Kon Nganong ang mga Saksi ni Jehova Nagpadayon sa Pagbantay

“Padayong magbantay . . . tungod kay wala kamo mahibalo kon unsang adlawa moabot ang inyong Ginoo.”​—MATEO 24:42.

1. Kang kinsa mapadapat ang tambag nga “magpadayon sa pagbantay”?

SA TANANG alagad sa Diyos​—bata o tigulang, bag-o pang nagpahinungod o dugay nang nag-alagad​—ang tambag sa Bibliya mapadapat: “Padayong magbantay”! (Mateo 24:42) Nganong importante kini?

2, 3. (a) Unsang ilhanan ang tin-awng gibatbat ni Jesus, ug unsay gipakita sa pagkatuman sa tagna? (b) Unsang kahimtang nga gihisgotan sa Mateo 24:42 ang nagasulay sa pagkatiunay sa atong pagtuo, ug sa unsang paagi?

² Sa hinapos sa iyang ministeryo sa yuta, gitagna ni Jesus ang ilhanan sa iyang dili-makitang presensiya nga may gahom sa Gingharian. (Mateo, mga kapitulo 24 ug 25) Gibatbat niya nga matin-aw ang maong panahon sa iyang harianong presensiya​—ug ang mga panghitabo ingong katumanan sa tagna nagpakita nga siya naentrono ingong Hari sa mga langit sa 1914. Siya mipunting usab sa usa ka sirkumstansiya nga magsulay unya sa pagkatiunay sa atong pagtuo. May kalabotan sa panahon dihang molihok na siya isip Tiglaglag aron sa paglaglag sa presenteng daotang sistema panahon sa dakong kasakitan nga si Jesus miingon: “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang.” Maoy diha kana sa hunahuna nga siya miingon: “Busa, padayong magbantay tungod kay wala kamo mahibalo kon unsang adlawa moabot ang inyong Ginoo.”​—Mateo 24:36, 42.

³ Ang dili nato pagkahibalo sa adlaw ug takna sa dihang mosugod na ang dakong kasakitan magkinahanglan nga kon kita nangangkon nga mga Kristohanon, angay magkinabuhi kita ingong matuod nga mga Kristohanon sa matag adlaw. Ang imo bang paagi sa paggamit sa imong kinabuhi mosangpot sa pag-uyon sa Ginoo inig-abot sa dakong kasakitan? O kon mauna pag-abot ang kamatayon, mahinumdom ba siya kanimo ingong usa nga nag-alagad nga maunongon kang Jehova hangtod sa kataposan sa imong presenteng kinabuhi?​—Mateo 24:13; Pinadayag 2:10.

Unang mga Tinun-an Nanlimbasog nga Magmabinantayon

4. Unsay atong makat-onan gikan sa panig-ingnan ni Jesus sa espirituwal nga pagkamabinantayon?

⁴ Si Jesu-Kristo mismo naghatag ug labing maayong panig-ingnan sa espirituwal nga pagkamabinantayon. Siya miampo nga subsob ug tim-os sa iyang Amahan. (Lucas 6:12; 22:42-44) Sa nag-atubang sa mga pagsulay, siya misalig pag-ayo sa pagtultol nga naa sa Kasulatan. (Mateo 4:3-10; 26:52-54) Wala niya itugot nga siya malinga gikan sa buluhaton nga gitudlo kaniya ni Jehova. (Lucas 4:40-44; Juan 6:15) Kadtong nag-isip sa ilang kaugalingon nga mga sumusunod ni Jesus mahimo bang sama ka mabinantayon?

5. (a) Nganong ang mga apostol ni Jesus may mga suliran sa pagpadayon paghupot sa espirituwal nga panimbang? (b) Unsang tabang ang gihatag ni Jesus sa iyang mga apostol human sa iyang pagkabanhaw?

⁵ Usahay, bisan ang mga apostol ni Jesus natarog. Ingong sangpotanan sa hingapin nga kaikag ug sayop nga mga hunahuna, kinahanglan nga ilhon ug atubangon ang mga kahigawad. (Lucas 19:11; Buhat 1:6) Sa wala pa nila hikat-oni ang pagsalig nga bug-os kang Jehova, ang kalit nga mga pagsulay nakapalibog kanila. Busa, sa dihang si Jesus gidakop, ang iyang mga apostol nangalagiw. Sa ulahi niadtong gabhiona, si Pedro, tungod sa kahadlok, balikbalik gani nga nangulipas sa pagkanakaila kang Kristo. Wala pa ikabutang sa kasingkasing sa mga apostol ang tambag ni Jesus: “Padayon sa pagbantay ug pag-ampo nga makanunayon.” (Mateo 26:41, 55, 56, 69-75) Human sa iyang pagkabanhaw gigamit ni Jesus ang Kasulatan aron palig-onon ang ilang pagtuo. (Lucas 24:44-48) Ug sa dihang mipatim-aw nga pipila kanila tingali magbutang sa ministeryo nga gisalig kanila sa ikaduhang dapit, gipalig-on ni Jesus ang ilang motibasyon nga ihatag ang bug-os nga pagtagad sa mas hinungdanong buluhaton.​—Juan 21:15-17.

6. Batok sa unsang duha ka lit-ag nga si Jesus nagpasidaan nga sayosayo sa iyang mga tinun-an?

⁶ Sayosayo niana, si Jesus nagpasidaan sa iyang mga tinun-an nga kinahanglang sila dili bahin sa kalibotan. (Juan 15:19) Siya mitambag usab kanila nga dili magharihari sa usag usa kondili mag-alagad nga magkauban ingong managsoon. (Mateo 20:25-27; 23:8-12) Namati ba sila sa iyang tambag? Gibutang ba nila sa unahan ang buluhaton nga gihatag niya kanila?

7, 8. (a) Sa unsang paagi gipakita sa rekord nga nahimo sa unang-siglong mga Kristohanon nga ilang gibutang sa kasingkasing ang tambag ni Jesus? (b) Nganong hinungdanon ang padayong pagkamabinantayon sa espirituwal?

⁷ Samtang ang mga apostol buhi pa, sila nanalipod sa kongregasyon. Ang kasaysayan nagpamatuod nga ang unang mga Kristohanon wala mag-apil-apil sa politikanhong kahikayan sa Romanhong Empiryo ug sila wala magbaton ug tinuboy nga klerong matang. Sa laing bahin, sila masibotong mga magmamantala sa Gingharian sa Diyos. Sa pagkatapos sa unang siglo, sila nakasangyaw sa tibuok Romanhong Empiryo, nga naghimog mga tinun-an sa Asia, Uropa, ug Amihanang Aprika.​—Colosas 1:23.

⁸ Bisan pa niana, kadtong mga kalamposan sa pagwali wala magpasabot nga sila dili na kinahanglan nga magpadayon sa pagbantay sa espirituwal nga paagi. Ang gitagnang pag-abot ni Jesus dugay pang mahitabo. Ug pagsulod sa kongregasyon sa ikaduhang siglo K.P., mitungha ang mga kahimtang nga nakapameligro sa espirituwalidad sa mga Kristohanon. Sa unsang paagi matuod kana?

Kadtong Mihunong sa Pagbantay

9, 10. (a) Human sa pagkamatay sa mga apostol, unsang mga panghitabo ang nagpakita nga daghang nag-angkong mga Kristohanon wala magpadayon sa pagbantay? (b) Unsang mga kasulatan nga gihisgotan niining parapoha ang nakatabang sa nag-angkong mga Kristohanon sa pagpabiling lig-on sa espirituwal?

⁹ Ang pipila nga misulod sa kongregasyon misugod sa pagpahayag sa ilang mga tinuohan sumala sa Gregong pilosopiya, aron sa paghimo sa ilang giwali nga mas dalawaton sa mga tawo sa kalibotan. Sa inanay, ang paganong mga doktrina, sama sa Trinidad ug sa kinaiyanhong pagkadili-mamatay sa kalag, nahimong bahin sa nabulingan nga matang sa Kristiyanidad. Kadto mitultol sa pagsalikway sa milenyong paglaom. Ngano? Kadtong midawat sa pagtuo sa pagkadili-mamatay sa kalag mihinapos nga ang mga panalangin sa paghari ni Kristo makab-ot ngatanan diha sa kalibotan sa mga espiritu sa kalag nga magpadayong buhi inigkamatay sa tawhanong lawas. Mao nga giisip nila nga dili na kinahanglang hulaton ang presensiya ni Kristo nga may gahom sa Gingharian.​—Itandi ang Galacia 5:7-9; Colosas 2:8; 1 Tesalonica 5:21.

¹⁰ Kining kahimtanga misamot tungod sa ubang mga hitabo. Ang pipila nga nangangkon nga Kristohanong mga magtatan-aw misugod sa paggamit sa ilang mga kongregasyon ingong usa ka paagi aron makab-ot ang pagkabantogan alang sa kaugalingon. Sa malalangon gipakabililhon nila ang ilang kaugalingong mga hunahuna ug mga pagpanudlo nga sama sa Kasulatan o labaw pa gani niini. Sa miabot ang higayon, kining apostatang iglesya nagpagamit mismo aron maalagaran ang intereses sa politikanhong kagamhanan.​—Buhat 20:30; 2 Pedro 2:1, 3.

Mga Sangpotanan sa Labawng Pagkamabinantayon

11, 12. Nganong ang Protestanteng Repormasyon wala magtimaan sa pagbalik ngadto sa matuod nga pagsimba?

¹¹ Human sa mga siglo sa mga pag-abuso sa bahin sa Iglesya Romana Katolika, ang pila ka Repormador mipatugbaw sa ika-16 nga siglo. Apan wala kadto magtimaan sa pagbalik ngadto sa matuod nga pagsimba. Nganong wala man?

¹² Bisan pag ang lainlaing Protestanteng mga grupo mibulag sa gahom sa Roma, gidala nila ang daghan sa pangunang mga pagtulon-an ug mga tulomanon sa apostasiya​—ang klero-ginsakpan nga ideya, ingon man ang pagtuo sa Trinidad, pagkadili-mamatay sa kalag, ug walay-kataposan nga pagpaantos human sa kamatayon. Ug, sama sa Iglesya Romana Katolika, sila nagpadayon nga bahin sa kalibotan, nga nakig-abyan sa politikanhong mga elemento. Busa sila nakiling nga isalikway ang bisan unsang mga pagdahom nga moabot si Kristo ingong Hari.

13. (a) Unsay nagpakita nga ang pila ka tawo tinuod nga nagmahal sa Pulong sa Diyos? (b) Sulod sa ika-19 nga siglo, unsang hitabo ang nakapaikag ilabina sa pila ka nag-angkong mga Kristohanon? (c) Nganong daghan ang nakasinatig kahigawad?

¹³ Bisan pa niana, si Jesus mitagna nga human sa pagkamatay sa mga apostol, ang tinuod nga mga manununod sa Gingharian (kinsa gitandi niya sa trigo) magpadayon sa pagtubo tapad sa mini nga mga Kristohanon (o, bunglayon) hangtod sa ting-ani. (Mateo 13:29, 30) Karong adlawa dili nato ikatala sa tino ang tanan nga giisip sa Agalon nga trigo. Apan angay ilhon nga sulod sa ika-14, ika-15, ug ika-16 nga mga siglo, may mga tawong nagpameligro sa ilang mga kinabuhi mismo ug sa kagawasan aron mahubad ang Bibliya ngadto sa pinulongan sa ultimong tawo. Ang uban dili lang nagtuo sa Bibliya ingong Pulong sa Diyos kondili nagsalikway usab sa Trinidad ingong dili-kasulatanhon. Ang pipila nagsalikway sa pagtuo sa pagkadili-mamatay sa kalag ug sa pagpaantos diha sa impiyernong-kalayo ingong bug-os nga supak sa Pulong sa Diyos. Gawas pa, sulod sa ika-19 nga siglo, ingong sangpotanan sa labawng pagtuon sa Bibliya, ang mga grupo sa Tinipong Bansa, Alemanya, Inglaterra, ug Rusya nagsugod sa pagpahayag sa pagtuo nga ang panahon sa pagbalik ni Kristo haduol na. Apan kadaghanan sa mga pagdahom nila misangpot sa kahigawad. Ngano? Sa dakong sukod, tungod kadto kay dako kaayo ang ilang pagsalig diha sa mga tawo ug dili kaayo diha sa Kasulatan.

Kon sa Unsang Paagi Sila Napamatud-ang Mabinantayon

14. Batbata ang paagi sa pagtuon sa Bibliya nga gigamit ni C. T. Russell ug sa iyang mga kauban.

¹⁴ Unya, sa 1870, giporma ni Charles Taze Russell ug sa pipila sa iyang mga kauban ang usa ka grupo alang sa pagtuon sa Bibliya sa Allegheny, Pennsylvania. Sila dili maoy unang nakaila sa daghan sa mga kamatuoran sa Bibliya nga ilang gidawat, apan sa dihang nagtuon, ilang gihimong batasan nga susihon pag-ayo ang tanang kasulatan sa usa ka gihatag nga pangutana.a Ang ilang katuyoan maoy, dili aron mangitag mga tekstong pamatuod alang sa usa ka nahunahunaan-daang ideya, kondili aron sa pagpaneguro nga sila naghimog mga konklusyon nga nahiuyon sa tanan nga gipamulong sa Bibliya bahin sa butang.

15. (a) Unsay nasabtan sa uban pa gawas kang Igsoong Russell? (b) Unsay nagtimaan sa mga Estudyante sa Bibliya ingon nga lahi kanila?

¹⁵ Ang pipilang uban pa nga nauna nila nakasabot nga si Kristo mobalik nga dili makita isip usa ka espiritu. Nakasabot ang pipila nga ang katuyoan sa pagbalik ni Kristo maoy, dili aron pagsunog sa yuta ug pagpuo sa tanang tawo, apan, hinunoa, aron pagpanalangin sa tanang banay sa yuta. May pipila pa gani nga nakaamgo nga ang tuig 1914 magtimaan sa kataposan sa Hentil nga Kapanahonan. Apan alang sa mga Estudyante sa Bibliya nga nakig-uban kang Igsoong Russell, dili lang kadto mga punto alang sa teolohikanhong panaghisgot. Ilang gitukod ang ilang mga kinabuhi palibot nianang mga kamatuorana ug gihatagan kanag internasyonal nga pagmantala sa gilapdong wala-hitupngi niadtong panahona.

16. Sa tuig 1914, nganong si Igsoong Russell misulat: “Kita ania sa usa ka panahon sa pagsulay”?

¹⁶ Sa gihapon, sila kinahanglang magpadayon sa pagbantay. Ngano? Ingong usa ka pananglitan, bisan pag nasayod sila nga ang 1914 gitiman-an diha sa tagna sa Bibliya, wala gayod sila mahibalo sa tino kon unsay mahitabo sa maong tuig. Kadto nahimong usa ka pagsulay kanila. Sa The Watch Tower sa Nobyembre 1, 1914, si Igsoong Russell misulat: “Atong hinumdoman nga kita ania sa usa ka panahon sa pagsulay. . . . Kon adunay bisan unsang hinungdan nga si bisan kinsa mobiya sa pagtuo sa Ginoo ug sa Iyang Kamatuoran ug sa paghunong pagsakripisyo alang sa Kawsa sa Ginoo, nan dili lang gugma sa Diyos diha sa kasingkasing ang nakaaghat sa pagkaikag sa Ginoo, kondili laing butang; tingali ang usa ka paglaom nga ang panahon mubo na; ang pagkonsagrar maoy sulod lang sa usa ka tinong panahon.”

17. Giunsa ni A. H. Macmillan, ug sa uban nga sama kaniya, pagpadayon sa paghupot sa espirituwal nga panimbang?

¹⁷ Namiya ang pipila sa pag-alagad ni Jehova niadtong panahona. Apan si A. H. Macmillan wala mobiya. Katuigan sa ulahi, siya prangkang miila: “Usahay ang atong mga pagdahom alang sa usa ka tinong petsa labaw pa kay sa gipamatud-an sa Kasulatan.” Unsay nakatabang kaniya nga magpadayon paghupot sa espirituwal nga panimbang? Siya nakaamgo, sumala sa iyang giingon, nga “sa dihang ang maong mga pagdahom dili matuman, kana wala mag-usab sa mga katuyoan sa Diyos.” Siya midugang: “Nakakat-on ako nga kinahanglang dawaton nato ang atong mga sayop ug magpadayon pagsusi sa Pulong sa Diyos alang sa dugang kalamdagan.”b Sa kamapaubsanon, gitugotan niadtong unang mga Estudyante sa Bibliya nga ang Pulong sa Diyos magpasibo sa ilang panglantaw.​—2 Timoteo 3:16, 17.

18. Sa unsang paagi ang Kristohanong pagkamabinantayon mipatunghag inanay nga mga kaayohan kon bahin sa pagkadili bahin sa kalibotan?

¹⁸ Sulod sa misunod nga katuigan, ang ilang panginahanglan nga magpadayon pagbantay wala makunhori. Siyempre, nasayran nila nga ang mga Kristohanon angay nga dili bahin sa kalibotan. (Juan 17:14; Santiago 4:4) Nahiuyon niana, wala sila moduyog sa Kakristiyanohan sa pagduso sa Liga sa Kanasoran ingong politikanhong kapahayagan sa Gingharian sa Diyos. Apan niadto lang 1939 nga tin-aw nilang nasabtan ang isyu sa Kristohanong neyutralidad.​—Tan-awa ang The Watchtower, Nobyembre 1, 1939.

19. Unsang mga kaayohan sa pagdumala sa kongregasyon ang misangpot tungod kay ang organisasyon nagpadayon sa pagbantay?

¹⁹ Sila wala gayod magbaton ug klerong matang, bisan pag ang gipili-sa-eleksiyon nga mga ansiano mibati nga ang pagwali sulod sa kongregasyon mao lamang ang dahomon gikan kanila. Bisan pa niana, tungod sa idlot nga tinguha nga makapahiuyon sa Kasulatan, ang organisasyon nagsubli sa papel sa mga ansiano sa kahayag sa Kasulatan, nga sa balikbalik nagbuhat niana pinaagi sa mga lindog sa Ang Bantayanang Torre. Ang mga kausaban sa organisasyon gihimo nga kaharmoniya sa gipaila sa Kasulatan.

20-22. Sa unsang paagi ang tibuok organisasyon inanay nga nasangkapan aron sa pagpalampos sa gitagnang buluhaton sa tibuok-yutang pagmantala sa Gingharian?

²⁰ Ang tibuok organisasyon gisangkapan aron tumanon sa bug-os ang buluhatong gilaraw sa Pulong sa Diyos alang sa atong adlaw. (Isaias 61:1, 2) Sa unsang gidak-on ang maayong balita gimantala sa atong adlaw? Si Jesus miingon: “Sa tanang kanasoran ang maayong balita kinahanglan nga mawali una.” (Marcos 13:10) Gikan sa tawhanong punto de vista, ang maong buluhaton kasagaran morag imposible.

²¹ Bisan pa niana, pinaagi sa pagsalig kang Kristo isip Ulo sa kongregasyon, ang matinumanon ug maalamong ulipon nga matang nagpadayon sa unahan. (Mateo 24:45) Sa pagkamatinuohon ug pagkalig-on gipunting nila sa katawhan ni Jehova ang buluhatong angay nga buhaton. Sukad sa 1919 paunahan, ang mas dakong pasiugda gihatag ngadto sa ministeryo sa kanataran. Alang sa daghan, dili sayon ang pagbalay-balay ug pagpakigsulti sa mga estranghero. (Buhat 20:20) Apan ang mga tun-anang artikulo sama sa “Bulahan ang mga Maisogon” (sa 1919) ug “Magmaisogon” (sa 1921) nakatabang sa pipila nga mosugod sa buluhaton, uban ang pagsalig kang Jehova.

²² Ang pag-awhag, sa 1922, nga “imantala, imantala, imantala, ang Hari ug ang iyang gingharian” mitagana sa gikinahanglang pagdasig aron mailado ang maong buluhaton. Sukad sa 1927 paunahan, ang mga ansianong wala modawat nianang Kasulatanhong responsabilidad gitangtang. Sa maomaong panahon, ang nagapanawng mga hawas sa Sosyedad, ang mga pilgrim, gitudlo nga mahimong rehiyonal nga mga direktor sa pag-alagad, nga mihatag ug personal nga instruksiyon ngadto sa mga magmamantala diha sa pagsangyaw sa kanataran. Dili ang tanan makapayunir, apan sa mga hinapos-sa-semana daghan ang mogahin sa tibuok nga mga adlaw alang sa pag-alagad, nga mosayo pagsugod sa buntag, mohunong lang makadiyut aron mokaon ug sanwits, ug unya mopadayon sa pag-alagad hangtod sa hapon na kaayo. Kadto makahuloganong mga panahon sa teokratikanhong kaugmaran, ug kita makabaton ug dakong kaayohan pinaagi sa pagsubli sa paagi ni Jehova sa pagtultol sa iyang katawhan. Siya nagpadayon sa paghimo niana. Uban sa iyang panalangin, ang buluhaton sa pagwali sa maayong balita sa natukod nga Gingharian matapos nga malamposon.

Nagapadayon Ka ba sa Pagbantay?

23. Bahin sa Kristohanong gugma ug pagkabulag gikan sa kalibotan, sa unsang paagi kita sa matag usa makapasundayag nga kita nagapadayon sa pagbantay?

²³ Kay nagasanong sa pagtultol ni Jehova, ang iyang organisasyon nagpadayon sa pagpasidaan kanato bahin sa mga buhat ug mga tinamdan nga magpaila nga kita maoy bahin sa kalibotan, busa mameligrong mahanaw uban niini. (1 Juan 2:17) Sa baylo, kita sa matag usa kinahanglang magbantay pinaagi sa pagsanong sa pagtultol ni Jehova. Si Jehova naghatag usab kanatog instruksiyon mahitungod sa pagkinabuhi ug pagbuhat nga magkahiusa. Ang iyang organisasyon nakatabang kanato nga motubo sa pagpabili sa tinuod nga kahulogan sa Kristohanong gugma. (1 Pedro 4:7, 8) Ang atong pagpadayon sa pagbantay nagkinahanglan nga kita maningkamot sa tim-os nga ipadapat kining tambaga, bisan pa sa tawhanong mga pagkadili-hingpit.

24, 25. Sa unsang hinungdanong mga bahin kita angay nga magpadayon sa pagbantay, uban sa unsang palaaboton?

²⁴ Sa makanunayon, ang matinumanon ug maalamong ulipon nagpahinumdom kanato: “Sumalig kang Jehova uban sa bug-os mong kasingkasing ug ayaw pagsalig sa imong kaugalingong salabotan.” (Proverbio 3:5) “Pag-ampo nga walay-hunong.” (1 Tesalonica 5:17) Kita gitambagan sa pagkat-on nga ipasukad ang atong mga desisyon sa Pulong sa Diyos, nga tugotang kining pulonga mahimong ‘usa ka lamparahan sa atong tiil ug usa ka kahayag sa atong alagianan.’ (Salmo 119:105) Sa kamahigugmaon, kita gidasig sa pagbutang pag-una sa atong mga kinabuhi sa pagwali sa maayong balita sa Gingharian sa Diyos, ang buluhatong gitagna ni Jesus alang sa atong adlaw.​—Mateo 24:14.

²⁵ Oo, ang matinumanon ug maalamong ulipon tinong nagabantay. Kinahanglan usab nga matag usa kita magpadayon sa pagbantay. Ingong sangpotanan sa pagbuhat niana, hinaot kita hikaplagan nga apil niadtong nagbarog nga inuyonan atubangan sa Anak sa tawo inig-abot niya aron sa pagpatuman sa paghukom.​—Mateo 24:30; Lucas 21:34-36.

[Footnote]

Pagsubli

◻ Sumala sa gipakita sa Mateo 24:42, nganong kinahanglan kitang magpabilin sa pagbantay?

◻ Giunsa ni Jesus ug sa iyang unang-siglong mga sumusunod ang paghupot sa padayong espirituwal nga pagkamabinantayon?

◻ Sukad sa 1870, unsang mga kaugmaran ang nahitabo tungod kay ang mga alagad ni Jehova nagpadayon sa pagbantay?

◻ Unsay mohatag ug ebidensiya nga kita sa matag usa nagapadayon sa pagbantay?

[Hulagway sa panid 23]

Si Jesus nagpadayong puliki sa buluhaton nga gitudlo sa iyang Amahan. Siya tim-os usab nga miampo

[Hulagway sa panid 24]

Si Charles Taze Russell sa iyang pagkatigulang

[Hulagway sa panid 25]

Kapig 4,700,000 ka magmamantala sa Gingharian ang aktibo sa tibuok yuta