Disididong Moalagad Kang Jehova Uban ang Bug-os nga Kasingkasing
“Alagara siya uban sa bug-os nga kasingkasing ug sa malipayong kalag; kay si Jehova nagasusi sa tanang kasingkasing, ug nakasabot sa tanang hilig sa mga hunahuna.”—1 CRONICAS 28:9.
1. Unsang mga pangutana ang ipatungha sa 1 Cronicas 28:9?
ANG kasulatang gikutlo sa ibabaw mopatunghag pila ka pangutana mahitungod sa kasingkasing. Kon kini nagatumong sa pisikal nga kasingkasing, sa unsang paagi ang tawo mabuhi uban ang dili tibuok nga kasingkasing? Pananglitan, may mabuhi ba uban ang katungang kasingkasing? Si Jehova, sama sa modernong-adlawng espesyalista sa kasingkasing, nagasusi ba sa pisikal nga kasingkasing alang sa mga depekto? Bahin sa kiling sa mga hunahuna, ang mga hunahuna nagapuyo ba sa atong kasingkasing? Ang pila ka reperensiya sa Bibliya daw nagaingon niana, nga nagahisgot sa ‘kiling sa mga hunahuna sa kasingkasing.’ (Genesis 6:5; 1 Cronicas 29:18) Si Jehova nagahiling ba sa atong pisikal nga mga kasingkasing sa pag-ila sa atong mga hunahuna? Unsa ba gayod ang kahulogan sa ‘pag-alagad kaniya uban ang bug-os nga kasingkasing’?
2. Unsang mga pagtuo mahitungod sa kasingkasing ang gituohan sa karaang mga Ehiptohanon, mga Babilonyanhon, ug sa Gregong pilosopo si Aristotle?
2 Ang karaang mga Ehiptohanon nagtuo nga ang pisikal nga kasingkasing mao ang dapit sa intelihensiya ug mga emosyon. Sila naghunahuna usab nga kini may kaugalingong pagbuot. Ang mga Babilonyanhon nag-ingong ang kasingkasing maoy gipuy-an sa pangutok ug gugma. Ang Gregong pilosopo si Aristotle nagtudlo nga kana mao ang dapit sa mga sentido ug dominyo sa kalag. Apan sa paglabay sa panahon ug sa pag-uswag sa kahibalo, gihiklin ang maong mga pagtuo. Sa kataposan ang kasingkasing giila kon unsa kini, usa ka bomba sa pagpasirkular sa dugo sa tibuok lawas.
3. Unsang mga kamatuoran ang nagahimo sa kasingkasing nga kahibulongan kaayo?
3 Oo, kini sa panguna maoy usa ka bomba, apan kahibulongan gayod nga bomba, nga matinumanong nagapaagos sa mapulang sapasapa sa kinabuhi sa matag segundo sa atong mga kinabuhi! Nga dakog diyutay sa komo, nga ang timbang wala makaabot sa usa ka libra, ang tawhanong kasingkasing nagapitik sa 100,000 ka beses sa usa ka adlaw, nga nagabomba sa dugo sa kinabuhi latas sa 60,000-milya cardiovascular nga sistema—mga 2,000 galon sa kada adlaw, nga tinagpulo ka milyong galon sa tibuok kinabuhi.a Ang pitik sa kasingkasing ginasugdan sa pundok sa mga selula nga mao ang pacemaker niini, nga nagapagulag elektrikal nga mga impulso nga nagagahom sa gikusgon sa pinitik sa kasingkasing. Walay unod sa lawas ang nagabuhat nga labawng hago, mas dugay, mas makanunayon, sa sunodsunod tinagpulo ka katuigan, kay sa kasingkasing. Kon mailalom sa emosyonal nga suliran o paugnat sa kusog kini makapauswag sa lima ka pilo sa produksiyon niini. Ipagawas ang kasingkasing sa dughan ug kini mopadayon sa pagpitik sa kadiyut nga panahon. Ilalom sa maayong mga kahimtang, bisan ang mga selula nga gihiwa gikan sa kasingkasing mopadayon sa pagpitik. Ang utok lamang ang nagkinahanglag labawng sustansiya ug oksiheno kay sa kasingkasing.
4, 5. (a) Unsang mga hiyas ang gipasidungog sa Kasulatan ngadto sa kasingkasing? (b) Sumala sa Kasulatan, unsang mga emosyon ug mga motibo ang nagapuyo sa kasingkasing?
4 Ang Pulong sa Diyos nagahisgot sa kasingkasing sa halos usa ka libong panahon. Ang pipila nianang mga paghisgota nagatumong sa literal nga kasingkasing. Ang pipila pa nagatumong sa sentro o kataliwad-an sa usa ka butang, sama sa “kasingkasing sa dagat” ug “sa kasingkasing sa yuta.” (Ezekiel 27:25-27; Mateo 12:40) Apan, sa halos usa ka libo pang paghisgot ang kasingkasing gigamit sa masambingayong diwa. Ang Theological Dictionary of the New Testament ni Kittel nagalistag daghang kasulatan ubos sa “kasingkasing” alang sa matag usa sa mosunod nga mga ulohan: “Sa kasingkasing nagapuyo ang mga pagbati ug mga emosyon, mga tinguha ug kusog nga mga pagbati.” “Ang kasingkasing mao ang dapit sa salabotan, ang tinubdan sa hunahuna ug pagpamalandong.” “Ang kasingkasing mao ang dapit sa kabubut-on, ang tinubdan sa mga hukom.” “Busa ang kasingkasing mao ang kinalabwang sentro nga niana ang Diyos moliso, nga niana mahitisok ang relihiyosong kinabuhi, nga magahukom sa moral nga kagawian.”
5 Ang mga emosyon ug mga motibo nagapuyo niining masambingayong kasingkasing. Sumala sa daghang kasulatan, ang kasingkasing mahimong masadyaon, masulob-on, mangiob, malamdagan, mawad-ag paglaom, masaligon, maluya, magahi. Kini mahimong manginit sa kasuko o matunaw sa kahadlok, hambogiro ug mapahitas-on o malumo ug mapaubsanon, mahigugmaon sa labihan o mapunog pagdumot, putli ug hinlo o sad-an sa pagpanapaw. Kini makiling sa kadaotan, apan kini makatukmod kanato sa pagbuhat ug maayo.
Mahimong Dili Taphaw o Maduhaduhaon
6, 7. (a) Unsang matang sa mga tawo ang gidumtan sa salmista, ug pinaagi sa unsang mga lihok sa Israel ug sa Juda nga kining kahimtanga giilustrar? (b) Giunsa pag-ilustrar ni Jesus nga ang taphaw sa kasingkasing nga pag-alagad kang Jehova dili dalawaton?
6 Ang literal nga kasingkasing kinahanglang mabug-os aron moobra, apan ang masambingayong kasingkasing mahimong mabahin. Ang salmista, nga lagmit usa ka tawong nahiuyon sa kaugalingong kasingkasing sa Diyos, misulat ubos sa pagdasig: “Ang mga tawong maduhaduhaon akong gidumtan.” (Salmo 119:113) Apil kanila mao kadtong mga Israelinhon nga gihagit ni Elias, nga nag-ingon: “Hangtod kanus-a kamo magakiangkiang sa duha ka nagkalaing mga hunahuna? Kon si Jehova mao ang matuod nga Diyos, sunda ninyo siya; apan kon si Baal, sunda ninyo siya.” (1 Hari 18:21) Nga maduhaduhaon, sila ‘nagkiangkiang sa duha ka nagkalaing hunahuna.’
7 Sa susamang paagi, tapos sa dili-bug-os nga pagbalik sa Juda kang Jehova, kini nahitala: “Bisan pa niana, ang katawhan naghalad gihapon ibabaw sa hatag-as nga mga dapit; kadto hinuon maoy ngadto kang Jehova nga ilang Diyos.” (2 Cronicas 33:17) Sila, nga may nabahing mga kasingkasing, nag-angkong nagsimba kang Jehova apan sa paaging wala itugot ug sa mga dapit nga sa nangagi didto sila nagsimba kang Baal. Matud ni Jesus: “Walay makapaulipon sa duha ka agalon.” (Mateo 6:24) Niadtong mga adlawa ang mga ulipon nahisamag usa ka kabtangan. Sila kinahanglang moalagad sa ilang agalon 24 oras sa usa ka adlaw. Ang ilang panahon dili mahimong bahinon sa duha ka agalon—katunga alang sa usa ug katunga alang sa lain. Gipahayag ni Jesus kining puntoha: walay taphaw nga pag-alagad kang Jehova!
8. Sa masambingayong pagkasulti sa unsang paagi ang usa ka tawo makabatog duha ka kasingkasing, ug unsang kasulatan ang nagapadayag niini?
8 Adunay usa lang ka literal nga kasingkasing sa matag tawo, apan, sa masambingayong pagkasulti, ang usa ka tawo makabatog duha ka kasingkasing. Gihisgotan ni David ang maong mga tawo, nga miingon: “Uban sa ngabil nga maulog-ologon sila nagapadayon sa pagsulti uban ang duha ka kasingkasing [“uban sa usa ka kasingkasing ug sa usa ka kasingkasing,” potnot sa Ref. Bi.].” (Salmo 12:2) Ang usa ka kasingkasing naandam alang sa publikong pasundayag, ang lain sekretong naglaraw alang sa hinakog nga kaayohan. Sa ingon niini kining duhag-nawong, duhag-kasingkasing nga dagway gibatbat sa Kasulatan: “Kay maingon nga ang usa naghunahuna sa kahiladman sa iyang kalag, mao man siya: ‘Kumaon ug uminom ka,’ siya nagaingon kanimo, apan ang iyang kasingkasing wala iduyog kanimo.” “Bisan pag iyang ginahimo ang iyang tingog nga maluluton, ayaw pagtuohi siya, kay adunay pito ka dulumtanang butang sa iyang kasingkasing.”—Proverbio 23:7; 26:25; Salmo 28:3.
9. Unsay nagapakitang ang maduhaduhaon sa kasingkasing nga pagsimba naglungtad sa adlaw ni Jeremias ug sa adlaw ni Jesus?
9 Ang maong pagkasalingkapaw sa tawhanong mga relasyon makaguol, apan kon ipugas sa pagsimba kang Jehova, maani ang katalagman. “Ayaw kamo pagsalig sa bakak nga mga pulong, nga magaingon, ‘Ang templo ni Jehova, ang templo ni Jehova, ang templo ni Jehova!’ Ania kamo nagasalig sa bakak nga mga pulong—kini dili gayod magpulos. Mahimo bang adunay pagpangawat, pagpatay ug pagpanapaw ug pagpanumpa sa bakak ug paghimo sa halad nga insenso kang Baal ug pagsunod sa ubang diyos nga wala ninyo hiilhi, ug kamo magabarog sa akong atubangan niining balaya nga niana gitawag ang akong ngalan, ug kamo magaingon, ‘Kami pagaluwason gayod,’ sa atubangan sa pagbuhat niining tanang dulumtanang butang?” (Jeremias 7:4, 8-10) Gisaway ni Jesus ang maong maduhaduhaong pagkasalingkapaw taliwala sa mga eskriba ug mga Pariseo, nga miingon: “Mga salingkapaw, si Isaias tukmang nanagna mahitungod kaninyo, sa miingon siya, ‘Kini nga katawhan nagapasidungog kanako pinaagi sa ilang mga ngabil, apan ang ilang kasingkasing halayo kaayo kanako.’”—Mateo 15:7, 8.
10, 11. Diin si Jehova ug si Kristo magatan-aw sa paghukom sa usa ka tawo, ug ngano?
10 Gikan niining tanan matin-aw nganong si Jehova miingon kang Samuel: “Dili sumala sa pagtan-aw sa tawo nga ang Diyos magatan-aw, tungod kay ang tawo makakita lamang sa makita sa mga mata, apan alang kang Jehova, siya makakita kon unsa ang kasingkasing.” (1 Samuel 16:7) Busa, inigsukod ni Jehova sa tawo, kini dili ipasukad sa hapaw nga ebidensiya; iyang hilingon ang kinataliwad-an mismo sa butang. Gipaila ni Kristo Jesus ang kasingkasing ingong matukmorong gahom luyo sa atong kagawian, kon kaha kini maayo o daotan: “Ang usa ka tawong maayo nagapagula gikan sa maayong bahandi sa iyang kasingkasing, apan ang usa ka tawong daotan nagapagulag daotan gikan sa iyang daotang bahandi; kay sa kadagaya sa kasingkasing ang iyang baba magasulti.” Gawas pa, “Gikan sa kasingkasing nagagula ang daotang mga pangatarongan, mga pagpatay, mga pagpanapaw, mga pakighilawas, mga pangawat, bakak nga mga pamatuod, mga pasipala.”—Lucas 6:45; Mateo 15:19.
11 Busa si Kristo Jesus, kinsa gitugyanan sa paghukom, nagatan-aw usab sa dapit nga ginatan-aw ni Jehova: “Ako mao ang nagasusi sa mga rinyon [“kinailalomang mga emosyon,” potnot sa Ref. Bi.] ug mga kasingkasing, ug igahatag ko kaninyo sa matag usa ang sumala sa inyong mga binuhatan.” (Pinadayag 2:23) Tungod niini, “labaw sa tanang ubang butang nga pagabantayan, bantayi ang inyong kasingkasing, kay gikan niana mao ang mga tinubdan sa kinabuhi.”—Proverbio 4:23.
12. Nganong ang pagkabug-os sa kasingkasing sa pag-alagad kang Jehova nagkinahanglag pagkugi sa atong bahin?
12 Ang atong pagsimba kang Jehova kinahanglang dili taphaw o maduhaduhaon, apan bug-os nga kasingkasing. Nagkinahanglan kinig pagkugi sa atong bahin. Ngano man? Kay ang kasingkasing maluibon ug mahimong malimbongon kaayo. Makahahadlok ang pagkahanas kaayo niini sa pagpakamatarong sa mga kadaotan nga makapadani sa atong nahulog nga unod. Bisan pag kini mahimong maglimbong kanato ug magtago sa tinuod natong mga motibo gikan kanato, si Jehova makakita niini kon unsa kini. Siya nagapahibalo kanato mahitungod niini, nga nagaingon: “Ang kasingkasing labi pang maluibon kay sa bisan unsa pang butang ug nawad-ag paglaom. Kinsay makaila niini? Ako, si Jehova, nagasusi sa kasingkasing, nagausisa sa mga rinyon, nga nagahatag sa matag usa sumala sa iyang mga dalan, sumala sa mga bunga sa iyang mga pakiglabot.”—Jeremias 17:9, 10.
Pagbatog Bug-os nga Kasingkasing
13. Unsay giingon ni Jesus mahitungod sa pila ka relihiyonista sa iyang adlaw, ug tungod sa maong kagawian, unsa ang sangpotanan alang kanila?
13 Mahitungod sa mga relihiyonista sa iyang adlaw, si Jesus miingon: “Ang kasingkasing niini nga katawhan dili na masanongon, ug pinaagi sa ilang mga igdulongog sila nakadungog nga walay tubag, ug ilang gipiyong ang ilang mga mata; aron sila dili gayod makakita pinaagi sa ilang mga mata ug makadungog pinaagi sa ilang mga igdulongog ug makasabot niini pinaagi sa ilang mga kasingkasing ug sila mobalik, ug sila akong pagaayohon.” (Mateo 13:15) Tungod sa relihiyosong mga ideya nga diha na sa hunahuna, ilang gisirhan ang ilang mga mata ug mga igdulongog ug gipagahi ang ilang mga kasingkasing ngadto sa pagtulon-an ni Jesus. Sila, kay nagsalikway sa pagbadlong, napakyas sa pagbatog kasingkasing nga may tukmang motibo: “Ang nagapamati sa pagbadlong makabaton sa kasingkasing [“makabatog maayog motibo,” potnot sa Ref. Bi.].” (Proverbio 15:32) Sila miangkong nagsimba sa Diyos, apan sila naghimo sa ilang “pagkamatarong” aron makita sa mga tawo.—Mateo 6:1, 2, 5, 16.
14. Unsang mga pananglitan ang nagapakita sa paagi nga niana mosulod ang kamatuoran aron sa pagpabilin sa atong kahiladman?
14 Pagkalabi pang maayo nga mahisama ni Haring Josapat sa Juda nga ‘nag-andam sa iyang kasingkasing sa pagpangita sa matuod nga Diyos.’ (2 Cronicas 19:3) Ang labing maayong pangandam sa imong pagpangita sa Diyos mao ang kinasingkasing nga pag-ampo. Sa nagmagul-anon si Ana mainitong miampo kang Jehova, “siya nagsulti diha sa iyang kasingkasing” ug gitubag ang iyang pag-ampo. Gikinahanglan usab mao ang kaandam sa pagpatalinghog. Ang inahan ni Jesus nagpatalinghog: “Ang iyang inahan nagtago pag-ayo niining tanang pulong sa iyang kasingkasing.” Siya misugod sa “paghinapos sa iyang kasingkasing,” ug siya nahimong usa ka matinumanong tinun-an ni Jesus. Si Jehova nagatabang sa sinserong tigpangita. Ang mahadlokon-sa-Diyos nga si Lidia nagpatalinghog kang Pablo, “ug gibuksan ug dako ni Jehova ang iyang kasingkasing aron sa pagpatalinghog sa mga butang gipamulong ni Pablo.” Siya nabawtismohan. (1 Samuel 1:12, 13; Lucas 2:19, 51; Buhat 16:14, 15) Ang masambingayong kasingkasing—ang mga pagbati, mga emosyon, maayong mga motibo—sa kanunay ang nagatugot sa kamatuoran sa pagsulod ug pagpabilin sa tawo.
15. Sa pagbaton ug bug-os nga kasingkasing, kinahanglan kita maandam sa pagbuhat sa unsa?
15 Sa pagbatog bug-os nga kasingkasing, kinahanglang maandam kita sa emosyonal nga paagi sa pagpadaplin sa daan nang mga hunahuna, nga maandam sa pagtugot nga makitang maminatud-on ang Diyos bisan pag kini magagun-ob sa paborito natong mga ideya o gimahal nga mga doktrina. (Roma 3:4) Ang hinakog nga mga motibo kinahanglang mawagtang aron ang atong mga kasingkasing magmasanongon sa kabubut-on ug mga paagi ni Jehova. Si Jehova kas-a nagsulat sa iyang mga kasugoan diha sa bato, apan sa ulahi siya nagsulat sa mga kasugoan diha sa tawhanong mga kasingkasing. Si apostol Pablo misulat usab diha sa mga kasingkasing. Ug ikaw, usab, “makasulat sa [mahigugmaong-kalulot ug kamatuoran] diha sa papan sa imong kasingkasing.”—Proverbio 3:3; Hebreohanon 10:16; 2 Corinto 3:3.
16. Unsang mga pangutana ang nagapasiugda sa mga lakang nga kinahanglang himoon sa usa sa pagbatog bug-os nga kasingkasing alang kang Jehova?
16 Ang imong kasingkasing takos ba ingong nahiangayng sulatanan sa mga prinsipyo ug mga hunahuna ni Jehova? Hinloan ba nimo kana sa daan nga mga hunahuna aron hatagag luna ang balaang kamatuoran? Unya mopadayon ka ba sa pagtuon, pagbag-o sa imong hunahuna, paghukas sa daang pagkatawo, ug pagsul-ob sa bag-ong pagkatawo nga gipahiuyon sa dagway sa Diyos? Buhaton ba nimo ang imong labing maarangan aron mahimong magbubuhat nga walay igakaulaw, nga gamiton sa tukma ang pulong sa kamatuoran?—Roma 12:2; Colosas 3:9, 10; 2 Timoteo 2:15.
Padayong Paghupot sa Bug-os nga Kasingkasing
17. Giunsa pagtambag ni David ang iyang anak si Solomon, ug nganong napakyas si Solomon sa pagsunod sa tambag?
17 Si David miingon kang Solomon: “Ug ikaw, Solomon, anak ko, ilhon mo ang Diyos nga imong amahan ug alagara siya uban ang bug-os nga kasingkasing ug malipayong kalag; kay si Jehova nagasusi sa tanang kasingkasing, ug nakasabot siya sa tanang hilig sa mga hunahuna.” Nagsugod si Solomon uban ang bug-os nga kasingkasing, apan sa paglabay sa katuigan, wala niya ipadayon ang paghupot niana: “Ug nahitabong sa panahon sa pagkatigulang ni Solomon ang iyang mga asawa nagpakiling sa iyang kasingkasing sa pagsunod sa ubang mga diyos; ug ang iyang kasingkasing wala mabug-os uban kang Jehova nga iyang Diyos sama sa kasingkasing ni David nga iyang amahan.”—1 Cronicas 28:9; 1 Hari 11:4.
18, 19. (a) Unsang nagkalainlaing paagi ang gamiton ni Satanas aron mapakyas ka sa paghupot nga padayon sa bug-os nga kasingkasing? (b) Kon mapakyas kining labi pang malalangong paningkamot ni Satanas, sa unsang paagi mausab ang iyang mga taktika?
18 Molampos ka ba sa bahin nga napakyas si Solomon? Kay nagpahinungod na sa imong kaugalingon ingong usa ka saksi ni Jehova, kay nakapadaplin na sa tanang pagkataphaw o pagkamaduhaduhaon sa kasingkasing sa imong pagsimba, kay nakatuman na sa mga pulong ni Jesus nga “higugmaa si Jehova nga imong Diyos uban sa bug-os mong kasingkasing,” determinado ka ba karon sa paghupot sa imong kasingkasing nga bug-os nahalad sa pag-alagad kang Jehova? (Mateo 22:37) Si Satanas dili moangay niana, ug siya usa ka malalangon nga kaaway. Ang imong kasingkasing mao ang iyang himoong puntiriya. Siya nasayod sa kiling niana sa sala, ug siya makaukiok pasulod niana kon dili ka magbantay. Dili ba iyang ‘gibutang sa kasingkasing ni Judas Iskariote ang pagluib kang Jesus?’ (Juan 13:2) Ang salapi, materyalismo, kalingawan, garbo, sekular nga mga karera, mapagawalong mga pasundayag, unodnong mga pangibog—siya nahibalo sa mahuyang natong mga bahin ug iyang ipuntiriya ang iyang kalayonhong mga udyong nganha niana. Pagngon ba nimo kanang tanan pinaagi sa kalasag sa pagtuo?—Efeso 6:16; 1 Juan 2:15-17.
19 Ug inigkapakyas niining tanang galamiton ni Satanas, siya wala pa mahuman. Siya mahimong usa ka leyon nga nagangulob nga maningkamot sa pagtukob sa matinumanong mga saksi ni Jehova pinaagi sa mapintasong mga panong manggugubot, mga pagbukbok, mga pagbilanggo, ug bisan kamatayon. Apan latas nianang tanan lig-onon ni Jehova kadtong may bug-os nga kasingkasing ngadto kaniya.—Santiago 4:7; 1 Pedro 5:8-10; Pinadayag 2:10.
20, 21. (a) Unsang mga pangutana ang mahimong isukna sa pagsusi sa literal nga kasingkasing? (b) Sa unsang paagi ang susamang mga pangutana magamit sa pagsusi sa masambingayong kasingkasing?
20 Kinahanglang susihon ang literal nga kasingkasing matag karon ug unya. Nagadawat ba kinig maayong sustansiya, sa igong mga gidaghanon, sa regular nga mga panahon? Ang pinitik ba niini makanunayon ug kusog o hinay ug luya? Ginahuptan ba nimo ang hustong presyon sa dugo? Nagabaton ba kini sa ehersisyong gikinahanglan niini? (Aron magmahimsog ang kasingkasing kinahanglang mobombag kusog sa tagdugay nga mga yugto.) Nagkalainlain ba ang katulinon sa pacemaker niini aron sa pagtagana sa mausab-usab nga mga panginahanglan? Gipailalom ba kini sa emosyonal nga palibot nga makapahago niini?
21 Kon gikinahanglan sa literal nga kasingkasing ang mga pagsusi, pagkalabi pa sa masambingayong kasingkasing! Si Jehova nagasusi niini; kita usab angay magasusi niini. Nagbaton ba kinig igong mga gidaghanon sa espirituwal nga pagkaon pinaagig regular personal nga pagtuon ug pagtambong sa tigom? (Salmo 1:1, 2; Proverbio 15:28; Hebreohanon 10:24, 25) Ang mga pagbati ug lalom nga mga emosyon niini nagatukmod kanato sa madasigong pag-alagad diha sa ministeryo sa kanataran—nga usahay tingali maghimo kanatong masingkamoton kaayo diha sa auxiliary payuniring? (Jeremias 20:9; Lucas 13:24: 1 Corinto 9:16) Komosta ang palibot niini? Gilibotan ba kini sa ubang mga kasingkasing nga nahiusa ug bug-os nga samag mga pagbati ug mga motibo?—2 Hari 10:15, 16; Salmo 86:11; Proverbio 13:20; 1 Corinto 15:33.
22. Unsay magpasalig sa kalamposan sa atong determinasyon sa pag-alagad kang Jehova uban ang bug-os nga kasingkasing?
22 Kon ang imong pagsusi makapaarang nimo sa pagtubag ug oo sa mga pangutana sa ibabaw, nan imong ginabantayan ang imong masambingayong kasingkasing. Molampos ka, uban sa minilyong ubang matinumanong saksi, sa imong determinasyon sa pag-alagad kang Jehova uban ang bug-os nga kasingkasing. Kana silang tanan nagbaton niini nga pasalig: “Ang kalinaw sa Diyos nga molabaw sa tanang hunahuna magabantay sa inyong mga kasingkasing ug sa inyong mga katakos sa panghunahuna pinaagi kang Kristo Jesus.”—Filipos 4:7.
[Mga footnote]
a Usa ka milya = 1.6 kilometros.
Usa ka galon = 3.8 litros.
Makahinumdom Ka Ba?
◻ Unsa ang daghang hiyas nga gipasidungog sa masambingayong kasingkasing?
◻ Sa unsang paagi kita makalikay nga mahimong taphaw o maduhaduhaon sa kasingkasing?
◻ Nganong si Jehova ug si Kristo Jesus nagatan-aw sa kasingkasing dihang magahukom?
◻ Sa unsang paagi kita makabaton ug makapadayon sa paghupot sa bug-os nga kasingkasing?
[Hulagway sa panid 17]
Ikaw ba duhag nawong?
[Mga Letrato sa panid 18]
Si Lidia
Si Josapat
Si Ana
Si Maria