“Higugmaa ang Kamatuoran ug Pakigdait”!

“Ang pulong ni Jehova sa mga panon nagpadayong midangat kanako, nga nag-ingon: ‘. . . Higugmaa ang kamatuoran ug pakigdait.’”​—ZACARIAS 8:18, 19.

1, 2. (a) Unsa ang rekord sa katawhan kon bahin sa pakigdait? (b) Nganong kining kalibotana karon dili gayod makakitag tinuod nga pakigdait?

“ANG kalibotan wala gayod magmalinawon. Sa usa ka dapit​—ug subsob nga magkadungan sa daghang dapit​—kanunay nga may gubat.” Kanay giingon ni Propesor Milton Mayer sa University of Massachusetts, T.B.A. Pagkamakapasubong komentaryo bahin sa katawhan! Tinuod, gustog pakigdait ang mga tawo. Gisulayan sa mga politiko ang tanang matang sa mga paagi aron padayong mahuptan kana, gikan sa Pax Romana sa Romanhong kapanahonan ngadto sa polisa nga “Mutually Assured Destruction” panahon sa Bugnawng Gubat. Sa kataposan, hinunoa, ang tanan nilang paningkamot napakyas. Sumala sa pagpahayag niini ni Isaias daghang siglo kanhi, ‘ang mga mensahero mismo sa pakigdait mihilak sa mapait.’ (Isaias 33:7) Ngano man kini?

² Tungod kini kay ang malungtarong pakigdait kinahanglang magagikan sa pagkawalay-pagdumot ug kadalo; kinahanglang kini ipasukad sa kamatuoran. Ang pakigdait dili mahimong ipasukad sa mga bakak. Kanay hinungdan nga sa dihang misaad sa kapasig-ulian ug pakigdait alang sa karaang Israel si Jehova miingon: “Ania akong ginahatag kaniya ang pakigdait nga sama sa usa ka suba ug ang himaya sa kanasoran nga sama sa usa ka baha.” (Isaias 66:12) Ang diyos niining sistema sa mga butang, si Satanas nga Yawa, maoy “usa ka magpapatay,” usa ka mamumuno, ug “usa ka bakakon ug ang amahan sa bakak.” (Juan 8:44; 2 Corinto 4:4) Sa unsang paagi ang usa ka kalibotan nga may ingon nga diyos makabaton ug pakigdait?

3. Unsang talagsaong gasa ang gihatag ni Jehova sa iyang katawhan, bisan pa sa ilang pagpuyo sa gubot nga kalibotan?

³ Talagsaon, hinunoa, si Jehova magahatag ug pakigdait ngadto sa iyang katawhan bisan pag sila nagpuyo sa gibungkag-sa-gubat nga kalibotan ni Satanas. (Juan 17:16) Sa ikaunom nga siglo W.K.P., iyang gituman ang iyang saad pinaagi ni Jeremias ug mihatag sa “pakigdait ug kamatuoran” ngadto sa iyang espesyal nga nasod sa dihang iya silang gipasig-uli ngadto sa ilang yutang-natawhan. (Jeremias 33:6) Ug niining kataposang mga adlaw, siya naghatag ug “pakigdait ug kamatuoran” ngadto sa iyang katawhan diha sa ilang “yuta,” o yutan-ong espirituwal nga kahimtang, bisan pag sila nakaagi sa kinadaotang panahon sa kagubot nga nakita niining kalibotana hangtod karon. (Isaias 66:8; Mateo 24:7-13; Pinadayag 6:1-8) Samtang atong ipadayon ang atong panaghisgot sa Zacarias kapitulo 8, mabatonan nato ang mas lalom nga pagpabili niining hinatag-sa-Diyos nga pakigdait ug kamatuoran ug tan-awon kon unsa ang kinahanglang buhaton nato aron mapreserbar ang atong bahin niini.

‘Lig-ona ang Inyong mga Kamot’

4. Sa unsang paagi gidasig ni Zacarias ang Israel nga molihok aron sila makasinatig pakigdait?

⁴ Sa ikaunom nga higayon sa Zacarias kapitulo 8, atong madungog ang usa ka makapaukyab nga kapahayagan gikan ni Jehova: “Mao kini ang giingon ni Jehova sa mga panon, ‘Lig-ona ang inyong mga kamot, kamo nga nagapatalinghog niining mga adlawa niining mga pulong nga gikan sa baba sa mga manalagna, sa adlaw nga gipahimutang ang patukoranan sa balay ni Jehova sa mga panon, aron ang templo matukod. Kay sa wala pa kadtong mga adlawa walay mga suhol alang sa katawhan; ug bahin sa mga suhol sa anad nga kahayopan, walay ingon nga butang; ug sa usa nga migula ug sa usa nga miabot walay pakigdait tungod sa kaaway, kay padayon kong giduso ang tanang tawo batok sa usag usa.’”​—Zacarias 8:9, 10.

5, 6. (a) Tungod kay nawad-ag kadasig ang mga Israelinhon, unsa ang kahimtang sa Israel? (b) Unsang kausaban ang gisaad ni Jehova sa Israel kon iyang ibutang nga una ang iyang pagsimba?

⁵ Gipamulong ni Zacarias kining mga pulonga samtang ang templo gitukod pag-usab sa Jerusalem. Sa nangagi, ang mga Israelinhon nga namalik gikan sa Babilonya nawad-ag kadasig ug mihunong sa pagtukod sa templo. Tungod kay ilang giliso ang ilang pagtagad ngadto sa ilang kaugalingong kahayahay, sila walay panalangin ug walay pakigdait gikan ni Jehova. Bisan pag gitikad nila ang ilang mga yuta ug giatiman ang ilang mga kaparasan, sila wala mouswag. (Hageo 1:3-6) Kadto nahisamag sila nagbuhat nga “walay mga suhol.”

⁶ Karon nga ang templo gitukod na usab, gidasig ni Zacarias ang mga Hudiyo nga ‘mahimong lig-on,’ nga maisogong ibutang ang pagsimba ni Jehova nga una. Unsay mahitabo kon himoon nila kana? “‘Karon ako dili na mahimong ingon sa kanhing mga adlaw alang sa mga nahibilin niining katawhana,’ mao ang giingon ni Jehova sa mga panon. ‘Kay anaa unya ang binhi sa pakigdait; ang parras mismo magahatag sa iyang mga bunga, ug ang yuta mismo magahatag sa iyang abot, ug ang mga langit mismo magahatag sa ilang yamog; ug ipahinabo ko gayod nga ang mga nahibilin niining katawhana magapanunod niining tanang butang. Ug mahitabo nga ingon nga kamo nahimong usa ka tinunglo taliwala sa mga nasod, Oh balay sa Juda ug balay sa Israel, sa ingon pagaluwason ko kamo, ug kamo mahimong panalangin. Ayaw kamo kahadlok. Palig-ona ang inyong mga kamot.’” (Zacarias 8:11-13) Kon ang Israel molihok uban ang determinasyon, siya mouswag. Sayosayo, sa dihang ang mga nasod buot mopunting sa usa ka panig-ingnan sa tunglo, sila makapunting sa Israel. Niadtong tungora ang Israel mahimong usa ka panig-ingnan sa panalangin. Pagkamaayong katarongan nga ‘palig-onon ang ilang mga kamot’!

7. (a) Unsang makapaukyab nga mga kausaban ang nasinati sa katawhan ni Jehova, nga misangko sa 1995 tuig sa pag-alagad? (b) Sa pagtan-aw sa tinuig nga taho, unsang mga nasod ang imong nakita nga adunay talagsaong rekord sa mga magmamantala, mga payunir, aberids nga mga oras?

⁷ Komosta man karong adlawa? Aw, sa katuigan sa wala pa ang 1919, ang katawhan ni Jehova daw nakulangan ug kadasig. Wala sila sa bug-os magbaton ug neyutral nga baroganan sa unang gubat sa kalibotan, ug sila may kiling sa pagsunod sa usa ka tawo inay sa ilang Hari, si Jesu-Kristo. Ingong sangpotanan, ang pipila naluya tungod sa pagsupak gikan sa sulod ug sa gawas sa organisasyon. Dayon, niadtong 1919, sa tabang ni Jehova ilang gipalig-on ang ilang mga kamot. (Zacarias 4:6) Sila gihatagan ni Jehova ug pakigdait, ug nagmauswagon sila kaayo. Makita kini sa ilang rekord sa miaging 75 ka tuig, nga misangko sa 1995 tuig sa pag-alagad. Ingong katawhan, ang mga Saksi ni Jehova naglikay sa nasyonalismo, pagdapigdapig sa tribo, pagkamapihigon, ug tanang ubang tinubdan sa pagdumot. (1 Juan 3:14-18) Nag-alagad sila kang Jehova uban ang tinuod nga kadasig diha sa iyang espirituwal nga templo. (Hebreohanon 13:15; Pinadayag 7:15) Sa miaging tuig lamang, migugol silag kapin sa usa ka bilyong oras nga nakigsulti sa uban mahitungod sa ilang langitnong Amahan! Kada bulan, sila nagdumala ug 4,865,060 ka pagtuon sa Bibliya. May aberids nga 663,521 ang nag-alagad ingong payunir matag bulan. Sa dihang ang mga ministro sa Kakristiyanohan buot mohatag ug usa ka panig-ingnan sa katawhan nga masiboton gayod sa ilang pagsimba, sila mopunting usahay sa mga Saksi ni Jehova.

8. Sa unsang paagi ang matag usa ka Kristohanon makabatog kaayohan gikan sa “binhi sa pakigdait”?

⁸ Tungod sa ilang kasibot, si Jehova magahatag sa iyang katawhan sa “binhi sa pakigdait.” Ang matag usa nga magaatiman sa maong binhi makakita nga ang pakigdait motubo diha sa iyang kasingkasing ug diha sa iyang kinabuhi. Ang matag matinuohong Kristohanon nga nagsunod sa pakigdait uban kang Jehova ug uban sa isigka-Kristohanon makaambit sa kamatuoran ug pakigdait sa katawhan nga nagdala sa ngalan ni Jehova. (1 Pedro 3:11; itandi ang Santiago 3:18.) Dili ba kana kahibulongan?

“Ayaw Kamo Kahadlok”

9. Unsang kausaban sa iyang mga pagpakiglabot sa iyang katawhan ang gisaad ni Jehova?

⁹ Karon atong basahon ang ikapitong kapahayagan gikan ni Jehova. Unsa ba kini? “Mao kini ang giingon ni Jehova sa mga panon, ‘Maingon nga ako naghunahuna sa pagbuhat kon unsay makatalagmanon kaninyo tungod kay ang inyong mga amahan nagpaaligutgot kanako,’ nag-ingon si Jehova sa mga panon, ‘ug ako wala magbasol, sa ingon magahunahuna ako niining mga adlawa sa pagbuhat ug maayo sa Jerusalem ug sa balay sa Juda. Ayaw kamo kahadlok.’”​—Zacarias 8:14, 15.

10. Unsang rekord sa mga Saksi ni Jehova ang nagpakita nga sila wala mahadlok?

¹⁰ Bisan pag ang katawhan ni Jehova natibulaag sa espirituwal nga diwa panahon sa unang gubat sa kalibotan, sa ilang mga kasingkasing buot nilang buhaton kon unsay matarong. Busa, si Jehova, human magpadapat ug disiplina, nag-usab sa iyang paagi sa pagpakiglabot kanila. (Malakias 3:2-4) Karong adlawa, kita maghinumdom ug magpasalamat kaniyang mainiton tungod sa iyang nahimo. Tinuod, kita nahimong “mga tumong sa pagdumot sa tanang nasod.” (Mateo 24:9) Daghan ang gibilanggo, ug ang pipila namatay pa gani tungod sa ilang pagtuo. Kita subsob moatubang sa pagkadili-mabination o pagkamabatokon. Apan kita dili mahadlok. Nasayod kita nga si Jehova mas lig-on kay sa bisan unsang pagsupak, makita o dili makita. (Isaias 40:15; Efeso 6:10-13) Dili kita mohunong sa pagpamati sa mga pulong: “Paglaom kang Jehova; magmaisogon ug palig-ona ang imong kasingkasing.”​—Salmo 27:14.

“Sulting Maminatud-on sa Usag Usa”

11, 12. Unsay angay nga ibutang nato sa hunahuna kon buot natong makaambit sa bug-os sa mga panalangin nga gihatag ni Jehova sa iyang katawhan?

¹¹ Aron bug-os nga makaambit sa mga panalangin gikan ni Jehova, adunay mga butang nga angay natong hinumdoman. Si Zacarias nag-ingon: “‘Kining mga butanga mao ang inyong pagabuhaton: Sulting maminatud-on sa usag usa. Uban sa kamatuoran ug sa paghukom sa pakigdait himoa ang inyong pagpanghukom diha sa inyong mga ganghaan. Ug ayaw paglalang ug daotan sa usag usa diha sa inyong mga kasingkasing, ug ayaw higugmaa ang bisan unsang bakak nga panumpa; kay kining tanang butanga akong gidumtan,’ mao ang giingon ni Jehova.”​—Zacarias 8:16, 17.

¹² Si Jehova nag-awhag kanato nga mosulti sa tinuod. (Efeso 4:15, 25) Dili niya dunggon ang mga pag-ampo niadtong magalalang ug daotang mga butang, magtago sa kamatuoran alang sa personal nga ganansiya, o magpahayag ug bakak nga mga panumpa. (Proverbio 28:9) Sanglit siya nagdumot sa apostasiya, buot niya nga kita mohawid sa kamatuoran sa Bibliya. (Salmo 25:5; 2 Juan 9-11) Dugang pa, sama sa mga tawong tigulang sa mga ganghaan sa siyudad sa Israel, ang mga ansiano nga naghusay sa hudisyal nga mga kaso angay magbase sa ilang panambag ug mga desisyon sa kamatuoran sa Bibliya, dili sa personal nga opinyon. (Juan 17:17) Buot ni Jehova nga sila magtinguha sa “paghukom sa pakigdait,” nga maninguha, ingong Kristohanong mga magbalantay, nga ipasig-uli ang pakigdait tali sa nagkabangi nga mga partido ug tabangan ang mahinulsolong mga makasasala nga makaangkon pag-usab sa pakigdait uban sa Diyos. (Santiago 5:14, 15; Judas 23) Sa samang panahon, mapreserbar nila ang kalinaw sa kongregasyon, nga maisogong magpalagpot niadtong magatugaw sa maong kalinaw pinaagi sa tinuyong pagpadayon sa buhat nga daotan.​—1 Corinto 6:9, 10.

“Usa ka Pagmaya ug Pagsadya”

13. (a) Unsang kausaban bahin sa pagpuasa ang gitagna ni Zacarias? (b) Unsang pagpuasa ang gituman sa Israel?

¹³ Karon, mabatian nato ang ikawalong solemneng kapahayagan: “Mao kini ang giingon ni Jehova sa mga panon, ‘Ang puasa sa ikaupat nga bulan, ug ang puasa sa ikalimang bulan, ug ang puasa sa ikapitong bulan, ug ang puasa sa ikanapulong bulan mamahimong usa ka pagmaya ug pagsadya ug maayong mga panahon sa piyesta alang sa balay sa Juda. Busa higugmaa ang kamatuoran ug pakigdait.’” (Zacarias 8:19) Ubos sa Moisesnong Balaod, ang mga Israelinhon nagpuasa sa Adlaw sa Pagtabon sa Sala aron ipahayag ang kasubo tungod sa ilang mga sala. (Levitico 16:29-31) Ang upat ka puasa nga gihisgotan ni Zacarias lagmit gituman aron magbangotan sa mga panghitabo may kalabotan sa pagkapukan ug pagkalaglag sa Jerusalem. (2 Hari 25:1-4, 8, 9, 22-26) Ugaling, niadtong tungora ang templo gitukod pag-usab ug ang Jerusalem gipuy-an na usab ug mga tawo. Ang pagbangotan giilisdan ug pagmaya, ug ang mga puasa nahimong mga panahon sa piyesta.

14, 15. (a) Sa unsang paagi ang pagsaulog sa Memoryal usa ka dakong hinungdan sa pagsadya, ug unsay igapahinumdom niini kanato? (b) Sumala sa makita sa tinuig nga taho, unsang mga nasod ang adunay talagsaong mga tumatambong sa Memoryal?

¹⁴ Karong adlawa, kita wala magtuman sa mga puasa nga gihisgotan ni Zacarias o sa puasa nga gibaod sa Balaod. Sanglit gihalad ni Jesus ang iyang kinabuhi alang sa atong mga sala, kita nagatagamtam sa mga panalangin sa mas dakong Adlaw sa Pagtabon sa Sala. Ang atong mga sala tabonan, dili lamang sa mahulagwayong paagi, apan sa kabug-osan gayod. (Hebreohanon 9:6-14) Sa pagsugot sa sugo sa langitnong Hataas nga Saserdote, si Jesu-Kristo, kita nagsaulog sa Memoryal sa iyang kamatayon isip ang bugtong solemneng saulog diha sa Kristohanong kalendaryo. (Lucas 22:19, 20) Dili ba nga kita nagtagamtam sa “usa ka pagmaya ug pagsadya” samtang kita nagtigom kada tuig alang sa maong saulog?

¹⁵ Sa miaging tuig, 13,147,201 ang nagtigom sa pagsaulog sa Memoryal, 858,284 nga labaw kay sa 1994. Pagkadaghan! Hulagwaya ang kasadya diha sa 78,620 ka kongregasyon sa mga Saksi ni Jehova samtang ang talagsaong gidaghanon nagpanon ngadto sa ilang mga Kingdom Hall alang sa saulog. Sa pagkatinuod, ang tanang presente gidasig nga ‘higugmaon ang kamatuoran ug pakigdait’ samtang sila naghinumdom sa kamatayon sa Usa nga mao “ang dalan ug ang kamatuoran ug ang kinabuhi” ug kinsa karon nagmando isip dakong “Prinsipe sa Pakigdait” ni Jehova! (Juan 14:6; Isaias 9:6) Ang maong pagsaulog adunay espesyal nga kahulogan alang niadtong nagsaulog niana diha sa mga nasod nga gibungkag sa kagubot ug gubat. Pipila sa atong mga igsoon nakasaksi sa di-ikabatbat makalilisang nga mga panghitabo sulod sa 1995. Bisan pa, ‘ang kalinaw sa Diyos nga magalabaw sa tanang panghunahuna nagbantay sa ilang mga kasingkasing ug sa ilang mga gahom sa hunahuna pinaagi ni Kristo Jesus.’​—Filipos 4:7.

‘Atong Pahumokon ang Nawong ni Jehova’

16, 17. Sa unsang paagi ang katawhan sa mga nasod ‘magapahumok sa nawong ni Jehova’?

¹⁶ Apan, diin ba gikan kadtong tanan nga minilyon nga mitambong sa Memoryal? Ang ikasiyam nga pamulong ni Jehova nagpatin-aw: “Mao kini ang giingon ni Jehova sa mga panon, ‘Mahitabo pa nga ang mga katawhan ug ang mga molupyo sa daghang siyudad mangabot; ug ang mga molupyo sa usa ka siyudad moadto gayod ngadto niadtong sa lain, nga magaingon: “Mangadto kita sa madali aron pahumokon ang nawong ni Jehova ug pangitaon si Jehova sa mga panon. Ako usab moadto.” Ug daghang katawhan ug gamhanang mga nasod ang mangabot gayod aron pangitaon si Jehova sa mga panon sa Jerusalem ug pahumokon ang nawong ni Jehova.’”​—Zacarias 8:20-22.

¹⁷ Ang katawhan nga mitambong sa Memoryal buot nga ‘mangita kang Jehova sa mga panon.’ Daghan kanila maoy iyang dedikado, bawtismadong mga alagad. Minilyon pa nga mitambong wala pa makaabot nianang ang-anga. Sa pila ka nasod ang tumatambong sa Memoryal maoy upat o lima ka pilong mas daghan kay sa mga magmamantala sa Gingharian. Kining daghang interesadong mga tawo nagkinahanglag tabang sa pagpadayon nga mouswag. Ato silang tudloan nga magmaya sa kahibalo nga si Jesus namatay alang sa atong mga sala ug karon nagamando sa Gingharian sa Diyos. (1 Corinto 5:7, 8; Pinadayag 11:15) Ug ato silang dasigon nga ipahinungod ang ilang kaugalingon kang Jehova nga Diyos ug magpasakop ngadto sa iyang tinudlo nga Hari. Niining paagiha ilang “pahumokon ang nawong ni Jehova.”​—Salmo 116:18, 19; Filipos 2:12, 13.

“Napulo ka Tawo Gikan sa Tanang Pinulongan sa mga Nasod”

18, 19. (a) Ingong katumanan sa Zacarias 8:23, kinsa karong adlawa ang “usa ka Hudiyo”? (b) Kinsa karong adlawa ang “napulo ka tawo” nga ‘nangupot sa sidsid sa usa ka tawo nga usa ka Hudiyo’?

¹⁸ Sa kataposang higayon sa ikawalong kapitulo sa Zacarias, atong mabasa: “Mao kini ang giingon ni Jehova sa mga panon.” Unsa ang kataposang kapahayagan ni Jehova? “Mahitabo unya niadtong mga adlawa nga napulo ka tawo gikan sa tanang pinulongan sa mga nasod ang mokupot, oo, sila gayod mokupot sa sidsid sa usa ka tawo nga usa ka Hudiyo, nga magaingon: ‘Kami mouban kaninyo, tungod kay kami nakadungog nga ang Diyos nagauban kaninyo.’” (Zacarias 8:23) Sa adlaw ni Zacarias, ang kinaiyanhong Israel mao ang piniling nasod sa Diyos. Apan, sa unang siglo gisalikway sa Israel ang Mesiyas ni Jehova. Busa, gipili sa atong Diyos ang “usa ka Hudiyo”​—usa ka bag-ong Israel​—ingong iyang espesyal nga katawhan, “ang Israel sa Diyos” nga nasakopan sa espirituwal nga mga Hudiyo. (Galacia 6:16; Juan 1:11; Roma 2:28, 29) Ang katibuk-ang gidaghanon niini nila maoy 144,000, nga pinili gikan sa katawhan sa pagmando uban kang Jesus diha sa iyang langitnong Gingharian.​—Pinadayag 14:1, 4.

¹⁹ Kadaghanan niining 144,000 namatay nang matinumanon ug nangadto na sa ilang langitnong ganti. (1 Corinto 15:51, 52; Pinadayag 6:9-11) Ang diyutay nagpabilin pa sa yuta ug sila nagmaya sa pagkakita nga ang “napulo ka tawo” nga mipili nga mouban sa “Hudiyo” sa pagkatinuod maoy “usa ka dakong panon . . . gikan sa tanang nasod ug mga tribo ug mga katawhan ug mga pinulongan.”​—Pinadayag 7:9; Isaias 2:2, 3; 60:4-10, 22.

20, 21. Samtang nagkaduol ang kataposan niining kalibotana, sa unsang paagi kita makapabiling may pakigdait uban kang Jehova?

²⁰ Samtang nagkaduol na ang kalaglagan niining kalibotana, ang Kakristiyanohan maoy sama sa Jerusalem sa adlaw ni Jeremias: “Dihay paglaom alang sa pakigdait, apan wala moabot ang maayo; ug alang sa panahon sa pagpang-ayo, ug, tan-awa! kalisang!” (Jeremias 14:19) Ang maong kalisang modangat sa tayuktok sa dihang mobalitok ang kanasoran sa bakak nga relihiyon ug sa kapintas laglagon kini. Dili madugay human niana, ang mga nasod mismo makasinatig kalaglagan diha sa kataposang gubat sa Diyos, ang Armageddon. (Mateo 24:29, 30; Pinadayag 16:14, 16; 17:16-18; 19:11-21) Panahon gayod unya kana sa dakong kaguliyang!

²¹ Latas nianang tanan, panalipdan ni Jehova kadtong nahigugma sa kamatuoran ug nag-ugmad sa “binhi sa pakigdait.” (Zacarias 8:12; Sofonias 2:3) Nan, magpabilin kitang luwas sulod sa yuta sa iyang katawhan, nga madasigong magadayeg kaniya sa publiko ug magatabang sa labing daghan kutob sa mahimo nga “pahumokon ang nawong ni Jehova.” Kon buhaton nato kana, sa kanunay matagamtam nato ang pakigdait ni Jehova. Oo, “si Jehova mismo magahatag ug kusog sa iyang katawhan. Si Jehova mismo magapanalangin sa iyang katawhan sa pakigdait.”​—Salmo 29:11.

Makapatin-aw Ka Ba?

◻ Sa unsang paagi ang katawhan sa Diyos ‘nagpalig-on sa ilang mga kamot’ sa adlaw ni Zacarias? Karong adlawa?

◻ Unsay atong sanong ngadto sa paglutos, pagkamabatokon, ug pagkadili-mabination?

◻ Unsay nalangkit sa atong ‘pagsultig tinuod sa usag usa’?

◻ Sa unsang paagi ang usa ka tawo ‘makapahumok sa nawong ni Jehova’?

◻ Unsang dakong hinungdan sa pagsadya ang nakita diha sa pagkatuman sa Zacarias 8:23?

[Hulagway sa panid 18]

Sa miaging tuig, ang mga Saksi ni Jehova migugol ug 1,150,353,444 ka oras sa pagpakigsulti sa katawhan bahin sa Gingharian sa Diyos