Kon Unsaon sa Pagkaplag ug Kalipay sa Paghimog Tinun-an

USA sa dakong kalipay nga masinati sa usa ka tawo mao kanang pagkahimong isigkamagbubuhat sa Diyos. Karon, ang buluhaton sa Diyos naglakip sa pagtigom sa mga tawong hilig sa pagkamatarong ngadto sa Kristohanong kongregasyon ug sa pagbansay kanila sa kinabuhi ingong mga Kristohanon karon ug usab alang sa kaluwasan ngadto sa usa ka bag-ong kalibotan.​—Miqueas 4:1-4; Mateo 28:19, 20; 2 Pedro 3:13.

Usa ka tinubdan sa dakong kalipay alang sa mga Saksi ni Jehova sa Latin Amerika ang pagkakita sa usa ka milyong tawo nga nangahimong mga tinun-an ni Jesu-Kristo sukad sa 1980. Niining mabungahong natad, diin daghan ang nagtahod ug nagtuo sa Bibliya, ang ubang bug-os panahong mga ministro nakatabang ug daghan nga magpahinungod sa ilang mga kinabuhi kang Jehova. Uban sa daghan kaayong kasinatian, tingali sila adunay ikasugilon kanato bahin sa kalipay sa paghimog tinun-an. Ang pipila sa ilang mga sugyot makatabang kanimo nga makakaplag ug kalipay sa paghimog mga tinun-an sa dapit nga imong gipuy-an.

Pag-ila sa Posibleng Mahimong “Karnero”

“Sa bisan unsang siyudad o balangay nga kamo mosulod, pangitaa kon kinsa diha niana ang takos,” nag-ingon si Jesus sa dihang gipadala niya ang iyang mga apostoles sa pagsangyaw. (Mateo 10:11) Kon ikaw moduaw sa mga tawo, unsaon nimo pag-ila ang mga tawo nga matabangan sa espirituwal? Si Edward, usa ka bug-os panahong ministro nga kapin na sa 50 ka tuig, nag-ingon: “Ilang ipakita kini pinaagi sa ilang tim-os nga mga pangutana ug sa ilang katagbawan sa dihang tubagon gikan sa Kasulatan.” Si Carol midugang: “Kon isulti kanako sa usa ka tawo ang iyang personal nga problema o kabalaka, kini sa pagkatinuod usa ka pagpangayog panabang. Maningkamot ako sa pagpangitag makatabang nga impormasyon diha sa mga publikasyon sa Watch Tower Society. Ang maong personal nga interes sagad motultol ug usa ka pagtuon sa Bibliya.” Apan, ang mga sinsero dili kanunay daling mailhan. Si Luis miasoy: “Ang uban nga daw interesado kaayo misangpot nga dili diay interesado, apan ang uban nga daw supak sa sinugdan nagbag-o sa dihang nadungog nila kon unsa gayod ang giingon sa Bibliya.” Sanglit daghang taga-Latin Amerika nagtahod sa Bibliya, siya midugang, “Mailhan nako kadtong matabangan sa espirituwal sa dihang sila andam nga modawat sa gitudlo sa Bibliya human nga ipakita ko kini kanila.” Ang pagtabang sa maong “takos” nga mga tawo nga mouswag sa espirituwal makahatag ug tinuod nga kalipay ug katagbawan. Unsaon nimo pagbuhat kini?

Pagsugod sa mga Pagtuon sa Bibliya

Ang paggamit ug mga tabang sa pagtuon sa Bibliya pinaagi sa “kasaligan ug mabuot nga ulipon” sagad mao ang labing maayong paagi sa pagtabang sa mga tawo nga makasabot sa kamatuoran sa Bibliya. (Mateo 24:45) Sa unsang paagi mapadako nimo ang apresasyon sa bili sa maong mga tabang sa pagtuon sa Bibliya? Si Edward miingon: “Sanglit ang mga sirkumstansiya, personalidad, ug mga panglantaw sa mga tawo lainlain man, naningkamot ako nga mapailin-ilinon sa pagsugod sa mga pagtuon sa Bibliya.” Dili mahimong gamiton nimo ang samang paagi uban sa tanan.

Sa uban, ang daghang di-pormal nga mga panaghisgot sa Kasulatan tingali gikinahanglan una pa ipailaila ang usa ka tun-anan sa pagtuon sa Bibliya. Bisan pa niana, usa ka magtiayong misyonaryo nagtaho: “Sagad namong itanyag ang pagtuon sa unang pagduaw.” Ingon man, ang usa ka Saksi nga nakatabang ug 55 ka tawo hangtod sa punto sa pagpahinungod miingon: “Ang akong pangunang paagi sa pagsugod sa mga pagtuon sa Bibliya mao ang pagsugod dihadiha sa librong Ikaw Mabuhing Walay Kataposan sa Paraiso sa Yuta.” Bisan pag ang uban supak sa ideya sa pagtuon ug bisan unsa, ang uban andam sa pagtuon ug bisan unsay ilang gituohan nga makatabang kanila sa kinabuhi. Ang tanyag sa libreng mga klase sa Bibliya sa balay sagad madanihon alang kanila. Ang ubang misyonaryo nagbatbat niining tanyaga ug dayon miingon: “Buot nakong ipakita kanimo kon unsaon namo kini pagbuhat. Kon gusto ka, ikaw makapadayon. Kon dili ka gusto, anaa kana kanimo.” Kon itanyag kini nianang paagiha, ang mga tawo dili mobatig kahadlok sa pagdawat.

Ang laing Saksi, nga nakatabang ug daghan sa mga timawa ug kulag edukasyon, miingon: “Akong nakita nga ang mga tract makatabang kaayo sa pagsugod ug mga pagtuon sa Bibliya.” Bisag unsang publikasyon ang ilang gamiton, ang bug-os panahong mga magtutudlo naningkamot sa paghatag ug dakong pagpasiugda sa Bibliya. Si Carola nag-ingon: “Sa unang pagtuon, gamiton lang nako ang mga hulagway ug mga lima ka kasulatan, aron ang pangunang mga punto ikapasiugda ug ang Bibliya mopatim-aw nga dili lisod.”

Paghupot nga Magpadayon ang Interes

Malipay ang mga tawo nga mobatig pag-uswag, busa mirekomendar si Jennifer: “Himoang makalingaw ang pagtuon. Hupting nagaabante.” Ang regular nga pagdumala sa pagtuon nga dili sal-angan ang mga semana makatabang usab kanila nga mobating sila naghimog pag-uswag. Ang usa ka espesyal payunir nga gipadako sa kailayahan nagbatbat sa importansiya sa pagpayano sa mga pagpatin-aw ug sa pagsentro sa pagtagad sa pangunang mga punto, aron nga bisan kadtong kulag edukasyon mouswag. Siya miingon: “Sa akong baryo, kinahanglang among bisbisan ang yuta ug tubig human mapugas ang binhi. Kon among bahaan ang kaumahan, ang yuta mogahi nga magpalisod sa paggitib sa motuboay nga mga binhi, ug kini mamatay. Sa ingon usab, kon imong bahaan ug daghang punto ang bag-ong mga interesado, daw malisod kini kaayo ug sila mohunong.” Bisan ang mga tawong may mausisaon nga mga hunahuna kinahanglang makakat-on sa pagsentro sa pagtagad diha sa usa ka ulohan sa usa ka panahon kon buot nilang mouswag sa pagsabot. Si Jesus miingon sa iyang mga apostoles: “Daghan pang butang nga akong isulti kaninyo, apan kamo dili pa makadaog pagdala niini sa pagkakaron.”​—Juan 16:12.

Ang laing paagi sa paghupot nga magpadayon ang interes mao ang pagdasig niadtong imong giduaw nga magpadayon sa pagpalandong sa Pulong sa Diyos kon wala ka. Si Yolanda mirekomendar: “Pagbilin ug pangutana nga dili tubagon. Hatagi silag homwork nga pagabuhaton, sama sa pagbasag usa ka bahin sa Bibliya o pagsusi sa usa ka ulohan nga naglangkit kanila.”

Ugmara ang Gugma Alang Kang Jehova

Ang imong kalipay mouswag kon imong tabangan ang imong mga estudyante nga mahimong “magbubuhat sa pulong, ug dili tigpaminaw lamang.” (Santiago 1:22) Unsaon nimo pagbuhat kana? Ang matuod nga mga Kristohanon napalihok pinaagi sa gugma kang Jehova. Si Pedro, nga gikan sa Mexico, nag-asoy: “Dili mahimong higugmaon sa mga tawo ang usa ka tawo nga dili nila kaila, busa sa pagsugod gayod sa pagtuon, tudloan ko sila sa ngalan sa Diyos gikan sa Bibliya, ug mangita akog higayon nga mapasiugda ang mga hiyas ni Jehova.” Sa pakigsultihay, imong matukod ang apresasyon alang kang Jehova pinaagi sa pagpahayag sa imong mga pagbati alang kaniya. Miingon si Elizabeth: “Hisgotan nako kanunay ang pagkamaayo ni Jehova. Sa akong mga pagtuon, kon makakita ako ug matahom nga bulak, maanindot nga langgam, o nagduladulang iring, hisgotan nako kanunay nga kini maoy buhat ni Jehova.” “Hisgoti ang bahin sa gisaad sa Diyos nga bag-ong kalibotan nga ingon ka tinuod sa imong nahibaloan,” nagsugyot si Jennifer. “Pangutana kon unsay buot nilang buhaton sa bag-ong kalibotan.”

Kon mapabilhong palandongon sa usa ka tawo ang iyang nakat-onan bahin kang Jehova, kini motidlom sa iyang kasingkasing ug motukmod kaniya sa paglihok. Apan dili siya makapalandong gawas kon iyang mahinumdoman. Usa ka mubong repaso sa tulo o upat ka pangunang mga punto human sa matag pagtuon maoy tabang sa paghinumdom. Daghang magtutudlo sa Bibliya nagpasulat sa mga bag-ohan sa yawing mga kasulatan uban ang usa ka nota sa likod sa ilang Bibliya. Usa ka misyonaryo sa Inglaterra nagbatbat sa laing kaayohan sa mga repaso: “Mangutana ako kon sa unsang paagi nakahatag ug kaayohan kanila ang impormasyon. Kini makapalandong kanila nga mapabilhon sa mga dalan ug mga kasugoan ni Jehova.”

Usa ka matinumanong Saksi nga migraduwar gikan sa ikatulong klase sa Gilead nag-ingon: “Kita kinahanglang magmadasigon. Kinahanglang masayod ang atong mga estudyante nga atong gituohan ang atong ginatudlo.” Ang pagtuo nga naghimo kanimong usa ka malipayong “magbubuhat sa buluhaton” makatakod kon imo kining ipakita.​—Santiago 1:25.

“Nakita ko nga ang mga tawo mobating mas suod sa Diyos kon tabangan ko sila sa pag-ila sa mga tubag sa ilang mga pag-ampo,” nag-ingon ang usa ka Saksi nga nakatabang sa daghan sa pagsimba kang Jehova. “Hatagan ko silag mga panig-ingnan gikan sa akong kaugalingong kasinatian, sama niining usa: Sa dihang kami sa akong kauban miabot sa usa ka bag-ong asaynment ingong mga payunir, kami dihay diyutayng utanon lamang, usa ka paketeng mantekilya, ug walay kuwarta. Nahurot namo ang pagkaon sa panihapon ug miingon, ‘Karon wala na kitay pagkaon ugma.’ Giampo namo kana, ug nangatulog. Sayo sa pagkasunod buntag usa ka lokal nga Saksi miduaw ug nagpailaila sa iyang kaugalingon, nga nag-ingon, ‘Nag-ampo ako nga si Jehova magpadalag mga payunir. Karon ako makauban kaninyo halos sa tibuok adlaw, apan sanglit ako nagpuyo man sa gawas sa nasod, ako maniudto uban kaninyo, busa gidala ko kining pagkaon alang kanatong tanan.’ Daghang baka ug mga utanon kadto. Isulti nako kanunay sa akong mga estudyante nga dili gayod kita pasagdan ni Jehova kon unahon nato pagpangita ang iyang Gingharian.”​—Mateo 6:33.

Itanyag ang Praktikal nga Tabang

Daghan pa ang nalangkit sa paghimog mga tinun-an ni Kristo kay sa pagdumalag pagtuon sa Bibliya. Usa ka misyonaryo nga nakaalagad sa daghang tuig ingong usa ka nagapanaw nga magtatan-aw miingon: “Hatagi silag panahon. Ayaw pagdalidali pagpauli human sa pagtuon. Kon haom, pabilin una ug pakig-estorya sa makadiyot.” Si Elizabeth nag-ingon: “Ako nagpakitag interes kanila tungod kay nalangkit ang kinabuhi. Daghang higayon nga nabalaka ako kanila ingon sa daw sila akong mga anak.” Ang ubang mga Saksi misugyot niini: “Duawa sila kon sila nagkasakit.” “Kon duol ka sa ilang balay, pananglitan diha sa pag-alagad sa kanataran, duawa sila makadiyot aron ipailaila ang ubang mga Saksi ngadto kanila.” Si Eva miingon: “Pamati pag-ayo aron makasabot sa kagikan sa tawo ug pagkabutang sa kinabuhi. Kini mag-apektar sa paagi sa pagsanong sa mga tawo sa kamatuoran ug makababag sa ilang pag-uswag. Pagpakighigala kanila, aron sila makabatog kompiyansa sa pagsulti sa ilang mga problema.” Si Carol midugang: “Ang tinuod nga interes diha sa tawo hinungdanon sanglit ang mga kausaban sa kamatuoran nga mahatag sa iyang kinabuhi usahay magkahulogan sa pagkawala sa pamilya ug mga higala. Kasagaran, maayo kon ang estudyante mahibalo kon diin kita nagpuyo ug may pagsalig sa pagduol kanato sa bisan unsang panahon.” Tabangi siya sa paglantaw sa kongregasyon ingong iyang bag-ong pamilya.​—Mateo 10:35; Marcos 10:29, 30.

“Magmaalisto sa pagtanyag ug praktikal nga tabang. Lingkod uban kanila sa mga tigom, ug tabangi sila sa ilang mga anak,” matod ni Yolanda. Ang pagpakita sa mga bag-ohan kon unsaon pagbansay sa ilang mga anak, sa pagpauswag sa ilang mga sukdanan sa kahinlo, sa pag-andam sa mga komento alang sa mga tigom, ug sa paghatag ug mga pakigpulong sa Tunghaan sa Teokratikanhong Ministeryo tanan maoy bahin sa buluhatong paghimog tinun-an. Laing igsoong babaye midugang: “Hinungdanong bansayon ang mga bag-ohan sa ministeryo. Kon pasagdan kining bahina sa pagbansay, ang uban magpabiling mahadlokon sa buluhatong pagsangyaw, mawad-an sa ilang kalipay sa pag-alagad kang Jehova, ug dili makalahutay.” Busa itagana ang maampingong pagbansay diha sa balay-ug-balay nga buluhaton, sa paghimog mga pagbalik-duaw, ug sa pagsugod sa mga pagtuon sa Bibliya. Ang imong kalipay dako sa dihang imong makita nga mouswag ang imong estudyante pinaagi sa imong tabang ug paggiya.

Palig-ona Sila nga Molahutay

“Anaa ang kiling nga pasagdan na ang pagtuon sa dihang ang estudyante bawtismado na,” nagpasidaan ang eksperyensiyadong tighimog tinun-an. Kinahanglang hinumdoman sa magtutudlo ug sa estudyante nga ang bag-ong nabawtismohan nga Kristohanon dili pa hamtong sa espirituwal. Nagkinahanglan pa siyag dugang pagtubo sa iyang pagtuo, sa iyang apresasyon sa balaod sa Diyos, ug sa iyang gugma kang Jehova. Hinungdanong dasigon siya sa paghimog maayong personal nga batasan sa pagtuon aron siya magpadayon sa pag-uswag.​—1 Timoteo 4:15.

Ang bag-ohan tingali nagkinahanglag tabang aron mouswag ug mahimong maabiabihong membro sa asosasyon sa mga igsoon. Siya tingali nagkinahanglag paggiya sa pagpakiglabot sa mga kahuyangan sa mga igsoon samtang siya nagkasuod kanila. (Mateo 18:15-35) Siya tingali nagkinahanglag tabang nga mahimong hanas nga magtutudlo, makaarang sa paghimog iyang kaugalingong panukiduki. Usa ka misyonaryo miasoy: “Usa ka estudyante human bawtismohi buot nga magpauswag sa iyang katakos ingong usa ka magtutudlo, busa siya miingon kanako, ‘Kinahanglang magdumala ako ug bag-ong pagtuon sa sunod semana, apan kinahanglan kong palunhawon ang akong panumdoman sa unang mga kapitulo nga akong natun-an. Mahimo ba nimong repasohon kining mga kapituloha uban kanako pag-usab, nga usa sa matag panahon, aron makakuha akog nota sa mga pagpatin-aw sa mga kasulatan ug mga ilustrasyon, ug unya akong magamit kini sa dihang moadto ako sa akong pagtuon sa Bibliya?’ Siya nahimong maayo kaayong magtutudlo, nga upat sa iyang mga estudyante ang gibawtismohan sa usa ka asembliya.”

Kon Nganong ang Paghimog Tinun-an Takos sa Paningkamot

“Ang paghimog mga tinun-an nagkahulogan ug dugang nga mga magdadayeg kang Jehova. Kini nagkahulogan ug kinabuhi alang niadtong modawat sa kamatuoran,” matod ni Pamela. “Gusto gayod akong motudlo sa kamatuoran sa uban​—maanindot kaayo kini! Makita sa usa nga ang mga estudyante inanayng nag-uswag, naghimog mga kausaban sa ilang mga kinabuhi ug nakabuntog sa mga kababagan nga daw dili masagubang kon dili pa sa espiritu ni Jehova. Daghan niadtong nakadangat sa paghigugma kang Jehova nahimong akong suod kaayong mga higala.”

“Sa dihang palandongon nako kadtong akong natabangan sa pagkahimong mga tinun-an,” miasoy ang usa ka misyonaryo gikan sa Alemanya, “nakita ko ang maulawon kaayong mga tawo nga nakahimog dakong kauswagan ingong mga ministro sa Diyos nga halos dili ako makatuo niana. Nakita nako ang mga tawo nga nakabuntog sa dagko kaayong kababagan, nga dayag pinaagi sa tabang ni Jehova. Nakita ko ang mga pamilya nga niadto nabungkag apan karon nahiusa​—malipayong mga anak nga may responsableng mga ginikanan. Nakita ko ang mga tawo nga nagpahimulos ug makahuloganong mga kinabuhi, nga nanagdayeg kang Jehova. Kini mao ang kalipay sa paghimog mga tinun-an.”

Oo, ang pagkahimong isigkamagbubuhat sa Diyos nga Jehova sa buluhatong paghimog tinun-an maoy usa ka tuboran sa dili-ikatandi nga kalipay. Ang mga kasinatian sa mga misyonaryo ug mga payunir nagpamatuod niini. Ikaw makakaplag ug samang kalipay ug katagbawan kon ipadapat nimo ang mga sugyot ug buhaton kini nga kinasingkasing. Uban sa panalangin ni Jehova, mahingpit ang imong kalipay.​—Proverbio 10:22; 1 Corinto 15:58.