Pagpahayag Diha sa Kristohanong Ministeryo

“Busa panlakaw kamo ug himoang mga tinun-an ang mga tawo sa tanang kanasoran.”—MATEO 28:19.

1. Unsang sugo nga gihatag ni Kristo nagpasabot sa panginahanglan sa pagpahayag?

ANG sugo ni Jesus, nga gikutlo sa itaas, nahimong usa ka hagit nato sa pagpahayag o komunikasyon uban sa mga tawo diha sa atong ministeryo samtang kita magbalay-balay, maghimog mga balikduaw, ug makig-ambit sa tanang ubang bahin sa pagwali sa Gingharian. Naapil nianang sugoa mao ang katungdanan sa pagmantala sa kamatuoran mahitungod kang Jehova nga Diyos, kang Jesu-Kristo, ug sa Mesiyanikong Gingharian diin si Jesus karon nagmando na.​—Mateo 25:31-33.

2. Aron epektibong makapahayag, unsay atong gikinahanglan?

² Sa unsang paagi kita epektibong makapahayag? Nahauna, kinahanglang tuohan nato ang impormasyon nga atong ginapahayag. Sa laing mga pulong, kinahanglang magbaton kitag dakong pagtuo nga si Jehova mao ang bugtong matuod nga Diyos, nga ang Bibliya sa pagkatinuod mao ang Pulong sa Diyos, ug ang Gingharian sa Diyos mao ang bugtong paglaom alang sa katawhan. Sa maong paagi, ang atong ginatudlo magagikan sa kasingkasing, ug atong masunod ang tambag ni Pablo kang Timoteo: “Buhata ang imong maarangan sa pagtanyag sa imong kaugalingon nga inuyonan sa Diyos, usa ka magbubuhat nga walay igakaulaw, nga nagagamit sa tukma sa pulong sa kamatuoran.”​—2 Timoteo 2:15.

Dili-Binaba nga Pagpahayag

3-5. (a) Sa unsang paagi kita makapahayag bisan walay isulting usa ka pulong? (b) Unsang mga kasinatian ang nagapamatuod niini?

³ Ang mga pulong kasagarang nalangkit sa pagpahayag. Apan, sa pagkatinuod, kita makapahayag na ngadto sa mga tawo bisan sa dili pa kita makigsulti kanila. Sa unsang paagi? Pinaagi sa atong pamarog ug sa paagi sa atong biste ug pamostura mismo. Katuigan kanhi ang usa ka misyonaryong graduwado sa Watchtower Bible School of Gilead nagbiyahe pinaagig barko paingon sa iyang asaynment sa laing nasod. Tapos sa pila ka adlaw sa dagat, ang usa ka estranghero nangutana kaniya nganong siya lahi kaayo sa uban nga pasahero. Ang misyonaryo nagpahayag sa butang angay himatikdan​—nga siya may laing mga sukdanan ug maduolan—​pinaagi lamang sa iyang panagway ug iyang gawi. Mihatag kadtog maayong higayon sa misyonaryo sa pagsangyaw.

⁴ Unya na usab, usa ka igsoong babaye nga nagbarog sa kalye nga nagtanyag ug basahon sa Bibliya ngadto sa lumalabay mipahiyom nga mahigalaon sa usa ka babaye nga naglakaw duol niya. Ang maong babaye misugod na sa pagkanaog sa hagdanan paingon sa usa ka estasyon sa tren. Dayon nabag-o ang iyang hunahuna, mibalik ngadto sa igsoong babaye, ug mihangyog usa ka pagtuon sa Bibliya sa balay. Unsay nakapadani kaniya? Bisan pag siya wala tanyagig basahon sa Bibliya, siya nakadawat ug mahigalaong pahiyom gikan sa Saksi nga naghimog pagsangyaw sa dalan.

⁵ Ikatulong pananglitan: Ang usa ka grupo sa batan-ong mga Saksi nangaon sa usa ka restawran ug natingala sa dihang ang usa ka estranghero miduol sa ilang lamesa ug gibayran ang ilang gikaon. Nganong gibuhat niya kadto. Siya nadani sa ilang gawi. Nga walay usa ka pulong gisulti ngadto sa estranghero, kining batan-ong mga Kristohanon nagpahayag nga sila mga tawong may kahadlok sa Diyos. Tin-aw, pinaagi sa atong barog, panagway, ug pagkamahigalaon, kita makapahayag bisan sa dili pa kita mosultig usa ka pulong.​—Itandi ang 1 Pedro 3:1, 2.

Pangatarongan Hinungdanon sa Pagpahayag

6. Iilustrar sa unsang paagi ang pagpangatarongan bililhon kaayo sa pagpahayag o komunikasyon.

⁶ Aron makapahayag nga binaba sa mga tawo mahitungod sa maayong balita, kinahanglang kita maandam, dili sa pagsulting dogmatiko, kondili sa pagpangatarongan kanila. Atong mabasang balikbalik nga si Pablo nangatarongan niadtong si kinsa gisulayan niya nga ipaambit ang maayong balita. (Buhat 17:2, 17; 18:19) Sa unsang paagi masunod nato ang iyang panig-ingnan? Aw, tungod sa nagkadaotang mga kahimtang sa kalibotan ang pipila tingali nagduhaduha sa paglungtad sa usa ka labing gamhanan ug mahigugmaon nga Diyos nga may pagtagad sa katawhan. Bisan pa niana, kita makapangatarongan kanila nga ang Diyos adunay panahon alang sa tanang butang. (Ecclesiastes 3:1-8) Busa, ang Galacia 4:4 nagaingon nga sa pag-abot sa gitakdang panahon sa Diyos, gipadala niya ang iyang Anak sa yuta. Kadto maoy kaliboan ka katuigan tapos siya unang misaad kanila nga iyang buhaton kana. Sa susama, sa pag-abot sa iyang gitakdang panahon, taposon niya ang pag-antos ug pagkadaotan. Dugang pa, gipakita sa Pulong sa Diyos nga ang Diyos adunay mapugsanong mga katarongan sa pagpapadayon sa pagkadaotan sa dugay na kaayo. (Itandi ang Exodo 9:16.) Ang pagpangatarongan sa ingon, ug pagpaluyo sa maong pangatarongan pinaagig mga ilustrasyon ug lig-ong Kasulatanhong pamatuod, motabang sa mga tawong sinsero sa pag-amgo nga ang paglungtad sa pagkadaotan dili magamit nga pangatarongan nga si Jehova wala maglungtad o walay pagtagad.​—Roma 9:14-18.

7, 8. Sa unsang paagi ang pagpangatarongan makatabang tingali nato sa pagpahayag ngadto sa usa ka Ortodoksong Hudiyo?

⁷ Pananglitan nga samtang ikaw nagbalay-balay, ang usa ka tagbalay moingon kanimo: “Ako usa ka Hudiyo. Dili ako interesado.” Sa unsang paagi imo kanang matubag? Usa ka igsoong lalaki mitahong nagmalamposon pinaagi sa paggamit niining paagiha: ‘Nakapaneguro ako nga mouyon ka kanako nga si Moises maoy usa sa kinalabwang mga manalagna nga gigamit sukad sa Diyos. Ug nahibalo ka ba nga siya miingon sumala sa nahitala diha sa Deuteronomio 31:29: “Ako nahibalo nga pagkatapos sa akong pagkamatay kamo . . . mobulag sa dalan nga mahitungod niana ako nagsugo kaninyo; ug ang katalagman mahitabo gayod kaninyo”? Si Moises usa ka tinuod nga manalagna, mao nga ang iyang mga pulong kinahanglang matuman. Dili ba kaha nga sa dihang kana natuman sa gipadala sa Diyos ang Mesiyas ngadto sa mga Hudiyo ug kana ang hinungdan wala siya dawata sa mga Hudiyo? Mahimong kana ang nahitabo. Karon kon kini matuod ug sila nasayop, kana ba katarongan nganong ikaw ug ako mohimo sa samang sayop?’

⁸ Hinumdomi, usab, ang mga Hudiyo nag-antos sa labihan diha sa mga kamot sa Kakristiyanohan, ilabina sulod niining sigloha. Basin buot nimong sultihan ang tagbalay nga kita walay bahin niana. Pananglitan, basin buot nimong isulti: ‘Nahibalo ka ba nga sa dihang diha sa gahom si Hitler, ang mga Saksi ni Jehova misupak sa iyang pagboykot sa mga Hudiyo? Sila midumili usab sa pagpahayag ug “Heil Hitler” ug sa pag-alagad diha sa iyang kasundalohan.’a

9, 10. Sa unsang paagi ang pagpangatarongan mahimong magamit sa pagtabang sa usa nga nagtuo sa impiyernong-kalayo?

⁹ Sa pagpaningkamot nga makapahayag ngadto sa usa nga nagtuo sa impiyernong-kalayo, ikaw mahimong mangatarongan nga kon ang usa ka tawo magaantos sa walay kataposan sa impiyerno, kinahanglang siya may dili-mamatay nga kalag. Ang magtutuo sa impiyernong-kalayo mouyon dayon. Unya makahisgot ka sa asoy sa paglalang kang Adan ug Eva ug malulutong mosukna kon nakamatikod ba siya sa maong asoy nga gihisgotan ang dili-mamatay nga kalag. Sa pagpadayon sa imong pangatarongan, dayon imong iawhag sa iyang pagtagad ang Genesis 2:7, diin ang Bibliya nagatug-an kanato nga si Adan nahimong usa ka kalag. Ug matikdi kon unsay gisulti sa Diyos nga mahimong sangpotanan sa sala ni Adan: “Sa singot sa imong nawong magakaon ka ug tinapay hangtod nga ikaw mobalik sa yuta, kay gikan niana ikaw gikuha. Kay abog ka ug sa abog ka mobalik.” (Genesis 3:19) Busa, si Adan nga kalag mibalik sa abog.

¹⁰ Ikaawhag usab nimo ang pagtagad sa kamatuoran nga wala bisan diin sa asoy sa Genesis nga ang Diyos naghisgot ug pag-antos nga walay kataposan diha sa impiyernong-kalayo. Sa dihang gipasidan-an sa Diyos si Adan nga dili mokaon sa gidili nga bunga, siya miingon: “Sa adlaw nga ikaw mokaon gikan niini ikaw mamatay gayod.” (Genesis 2:17) Walay paghisgot sa impiyernong-kalayo! Kon ang tinuod nga sangpotanan sa sala alang kang Adan maoy, dili kamatayon, ‘pagbalik sa abog,’ kondili walay-kataposang pag-antos, sa bug-os nga hustisya dili ba angay ipatin-aw kana sa Diyos? Busa, ang mabinantayon ug malulutong pangatarongan makatabang sa usa ka sinserong tawo sa pagsabot sa mga panagsumpaki sa iyang pagtuo. Hinaot dili gayod nato malimtan ang kahinungdanon sa paggamit sa pangatarongan samtang ipakig-ambit nato sa uban ang kamatuoran sa Pulong sa Diyos.​—Itandi ang 2 Timoteo 2:24-26; 1 Juan 4:8, 16.

Mga Hiyas nga Gikinahanglan Alang sa Epektibong Pagpahayag

11-13. Unsang Kristohanong mga hiyas ang makatabang nato sa pagpahayag nga epektibo?

¹¹ Karon, unsang mga hiyasa ang kinahanglang atong ugmaron aron makapahayag sa mga kamatuoran sa Gingharian sa labing epektibong paagi? Aw, unsay gisugilon kanato sa panig-ingnan ni Jesus? Sa Mateo 11:28-30, atong mabasa ang iyang mga pulong: “Umari kamo, kamong tanan nga nabudlayan ug nabug-atan, ug papahulayon ko kamo. Isangon ang akong yugo diha kaninyo ug makakat-on gikan kanako, kay ako malumo ug mapaubsanon sa kasingkasing, ug kamo makakaplag ug kapahulayan sa inyong mga kalag. Kay ang akong yugo maayo ug ang akong lulan magaan.” Dinha atong makita ang usa sa mga pasikaranan sa kalamposan ni Jesus sa pagpahayag. Siya malumo ug mapaubsanon sa kasingkasing. Ang mga tawong matarong ug kasingkasing nakakaplag nga siya makapahayahay. Si apostol Pablo mihatag usab ug maayong panig-ingnan, kay, sumala sa iyang gisulti sa mga ansiano gikan sa Efeso, sukad sa unang adlaw nga siya mianha kanila, siya nagpaulipon alang sa Ginoo “uban sa labing dakong pagpaubos sa hunahuna.”​—Buhat 20:19.

¹² Pinaagi sa kanunay natong pagpadayag sa pagkamakasaranganon ug pagpaubos sa hunahuna, makaplagan sa uban nga kita makapahayahay usab, ug mas sayon nga kita makapahayag uban kanila. Ang bisan unsang laing tinamdan lagmit mopatunghag usa ka babag tali kanato ug niadtong si kinsa gisulayan nato nga mapahayagan. Sa pagkamatuod, “ang kinaadman maoy uban sa mga makasaranganon.”​—Proverbio 11:2.

¹³ Aron makapasag impormasyon sa epektibong paagi, kinahanglan usab nga kita magpailob ug magmataktikanhon. Si apostol Pablo tinong mataktikanhon sa dihang siya nagpamatuod ngadto sa mga pilosopo nga nagtigom sa iyang atubangan sa Bungtod sa Mars. Iyang gipahayag ang maayong balita sa paagi nga sila makasabot. (Buhat 17:18, 22-31) Kon buot natong magmalamposon sa pagpahayag sa atong mga mamiminaw, kinahanglang sundon nato ang tambag nga gihatag ni apostol Pablo ngadto sa mga taga-Colosas sa miingon siya: “Himoa nga ang inyong panagkabildo kahimut-anan kanunay, ug dili gayod tab-ang; tun-i kon unsaon pagpakigsulti sa labing maayo sa matag tawo nga inyong mahibalag.” (Colosas 4:6, The New English Bible) Ang atong sinultihan angay nga kanunay makapahimuot. Ang maong sinultihan lagmit mobukas sa mga hunahuna sa atong mga mamiminaw, samtang ang dili-makataronganong mga komento magsira sa ilang mga hunahuna.

14. Sa unsang paagi ang relaks, kabildohay nga paagi motabang kanato sa pagpahayag sa uban?

¹⁴ Buot natong tan-awong relaks sa tanang panahon. Kini makatabang nga ang atong mga mamiminaw magmalinawon. Ang pagkarelaks nag-apil sa pagkadili kaayo maikagon nga maoy mosulti sa tanang panahon. Hinunoa, pinaagi sa wala-magdali nga tinamdan ug mahigalaong mga pangutana, gihatagan nato ang atong mga mamiminaw ug higayon sa pagpahayag sa ilang kaugalingon. Ilabina sa dihang kita nagasangyaw nga dili pormal maalamon ang pagdasig sa laing tawo sa pagsulti. Ingong pananglitan, ang usa ka Saksi nakakaplag nga siya nakatupad sa paglingkod sa usa ka Romano Katolikong pari sa usa ka ayroplano. Sulod sa kapin sa oras, ang Saksi nagpadayon sa pagsukna sa pari sa mataktikanhong mga pangutana, ug ang pari, sa pagtubag, mao kanunay ang nagsulti. Apan sa panahon nga sila nagbulag, ang pari nakabatog ubay-ubayng basahon sa Bibliya. Ang maong mapailobong paagi motabang nato sa pagpadayag sa laing gikinahanglang hiyas, nga mao ang empatiya.

15, 16. Sa unsang paagi ang empatiya makatabang nato sa pagpahayag?

¹⁵ Ang empatiya nagpasabot nga ibutang ang atong kaugalingon sa dapit sa uban, ingnon ta. Gipabilhan sa bug-os ni apostol Pablo ang panginahanglan sa empatiya, sumala sa makita gikan sa iyang gisulat ngadto sa mga taga-Corinto: “Bisan ako nahigawas gikan sa tanang tawo, ako naghimo sa akong kaugalingon nga ulipon sa tanan, aron ako makakabig sa labing daghang tawo. Ug busa ngadto sa mga Hudiyo ako nahimong usa ka Hudiyo, aron ako makakabig sa mga Hudiyo; ngadto niadtong nailalom sa kasugoan ako nahimong sama sa nailalom sa kasugoan, bisan pag ako dili ilalom sa kasugoan, aron ako makakabig niadtong nailalom sa kasugoan. Ngadto niadtong walay kasugoan ako nahimong sama sa walay kasugoan, bisan pag ako dili ingon nga walay kasugoan ngadto sa Diyos kondili nailalom sa kasugoan ngadto kang Kristo, aron akong makabig kadtong walay kasugoan. Ngadto sa mga mahuyang ako nahimong mahuyang, aron akong makabig ang mga mahuyang. Ako nahimong tanang butang ngadto sa katawhan sa tanang matang, aron ako makaluwas gayod unta sa pipila.”​—1 Corinto 9:19-22.

¹⁶ Sa pagsundog kang apostol Pablo niining mga bahina, kinahanglan kita magmataktikanhon, mahimong masinabtanon, ug mapaniiron. Ang empatiya motabang nato sa pagpahayag sa kamatuoran ngadto sa atong mga mamiminaw sumala sa ilang paagi sa panghunahuna ug pagbati. Ang basahong Nangatarongan Pinasukad sa Kasulatan dakog tabang niining bahina. Dad-a kini kanunay sa ministeryo.

Gugma—Usa ka Tabang sa Pagpahayag

17. Sa tanang Kristohanong hiyas, hain ang labing bililhon sa pagpahayag nga epektibo sa kamatuoran, ug sa unsang paagi kini gipakita?

¹⁷ Ang pagkamakasaranganon, pagpaubos sa hunahuna, pailob, ug empatiya kinahanglanon sa epektibong komunikasyon sa pagpasag impormasyon. Hinuon, labaw sa tanan ang dili-mahakogon nga gugma motabang nato nga magmalamposon sa pag-abot sa mga kasingkasing sa uban. Gibati si Jesus ug kaluoy sa katawhan tungod kay sila “gipanitan ug natibulaag sama sa mga karnero nga walay usa ka magbalantay.” Gugma mao ang nagdasig kang Jesus sa pag-ingon: “Umari kamo, kamong tanan nga nabudlayan ug nabug-atan, ug papahulayon ko kamo.” (Mateo 9:36; 11:28) Tungod kay sila atong gihigugma kita usab buot magpahayahay sa katawhan ug tabangan sila sa pagsubay sa dalan sa kinabuhi. Ang atoa maoy usa ka mensahe sa gugma, mao nga ipadayon nato ang pagsugilon niini sa mahigugmaong paagi. Kining gugmaha mapadayag pinaagi sa mahigalaon nga pahiyom, pinaagi sa kalulot ug kalumo, pinaagi sa pagkamasadyaon ug kamainiton.

18. Sa unsang paagi kita makasundog kang Pablo, sama nga siya misundog sa Agalon?

¹⁸ Niining bahina si apostol Pablo maoy usa ka maayong manunundog sa iyang Agalon, si Jesu-Kristo. Nganong siya malamposon kaayo sa pagtukod sa sunodsunod nga kongregasyon? Tungod sa iyang kadasig? Oo. Apan tungod usab sa gugma nga iyang gipadayag. Matikdi ang iyang mga pahayag sa pagmahal bahin sa bag-ong kongregasyon sa Tesalonica: “Kami nahimong malumo sa inyong taliwala, sama sa dihang ang usa ka inahan nga nagapasuso nagamahal sa iyang mga anak. Busa, kay may malumong pagbati alang kaninyo, kami nahimuot kaayo sa pagpasa kaninyo, dili lamang sa maayong balita sa Diyos, kondili sa amo usab nga mga kalag, tungod kay kamo nahimong minahal kanamo.” Ang pagsundog kang Pablo motabang nato sa atong paningkamot sa pagpahayag.​—1 Tesalonica 2:7, 8.

19. Nganong dili kita mawad-ag kadasig tungod sa dili-mosanong nga teritoryo?

¹⁹ Kon atong nahimo ang atong labing maayo sa pagpahayag ug mapakyas kita sa pagbaton sa gitinguhang sangpotanan, angay ba kitang maluya? Dili gayod. Ang mga Estudyante sa Bibliya (sumala sa pagtawag niadto sa mga Saksi ni Jehova) tig-ingon nga aron dawaton ang kamatuoran, ang mga tawo kinahanglang may tulo ka hiyas. Kinahanglan sila matinud-anon, mapaubsanon, ug gigutom sa espirituwal. Dili kita makadahom nga ang mga tawong dili sinsero, kadtong dili matinud-anon, modawat sa kamatuoran; ni makadahom kita nga ang hambogiro o garbosong mga tawo mamati sa maayong balita. Dugang pa, bisan pag ang usa ka tawo may usa ka sukod sa pagkamatinud-anon ug pagkamapaubsanon, lagmit nga dili siya modawat sa kamatuoran kon siya wala gutoma sa espirituwal.

20. Nganong ikasulti kanunay nga ang atong paningkamot dili makawang?

²⁰ Sa walay duhaduha daghan nga imong mahibalag sa inyong teritoryo mahimong kulangan sa usa o kapin pa sa tulo ka hiyas. Nabatonan sa manalagnang si Jeremias ang samang kasinatian. (Jeremias 1:17-19; itandi ang Mateo 5:3.) Bisan pa niana, ang atong mga paningkamot dili gayod makawang. Nganong dili man? Tungod kay kita nagamantala sa ngalan ug Gingharian ni Jehova. Pinaagi sa atong pagwali ug atong presensiya mismo, gipasidan-an nato ang mga daotan. (Ezekiel 33:33) Ug ayaw gayod kalimti nga sa atong paningkamot nga ipasa ang kamatuoran sa uban, kita makabatog kaayohan mismo. (1 Timoteo 4:16) Gihuptan nato ang atong pagtuo nga lig-on ug ang atong paglaom sa Gingharian nga masanag. Dugang pa, gihuptan nato ang atong integridad ug sa ingon nakig-ambit sa pagbalaan sa ngalan ni Jehova nga Diyos, nga nagahimo sa iyang kasingkasing nga malipayon.​—Proverbio 27:11.

21. Unsay ikasulti ingong sumaryo?

²¹ Sa pagsuma: Ang pagpahayag mao ang epektibong pagpasa sa impormasyon. Ang arte sa pagpahayag hinungdanon, ug dakong kadaot ang mosangpot sa dihang mabugto ang pagpahayag o komunikasyon. Atong nakita nga si Jehova nga Diyos ug si Jesu-Kristo mao ang kinalabwang mga tigpahayag ug nga si Jesu-Kristo nagtudlo sa usa ka kanal-galamiton sa komunikasyon sa atong adlaw. Ato usab gipahayag nga pinaagi sa atong pamostura ug gawi, kita nagapahayag, nga nagapadalag mga mensahe ngadto sa uban. Atong nakat-onan nga ang pagpangatarongan dakog bahin sa atong paningkamot nga magpahayag ngadto sa mga tawo ug aron sa pagpahayag nga epektibo, kinahanglan nga kita makasaranganon ug mapaubsanon, nga magpadayag sa empatiya, magmapailobon, ug, labaw sa tanan, itukmod sa usa ka kasingkasing nga punog gugma. Kon ugmaron nato kining mga hiyasa ug sundon ang mga panig-ingnan sa Bibliya, kita mahimong malamposong Kristohanong mga tigpahayag.​—Roma 12:8-11.

[Footnote]

Unsaon Nimo Pagtubag?

◻ Sa unsang paagi ang pagpahayag magsugod sa dili pa isulti ang usa ka pulong?

◻ Unsa ang pila ka pananglitan sa pagpahayag pinaagi sa epektibong pagpangatarongan?

◻ Unsang mga hiyas ang nakapaarang kang Jesu-Kristo ug Pablo sa pagpahayag nga epektibo?

◻ Nganong kinahanglang dili kita maluya kon ang sangpotanan hinay nga moabot?