Tibuok-Yutang Kasegurohan—Sa Unsang Paagi?

HANDURAWA ang pagpuyo sa usa ka yuta nga luwas gikan sa kapeligrohan ug kapit-os. Mao kanay kahulogan sa tibuok-yuta nga kasegurohan. Kini maoy usa ba lamang ka damgo?

Dili. Palandonga ang mga adlaw ni Haring Solomon sa karaan. Mahitungod sa iyang maalamon nga pagmando, ang Bibliya nag-ingon: “Ang Juda ug Israel nagpuyo nga malig-on, ang tagsatagsa ilalom sa iyang parras ug sa iyang kahoy nga higuerra . . . sa tanang mga adlaw ni Solomon.”—1 Hari 4:25.

Usa ka Leksiyon Gikan sa Pagmando ni Solomon

Ang tagsaong mga asoy sa Bibliya, sama sa ibabaw, gilantaw sa mga maduhaduhaon ingon nga pagpasulabi. Busa, may mangutana: ‘Sa unsang paagi makatino ako nga ang pagmando ni Solomon dili lamang usa ka sugilambong?’ Ang dili-direkta nga arkeolohikal nga ebidensiya gipadayag sunod niining artikuloha. Sa pagkamatuod, ang labing maayong ebidensiya sa kamatuoran sa pagmando ni Solomon mao nga kini gitaho diha sa dili-masayop nga Pulong sa buhi nga Diyos, si Jehova.—Juan 17:17; 1 Pedro 1:24, 25.

Ang sekreto sa kasegurohan nga gitagamtam ubos sa pagmando ni Solomon mao ang pagpadapat sa matarong nga mga kasugoan ni Jehova. Sa wala pa mosulod ang mga Israelitas sa Yutang Saad, ang Diyos miingon: ‘Kon magalakaw kamo sa akong kabalaoran ug pagabantayan ninyo ang akong mga sugo, ang yuta magahatag sa iyang mga abot. Ug magapuyo kamo sa kasegurohan diha sa inyong yuta. Ug magahatag ako ug pakigdait diha sa yuta, ug magakatulog kamo nga walay bisan kinsa nga magahadlok kaninyo.’—Levitico 26:3-6.

Makasubo, sa dihang namatay si Solomon ang mga Israelitas mihunong sa pagsunod kang Jehova; sila mibali sa pagsimbag mga diyosdiyos ug sa mahugaw nga pagsimba sa sekso. Ingong sangpotanan, nawala kanila ang ilang kasegurohan, ug ang yuta gisulong ni Paraon Sisac sa Ehipto. (1 Hari 14:21-26) “Kamo, sa inyong bahin, mingbiya kanako, busa, gibiyaan ko usab kamo diha sa mga kamot ni Sisac,” miingon si Jehova sa nagkatigom nga mga magmamando sa Jerusalem.—2 Cronicas 12:5.

Usa nga Labaw pa Kay Kang Solomon

Gilig-on ni Jesu-Kristo ang makasaysayanhong kamatuoran bahin kang Solomon ug sa “tanan niyang himaya.” (Mateo 6:29) Apan kon bahin sa iyang kaugalingon, si Jesus miingon: “Tan-awa! ania dinhi karoy labaw pa kay kang Solomon.” (Mateo 12:42) Unsay iyang buot ipasabot? Ang kasegurohan nga gitagamtam ubos sa pagmando ni Solomon limitado. Kadto nga tawhanong hari dili makalibre sa iyang mga sakop gikan sa sakit, sala, ug kamatayon. Si Jesus, hinunoa, nagtudlo sa mga tawong makasasala kon sa unsang paagi makab-ot nila ang hingpit nga kinabuhi diha sa walay kataposang kasegurohan.—Juan 10:10; 13:34, 35; 17:3.

Ang basehanan aron makab-ot ang maong bug-os nga kasegurohan natukod pinaagi sa kamatayon ug pagkabanhaw ni Jesus. (Juan 3:16; 1 Corinto 15:20) Gikan sa tuo nga kamot sa Diyos sa langit, sa dili madugay iyang ipakanaog ang tibuok-yutang kasegurohan ngadto sa tanan nga magpasakop sa iyang pagmando. Si Haring David sa karaan nadasig sa pagsulat mahitungod niini diha sa balaknon nga ika-72 nga Salmo. Kining mga pulonga adunay lakbit nga katumanan sa panahon sa pagmando sa anak ni David, busa may sulat sa ibabaw niini nga, “Mahitungod Kang Solomon.” Apan, ang dakong katumanan maoy may kalabotan sa pagmando sa Gingharian sa Labaw nga Solomon, si Jesu-Kristo.

Sumala sa Salmo 72:7, 8, ang kasegurohan nga tagamtamon ubos sa pagmando ni Kristo maoy sa tibuok-yuta ug walay kataposan. “Sa iyang mga adlaw molambo ang mga matarong, ug ang kadagaya sa pakigdait hangtod nga ang bulan mahanaw na. Ug siya adunay mga ginsakopan usab gikan sa dagat ngadto sa laing dagat ug gikan sa Suba ngadto sa kinatumyan sa yuta.”—Itandi ang Zacarias 9:9, 10.

Ang mga sakop sa pagmando ni Kristo makatagamtam usab gikan sa kagawasan sa kawalad-on, kay ang Salmo 72:16 nagpasalig kanato: “Adunay daghang trigo sa yuta; diha sa tumoy sa bukid adunay pagsugwak.” Siyempre, aduna usay kagawasan gikan sa pagpihig, pagdaogdaog, ug kabangisan. “Kay siya magaluwas sa kabos nga nagapangayog tabang, ug sa sinakit nga walay magtatabang. Gikan sa pagdaogdaog ug gikan sa kabangisan iyang lukaton ang ilang kalag, ug ang ilang dugo hamili sa iyang mga mata.”—Salmo 72:12, 14.

Sama sa panahon ni Haring Solomon, ang basehanan alang sa tibuok-yuta nga kasegurohan mao ang maalamong pagpadapat sa unibersohanong kabalaoran ni Jehova. Mao unya kini ang tubag sa matagnaong hangyo ni David: “Oh Diyos, ihatag sa hari ang imong mga paghukom . . . Pasagdi nga pagahukman niya ang mga sinakit sa katawhan, pagaluwason niya ang mga anak sa kabos, ug magadugmok sa malupigon.”—Salmo 72:1, 4.

Unsay Ikasulti Bahin sa Atong Presenteng mga Panginahanglan?

‘Maanindot kaayo kana,’ may moingon, ‘apan gikinahanglan nako ang pisikal nga kasegurohan karon.’ Matuod, ang mga Kristohanon ubos gihapon sa dili-malig-ong mga kahimtang nga nagahampak sa katawhan—krimen, sakit, kinaiyanhong mga katalagman, pagkatigulang, ug kamatayon. Ang eksperyensiya sa tibuok kalibotan nagpakita, hinunoa, nga pinaagi sa kahibalo sa Bibliya, sila mas makasagubang. (Proverbio 15:1; 22:3) Lain pa, sila adunay katagbawan sa usa ka malig-ong paglaom. Ang usa ka bag-ong estudyante sa Bibliya gikan sa daghag-krimen nga lugar sa Johannesburg, Habagatang Aprika, mibatbat ug usa ka paagi diin ang Kasulatan nakatabang kaniya: “Karon ako nahibalo nga ang krimen dili-dumalayon; kini temporaryo lamang.”

Gani, adunay paglaom usab alang niadtong nangamatay ingong mga biktima sa kriminal nga kabangisan. “Ako ang pagkabanhaw ug ang kinabuhi,” misaad si Jesus, ug unya siya midugang: “Siya nga motuo kanako, bisan siya mamatay, mabuhi siya.”—Juan 11:25.

Aron matagamtam ang pagbati sa kasegurohan, ikaw nagkinahanglan ug malig-ong pagtuo, nga nagagikan sa pagtuon sa Pulong ni Jehova. Pinaagi sa adlaw-adlaw nga paggahin ug panahon sa pagtuon sa Bibliya, imong maeksperyensiyahan ang katumanan niining katingalahang saad: “Bisan kinsa nga mamati kanako, magapuyo sa kasegurohan ug magmalinawon nga walay kahadlok sa kadaotan.”—Proverbio 1:33; 2:21, 22.

[Kahon sa panid 6]

“Ubos kang Solomon, ang materyal nga kultura sa mga Israelitas abante ug kapin sa tulo ka dekada kay sa nabatonan niini sa nag-unang duha ka gatos ka tuig. Among nakita diha sa sapaw sa yuta sa panahon ni Solomon ang mga kagun-oban sa dagkong mga tinukod, dagkong mga siyudad nga may dagkong mga kuta, ang pagsulbong sa residensiyal nga mga lugar nga may malig-ong mga pundok sa mga balay sa mga sapian, nga abante kaayo ang teknikal nga abilidad sa magkokolon ug ang iyang mga paagi sa paggama. Kami nakakita, usab, sa mga kagun-oban sa mga kabilin nga mga butang nga naghawas sa mga gamit nga hinimo gikan sa halayong mga lugar, mga timaan sa malagsikong internasyonal nga komersiyo ug patigayon.”—The House of David, ni Jerry M. Landay.

[Picture Credit Line sa panid 5]

NASA photo