Mga Pangutana Gikan sa mga Magbabasa

◼ Diha sa Mateo 10:21, nagpasidaan ba si Jesus kanato nga daghang mga igsoon sa kongregasyon mobatok sa ilang espirituwal nga mga igsoon?

Dili, dili kana mao ang punto sa pasidaan ni Jesus, nga mabasa: “Dugang pa, ang igsoon magatugyan sa iyang igsoon ngadto sa kamatayon, ug ang amahan magatugyan sa iyang anak, ug ang mga anak makigbatok sa mga ginikanan ug ipatay sila.”​—Mateo 10:21.

Ang konteksto nagpakita nga gipamulong kini ni Jesus ngadto sa 12 ka apostoles sa dihang iyang gipapanaw sila sa pagwali sa Israel. Ang kadaghanan sa iyang gipamulong ilabinang may kahulogan alang sa mga apostoles. Pananglitan, siya miingon mga sila gihatagag gahom sa paghimog milagrosong mga pagpang-ayo, sa pagpagula sa mga yawa, ug bisan sa mga pagbanhaw. (Mateo 10:1, 8; 11:1) Ang kasaysayan nagpamatuod nga dili tanang mga Kristohanon nakadawat sa maong milagrosong mga gahom, nga nagpamatuod nga si Jesus dinhi nagpakigpulong sa usa ka espisipiko nga mamiminaw​—ang iyang mga apostoles.

Apan, ang pipila sa gipamulong ni Jesus nagaabot dili lang sa pagpapanaw sa mga apostoles aron sa pagwali. Iyang gisultihan sila: “Magbantay kamo sa mga tawo; . . . kamo pagataralon ngadto sa mga gobernador ug sa mga hari tungod kanako, aron sa pagpamatuod kanila ug sa mga nasod.” (Mateo 10:17, 18) Niana nga panaw sa pagwali, ang 12 tingali nakaatubang ug pagsupak, apan walay ebidensiya nga sila “gitaral ngadto sa mga gobernador ug sa mga hari” aron sa pagpamatuod sa “mga nasod.”a Sa ulahi nga mga tuig, ang mga apostol miatubang sa mga magmamando, sama sa mga Hari nga si Herodes Agripa I ug II, Sergio Paulo, Galion, ug bisan si Imperador Nero. (Buhat 12:1, 2; 13:6, 7; 18:12; 25:8-12, 21; 26:1-3) Busa ang mga pulong ni Jesus mapadapat sa ulahi.

Ang tambag ni Jesus nagpadayon uban ang pasidaan: “Ang igsoon magatugyan sa iyang igsoon ngadto sa kamatayon.” Siya wala magpunting sa espirituwal nga mga igsoon ni naghisgot siya sa espirituwal nga mga amahan o mga anak uban sa iyang sunod nga pulong diha sa bersikulo 21: “Ang amahan [magatugyan] sa iyang anak, ug ang mga anak makigbatok sa mga ginikanan ug ipatay sila.” Ang gipasabot ni Jesus mao nga ang mga apostoles makadahom ug pagbatok o pagsupak bisan sa mga paryente.​—Mateo 10:35, 36.

Ang mga apostoles gikinahanglang molahutay sa maong panaw sa pagwali. Si Jesus nagpadayon: “Pagadumtan kamo sa tanang tawo tungod sa akong ngalan; apan ang molahutay hangtod sa kataposan mamaluwas.”​—Mateo 10:22.

Ang pipila sa gipamulong ni Jesus sa maong okasyon hinungdanon alang kanato ingong mga Saksi ni Jehova karong adlawa. Ang gipasiugda sa atong pagwali mao ang Gingharian. Atong gihimo ang atong ministeryo nga walay bayad ug nagapangita sa mga tawong interesado sa balita o takos niana. Gikinahanglan usab nga mag-amping. Daghan kaayo ang mga magsusupak. Usahay mga paryente, mga silingan, o mga kauban sa trabaho mopahibabog grabeng mga problema, ilabina sa mga sinsero nga nagsugod na sa pagtinguha sa dalan sa matuod nga Kristiyanidad. Gisobli ni Jesus ang pasidaan mahitungod sa maong pagsupak sa nagbatbat sa “ilhanan” sa iyang presensiya. (Mateo 24:3, 9, 10; Lucas 21:16, 17) Iyang gisobli usab ang atong panginahanglan sa ‘paglahutay hangtod sa kataposan aron mamaluwas.’ Oo, kinahanglang molahutay kita hangtod sa kataposan sa atong presenteng kinabuhi o hangtod nga kining sistema sa mga butang matapos ug kita makasulod diha sa usa ka bag-ong kalibotan.​—Mateo 24:13.

[Footnote]