Gipahunong ni Jesus ang Bagyo

Seguradong gikapoy si Jesus sa tibuok adlawng buluhaton. Pagkagabii, iyang giingnan ang mga tinun-an: “Manabok kita sa pikas baybayon,” atbang sa Capernaum.—Marcos 4:35.

Naa sa sidlakang baybayon sa Dagat sa Galilea ang rehiyon sa mga Gerasanhon. Kining lugara nailhan sab nga Decapolis. Ang mga siyudad sa Decapolis maoy sentro sa kultura sa mga Grego, pero daghang Hudiyo ang nagpuyo didto.

Nahibaloan sa mga tawo ang pagbiya ni Jesus sa Capernaum. Busa dunay nanguyog sakay sa ubang sakayan. (Marcos 4:36) Dili ra man hinuon layo ang ilang adtoan. Ang Dagat sa Galilea maoy usa ka dako ug lawom nga lanaw, nga mga 21 kilometros ang gitas-on ug mga 12 kilometros ang gilapdon.

Bisag hingpit si Jesus, bation gihapon niya ang kakapoy tungod sa iyang mga buluhaton. Busa dihang naglawig na sila, siya mihigda sa ulin sa sakayan nga nag-unlan, ug nakatulog.

Pipila sa mga apostoles ang hanas sa paglawig, pero dili ni sayon nga biyahe. Ang Dagat sa Galilea gipalibotag mga bukid ug medyo init ang temperatura sa lanaw. Usahay mag-abot ang bugnaw nga hangin gikan sa bukid ug ang init nga hangin sa lanaw, nga mopatunghag kalit ug kusog nga bagyo. Ug mao nay nahitabo. Gihapak sa mga balod ang sakayan. Dayon “ang ilang sakayan nasudlag tubig ug hapit nang malunod.” (Lucas 8:23) Pero natulog gihapon si Jesus!

Ang mga tinun-an naningkamot nga makontrol ang sakayan, kay hanas man sila sa paglawig bisan pag daot ang panahon. Pero kusog kaayo ning bagyoha. Kay nahadlok mamatay, ilang gipukaw si Jesus ug giingnan: “Ginoo, tabang! Mangamatay na ta!” (Mateo 8:25) Ang mga tinun-an nahadlok nga malumos!

Pagmata ni Jesus, iyang giingnan ang mga apostoles: “Nganong nangalisang man mo, kamong diyutay ug pagtuo?” (Mateo 8:26) Dayon gibadlong ni Jesus ang hangin ug ang balod: “Hilom! Hunong na!” (Marcos 4:39) Milurang ang hangin ug nawala ang dagkong balod. (Giasoy ni Marcos ug Lucas kining makapahinganghang hitabo. Una, gipasiugda ang milagrosong pagpakalma ni Jesus sa bagyo, ug dayon gihisgotan ang kakulang ug pagtuo sa mga tinun-an.)

Hunahunaa ang epekto niini sa mga tinun-an! Ilang nasaksihan nga milinaw ang Dagat sa Galilea human kini gipakalma ni Jesus. Puwerte nilang hadloka. Busa sila miingon: “Kinsa man gyod ni siya, kay bisan ang hangin ug ang dagat mopatuo man kaniya?” Ug luwas silang nakaabot sa pikas tampi. (Marcos 4:41–5:1) Ug lagmit nakatabok pod ang ubang mga sakayan.

Makapahupay gayod ang pagkahibalo nga ang Anak sa Diyos dunay gahom sa pagpahunong ug bagyo! Dihang mabug-os na ang iyang pagtagad sa yuta panahon sa iyang pagmando sa Gingharian, ang tanang tawo mopuyo nga may kasegurohan kay wala nay makapalisang nga mga kalamidad!