Palongon ba Nimo ang Nagbaga nga Pabilo?

GISANGYAW ni Jesu-Kristo ang maayong balita sa Gingharian sa Diyos ngadto sa tanang matang sa katawhan. Daghan kanila ang dinaogdaog, nangaluya. Apan gihatagan sila ni Jesus ug makapadasig nga mensahe. Siya may kahangawa sa nag-antos nga katawhan.

Ang magsusulat sa Ebanghelyo nga si Mateo nagpasiugda sa kahangawa ni Jesus pinaagi sa paghatag ug pagtagad sa tagna nga girekord ni Isaias. Nagkutlo sa mga pulong nga gituman ni Kristo, si Mateo misulat: “Walay nabun-og nga tangbo nga iyang gupokon, ug walay nagbaga nga pabilong lino nga iyang palongon, hangtod nga iyang ikapadala ang hustisya nga may kalamposan.” (Mateo 12:20; Isaias 42:3) Unsay gipasabot niining mga pulonga, ug sa unsang paagi natuman ni Jesus kining tagnaa?

Pagtan-aw sa Tagna

Ang tangbo sagad manubo sa kalamakan ug kini huyang ug dili lig-on nga tanom. Ang “nabun-og nga tangbo” tinuod nga huyang gayod. Busa kini daw naglarawan sa dinaogdaog o nag-antos nga katawhan sama sa tawong kuyos ug kamot nga giayo ni Jesus sa Igpapahulay. (Mateo 12:10-14) Apan komosta ang bahin sa matagnaong paghisgot sa usa ka pabilo sa lampara?

Ang kasagarang lampara sa balay sa unang siglo K.P. maoy usa ka gamay samag-pitsil nga gama sa yutang kolonon nga linginon ug gunitanan. Ang lampara sagad pun-on sa lana nga olibo. Tungod sa pagkabasa sa pabilo sa lana, suyopon pataas sa pabilo nga gama sa lino ang lana sa pagpasiga sa kalayo. Siyempre, ang ‘nagbagang pabilo’ maoy usa nga hapit nang mapalong.

Gimantala ni Jesus ang iyang makapalipayng mensahe ngadto sa daghan nga sa mahulagwayong paagi samag nabun-og nga tangbo, nabawog ug gipatidpatiran. Kining mga tawhana sama usab sa usa ka nagbagang pabilo nga lino tungod kay ang ilang kataposang siga sa kinabuhi hapit nang mapalong. Sila tinuod gayod nga gidaogdaog ug nangaluya. Bisan pa, wala gupoka ni Jesus ang mahulagwayong nabun-og nga tangbo o palonga ang simbolikong nagbaga nga pabilo. Ang iyang mahigugmaon, malumo, mahangawaong mga pulong wala makahatag ug dugang kaluya ug kaguol sa nag-antos nga katawhan. Hinunoa, ang iyang mga komento ug ang iyang mga pakiglabot uban kanila may makapasibot nga epekto.​—Mateo 11:28-30.

Karon, usab, daghan ang nagkinahanglan ug kahangawa ug pagdasig tungod kay ginaatubang nila ang makapaluyang mga problema. Bisan ang mga alagad ni Jehova dili sa tanang panahon mga torre sa kalig-on. Usahay ang pipila kaamgid sa nagbaga nga mga pabilo. Busa ang mga Kristohanon angayng makapadasig​—nagpasiga sa kalayo, sa mahulagwayong pagkasulti​—sa ingon nagpalig-on sa usag usa.​—Lucas 22:32; Buhat 11:23.

Ingong mga Kristohanon buot natong makapadasig. Dili kita motuyo sa pagsulay sa pagpaluya kang bisan kinsa nga nagpangitag espirituwal nga tabang. Sa pagkatinuod, tinguhaon nato ang pagsundog sa panig-ingnan ni Jesus sa pagpalig-on sa uban. (Hebreohanon 12:1-3; 1 Pedro 2:21) Ang kamatuoran nga kita sa wala-tuyoa makapukan kang bisan kinsa nga modangop kanato alang sa pagdasig maoy maayong katarongan sa paghatag ug maugdang nga pagpalandong sa atong paagi sa pagpakiglabot sa uban. Dili gayod buot nato nga ‘mapalong ang nagbaga nga pabilo.’ Unsang mga giya sa Kasulatan ang makatabang kanato niining bahina?

Mga Epekto sa Pagsaway

Kon ang Kristohanon ‘makahimog sayop nga lakang, kadtong may espirituwal nga mga kuwalipikasyon maningkamot nga ipasibo ug balik ang maong tawo diha sa espiritu sa kalumo.’ (Galacia 6:1) Ugaling, husto ba ang pagpangitag mga sayop sa uban ug pahimuslan ang matag higayon sa pagtul-id kanila? O husto ba nga itukmod sila sa pagbuhat ug labaw pa pinaagi sa pagpaila nga ang ilang presenteng mga paningkamot dili pa igo, tingali magpahinabo kanilang makabaton ug mga pagbating sad-an? Walay ebidensiya nga mihimo ug ingon niana si Jesus. Bisag nagtinguha kita sa pagtabang sa uban aron mouswag, kadtong nakadawat ug dili malulutong pagsaway basin mobatig kaluya imbes malig-on. Bisan ang mapuslanong pagsaway makapaluya kon sobra. Kon ang labing maayong mga paningkamot sa mahunahunaong Kristohanon sugaton lamang ug kasuko, siya lagmit moangka ug moingon, ‘Aw nganong maningkamot pa?’ Sa pagkatinuod, siya lagmit nga mosurender na lang sa bug-os.

Samtang ang paghatag ug tambag sa Kasulatan hinungdanon, dili angayng makita kining espirituha diha sa tinudlong mga ansiano o sa uban diha sa kongregasyon. Ang Kristohanong mga tigom sa dakong bahin wala himoa sa paghatag ug sa pagdawat ug tambag. Hinunoa, kita regular nga magtigom sa paglig-on ug sa pagdasig sa usag usa aron kalipayan sa tanan ang ilang panag-ubanay ug ang ilang sagradong pag-alagad sa Diyos. (Roma 1:11, 12; Hebreohanon 10:24, 25) Pagkamaayo kon makita nato ang kalainan tali sa seryosong sayop ug ang pagkadili-hingpit nga maalamon ug mahigugmaong palabyon!​—Ecclesiastes 3:1, 7; Colosas 3:13.

Ang mga tawo mas dali nga mosanong sa pagdasig kay sa pagsanong nila sa pagsaway. Ngani, kon bation sa mga indibiduwal nga gisaway nga dili makataronganon, mas mokiling sila sa paghawid ug maayo sa ilang gisaway nga batasan! Apan kon sila makataronganong dayegon, mabayaw ang ilang espiritu, ug sila mapukaw sa pagpauswag. (Proverbio 12:18) Busa sama kang Jesus, pasagding kita makapadasig ug dili gayod ‘palongon ang nagbaga nga pabilo.’

Komosta ang mga Pagtanditandi?

Ang pagpaminaw sa maayong mga kasinatian sa ubang mga Kristohanon makapadasig gayod. Si Jesus mismo nalipay sa dihang nadungog niya ang kalamposan sa iyang mga tinun-an sa pagsangyaw sa mensahe sa Gingharian. (Lucas 10:17-21) Sa susama, kon madungog nato ang kalamposan, maayong panig-ingnan, o integridad sa uban diha sa pagtuo, kita madasig ug mobating mas determinado sa pagpabilin diha sa atong Kristohanong dalan.

Ugaling, komosta kon ang taho gitanyag diha sa paagi nga nagsugyot nga, ‘Ikaw dili ingon ka maayo niini nga mga Kristohanon, ug ikaw angayng maningkamot ug maayo pa kay sa imong ginahimo’? Madasig kaha ang tigpaminaw sa paghimog aktibong programa sa pagpauswag? Malagmit nga siya mawad-ag kadasig ug tingali mosurender, ilabina kon kanunayng himoon o ipasabot ang mga pagtanditandi. Kini mahimong sama sa usa ka ginikanan nga nangutana sa iyang anak, ‘Nganong dili nimo sundogon ang imong igsoon?’ Ang komentong sama niini mahimong mopahinabog kayugot ug kahigawad, apan walay kalagmitan nga mopalambo kini ug mas maayong pamatasan. Ang mga pagtanditandi adunay susamang epekto diha sa mga hamtong, maghimo gani kanilang mayugtanon ngadto niadtong gitandi kanila.

Dili kita makadahom nga ang tanan makahimog parehong gidaghanon sa pag-alagad sa Diyos. Diha sa usa sa mga sambingay ni Jesus, usa ka agalon ang mihatag sa iyang mga sulugoon ug usa, duha, o lima ka talanton nga salapi. Kini gihatag “sa matag usa sumala sa iyang kaugalingong katakos.” Ang duha ka sulugoon nga maalamong mipatigayon ug nagpauswag sa ilang mga talanton gikomendahan tungod kay sila kasaligan, bisan tuod ug lahi ang mga resulta sa ilang buluhaton.​—Mateo 25:14-30.

Si apostol Pablo tukmang misulat: “Ipapamatuod sa matag usa kon unsa ang iyang kaugalingong buhat, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.” (Galacia 6:4) Nan, aron tinuod nga makapadasig sa uban, kita angayng maningkamot sa paglikay sa paghimog negatibong mga pagtanditandi.

Pipila ka Paagi sa Pagpalig-on

Unsay atong mahimo sa paglig-on sa nawad-ag kadasig ug malikayan ang ‘pagpalong sa nagbaga nga pabilo’? Buweno, walay espesipikong pormula ang ginasunod kon maghatag ug pagdasig. Ugaling, lagmit nga ang atong mga pulong makapalig-on sa uban kon atong ipadapat ang mga prinsipyo sa Bibliya. Unsa ang pipila niini?

Magmapainubsanon. Sa Filipos 2:3, gitambagan kita ni Pablo nga ‘dili magabuhat ug unsa man tungod sa pagkamatigion o tungod sa pagpakaimportante sa kaugalingon.’ Hinunoa, kita angayng mosulti o molihok nga mapainubsanon. ‘Uban sa pagpaubos sa hunahuna kita angayng magaisip nga ang uban labaw kay kanato.’ Walay giingon si Pablo nga kita dili na maghunahuna sa atong kaugalingon. Bisan pa, kinahanglang sabton nato nga ang matag tawo maoy labaw kay kanato sa pila ka bahin. Ang Gregong pulong dinhi nga gihubad ug “labaw” nagsugyot nga ang usa ka tawo “dili motan-aw sa iyang kaugalingong mga pribilehiyo, ug mainampingong magpalandong sa mga katakos sa uban nga niini siya labaw.” (New Testament Word Studies, ni John Albert Bengel, Tomo 2, panid 432) Kon kini atong buhaton ug isipon nga ang uban labaw, kita makiglabot kanila sa mapainubsanong paagi.

Pagpakitag pagtahod. Pinaagi sa tim-os nga pagpahayag sa atong kaugalingon, atong ginapatin-aw nga kita adunay kompiyansa sa matinumanong mga isigkamagtutuo, isipon sila ingong mga indibiduwal nga matinguhaon sa pagpahimuot sa Diyos. Apan kon pananglit sila nagkinahanglan ug espirituwal nga tabang. Nan kita mohatag ug tabang sa matinahoron, halangdon nga paagi. Gipadayag kini ni Pablo niining paagiha: “Manguna sa pagpakitag pasidungog sa usag usa.”​—Roma 12:10.

Mamahimong usa ka maayong tigpatalinghog. Oo, aron madasig kadtong nag-atubang ug makapaluyang mga suliran, kita kinahanglang mahimong maayong mga tigpatalinghog, dili mga tigsermon. Imbes maghatag ug dihadiha, taphawng mga sugyot, mogahin kitag panahon sa paghatag ug mga giya sa Kasulatan nga tinuod gayod nga makatubag sa naglungtad nga mga panginahanglan. Kon dili kita mahibalo kon unsay isulti, ang pagpanukiduki sa Bibliya makatabang kanato sa pagsulting mahupayon ug sa pagpalig-on sa uban.

Magmahigugmaon. Kinahanglan bation nato ang gugma alang niadtong buot natong dasigon. Kon ipakita diha sa kaubang mga alagad ni Jehova, ang atong gugma molabaw pa sa paglihok lamang sa ilang kinamaayohang mga intereses. Kini kinahanglang lakipan ug mainit nga pagbati. Kon aduna kitay gugma nga ingon niini alang sa tanang katawhan ni Jehova, ang atong mga pulong mahimong tinuod nga pagdasig kanila. Bisan kon kinahanglan natong mohatag ug mga sugyot sa pagpauswag, wala gayoy kalagmitan nga masaypan sa pagsabot ang atong isulti o mopahinabog kadaot kon ang atong motibo maoy dili ang pagpadayag lamang sa atong hunahuna kondili ang paghatag ug mahigugmaong tabang. Sumala sa tukma kaayong gipahayag ni Pablo, “ang gugma nagapalig-on.”​—1 Corinto 8:1; Filipos 2:4; 1 Pedro 1:22.

Mamahimong Makapalig-on Kanunay

Niining makuyaw nga “kataposang mga adlaw,” ang katawhan ni Jehova nagaatubang ug daghang mga pagsulay. (2 Timoteo 3:1-5) Dili ikahibulong nga sila usahay mag-antos sa daw mao na ang kinutoban sa ilang pag-antos. Ingong mga alagad ni Jehova, dili gayod nato buot nga mosulti o mobuhat ug mga butang nga lagmit magpahinabo kang bisan kinsa sa atong kaubang mga magsisimba nga mobating sama sa nagbaga nga mga pabilo nga hapit nang mapalong.

Nan, pagkahinungdanon nga atong dasigon ang usag usa! Himoon nato ang tanang paningkamot nga mahimong makapalig-on pinaagi sa pagkamapainubsanon ug pagkamatinahoron ngadto sa nangaluyang mga isigkamagsisimba. Hinaot nga kita mamati pag-ayo kon sila adunay isulti kanato ug kanunayng tinguhaon ang pagtabang kanila pinaagi sa pagpunting sa pagtagad ngadto sa Pulong sa Diyos, ang Bibliya. Labaw sa tanan, atong ipasundayag ang gugma, kay kini nga bunga sa balaang espiritu ni Jehova motabang kanato sa pagpalig-on sa usag usa. Hinaot nga dili gayod kita mosulti o molihok sa bisan unsang paagi nga lagmit ‘makapalong sa nagbaga nga pabilo.’