Ayaw Kamo Pagkataka sa Pagbuhat ug Maayo

“Dili kita managkataka sa pagbuhat ug maayo, kay sa nahaigo nga panahon kita magaani kon kita dili magakaluya.”—GALACIA 6:9.

1. Unsang komisyon o sugo ang gihatag ni Jesus sa iyang mga sumusunod?

PAGKAMAAYO sa buluhaton nga ginabuhat sa mga Kristohanon ingong bahin sa ilang pagsimba! Kini nahisakop sa tin-aw nga sugo: “Busa panlakaw kamo ug himoa ang mga tinun-an sa katawhan sa tanang kanasoran, nga magabawtismo kanila . . . , nga magatudlo kanila sa pagbantay sa tanang butang akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:19, 20) Si Jesu-Kristo mao mismo ang naghatag sa iyang mga tinun-an sa sugo nga himoon kanang tibuok-kalibotang buluhaton sa pagpanudlo.

2. (a) Nganong kita makaingon nga ang paghimog tinun-an maoy buluhaton nga hinungdanon ug maayo? (b) Unsang mga katuyoan ang ginaalagaran sa buluhatong paghimog tinun-an?

² Sanglit ang sugo sa paghimog tinun-an usa man sa kataposang mga pahayag nga gihimo ni Jesus ngadto sa iyang unang mga tinun-an una mosaka sa langit, dili ba kadto labing hinungdanon nga tinudlong buluhaton? Oo, kay ang pagbuhat niana makaluwas sa mga kinabuhi. (1 Timoteo 4:16) Kana nagahimo niana nga usa ka maayong buluhaton. Kini nagataganag maayong edukasyon sa Bibliya alang sa magpatalinghog sa mensahe sa Gingharian, ug ang buluhaton sa pagwali nagapasidaan sa mga dili-mosanong. (Lucas 10:10, 11) Busa, ang ilang pagbuhat niining buluhatona nagapaila sa matuod nga mga Kristohanon sama ra sa pagsunod nila sa ubang mga pagtulon-an ni Jesus.—Juan 8:31.

3. (a) Unsay sanong sa mga tinun-an ni Jesus ngadto sa iyang personal nga panig-ingnan ug sa iyang sugo kanila? (b) Unsang tinamdan ang giugmad ni Jesus diha sa iyang mga tinun-an?

³ Ingong Dakong Magtutudlo, gihatag ni Jesus ang labing maayong panig-ingnan alang sa iyang mga sumusunod. Siya nagtudlo sa dayag ug naghimog mga tinun-an pinaagi sa “pagwali sa maayong balita sa gingharian.” (Mateo 9:35) Sa pagsundog kaniya, ang bag-ong mga sumusunod mismo nahimong mga tighimog tinun-an, kay ang matuod nga tinun-an maoy “usa nga nagatuo ug nagatabang sa pagpakaylap sa mga doktrina sa lain.” Sa sinugdan, ang ilang buluhatong paghimog tinun-an gilimite lamang ngadto sa mga Hudiyo ug sa mga kinabig. Hinunoa, tungod sa dili-maayong pagsanong niadtong natarana, gituman ba sa mga sumusunod ni Jesus ang iyang sugo nga “magpadayon sa pag-adto” nga “walay hunong”? Aw, oo, sila “nangadto sa nangawalang mga karnero sa balay sa Israel” hangtod ang unang mga Hentil nahimong mga magtutuo sa 36 K.P. (Mateo 10:5, 6; Buhat 5:42) Gikaingon nga ang mga tinun-an “nagpuno sa Jerusalem sa [ilang] pagpanudlo.” (Buhat 5:28) Sila wala magakataka sa ilang maayong buluhaton. Hinunoa, matinumanon silang nagpadayon sa pagtuman niana.

“Ang Uma Mao ang Kalibotan”

4. Uban sa unsang tinamdan ang mga sumusunod ni Jesus nagtuman sa ilang gipadakong buluhaton?

⁴ Gipaila ni Jesus nga ang uma magaapil sa “katawhan sa tanang kanasoran.” (Mateo 28:19) Sa usa ka sambingay mahitungod sa pagpugas sa binhi sa Gingharian, siya miingon: “Ang uma mao ang kalibotan.” (Mateo 13:38) Busa, ang mga Kristohanon mahimong Gingharianong “mga saksi” niya sa bisan diin. Sila usab “mopadayon sa pag-adto,” niining panahona “sa kinalay-ang bahin sa yuta.” (Buhat 1:8) Si apostol Pablo “napuliki sa labihan sa pulong,” ug kita makatino nga ang ubang Kristohanon puliki usab.—Buhat 18:5.

5. Giunsa sa pagpakita ni Jesus nga iyang gidahom nga mapuliki kaayo ang iyang mga tinun-an sa buluhatong pagsangyaw hangtod sa kataposan sa presenteng sistema?

⁵ Gidahom ni Jesus nga mapuliki kaayo ang mga Kristohanon sa buluhatong pagsangyaw hangtod sa kataposan sa presenteng sistema sa mga butang. Kini gipakita sa iyang gitagna mahitungod sa Kristohanong ministeryo ug sa teritoryo nga ilang kobrehan. Si Jesus miingon: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang kanasoran; ug unya moabot ang kataposan.”—Mateo 24:14.

6. Hangtod kanus-a pagabuhaton ang buluhatong pagwali sa Gingharian, ug sa unsang paagi kini magaapektar sa atong tinamdan bahin niini?

⁶ Sa dihang gihatag ni Jesus ang sugo sa paghimo sa buluhaton sa pagwali sa Gingharian ug sa paghimog tinun-an sa tibuok yuta, nasayod siya nga may adlaw rang kanang maayong buluhaton mahidangat sa tayuktok niini, sama ra sa nahitabo sa Hudiyonhong natad. Ug kana makalampos sa katuyoan niana. “Dayon,” sumala sa iyang giingon, “moabot ang kataposan.” Busa, hangtod sa kataposan, ang mga Saksi ni Jehova sa masaligon ug mangayaon magpadayon sa buluhatong gihatag kanila. Kana nagabulig kanila sa pagpadayon sa buluhaton sa atong adlaw hangtod matapos kini.

Kon Unsaon Paghimo ang Buluhaton

7. Unsang temaha ang nagtimaan sa ministeryo ni Jesus ug sa iya sa iyang mga tinun-an?

⁷ Si Jesus nagtudlo sa iyang unang mga tinun-an kon unsaon paghimo ang ilang publikong ministeryo. Madasigon nilang gisunod ang iyang sugo nga “panlakaw kamo.” Sa dihang nagbansay kanila alang sa ilang buluhaton sa pagsangyaw, si Jesus miingon: “Samtang manlakaw kamo, magwali kamo, nga magaingon, ‘Ang gingharian sa mga langit haduol na.’” (Mateo 10:7) Kana naghatag sa ilang mensahe sa samang tema nga mao ang Gingharian nga mao ang timaan sa iyang ministeryo. Kana maayong balita alang sa mga buotan ug kasingkasing. Sa dihang gisugdan sa mga sumusunod ni Jesus ang ilang buluhaton, mihunong ba siya? Wala, gayod, kay “sa nakatapos na si Jesus paghatag ug mga tugon ngadto sa iyang napulog-duha ka tinun-an, siya milakaw gikan didto aron sa pagpanudlo ug pagwali sa ilang mga siyudad.”—Mateo 11:1.

8. (a) Diin ug sa unsang paagi himoon sa mga magmamantala sa Gingharian ang ilang pagduol? (b) Nganong nahiangay ang pagdala sa maayong balita ngadto sa balay sa usa ka tawo? (c) Unsa ang mga kaayohan sa tukmang paghatag ug katahoran sa usa ka tagbalay?

⁸ Diin ug sa unsang paagi himoon sa maong mga magmamantala sa Gingharian ang ilang pagduol? Giingnan sila ni Jesus: “Inigsulod ninyo sa balay, hatagig katahoran ang panimalay.” (Mateo 10:12) Ang pagsulod sa balay sa usa ka tawo uban ang maayong balita nagahatag kahalangdon sa tagbalay, nga magahatag kaniyag higayon sa pagdawat o pagsalikway sa mensahe sa Gingharian sulod sa iyang pinuy-anan. Ang naandan ug dinawat nga mga matang sa paghatag ug katahoran dili lamang mao ang matinahoron ug mahunahunaong mga paagi sa pagsugod sa kabildohay, apan may kaayohan usab nga mabatonan tungod kay ang mahigalaon ug mangayaong paghatag ug katahoran maghimo sa wala-dapita nga pagduaw nga inabiabi nga duaw. (Itandi ang Mateo 28:9; Lucas 1:28.) Ang tono sa tingog ug pagtubag sa tawo diha sa pultahan daghag ginatug-an kanimo bahin sa iyang tinamdan. Kinahanglang tagdon mo kana sa dili pa mopadayon kay ang maong kahibalo mas mopasayon sa pagpasibo sa imong mga komento ngadto sa mga panginahanglan sa tagbalay.—Itandi ang Buhat 22:1, 2; 23:6.

9. Unsay nagapakitang dili tanan mamati sa mensahe sa Gingharian nga may pagpabili, ug unsa ang reaksiyon niadtong dili magpakitag interes niana?

⁹ Gipahibalo ni Jesus ang iyang mga tinun-an nga dili maayog pagsanong ang tanang tawo sa usa ka teritoryo. Siya miingon: “Sa bisan unsang siyudad o balangay nga inyong adtoan, pangitaa kon kinsa diha ang takos.” Kon modawat pa ang tanan sa mensahe sa Gingharian, wala untay katarongan nga gamiton ang pamulong “pangitaa ninyo.” Unsa ba ang angay nga pagsanong ngadto niadtong dili mopakitag interes sa mensahe? “Sa dihang may dili magpadayon kaninyo o magpatalinghog sa inyong mga pulong, sa paggula nianang balaya o nianang siyudara itaktak ninyo ang abog sa inyong mga tiil,” nga molakaw diha sa kalinaw ug itugyan ang sangpotanan ngadto sa paghukom ni Jehova.—Mateo 10:11, 14.

Ang Kahimtang Karong Adlawa

10. Unsay gikaingon bahin sa kalihokan sa pagwali sa Gingharian sa mga Saksi ni Jehova?

¹⁰ Sa matinumanong pagsunod sa Kristohanong komisyon o sugo, gilukop sa mga Saksi ni Jehova ang yuta sa mensahe sa Gingharian. Busa, si A. P. Wisse, usa ka magsusulat sa Netherlands, mikomento: “Sila lain sa ubang tawo. Bahin sa maong kalainan mao ang sangpotanan sa ilang madasigong pagwali. Giisip nila ang matuod nga Kristiyanidad dili ingong relihiyon nga may mga katedral, uban ang mga parokyano nga ang matag usa may kaugalingong pihong dapit ug kansang relihiyon nangayo lamang nga sila magpatalinghog. Sila nagasulting waylipodlipod sama ni Pablo kang bisan kinsa nga magpatalinghog.” Ang maong kadasig sa ministeryo tinong gipanalanginan ni Jehova nga Diyos.

11, 12. (a) Unsang mga resulta ang napatungha sa ministeryo sa katuigang dili pa dugay? (b) Samtang kita mouswag sa gidaghanon, unsay nagakahitabo sa mabatonang teritoryo nga masangyawan? (c) Unsang mga pangutana ang mapatungha?

¹¹ Kapin sa 3,000,000 ka magmamantala sa Gingharian karon madasigong nagabuhat diha sa 210 ka nasod. Makita nato ang dakong pag-uswag sa bag-ong mga tinun-an—1,246,204 ang nabawtismohan sa miaging pito ka tuig. Dayag ang pagpanalangin ni Jehova sa makugihong paningkamot. (Isaias 60:8-10, 22) Ngani, sa labing menos 40 ka nasod ug kaislahan, adunay usa ka Saksi sa matag 300 ka molupyo o menos pa, o usa sa mga 100 ka panimalay! Dugang pa, sa pila ka bahin sa mga nasod sama sa Canada ug Guadeloupe, ang proporsiyon maoy usa ka Saksi sa 45 o 50 ka tawo sa teritoryo sa usa ka kongregasyon—mga 15 lamang ka balay o menos nga duawon sa matag magmamantala! Daghan sa maong mga teritoryo gisangyawan kada bulan. Bisan sa mga nasod nga mas tag-as ug mga proporsiyon, ang pila ka bahin sa siyudad subsob kaayong gikobrehan sa atong pagsangyaw nga buluhaton. Sa Seoul, Republika sa Korea, ang pila ka teritoryo sa siyudad gisangyawan kada lima ka adlaw! Samtang kita nagauswag sa gidaghanon, ug samtang dugang ug dugang mga Saksi ang nagahimo sa buluhatong payunir ug auxiliary payunir, magakasubsob ang atong pagduaw sa kabalayan sa atong mga silingan. Makahatag ba kanag mga suliran?

¹² Pagaadmitihong adunay mga suliran sa pila ka dapit, alang sa mga Saksi ni Jehova ug sa atong ginaduaw. Nakadugang sa mga suliran mao ang mausbawong kawalay-pagtagad sa katawhan diha sa daghang kayutaan. Aw, samtang mouswag ang atong gidaghanon, kita ba inanay magakataka sa pagbuhat sa atong maayong buluhaton? Nagahinapos ba kitang ang atong buluhaton hapit nang mahuman ug kita ‘nakapangita na’ niadtong mosanong ug nangahimong mga tinun-an? Kita ba sa personal gikapoy na ug tingali mibatig kapakyasan sa pagduaw sa samang dili-mosanong nga mga tawo? Unsay mahimo aron atong ipadayon ang labing dako natong kalihokan?

Padayong Paghupot sa Hustong Tinamdan

13, 14. (a) Angay unsay atong pag-isip sa maugmad nga kahimtang sa teritoryong subsob masangyawan? (b) Nganong dili kita maluya tungod sa “dili mosanong”? (c) Sa unsang paagi kita makasunod sa apostolikanhong panig-ingnan sa pag-atubang niadtong mayugot sa atong mga pagduaw?

¹³ Ang kasulbaran sa panguna naglangkit sa atong tinamdan ingong mga saksi ni Jehova. Sa usa ka butang, atong tan-awon kanunay ang masanagong kiliran. Ang mas subsob nga pagkobre sa teritoryo tungod sa hataas nga proporsiyon sa mga magmamantala nganha sa populasyon tinong naugmad diha sa daghang dapit samtang ang atong buluhaton nagsingabot sa tayuktok niini. Apan dili ba kini ang atong giampo? (2 Tesalonica 3:1) Ang ato karong makita angay makapasadya kanato ug magkombinsir kanato nga kita ania na sa kataposang mga ang-ang sa buluhatong paghimog tinun-an! Ang Gingharian ginawali sumala sa gitagna ni Jesus. Ug bisan sa mga dapit nga ang mga tawo ‘dili mamati sa atong mga pulong,’ sila ginapasidan-an pinaagi sa atong buluhatong pagwali sa Gingharian. Hinumdomi, gawas sa paghimog mga tinun-an, kita nagamantala sa maayong balita “alang sa pamatuod.”—Mateo 10:14; 24:14.

¹⁴ Dugang pa, pagadahomon nga ang nagauswag nga gidaghanon mosalikway sa mensahe sa Gingharian samtang magkahiduol ang kataposan. Tin-aw ang mga panagna, ug ang mga kasinatian ni Jesus ug ni Pablo nagapasalig kanatong anaay “dili mosanong” ug kansang mga kasingkasing “dili madawaton.” Busa, niining panahona kinahanglang mag-amping kita nga kita dili kay dili mosanong sa atong komisyon. Bisan niadtong dili mosanong, kinahanglang kita moadto “nga balikbalik.” (Isaias 6:9-11; Mateo 13:14, 15; Proverbio 10:21) Matuod, kinahanglag kaisog sa pag-adto nga subsob sa mga tawong dili gusto sa atong mga pagduaw. Bisan pa niana, walay kahimtang sa teritoryo sa bisan diin ang magaingon kanato nga, ‘Hunong na kamo sa pagsulti.’ Hinunoa, sama sa mga apostol, kita angay moampo alang sa kaisog sa “pagpadayon sa pagsulti”—bisan pa sa kayugot o pagkadili-mahigalaon—hangtod matapos ang buluhaton.—Buhat 4:18-20, 24-31.

15. Unsang pagdasig ang gihatag sa Galacia 6:9, ug sa unsang paagi kini angay mag-apektar sa atong pag-isip sa pagduaw sa atong mga silingan uban ang maayong balita?

¹⁵ Sa panguna, adunay duha lamang ka matang sa mga tawo sa tanan natong teritoryo—kadtong sa maong gutlo interesado ug kadtong dili. Busa, kinahanglang atong ipadayon ang buluhaton sa ‘pagpangita sa mga takos.’ Ang pagbuhat niini nahiapil sa daghang ekselenteng binuhatan nga kinahanglang atong ipatungha ingong mga Kristohanon sa pagpakita sa atong gugma kang Jehova ug sa atong pagkamaunongon kaniya. Busa, “dili kita magakataka sa pagbuhat ug maayo, kay sa nahaigo nga panahon kita magaani kon kita dili magakaluya.” (Galacia 6:9) Sanglit kita karon haduol na kaayo sa kataposan niining sistemaha, karon dili mao ang panahon sa pagkataka o kapoyon sa pagduaw sa atong mga silingan uban sa maayong balita sa Gingharian. Si Jehova wala pa moingong natapos na ang buluhaton.

Kon Nganong Kinahanglan Kita “Magpadayon sa Pagsulti”

16. (a) Unsa ang pipila sa mga sirkumstansiya nga makausab sa sanong sa mga tawo sa usa ka teritoryo? (b) Unsang lokal nga mga panig-ingnan sa kausaban sa pagsanong ang imong ikahatag?

¹⁶ Kita matabangan usab sa paghupot ug maayong tinamdan kon atong hinumdomang ang pagkamaunongon kang Jehova gipasundayag sa madasigong mga kalihokan sa pagwali sa Gingharian. Dugang pa, kanunay mausab ang mga teritoryo sa nagkalainlaing paagi. Ang mga tawo mamalhin o tingali mausab ang ilang mga kahimtang. Sila tingali dili interesado sa kataposang panahong kita miduaw, apan ang pagkawala sa trabaho, pagkamatay sa usa ka minahal, usa ka dakong kausaban sa pagbisogay tali sa mga dagkong gahom sa kalibotan, grabeng sakit—kini ug ang ubang kausaban mahimong magpasabot nga sila masanongon sa sunod panahong kita moduaw. Ang uban, kay nahibalo nga ang usa ka higala o minahal nahimong usa sa mga Saksi ni Jehova, basin karon buot nang makigsulti kanato aron mahibalo kon unsay atong gituohan nga nakapatungha sa maong kausaban.

17. Unsay sanong sa pipila karon sa mensahe sa Gingharian? Paghatag ug lokal nga mga panig-ingnan.

¹⁷ Hinumdomi, usab, nga kadtong nangahamtong sa katuigang dili pa dugay karon may mga pamilya na, nagaisip sa kinabuhi nga ugdang, ug may mga pangutana nga matubag lamang sa Pulong sa Diyos. Pananglitan, ang usa ka batan-ong inahan nagpadayon sa duha ka Saksi sa iyang balay ug miingon: “Sa bata pa ako, wala gayod ako makasabot nganong ang akong inahan dili magpadayon sa mga Saksi ug mosulti kanila nga dili siya interesado, sa dihang ang buot lamang ninyong buhaton mao ang paghisgot sa Bibliya. Mihukom ako niadto nga sa dihang ako modako, maminyo, ug magbatog kaugalingon nakong balay, padayonon ko ang mga Saksi ni Jehova ug ipasaysay ang Bibliya kanako.’

18. Sa unsang paagi ang nagakausab nga relihiyosong kahimtang nagaapektar sa teritoryo nga niana kita nagasangyaw ug nagatudlo?

¹⁸ Nakamatikod ka ba nga ang pila ka tawo nga dili makigsulti kanato sa daghang katuigan ug naghunahuna nga sila luwas na karon nagasukna kanatog sinserong mga pangutana? Ngano? Nahitabo ang kausaban sa ilang panghunahuna bahin sa relihiyon. Sila nagaingon nga sila nawad-ag kasibot ug nalisang sa mga pagyagyag bahin sa imoral nga kagawian, politikanhong mga kalihokan, ug pag-usik sa kuwarta sa simbahan sa pila ka iladong ebanghelista sa telebisyon nga sa nangagi ilang gisaligan. Lagmit, may daghan pa niana samtang ang mga kahimtang sulod sa Dakong Babilonya mopadayon sa pagkadaot hangtod sa panahong siya laglagon.—Pinadayag 18:1-8.

19, 20. Unsay nagapakita nganong kita angay dili mobatig kaluya mahitungod sa pagduaw nga balikbalik sa mga tawong dili modawat sa mensahe?

¹⁹ Sa bisan unsang paagi, kita angay nga dili maluya dihang ang kadaghanang tawo dili madinawaton. Inigbiya nato kanila, basin kita anaa pa sa ilang mga panumdoman. Sa Canada ang usa ka tagbalay nga giduaw sa duha ka Saksi nagklaro gayod nga siya dili interesado. Sa ulahi, misugod siya sa pagpalandong sa ilang gisulti ug buot niyang pangitaon sila aron matubag nila ang mga pangutana nga mitungha sa iyang hunahuna. Misakay siya sa iyang kotse ug nangita kanila nga nagngadto-nganhi sa kadalanan sa iyang silinganan apan wala sila hikaplagi. Mihunong ba siya? Wala, siya mihapit sa balay sa usa ka higala aron mangutana kon sila tua ba didto. Wala sila didto, apan miingon ang higala nga may Saksi sa iyang gitrabahoan ug iyang ipakontak sa Saksi ang babayeng interesado. Ang sangpotanan mao ang sunodsunod nga pagduaw sa balay sa tawong interesado, nga niana gidapit niya ang mga higala, mga silingan, mga paryente, ug mga kauban sa trabaho. May panahong abot ug 15 ka tawo ang presente, ug mga 430 ka libro ug Bibliya ingon man 2,015 ka magasin ang napahimutang.

²⁰ Daghan ang moangay sa atong mga pagduaw. Sa usa ka sulat ngadto sa usa ka sangang-buhatan sa Watch Tower Society, usa ka babaye miingon: “Salamat tungod sa pagsilsil ug dakong dedikasyon diha sa mga kasingkasing niadtong sakop sa inyong pagtuo. Salamat sa pagduaw . . . ug pagpakig-ambit sa gugma sa Ginoo sa uban. Ang maong yanong buhat dako kaayog ginabuhat alang sa uban. . . . Bisan pag ang uban tingali pintasan, ang uban dili matinagdanon, ug ang uban madinawaton, . . . tinuod nga dako kaayo ang mahimong kaayohan nga may moduaw sa pagpahinumdom kanimo sa espirituwal nga mga butang. Giisip ko nga kini maayo, ang paghisgot sa Ginoo sa usag usa.” Sa laing sulat, ang usa ka tagbalay mihangyo kanamo nga ‘dili matak-an sa mga tawo,’ bisan pag unsay ilang pagtagad kanamo. “Busa dili kita magakataka sa pagbuhat ug maayo, kay sa nahaigo nga panahon kita magaani kon kita dili magakaluya.” (Galacia 6:9) Kining buluhatona dunay pag-uyon ug panalangin ni Jehova, ug ang atong paghimo niini nagapamatuod sa atong gugma kaniya ug sa atong silingan. (Mateo 22:37-39) Busa atong ipadayon ang buluhaton hangtod sa pagkahuman.—Itandi ang Filipos 1:6.

21. (a) Kalagmitan diin man ang bahin sa hagit sa pagduaw pag-usab sa subsob gisangyawan nga mga teritoryo? (b) Unsay pagahisgotan sa sunod nga artikulo?

²¹ Atubangon nato ang kamatuoran nga tingali ang mga tawo dili kanunay ang maorag makahatag kalisod sa pagsangyaw sa teritoryo nga subsob. Usahay kita mismo ang nagapalisod. Mosugod ba kitang may negatibong mga ideya, kay mibating nakaila na kita sa mga tawo ug nasayod kon unsay ilang mga reaksiyon? Makaapektar kana sa atong tinamdan ug lagmit sa atong tono sa tingog ug sa dagway sa nawong. Gigamit ba gihapon nato ang samang mga metodo ug pulong nga atong gigamit sa daghang katuigan? Karon nga nausab na ang teritoryo ang butang milampos sa nangagi basin dili na makaabot sa ubang mga takos. Tingali gikinahanglan nato ang bag-ong paagi ug bag-ong panglantaw sa atong buluhaton. Sunod, atong tan-awon kon unsay atong mahimo aron kita dili ‘magakataka apan makaani sa nahaigo nga panahon.’

Makapatin-aw Ka Ba?

◻ Nganong kita dili angay “magakataka” sa pagduaw sa atong mga silingan uban ang maayong balita?

◻ Kinsay nagsugo kanato sa paghimog mga tinun-an sama sa atong ginahimo, ug unsa ang paninugdang mga bahin nianang metodoha?

◻ Unsang kahimtang ang naugmad diha sa daghang teritoryo, ug unsay motabang kanato sa pagpadayon sa paghupot sa matarong nga tinamdan bahin nianang kahimtanga?

◻ Nganong angay kita magpadayon sa pagpahayag sa maayong balita nga “walay hunong”?

[Kahon sa pahid 14]

KITA “DILI MAGAKATAKA” SA PAGSANGYAW SA GINGHARIAN KON ATONG HINUMDOMAN:

◻ Kon kinsay naghatag kanato sa sugo ug sa instruksiyon kon sa unsang paagi himoon ang buluhaton

◻ Nga ang panalangin ni Jehova anaa sa ginabuhat na sa tibuok kalibotan

◻ Ang pagpadayon sa paghupot sa hustong tinamdan bisan pa sa “mga dili mosanong”

◻ Ang pag-ampo sa “pagpadayon sa pagpahayag” sama sa gibuhat sa mga apostol