Kapitulo 10

Ang Gipanumpa sa Diyos nga Buhaton Alang sa Katawhan—Karon Haduol Na!

ANG Diyos manumpa ba? Oo, ang Diyos manumpa, apan siya dili mogamit ug kalaw-ayan, nga mokalit pagkasuko ug mawad-ang pagpugong-sa-kaugalingon. Ang iyang pagpanumpa sa tanang panahon maoy aron sa paglig-on sa butang iyang ginapahayag nga mao ang iyang katuyoan. Kini nagahatag ug dugang pasalig niadtong apektado. Busa, ang tanang tawo maayong magpatalinghog sa iyang mga pulong sa Isaias 45:23: “Tungod sa akong kaugalingon ako nanumpa—ang pulong migula sa akong baba sa pagkamatarong, mao nga kini dili mobalik—aron kanako ang tanang tuhod mangapiko, ang tanang dila managpanumpa.”

² Karong adlawa, kapin ug 2,700 ka tuig tapos nianang tagnaa, kombinsido ba kitang matuod ang mga pulong sa manalagna sa Isaias 45:24: “Diha lamang gayod kang Jehova anaa ang bug-os nga pagkamatarong ug kusog. Ang tanang nangasilag kaniya manuol kaniya ug pagapakaulawan”? Kon mao, kita makauyon usab sa sunod nga mga pulong ni Isaias sa bersikulo 25: “Kang Jehova ang tanang binhi sa Israel mapamatud-ang matarong ug magpasigarbo sa ilang kaugalingon.”

³ Sa pagbasa sa Isaias 45:25, maghunahuna ba kita sa Republika sa Israel? Dili! Ang mga Israeli wala magpasidungog sa ilang pagdaog ngadto sa Diyos sa ilang sagradong Hebreohanong Kasulatan. Tungod sa sayop nga pagbalaan sila dili gani molitok sa iyang ngalan.

⁴ Tungod niana, kita ba mangatarongan nga ang Isaias 45:23-25 wala matuman hangtod niining tuiga? Dili! Walay pagkapakyas sa katumanan sa tagna sa tinudlong panahon ni Jehova. Uban kaniya, imposibleng mapakyas ang iyang tagna! Dili lamang ang iyang pulong sa kaugalingon kasaligan ug katuohan apan ilabinang matuod kana kon si Jehova manumpa niana, magdugang sa iyang panumpa, aron sa paglig-on sa mga butang.

Ang Diyos Misulod Uban ang Usa ka Panumpa

⁵ Mahitungod niini, atong mabasa sa Hebreohanon 6:13-18: “Kay sa pagsaad sa Diyos ngadto kang Abraham, kay wala may dako pa kaniya nga kapanumpaan, siya nanumpa sa iyang kaugalingon, nga nag-ingon: ‘Sa pagkatinuod pagapanalanginan ko ikaw, ug sa pagpadaghan padaghanon ko ikaw.’ Ug sa ingon tapos magpadayag si Abraham ug pailob, iyang nabatonan ang maong saad. Kay ang mga tawo nagapanumpa sa usa nga dako pa, ug ang ilang panumpa mao ang kataposan sa matag panaglalis, kay kini usa ka legal nga pasalig alang kanila. Niining paagiha ang Diyos, sa dihang siya may katuyoan nga ipasundayag nga labi pang dagaya ang pagkadili-mabalhinon sa iyang tambag ngadto sa mga manununod sa saad, misulod uban sa usa ka panumpa, aron nga, pinaagi sa duha ka dili-mabalhin nga butang nga niana dili mahimo sa Diyos ang pagbakak, kitang nakadangop na sa dangpanan makabaton untag lig-ong pagdasig sa pagpangupot sa paglaom nga gibutang sa atong atubangan.”

⁶ Sa malangkobon, may gamhanang panukmod sa pagpanumpa, sa pagpahayag sa usa ka panumpa. Kana matuod ilabina kon ang pagpanumpa maoy kinaugalingon sa Diyos, kinabubut-on. Ang maong panukmod gitagana niining kahimtanga diin si Jehova gitaho ingong nanumpa, oo, nanumpa sa iyang kaugalingon. Ang saad nga gilig-on sa panumpa nga gihimo ni Jehova kang Abraham, ang iyang “higala,” nagaapektar kanatong tanan karong adlawa. Gipabilhan kini ni Jehova dihang gidawat ni Abraham ang balaang imbitasyon ug mipahawa sa iyang yutang natawhan aron moadto sa yuta nga igahatag ni Jehova ngadto sa mga kaliwat ni Abraham aron panag-iyahon. Si Jehova sa luwas nga paagi makapadako sa ngalan sa maong “higala” ug makagamit kaniya aron panalanginan ang uban. Si Jehova nakaingon ngadto kaniya: “Ug pagapanalanginan ko kadtong magapanalangin kanimo, ug pagatunglohon ko kadtong magapanghimaraot kanimo, ug ang tanang banay sa yuta magapanalangin gayod sa ilang kaugalingon tungod kanimo.”—Genesis 12:3; Isaias 41:8.

⁷ Dihang ang asawa ni Abraham si Sara maoy 90 anyos na, nga dili na manganak, milagrosong gipaboran siya sa Diyos nga manganak alang kang Abraham sa ilang minahal nga anak, si Isaac, aron sa pagpausbaw sa Iyang kahibulongang saad ngadto kang Abraham. Si Abraham nagpamatuod nga andam ug buot mohalad bisan sa maong minahal nga anak ingong tawhanong halad sa pagsugot sa sugo sa iyang Diyos, si Jehova. Kadtong talagsaong pasundayag sa pagtuo ug pagkamasinugtanon nakapatandog kaayo kang Jehova nga siya miingon ngadto sa iyang “higala,” si Abraham:

⁸ “‘Sa akong kaugalingon ako nagapanumpa,’ nagaingon si Jehova, ‘nga tungod kay imong gibuhat kining butanga ug wala nimo ihikaw ang imong anak, ang imong bugtong nga anak, pagapanalanginan ko gayod ikaw ug padaghanon ko gayod ang imong binhi ingon sa mga bituon sa mga langit ug ingon sa mga balas sa dagat nga anaa sa baybayon; ug ang imong binhi manag-iya sa ganghaan sa iyang mga kaaway. Ug pinaagi sa imong binhi ang tanang nasod sa yuta magapanalangin sa ilang kaugalingon tungod kay ikaw nagpatalinghog sa akong tingog.’”—Genesis 22:15-18.

⁹ Kini ang unang dapit sa Bibliya diin si Jehova gitaho nga nanumpa. Tungod kay walay dako pa nga iyang kapanumpaan, siya nanumpa sa iyang kaugalingon, nga nag-obligar sa iyang kaugalingon nganha niana. Niining paagiha siya dili manubag kang bisan kinsa kondili sa iyang kaugalingon lamang. Maoy sa kaugalingon niyang kadungganan nga iyang ginatuman ang iyang kaugalingong pagpahayag sa katuyoan.

Asa Kutob?

¹⁰ Si Abraham misulod sa yutang saad sa Canaan duolag 4,000 ka tuig kanhi. Busa sa pagkakaron, diin na kutob natuman ang maong pakigtugon nga gihimo sa 1943 W.K.P.?

¹¹ Karong adlawa, nagalungtad ang Republika sa Israel sa Tungang Sidlakan. Sa kaugalingong interes niini, kini usa ka membro sa Hiniusang Kanasoran. Ang HK nagahawas sa pagsalikway sa Gingharian ni Jehova nga Diyos pinaagi sa sinaad nga “binhi” ni Abraham ug busa pagalaglagon sa “gubat sa dakong adlaw sa Diyos nga Makagagahom sa Tanan,” ang Armageddon. Ang matag membro sa HK, apil ang Republika sa Israel, pagapuohon nga dili na maglungtad. Makapasubo, ang unodnon, kinaiyanhong mga kaliwat ni Abraham wala makasunod sa mga kinahanglanon aron mahimong sinaad nga Mesiyanikong “binhi” nga pinaagi niana pagapanalanginan ni Jehova nga Diyos ang tanang tawo.—Pinadayag 16:14-16.

¹² Dayag nga himatikdan sa tanan, ang sinaad nga Mesiyas wala magmando sa yutan-ong Jerusalem sa Tungang Sidlakan aron matuman ang Abrahamikong pakigtugon. Lahi sa iyang katigulangang si David sa kakaraanan, ang Mesiyas ug ang “Prinsipe sa Pakigdait” dili mag-inusara sa pagmando. Siya misaad nga iuban niya sa iyang pagmando ang iyang 12 ka matinumanong apostol ug ang iyang ubang inanak-sa-espiritung mga tinun-an, nga ang gidaghanon maoy 144,000. (Pinadayag 7:1-8; 14:1-4) May nahibilin pa sa maong mga tinun-an sa yuta. Unsay gibuhat alang kanila sa pagpausbaw sa pagkatuman sa Abrahamikong pakigtugon nga gipanumpaan sa Diyos? Ang usa nga maoy pangunang umaabot nga kauban nianang Ginghariana, si apostol Pablo, misulat sa Galacia 3:8: “Karon ang Kasulatan, kay nakasabot daan nga ipahayag sa Diyos nga matarong ang katawhan sa kanasoran tungod sa pagtuo nagpahayag daan sa maayong balita ngadto kang Abraham, nga mao: ‘Pinaagi kanimo ang tanang nasod pagapanalanginan.’”

¹³ Ang mga Kristohanon nga gipili gikan sa kanasoran wala magpaabot sa pagkatukod sa Gingharian sa 1914 aron madawat ang sinaad nga panalangin, kay si apostol Pablo mipadayon sa pag-ingon: “Busa kadtong nagapabilin sa pagtuo ginapanalanginan uban sa matinumanong si Abraham.” (Galacia 3:9) Si Pablo usa ka Kristohanon ug gipanalanginan, ug mao usab ang tanang ubang inanak-sa-espiritung mga Kristohanon sa iyang adlaw.a Mao usab karong adlawa, ang nahibilin, nga nalangkoban sa inanak-sa-espiritung mga Kristohanon nga nagapabilin sa pagtuo sa Mesiyas ingong pangunang “binhi” ni Abraham aron sa pagpanalangin sa tanang tawo, nakaagom sa gisaad nga panalangin.

¹⁴ Pinaagi sa pagpahinungod sa ilang kaugalingon kang Jehova ug pagpasimbolo sa maong pagpahinungod pinaagi sa bawtismo sa tubig ug dayon gipanganak sa espiritu sa Diyos ngadto sa usa ka espirituwal nga kahimtang, kining mga Kristohanon nahimong espirituwal nga mga anak sa Labaw nga Abraham, si Jehova nga Diyos. Sila nahimo usab nga kaubang mga manununod ni Jesu-Kristo, ang Labaw nga Isaac. (Roma 8:17) Sila linaing gipanalanginan sumala sa Abrahamikong pakigtugon. Si Jehova nagatuman kon unsay iyang gipanumpang buhaton, sa ingon nagabayaw sa iyang kaugalingon ingong nagsulti sa tinuod, Usa nga hingpit makaarang sa pagtuman kon unsay iyang ugdang gipanumpa nga buhaton sa iyang kaugalingong ngalan.

¹⁵ Ang matag usa ka membro sa nahibilin sa inanak-sa-espiritung mga Kristohanon maoy Hudiyo sa espirituwal nga diwa. Sumala sa giingon ni apostol Pablo: “Siya dili usa ka Hudiyo kon ang iyang pagka-Hudiyo maoy sumala sa gawas nga panagway, ni ang sirkunsisyon mao kadtong sa gawas sa unod. Apan siya usa ka Hudiyo kon ang iyang pagka-Hudiyo maoy sa kahiladman, ug ang iyang sirkunsisyon maoy sa kasingkasing pinaagi sa espiritu, ug dili pinaagi sa sinulat nga kalagdaan.”—Roma 2:28, 29.

¹⁶ Niining “konklusyon sa sistema sa mga butang,” kadtong inanak-sa-espiritung mga Kristohanon, si kinsa mga Hudiyo sa kahiladman uban ang sirkunsisyon sa ilang mga kasingkasing, naglangkob sa Hudiyo nga matang nga gitagna sa Zacarias 8:23, diin kini nahisulat: “Kini ang giingon ni Jehova sa mga panon, ‘Mahitabo sa maong mga adlaw nga ang napulo ka lalaki gikan sa tanang pinulongan sa kanasoran mokupot, oo, sila mokupot gayod sa sidsid sa usa ka lalaki nga usa ka Hudiyo, nga magaingon: “Mouban kami kanimo, kay among nadungog nga ang Diyos nagauban kanimo.”’”

¹⁷ Ang “katawhan” nga kaniya buot mokuyog kadtong “napulo ka lalaki” sa pagsimba kang Jehova nga Diyos mao ang presenteng-adlaw nga nahibilin niadtong espirituwal nga mga Hudiyo, ang matang nga nagalangkob sa “matinumanon ug maalamong ulipon” sa Mateo 24:45-47. Sanglit ang numerong napulo nagahawas sa kabug-osan sa yutan-ong matang, ang “napulo ka lalaki gikan sa tanang pinulongan sa kanasoran” mobarog alang sa tanang simbolikong mga karnero nga gitagna sa Mateo 25:32-46. Kini sila maoy sakop sa “ubang mga karnero” nga matang nga giingon ni Jesus iyang dad-on sa pagpakig-uban sa karnerohong nahibilin aron maporma uban kanila ang “usa ka panon” nga atimanon sa “usa ka magbalantay,” nga siya mismo. (Juan 10:16) Sa maong paagi ila nang matilawan ang mga panalangin sa Abrahamikong pakigtugon pinaagi sa “binhi” sa Labaw nga Abraham, si Jehova nga Diyos. Nan, sa pagkatinuod ang gipanumpa sa Diyos nga buhaton alang sa tanang tawo haduol na!

[Mga footnote]

[Mga Pangutana nga Pagatun-an]

1, 2. (a) Sa unsang diwa ang Diyos nagapanumpa, ug ngano? (b) Unsay ginaingon sa Diyos sa Isaias 45:23? (c) Sa unsang mga pamulong sa manalagnang si Isaias nga kita makauyon?

3, 4. (a) Nganong ang Isaias 45:25 dili magpahunahuna kanato sa Republika sa Israel? (b) Napakyas ba pagkatuman ang Isaias 45:23-25, ug nganong kana ang imong tubag?

5. Sa unsang paagi ginapatin-aw sa Hebreohanon 6:13-18 ang pagsulod sa Diyos uban ang panumpa diha sa saad ngadto kang Abraham?

6. (a) Unsay nagtukmod sa Diyos sa pagpanumpa sa iyang kaugalingon maylabot sa iyang saad kang Abraham? (b) Sa unsang paagi gigamit ni Jehova ang iyang “higala”?

7. (a) Gipaboran sa Diyos sa unsang milagro si Abraham dihang ang iyang asawa 90 anyos na sa edad? (b) Giunsa pagpadayag ni Abraham ang iyang pagtuo ug pagkamasinugtanon sa linaing paagi?

8, 9. (a) Unsay sanong ni Jehova ngadto sa maong pasundayag sa pagtuo ug pagkamasinugtanon ni Abraham? (b) Gipahinabo sa Diyos nga siya manubag kang kinsa?

10. Unsa ka dugay na kanhi gihimo sa Diyos ang iyang pakigtugon uban kang Abraham, ug busa unsang pangutana ang motungha?

11. (a) Unsay ginapaila sa pagkamembro sa Republika sa Israel sa HK, ug uban ang unsang sangpotanan? (b) Ang kinaiyanhon bang mga kaliwat ni Abraham nakakab-ot sa mga kinahanglanon aron mahimong sinaad nga “binhi”?

12, 13. (a) Lahi sa iyang katigulangang si David, nganong ang “Prinsipe sa Pakigdait” dili mag-inusara sa pagmando? (b) Naghulat ba ang dinihogang mga Kristohanon sa pagkatukod sa Gingharian sa 1914 aron madawat ang sinaad nga panalangin, ug sa unsang paagi kita nahibalo?

14. (a) Sa unsang paagi ang dinihogang mga Kristohanon sa linain gipanalanginan sumala sa Abrahamikong pakigtugon? (b) Sa unsang paagi kini nagbayaw kang Jehova?

15. Ang matag membro sa nahibilin sa inanak-sa-espiritung mga Kristohanon maoy unsa sumala sa ginaingon ni apostol Pablo?

16. Ang espirituwal nga mga Hudiyo nagalangkob sa unsang matang nga gitagna sa Zacarias 8:23?

17. (a) Kinsay gihawasan sa “napulo ka lalaki” nga buot mosimba kang Jehova uban sa presenteng-adlawng nahibilin sa espirituwal nga mga Hudiyo? (b) Pinaagi sa pagpakig-uban sa espirituwal nga mga Hudiyo sa pagsimba kang Jehova, unsay gipahimuslan karon sa mga membro sa “ubang mga karnero”?