka basahon sa handomanan gisulat sa iyang atubangan alang kanila nga nahadlok kang Jehova ug kanila nga nagapalandong sa iyang ngalan.” Ang mga dinihogan ug kadtong sakop sa dakong panon nagpadayag sa maong masimbahong ‘kahadlok kang Jehova.’ Giisip mo ba nga usa ka pribilehiyo nga mahimong usa sa mga Saksi ni Jehova, nga usa ka bahin sa malipayong katawhan nga nagpamalandong sa ngalan ni Jehova ug nagdayeg niana sa tibuok kalibotan? Pagkamatagbawon gayod nimo sa personal tungod kay ikaw gipasaligan nga si Jehova mahinumdom sa imong pagkamatinumanon!—Hebreohanon 6:10.

14. Sa unsang paagi nakatabang kanimo ang 12 ka manalagna sa pagsabot kon unsang mga tinamdan ug mga buhat ang gidumtan ni Jehova?

¹⁴ Ugaling lang, sa unsang paagi ikaw mismo makuwalipikado aron ang imong ngalan mahilakip nianang “basahon sa handomanan,” nga sa pagkakaron ginasulat atubangan ni Jehova? Hinumdomi ang pipila sa maalamong tambag nga atong nakita diha sa mga basahon sa 12 ka manalagna. Nakakat-on kita bahin sa panggawi, mga hiyas, ug mga tinamdan nga dili makapahimuot kang Jehova. Pananglitan, ang mga manalagna nagpasidaan kanato bahin sa mga buhat nga sumala sa Diyos nahasupak sa iyang matarong nga mga sukdanan ug makadaot sa atong mga kinabuhi, sama sa ‘malaw-ay nga panggawi’ ug ang “espiritu sa pakighilawas.” (Oseas 4:12; 6:9) Gidumtan sa Diyos kadtong magluib sa ilang kapikas o, sa dugang nga pagpadapat sa maong prinsipyo, sa ubang mga membro sa pamilya. (Malaquias 2:15, 16) Giinspirar ni Jehova ang mga manalagna aron ipasiugda nga siya dili mahimuot sa kapintasan, bisan kon unsa kanang matanga. (Amos 3:10) Iyang gipasulat usab nga mapasiugdahon kanila ang panginahanglan sa paglikay sa inhustisya o pagkalimbongan diha sa mga transaksiyon sa negosyo ug sa panalapi. (Amos 5:24; Malaquias 3:5) Ug ang 12 ka basahon nagpasiugda nga hinungdanon kaayo nga ang mga tawong may awtoridad dili magtuis sa ilang panghukom tungod sa pagkamapihigon o sa hakog nga intereses.—Miqueas 7:3, 4.

15. Unsa ang pipila ka kaayohan nga imong madawat tungod sa pagsunod sa mga tambag sa 12 ka manalagna?

¹⁵ Hinuon, wala lang ipunting sa mga manalagna ang atong pagtagad sa mga butang nga angay natong likayan. Ilang gipalutaw ang mga kaayohan nga atong matagamtam tungod sa pagtuboy sa mga sukdanan sa Diyos. Mahimong mas suod ang atong relasyon uban kang Jehova. (Miqueas 4:5) Mahimong mas lig-on ug aktibo ang atong kongregasyon sa dihang magmalamboon ang pagkamatarong. Mahimong mas lig-on ang atong kaminyoon, ug mas mahiusa ang atong pamilya, nga mas magmatinagdanon sa espirituwal nga mga butang. (Oseas 2:19; 11:4) Pinaagi sa matarong ug matinud-anong panggawi, maangkon nato ang pagtahod sa uban. Sa pagsundog sa kaluoy ni Jehova, atong ipasundayag ang kahangawa ug mahigugmaong-kalulot ug kana ipakita usab kanato sa atong mga igsoong lalaki ug babaye. (Miqueas 7:18, 19) Oo, malibotan kitag mga tawo nga mahunahunaon sa espirituwal, mga igsoong lalaki ug babaye nga nahigugma sa kamatuoran ug pakigdait, ug labaw sa tanan, atong mahigala si Jehova. (Zacarias 8:16, 19) Dili ka ba mouyon nga kini maoy mga panalangin nga imo nang natagamtam?

16. Unsang kalainan ang dayag karon, ug unsay kahulogan niini sa adlaw sa paghusay ni Jehova?

¹⁶ Ingong sangpotanan sa bag-o pa natong gihisgotan, tinuod kaayo nga ang “kalainan tali sa usa nga matarong ug sa usa nga daotan”—tali sa matuod ug mini nga mga Kristohanon—mas dayag gayod. (Malaquias 3:18) Kita nanlimbasog sa pagsunod sa mga sukdanan ni Jehova samtang ang kalibotan sa katibuk-an natidlom nga mas lalom pa sa yanang sa pagkadili-diyosnon. Ug nahibalo ka nga ang maong kalainan aduna unyay grabeng mga resulta sa pag-abot sa “dakong adlaw ni Jehova.”—Sofonias 1:14; Mateo 25:46.

17. Sa umaabot, sa unsang paagi magamit nimo ang impormasyon niining libroha?

¹⁷ Nan, matin-aw nga ang tambag sa 12 ka manalagna magpabiling bililhon. Samtang moatubang kag espesipikong mga suliran o mga desisyon, basin gusto nimong sublion ang praktikal nga impormasyong gipahayag diha sa mga kapitulo niining libroha. Sa ingon ikapakita nimo ang imong padayong tinguha nga matudloan sa mga dalan ni Jehova ug “magalakaw sa iyang mga alagianan.” (Miqueas 4:2) Apan, dili lang karong panahona ang nalangkit. Ang imong tim-os nga tinguha mao nga ang imong ngalan permanenteng masulat diha sa basahon sa handomanan ni Jehova, dili ba? Ang mga basahon sa 12 ka manalagna makatabang kanimo sa maong tumong.

ANG PAGTUO MOSANGKO SA KALUWASAN

18. Unsang bililhong kinahanglanon ang imong makaplagan sa Joel 2:32, ug unsay gidugang ni apostol Pablo sa maong kinahanglanon?

¹⁸ Nga nagpasiugda sa usa ka dakong hinungdan nga makapatungha sa pag-uyon ni Jehova kanimo, si Joel miingon: “Ang matag usa nga magatawag sa ngalan ni Jehova maluwas.” (Joel 2:32) Duha ka apostoles, si Pedro ug Pablo, nagkutlo niining hinungdanong panginahanglan. (Buhat 2:21; Roma 10:13) Si Pablo midugang ug usa ka bahin sa maong tambag sa dihang siya nangutana: “Unsaon nila pagtawag kaniya kinsa wala sila magbutang ug pagtuo?” (Roma 10:14) Bahin kanimo, segurado nga gusto nimong motawag sa ngalan ni Jehova ug magpasundayag ug pagtuo diha kaniya karon ug hangtod sa kahangtoran!

19. Unsay nalangkit sa pagtawag sa ngalan ni Jehova?

¹⁹ Ang pagtawag sa ngalan ni Jehova wala lang magpasabot sa pagkaila ug paggamit sa personal nga ngalan sa Diyos. (Isaias 1:15) Ang konteksto sa Joel 2:32 nagpasiugda sa tinuod nga paghinulsol ug pagsalig sa kapasayloan ni Jehova. (Joel 2:12, 13) Ang pagtawag sa ngalan sa Diyos nagpasabot gayod sa pagkaila, pagsalig, pagsugot, ug pagbutang kaniya nga una sa atong kinabuhi. Oo, ang pag-alagad kang Jehova maoy kinalabwan sa atong kinabuhi. Ingong resulta, kana mosangko gayod sa matagbawon ug malungtarong kinabuhi, nga maoy panalangin gikan sa Diyos.—Mateo 6:33.

20. Samtang magpasundayag kag pagtuo, unsang kahibulongang ganti ang maposible?

²⁰ Si Jehova miingon pinaagi ni Habacuc: “Kon bahin sa matarong, siya magpadayong buhi tungod sa iyang pagkamatinumanon.” (Habacuc 2:4) Itisok gayod kana sa hunahuna ug kasingkasing. Kini maoy usa sa pangunang mga kamatuoran sa Bibliya. Gipunting ni Pablo ang maong kasulatan sa tulo ka higayon diha sa iyang inspiradong mga sinulat.b (Roma 1:16, 17; Galacia 3:11, 14; Hebreohanon 10:38) Ang maong kamatuoran nag-obligar kanimo sa pagpasundayag ug pagtuo diha sa halad nga gitanyag ni Jesu-Kristo alang sa atong mga sala. Si Jesus misaysay: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya . . . makabaton ug kinabuhing walay kataposan.” Dayon si Jesus midugang: “Siya nga magpasundayag ug pagtuo sa Anak adunay kinabuhing walay kataposan.” (Juan 3:16, 36) Ang maong halad magpahinabo sa pagkaayo nga ikatanyag lamang sa atong Manunubos. Human sa pagtala sa giingon ni Jehova bahin sa kon unsay himoon sa Iyang dakong adlaw ngadto sa daotang kalibotan ni Satanas, si Malaquias nagpadayon: “Kaninyo nga nahadlok sa akong ngalan ang adlaw sa pagkamatarong mosidlak gayod, nga may pagpang-ayo sa mga pako niini.” Oo, mosidlak si Jesus nga may pagpang-ayo. Kana naglangkit sa espirituwal nga pagkaayo nga atong nasinati karon. Bisan pa niana, pagkamakapaukyab ang paghunahuna nga kini maglakip sa bug-os nga pagkaayo sa panglawas didto sa bag-ong kalibotan!—Malaquias 4:2.

21. Nganong makasalig ka sa katakos ni Jehova sa pagtuman sa iyang kabubut-on?

²¹ Hinungdanon usab ang pagbutang ug pagtuo sa katakos sa Diyos sa pagtuman sa iyang kabubut-on. Sa adlaw ni Miqueas, lisod ang pagsalig sa isigkatawo. Ang manalagna miingon: “Ayaw ibutang ang inyong pagtuo sa inyong isigkatawo. Ayaw kamo pagsalig sa usa ka suod nga higala.” Bisan pa niana, si Miqueas wala malisdi sa pagsalig kang Jehova; dili ka usab angayng malisdan. Si Miqueas miingon: “Bahin kanako, magalantaw ako kang Jehova.” (Miqueas 7:5, 7) Lahi sa mabalhinog-hunahuna nga mga tawo, si Jehova adunay determinasyon ug gahom sa pagtuman sa iyang katuyoan aron mabayaw ang iyang pagkasoberano ug alang sa malungtarong kaayohan sa mga tawong may pagtuo.

22. Unsang sangpotanan ang masinati niadtong nagatawag sa ngalan ni Jehova diha sa pagtuo?

²² Masaligon kang makapahayag sa samang mga pagbati diha sa mga pulong ni Habacuc: “Ako magsadya kang Jehova; magmalipayon ako sa Diyos sa akong kaluwasan.” (Habacuc 3:18) Gipahayag nga tin-aw sa manalagnang si Joel ang katarongan sa pagkalipay niadtong nagatawag sa ngalan ni Jehova diha sa pagtuo: Sila “makalingkawas” o, sumala sa pagpahayag niana ni Pablo, “maluwas.” (Joel 2:32; Roma 10:13) Sa unsang diwa sila makalingkawas o maluwas? Ang imong pagpasundayag ug pagtuo nagluwas na kanimo gikan sa malinglahong mga buhat ni Satanas ug sa daghang makaguol nga mga kasinatian nga pagaatubangon sa daotan. (1 Pedro 1:18) Apan, dugang pa niana, makapaabot kang masaligon sa kaluwasan latas sa kalaglagan niining daotang sistema sa mga butang. Kana magtugot kanimo sa pagtagamtam ug daghang panalangin nga gipunting sa 12 ka manalagna.

MGA PAANINAG SA PARAISO

23, 24. (a) Unsang pipila ka paaninag sa Paraiso ang gihatag sa 12 ka manalagna? (b) Sa unsang paagi ang imong panglantaw sa umaabot naapektohan sa gisulat sa 12 ka manalagna?

²³ Adunay malungtarong mga panalangin sa unahan alang niadtong “nahadlok kang Jehova.” (Malaquias 3:16) Ang pipila sa 12 ka manalagna mihatag ug tin-awng mga paaninag sa yutan-ong Paraiso nga haduol na, mga kabatbatan nga makapalipay ug makapahinam kanimo. Pananglitan, si Miqueas misulat: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.” (Miqueas 4:4) Sa pagkatinuod, ubos sa Gingharian sa Diyos, mobati kag kasegurohan ug anihon nimo ang mga bunga sa imong kahago!

²⁴ Dili ingong dili-realistiko ang paglaom nga wala na unyay sakit, kasubo, ug bisan kamatayon. Di tiaw nga kalipay ang bation unya niadtong mahibalik sa kinabuhi uban sa paglaom nga mabatonan ang tawhanong kahingpitan! Ilang masinati ang bug-os nga kahulogan sa gipunting sa Oseas 13:14: “Gikan sa kamot sa Sheol tubson ko sila; gikan sa kamatayon bawion ko sila. Hain ang imong mga ikot, Oh Kamatayon? Hain ang imong pagkamalaglagon, Oh Sheol?” Gipadapat ni Pablo ang maong bersikulo sa langitnong pagkabanhaw.—1 Corinto 15:55-57.

25. Unsa unyay imong bation didto sa bag-ong kalibotan?

²⁵ Dili gayod lisod ang pagtuo nga mahitabo gayod ang pagpamanhaw dinhi sa yuta. (Zacarias 8:6) Sa dihang gitagna ni Amos ug Miqueas nga ang katawhan sa Diyos mahibalik gikan sa pagkadestiyero, kadto maorag lisod tuohan. Apan nahibalo ka nga kadto nahitabo gayod. (Amos 9:14, 15; Miqueas 2:12; 4:1-7) Ang mga nahibalik mitubag: “Kami nahisama niadtong nagdamgo. Niadtong panahona ang among baba napuno sa katawa, ug ang among dila sa hugyaw sa kalipay. . . . Si Jehova nagbuhat ug usa ka dakong butang sa iyang gibuhat kanamo. Kami nagmalipayon.” (Salmo 126:1-3) Kana mao ang imong bation didto sa bag-ong kalibotan sa pagkasinatig “panalangin hangtod nga wala nay panginahanglan.”

26. Unsay mapaabot niadtong nagkinabuhi nga naghunahuna sa adlaw ni Jehova?

²⁶ Human mawagtang ang pagkadaotan sa yuta panahon sa “adlaw ni Jehova,” “ang pagkahari maiya ni Jehova” sa mas bug-os nga diwa. (Abdias 15, 21) Dili ba unya kana usa ka kahibulongang panalangin alang sa tanan niyang yutan-ong mga sakop? Ug ikaw mahiapil niadtong katawhan nga mapadapatan sa mga pulong sa Malaquias kapitulo 3: “‘Sila mahimong akoa gayod,’ miingon si Jehova sa mga panon, . . . ‘Ug ako maluoy kanila, ingon sa usa ka tawo nga naluoy sa iyang anak nga nagaalagad kaniya.’” (Malaquias 3:17) Tin-aw nga ang imong pagkamatinumanon, nga karon naghatag kanimog kahigayonan nga maluwas, mohatag unya kanimog kahigayonan nga makabatog “panalangin hangtod nga wala nay panginahanglan.” Kahibulongan gayong palaaboton!