Ang Milagrosong Pagpang-ayo sa Katawhan Haduol Na

“WALA kita sukad makakitag sama niini.” Mao kanay giingon sa mga nakakita sa milagroso, dihadihang pagkaayo sa paralitiko nga gihimo ni Jesus. (Marcos 2:12) Gipang-ayo usab ni Jesus ang mga buta, amang, ug ang mga piang, ug ang iyang mga sumusunod mihimo sa susama. Pinaagi sa unsang gahom nga gibuhat kana ni Jesus? Unsay gidulang bahin sa pagtuo? Unsang kalamdagan ang gipahinabo niining unang-siglong mga kasinatian diha sa milagrosong pagpang-ayo karon?​—Mateo 15:​30, 31.

“Ang Imong Pagtuo Nakapaayo Kanimo”

Ang mga mananambal pinaagig pagtuo karong adlawa gustong mokutlo sa pahayag ni Jesus ngadto sa usa ka babaye nga nag-antos ug 12 ka tuig gumikan sa talinugo kinsa miduol kaniya aron matambalan: “Ang imong pagtuo nakapaayo kanimo.” (Lucas 8:​43-48) Ang pahayag ba ni Jesus nagpakita nga ang iyang pagkaayo nagdepende sa iyang pagtuo? Pananglitan ba kadto sa “pagpanambal pinaagig pagtuo” sama sa ginahimo karong adlawa?

Kon basahon nato pag-ayo ang talaan sa Bibliya, atong makita nga sa kadaghanang higayon si Jesus ug ang iyang mga tinun-an wala magkinahanglan nga ang mga masakiton mopahayag sa ilang pagtuo una pa ayoha. Ang babaye nga gihisgotan sa ibabaw miduol ug, nga walay gisulti kang Jesus, hilom nga mikupot sa iyang sapot sa likod ug “dihadiha ang iyang pagtalinugo mihunong.” Sa laing okasyon, giayo ni Jesus ang usa ka tawo nga lakip niadtong miabot aron sa pagdakop kaniya. Giayo gani niya ang usa ka tawo nga wala makaila kon kinsa si Jesus.​—Lucas 22:​50, 51; Juan 5:​5-9, 13; 9:​24-34.

Nan, unsay papel nga gidula sa pagtuo? Sa dihang si Jesus ug ang iyang mga tinun-an didto sa distrito sa Tiro ug Sidon, usa ka babayeng Fenicianhon miabot ug misinggit sa makusog: “Kaluy-i ako, Ginoo, Anak ni David. Ang akong anak nga babaye grabeng nademonyohan.” Handurawa ang iyang kawalay-paglaom samtang siya mihangyo: “Ginoo, tabangi ako!” Gihakop sa kaluoy, si Jesus mitubag: “O babaye, dako ang imong pagtuo; ipahinabo kini kanimo sumala sa buot mo.” Ug ang iyang anak nga babaye naayo “sukad niadtong taknaa.” (Mateo 15:​21-28) Tin-aw, ang pagtuo nalangkit, apan kansang pagtuo? Matikdi nga pagtuo kadto sa inahan, dili sa batang-masakiton, nga gidayeg ni Jesus. Ug pagtuo sa unsa? Pinaagi sa pagtawag kang Jesus nga “Ginoo, Anak ni David,” ang babaye publikong nag-ila nga si Jesus mao ang gisaad nga Mesiyas. Dili kadto yanong pahayag sa pagtuo sa Diyos o pagtuo sa gahom sa tig-ayo. Sa dihang si Jesus miingon, “Ang imong pagtuo nakapaayo kanimo,” iyang gipasabot nga kon walay pagtuo kaniya ingong Mesiyas, ang mga masakiton dili unta moduol kaniya aron ayohon.

Gikan niining mga pananglitan sa Kasulatan, atong masabtan nga ang pagpang-ayo nga gihimo ni Jesus lahi kaayo sa kasagarang makita o giangkon karong adlawa. Walay hilabihang pasundayag sa pagbati​—pagsinggit, pangyamyam, pagminatay, pagkawala sa panimuot, ug uban pa​—gikan sa panon ug walay dramatikong pagsalimuang sa bahin ni Jesus. Dugang pa, si Jesus wala mapakyas sa pag-ayo sa maluyahon sa pasangil nga sila nakulangan sa pagtuo o nga ang ilang halad nga salapi diyutay ra.

Mga Pagpang-ayo Pinaagi sa Gahom sa Diyos

Sa unsang paagi nahitabo ang mga pagpang-ayo ni Jesus ug sa iyang mga tinun-an? “Diha ang gahom ni Jehova aron siya maghimog pagpang-ayo,” mitubag ang Bibliya. (Lucas 5:17) Human sa usa ka pagpang-ayo, matod sa Lucas 9:​43, “silang tanan misugod sa pagkahingangha sa halangdong gahom sa Diyos.” Sa katukma, wala itumong ni Jesus ang pagtagad ngadto kaniya ingong mananambal. Sa usa ka higayon iyang giingnan ang usa ka tawo nga iyang gipahigawas gikan sa pagpanghasi sa demonyo: “Pauli sa imong mga paryente, ug itaho kanila ang tanang butang nga gihimo ni Jehova alang kanimo ug ang kaluoy niya kanimo.”​—Marcos 5:19.

Sanglit si Jesus ug ang mga apostol nanagpang-ayo pinaagi sa gahom sa Diyos, sayon sabton kon nganong ang pagtuo sa bahin sa usa nga giayo dili kanunayng gikinahanglan aron ayohon. Hinunoa, ang lig-ong pagtuo sa bahin sa tig-ayo gikinahanglan. Busa, sa dihang ang mga sumusunod ni Jesus wala makapagawas ug usa ka matang sa gamhanang demonyo, giingnan sila ni Jesus sa katarongan: “Tungod sa kagamay ninyog pagtuo.”​—Mateo 17:20.

Katuyoan sa Milagrosong Pagpang-ayo

Bisan tuod naghimog daghang pagpang-ayo si Jesus latas sa iyang yutan-ong ministeryo, siya wala lamang magsunod sa usa ka ‘ministeryo sa pagpang-ayo.’ Ang iyang milagrosong pagpang-ayo​—nga niana wala siya magpabayad sa mga tawo o nangayog bisan unsang donasyon​—maoy segundaryo sa iyang pangunang buluhaton, nga mao ang ‘pagwali sa maayong balita sa gingharian.’ (Mateo 9:35) Ang talaan nag-ingon nga sa usa ka higayon “gidawat niya sila nga maluloton ug misugod sa pagsulti kanila bahin sa gingharian sa Diyos, ug siya nag-ayo niadtong nanginahanglag pag-ayo.” (Lucas 9:11) Sa mga asoy sa Ebanghelyo, si Jesus kanunayng gitawag nga “Magtutudlo” apan dili gayod ingong “Mananambal.”

Nan, nganong naghimo si Jesus ug milagrosong pagpang-ayo? Sa panguna maoy aron ipaila ang iyang kaugalingon nga mao ang gisaad nga Mesiyas. Sa dihang si Juan Bawtista dili-makataronganong gibilanggo, buot niya ug pasalig nga iyang natuman ang buluhaton nga gipabuhat sa Diyos kaniya. Iyang gipadala ang iyang kaugalingong mga tinun-an kang Jesus ug nangutana: “Ikaw ba mao ang Usa nga Moanhi, o magdahom pa kami ug lain?” Matikdi kon unsay giingon ni Jesus sa mga tinun-an ni Juan: “Lakaw ug itaho kang Juan kon unsay inyong nadungog ug nakita: Nagpakakita pag-usab ang mga buta, ug ang mga bakol nagpanglakaw, ang mga sanlahon gihinloan ug ang mga bungol nagpakadungog, ug ang mga patay gipamangon, ug ang mga kabos ginapahayagan sa maayong balita.”​—Mateo 11:​2-5.

Oo, ang kamatuoran nga si Jesus dili lang kay naghimog pagpang-ayo apan usab sa ubang milagrosong mga buhat nga nasulat sa Ebanghelyo lig-ong nagpaila sa iyang kaugalingon ingong “ang Usa nga Moanhi,” ang gisaad nga Mesiyas. Wala nay panginahanglan ni bisan kinsa nga ‘magdahom ug lain.’

Milagrosong mga Pagpang-ayo Karong Adlawa?

Nan, dahomon ba nato nga pamatud-an sa Diyos ang iyang gahom karong adlawa pinaagi sa mga pagpang-ayo? Dili. Pinaagi sa milagrosong mga buhat nga iyang gihimo pinaagi sa gahom sa Diyos, gihimo ni Jesus nga dili kaduhaduhaan nga siya mao ang Mesiyas nga gisaad sa Diyos nga moabot. Ang gamhanang mga buhat ni Jesus nasulat sa Bibliya aron basahon sa tanan. Dili na kinahanglang pamatud-an pa sa Diyos ang iyang gahom pinaagi sa pagsubli sa maong mga buhat diha sa matag kaliwatan sa katawhan.

Makaiikag, ang mga pagpang-ayo ug ubang milagrosong mga buhat makapakombinsir lamang sa usa ka sukod. Bisan ang uban nga nakasaksi sa mga milagro ni Jesus wala motuo nga siya gipaluyohan sa iyang langitnong Amahan. “Bisan tuod siya nakahimog daghan kaayong mga ilhanan atubangan kanila, sila wala managbutang ug pagtuo kaniya.” (Juan 12:37) Maoy hinungdan nga human hisgoti ang lainlaing milagrosong mga gasa​—pagpanagna, pagsultig mga dila, pagpang-ayo, ug uban pa​—nga gihatag sa Diyos sa lainlaing mga membro sa unang-siglong Kristohanong kongregasyon, si apostol Pablo gidasig sa pag-ingon: “Kon aduna may mga gasa sa pagpropesiya, kini sila wagtangon ra; kon aduna may mga dila, kini sila mohunong; kon aduna may kahibalo, kini wagtangon ra. Kay kita adunay dili-bug-os nga kahibalo ug kita nagapropesiya nga dili-bug-os; apan sa dihang kanang bug-os moabot, kanang dili-bug-os wagtangon.”​—1 Corinto 12:​28-31; 13:​8-10.

Siyempre, ang pagbaton ug pagtuo sa Diyos hinungdanon alang sa atong kaayohan. Bisan pa niana, ang pagbase sa atong pagtuo sa bakak nga mga saad sa mga pagpang-ayo motultol lamang sa kahigawad. Dugang pa, mahitungod sa panahon sa kataposan, si Jesus mihatag niining maong pasidaan: “Manungha ang bakak nga mga Kristo ug bakak nga mga propeta ug maghatag ug dagkong mga ilhanan ug mga katingalahan aron mopahisalaag, kon posible, bisan sa mga pinili.” (Mateo 24:24) Gawas pa sa pagpanambal konohay ug panglimbong, mahimong aduna usab ing kapasundayagan sa gahom sa demonyo. Ingong resulta, ang mga pangangkon sa dili-ikasaysay nga mga hitabo angayng dili makapatingala kanato, ug kini tinong dili pasikaranan sa tinuod nga pagtuo sa Diyos.

Sanglit walay usa karong adlawa ang naghimog mga pagpang-ayo sama kang Jesus, nadisbentahaan ba kita? Dili gayod. Sa pagkatinuod, kadtong giayo ni Jesus sa ngadtongadto mahimong nasakit pag-usab. Silang tanan natigulang ug namatay. Ang mga kaayohan sa pagpang-ayo nga ilang nadawat kadiyot ra. Bisan pa niana, ang milagrosong mga pagpang-ayo ni Jesus adunay dumalayong kahulogan sa pagkaagi nga kini naglandong sa umaabot nga mga panalangin.

Busa, human susiha ang Pulong sa Diyos, ang Bibliya, si Alexandre ug Benedita, nga gihisgotan sa sinugdan, wala na motuo sa modernong pagpang-ayo pinaagig pagtuo ug sa espiritistikanhong pagpanambal. Bisan pa niana, sila kombinsido nga ang milagrosong pagpang-ayo dili mga butang sa nangagi. Nganong ingon niana? Sama sa minilyon sa tibuok kalibotan, sila naglantaw sa unahan sa mga panalangin sa pagpang-ayo ubos sa Gingharian sa Diyos.​—Mateo 6:10.

Sakit ug Kamatayon Wala Na

Sa atong nasabtan sa sinugdan, ang pangunang tumong sa ministeryo ni Jesus dili mao ang pag-ayo sa masakiton ug paghimog ubang mga milagro. Hinunoa, gihimo niya ang pagsangyaw sa Gingharian sa Diyos nga iyang pangunang buluhaton. (Mateo 9:​35; Lucas 4:​43; 8:1) Kanang maong Gingharian mao ang galamiton nga pinaagi niana buhaton sa Diyos ang milagrosong pagpang-ayo sa katawhan ug ayohon sa Diyos ang tanang kadaot nga gihimo sa sala ug pagkadili-hingpit diha sa tawhanong pamilya. Sa unsang paagi ug kanus-a niya buhaton kini?

Sa pagtagna bahin sa umaabot, si Kristo Jesus naghatag sa iyang apostol nga si Juan ug usa ka matagnaong panan-awon: “Karon napahinabo na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo!” (Pinadayag 12:10) Ang tanang pamatuod nagpakita nga sukad sa 1914 ang dakong magsusupak sa Diyos, si Satanas, gitambog sa silinganan sa yuta, ug ang Gingharian karon tinuod nga nagalihok! Si Jesus gipahimutang na ingong Hari sa Mesiyanikong Gingharian ug andam na karon sa paghimog dagkong kausaban sa yuta.

Sa haduol nga umaabot, ang langitnong gingharian ni Jesus magmando ibabaw sa matarong bag-ong tawhanong katilingban, sa ingon “usa ka bag-ong yuta.” (2 Pedro 3:13) Sama sa unsa unya ang mga kahimtang? Ania ang mahimayaong talan-awon: “Nakita ko ang usa ka bag-ong langit ug usa ka bag-ong yuta; kay ang kanhing langit ug ang kanhing yuta nahanaw na man . . . Ug pahiran [sa Diyos] ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:​1, 4.

Mahanduraw ba nimo kon sama sa unsa ang kinabuhi sa dihang ang milagrosong pag-ayo sa katawhan mahitabo? “Walay molupyo nga magaingon: ‘Ako masakiton.’ Ang katawhan nga nagpuyo sa yuta mao kadtong gipasaylo sa ilang kalapasan.” Oo, ang Diyos magpalampos sa dili gayod mahimo sa mga mananambal pinaagig pagtuo. “Siya aktuwal nga magalamoy sa kamatayon sa walay kataposan.” Sa pagkatinuod, “ang Soberanong Ginoong Jehova magapahid sa mga luha gikan sa ilang mga nawong.”​—Isaias 25:​8; 33:24.

[Hulagway sa panid 7]

Ubos sa Gingharian sa Diyos ang katawhan mamaayo sa milagrosong paagi