GOMORA
Usa sa “mga siyudad sa Distrito” nga lagmit nahimutang duol sa habagatang tumoy sa Patayng Dagat. (Gen 13:12) Mopatim-aw nga ang Sodoma ug Gomora mao ang labing ilado taliwala niining mga siyudara. Gituohan sa daghang eskolar nga ang mga kagun-oban niini karon nalusbog ilalom sa katubigan sa Patayng Dagat, bisan tuod ang pipila nag-ingon nga ang mga kagun-oban sa mga siyudad tingali mao ang mga kagun-oban ubay sa mga lugot dapit sa S ug HS sa Patayng Dagat. Sa panahon ni Abraham ang rehiyon gihubit ingong “maayong pagkatubig . . . sama sa tanaman ni Jehova.” (Gen 13:10; tan-awa ang DISTRITO SA JORDAN.) Sa panahon nga si Lot, ang pag-umangkon ni Abraham, mipuyo niining tabunok nga Distrito, si Haring Birsa sa Gomora uban sa mga hari sa upat pa ka laing mga siyudad sa Distrito mirebelde batok sa pagmando ni Kedorlaomer sa Elam ug sa laing tulo ka kaalyadong mga hari. Sila giatake ug nangalagiw, nga ang pipila sa ilang mga sundalo nangahulog sa daghan kaayong mga gahong sa aspalto sa maong dapit. Giagawan sa mga hari sa Sidlakan ang Sodoma ug Gomora ug gibihag si Lot.—Gen 14:1-12.
Kapin sa 14 ka tuig sa ulahi, ang tuaw sa pagmulo tungod sa pagkadaotan sa Sodoma ug Gomora misamot pag-ayo mao nga si Jehova nagpadalag mga manulonda sa pagsusi sa kahimtang ug dayon sa paglaglag sa maong mga siyudad pinaagig ulan nga kalayo ug asupre.—Gen 18:20, 21; 19:24, 28.
Ang bug-os nga pagkalaglag niining mga siyudara human niadto gigamit ingong simbolo sa bug-os nga kalaglagan. (Deu 29:22, 23; Isa 1:9; 13:19; Jer 49:18) Mahulagwayong gipahayag ni Jehova ang hilabihang pagkaunlod sa mga magmamando ug sa katawhan sa Juda ug Jerusalem ngadto sa pagkadaotan sa dihang siya miingon kanila pinaagi sa manalagna nga si Isaias: “Pamatia ninyo ang pulong ni Jehova, kamong mga diktador sa Sodoma. Pamatia ninyo ang balaod sa atong Diyos, kamong mga taga-Gomora.”—Isa 1:1, 10; Jer 23:14.
Sa dihang gisaway ang pipila ka Hudiyohanong mga siyudad sa unang siglo, gihisgotan ni Jesus ang hilabihang pagkadaotan sa Sodoma ug Gomora. Iyang gitumong ang maong mga pulong sa pagsaway ngadto sa dili-mahinulsolong Capernaum, diin didto personal niyang gihimo ang daghan sa iyang gamhanang mga buhat. Ug mahitungod sa bisan unsang siyudad nga mosalikway sa iyang mga tinun-an, nga dili magpasundayag ug pagtuo bisan pa sa gamhanang mga buhat nga ilang gihimo ingong ebidensiya sa pagpaluyo sa Diyos, si Jesus miingon: “Mas maagwanta pa unya alang sa yuta sa Sodoma ug sa Gomora ang Adlaw sa Paghukom kay nianang siyudara.” (Mat 10:5-15; 11:23, 24) Sanglit ang Sodoma ug Gomora ug ang mga siyudad sa palibot niini gisilotan pinaagi sa “kalayo nga walay kataposan,” nga naghawas sa dumalayon nga kalaglagan, dayag nga gigamit ni Jesus dinhi ang usa ka hyperbole, o paghingapin, aron ipasiugda nga imposible gayod nga magbag-o ang maong walay pagtuong mga Hudiyo bisan pa kon sila presente sa Adlaw sa Paghukom.—Jud 7.