Mga Pangutana Gikan sa mga Magbabasa

Angay ba natong ihinapos gikan sa Mateo 11:11 nga si Jesus nahibalo nang daan nga unang mamatay si Juan Bawtista kay kang Jesus?

Oo, dayag nga si Jesus nahibalo nga si Juan dili na hiabtang buhi aron mahimong usa ka dinihogang Kristohanon, kay si Jesus miingon: “Sa pagkatinuod magaingon ako kaninyo nga, Taliwala sa mga gianak ug babaye, wala pay nahitungha nga molabaw pa ka dako kay kang Juan Bawtista; ngani ang labing gamay diha sa gingharian sa langit dako pa kay kaniya.”​—Mateo 11:11.

Sa gipahayag sa manulondang si Gabriel ang umaabot nga pagkatawo ni Juan, siya mitagna nga si Juan, “uban sa espiritu ug gahom ni Elias, . . . magatagana alang kang Jehova ug usa ka inandam nga katawhan.” Si Juan mahimong usa ka mag-uuna, magaandam ug usa ka katawhan alang sa Mesiyas ni Jehova. Apan walay gipaila diha sa maong balaanong pahibalo nga si Juan mismo mahimong usa ka tinun-an sa umaabot nga Mesiyas, ni dunay bisan unsang sugyot bahin niana diha sa matagnaong pahayag nga gilitok sa amahan ni Juan, si Zacarias.​—Lucas 1:17, 67-79.

Busa, human bawtismohi si Jesus, si Juan nagpadayon sa pagsangyaw ug sa pagpamawtismo, nagpabilin sa iyang tinudlong buluhaton sa pag-andam ug usa ka katawhan. Sa milagrosong paagi nahibalo si Juan nga si Jesus motaganag usa ka bawtismo pinaagi sa balaang espiritu, apan si Juan wala mag-ingon nga siya mismo makadawat ug balaang espiritu, nga mahimong usa ka dinihogang Kristohanon. (Mateo 3:11) Giila usab ni Juan nga siya magakakunhod, samtang si Jesus padayong magauswag.​—Juan 3:22-30.

Sa gipamulong ni Jesus kanang atong mabasa sa Mateo 11:11, si Juan nabilanggo na. Gipahibalo nang daan ni Jesus nga kining nabilanggo nga manalagna mas gamay kay sa usa nga labing gamay kinsa sa umaabot mag-alagad ingong hari-saserdote didto sa mga langit. Oo, si Jesus usab mopatim-aw nga nahibalo nga si Juan mamatay sa dili madugay, mahanaw sa yutan-ong talan-awon una pa buksan ang “bag-ong” dalan ngadto sa langitnong kinabuhi. (Hebreohanon 10:19, 20) Kana nagpasabot nga si Juan dili na hiabtang buhi hangtod sa Pentekostes 33 K.P., dihang misugod ang pagdihog sa balaang espiritu sa mga tinun-an ni Jesus. Busa, ang komento ni Jesus sa Mateo 11:11 mahimong pagaisipon usab nga usa ka timaan nga siya nahibalo nga si Juan dili mahaadto sa langit.