Mga Manulonda—Sila ba Nakaapekto sa Imong Kinabuhi?
ADUNA ba gayoy mga manulonda? O produkto ba lamang sila sa handurawan? Kon naglungtad sila, makaapekto ba sila sa imong kinabuhi?
Adunay usa lamang ka kasaligang tuboran sa mga tubag sa maong mga pangutana. Kana mao ang dinasig nga Rekord nga gihatag sa Diyos sa tawo—iyang Pulong, ang Balaang Bibliya. Bahin niini si apostol Pablo misulat: “Ang tanang Kasulatan dinasig sa Diyos ug mapuslanon . . . sa pagtul-id sa mga butang.”—2 Timoteo 3:16.
Busa, makasalig kita nga hatagan kita sa Bibliya ug tukmang tubag bahin sa paglungtad sa mga manulonda ug kon sila ba makaapekto kanato. Siyempre ang Maglalalang sa uniberso makasulti kanato kon usa ba sa iyang mga kalalangan ang mga manulonda.
Tinuod ba ang mga Manulonda?
Ang Bibliya tin-awng nag-ingon: “Iyang [Diyos] gihimo ang iyang mga manulonda nga mga espiritu.” (Hebreohanon 1:7) Busa ang Maglalalang adunay espiritung mga linalang sa langitnong gingharian. Dili nato sila makita, ug sila gamhanan.—Salmo 104:4; 2 Pedro 2:11.
Gimbut-an ba sa Diyos nga walay personalidad ang mga manulonda, hanap nga mga binuhat? Kon mao, nganong gilarawan sa Bibliya ang mga manulonda nga may mga pagbati? Pananglitan, kini nagsulti kanato nga dihang gibutang ang pundasyon sa yuta, ang mga manulonda “nagdungan sa pag-awit, ug ang tanang mga anak sa Diyos [ang mga manulonda] nagduyog sa pagsinggit sa kalipay.”—Job 2:11.
Mopatim-aw nga, sama sa intelehenting yutan-ong mga linalang sa Diyos, ang intelehenting espiritung mga linalang, ang mga manulonda, adunay ilang kaugalingong personalidad. Bisag duha lamang ka ngalan sa mga manulonda ang gihisgotan sa Bibliya, (Miguel ug Gabriel), ang kamatuoran nga dunay mga ngalan ang mga manulonda nakadugang sa ilang tagsatagsang paglungtad. (Lucas 1:11, 19, 26; Judas 9) Kusganong gihukman sa Bibliya ang pagsimba sa mga manulonda, ug lakip niana ang pag-ampo kanila. Inay mag-ampo kita sa mga manulonda, gitambagan kita ni apostol Pablo: “Diha sa tanang butang ipahibalo ninyo sa Diyos ang inyong mga hangyo pinaagi sa pag-ampo ug sa pagpangamuyo uban sa pagpasalamat.”—Filipos 4:6; Pinadayag 19:10; 22:8, 9.
Apan giprograma ba ang mga manulonda nga walay gahom sa pagpili sa kaugalingon tali sa matarong ug daotan sama sa walay hunahunang mga robot? Dili, ang mga manulonda makahimog desisyon sa ilang kaugalingon, sama sa mga tawo. Pananglitan, dihang nakalapas ang pila ka manulonda sa kasugoan sa Diyos sa panahon ni Noe, gisalikway sila sa Diyos, ug sila gipalagpot gikan sa langitnong mga korte. Ang ilang sukihang paggawi maoy klarong pamatuod nga may indibiduwalidad ang manulonda.—Genesis 6:1, 2; 2 Pedro 2:4; Mateo 25:41.
Busa, ang Bibliya nagtagana kanato ug impormasyong makatabang bahin sa sinugdan, paglungtad, ug kinaiyahan sa mga manulonda. Ang paglapas sa gipahayag sa Pulong sa Diyos bahin kanila moagak sa tawo sa walay hinungdang pagpalandong sa mga pangutana nga walay tubag ang Bibliya. Motultol gani kini sa paghatag ug dili-angay nga pagtagad o pagsimba sa mga manulonda. (Colosas 2:18) Ang Bibliya nagpahinumdom kanato sa “pagtino sa labi pang hinungdanong mga butang” ug sa dili ‘paglapas sa gikawali na ingong maayong balita.’—Filipos 1:10; Galacia 1:8.
Ang mga Manulonda sa Katuyoan sa Diyos
Bisan pag daghang mouyon sa sinugdan ug sa mga kinaiyahan sa mga manulonda, pipila lang ang nahibalo sa katarongan sa ilang paglungtad ug sa unsang paagi nakaapekto ang mga manulonda sa atong mga kinabuhi karon.
Diha sa Bibliya, ang duha ka pulong nga gigamit alang sa “manulonda” mao ang mal·’akhʹ (Hebreohanon) ug agʹge·los (Grego). Kining duha nagkahulogang “mensahero.” Kini nagpahibalo kanato ug butang mahitungod sa usa sa mga obra sa mga manulonda. Ang mga manulonda nagaalagad ingong mga mensahero, kun sinugo, taliwala sa Diyos ug sa tawo.
Pananglitan, gipadala ang usa ka manulonda sa paghatod ug mensahe kang Abraham mahitungod sa iyang anak si Isaac ug sa panalangin nga miabot pinaagi kaniya, sa panalangin nga atong madawat. (Genesis 22:11-17) Gipadala ang usa ka manulonda sa pakigsulti kang Moises. (Buhat 7:37, 38) Gipadala usab sa Diyos ang usa ka manulonda nga may mga instruksiyon kang propetang Elias. (2 Hari 1:3) Ug mipakita ang usa ka manulonda kang Jose, ang ama-ama ni Jesus, nga may linaing mga instruksiyon bahin sa bata.—Mateo 2:13.
Ang mga manulonda gipadala usab sa pagpanalipod sa katawhan sa Diyos: “Ang manulonda ni Jehova nagapahaluna sa paglibot sa mga nangahadlok kaniya, ug magaluwas kanila.” (Salmo 34:7) Pananglitan, gipagawas sa usa ka manulonda si apostol Pedro sa bilanggoan. (Buhat 12:6-11) Duha ka manulonda mitabang kang Lot ug sa iyang anak nga mga babaye aron maluwas sa kalaglagan sa Sodoma ug Gomorra pinaagi sa pag-uban kanila gawas niadtong lugara. Apan, ang asawa ni Lot, wala misupak sa mga manulonda, busa nalakip sa kalaglagan uban sa duha ka siyudad.—Genesis 19:1-26.
Ang Bibliya naghisgot ug daghang mga higayon sa pagtabang sa manulonda, nakapalig-on sa gipamulong sa Hebreohanon 1:7 ug 14: “Mahitungod sa mga manulonda siya nagaingon: ‘Ang iyang mga manulonda gihimo niya nga mga espiritu, ug ang iyang mga sulogoon gihimo niya nga mga dilaab sa kalayo.’ Dili ba silang tanan mga espiritu alang sa pag-alagad sa katilingban, nga gipadala aron sa pag-alagad alang niadtong makapanunod sa kaluwasan?”
Nakahatag dakong kahupayan ang manulonda kang Jesus. Sa gabii sa wala pa siya mamatay, nahibalo na si Jesus kon unsay mahitabo kaniya—nga siya luiban, dagmalan, ug mabangisong patyon. Siya nagkinahanglan ug kusog sa pag-antos sa pagsulay sa iyang integridad. Nianang malisod nga panahon, usa ka manulonda mipakita kaniya ‘sa paglig-on kaniya.’ Pagkadakong panalangin kanang paglipay sa manulonda alang kang Jesus! Ingong resulta, bisan nga giantos niya ang kasakit nga “nahimong mga tinulo sa dugo ang iyang singot nga nangatagak sa yuta,” nakahimo siya sa pag-antos nga matinumanon hangtod sa kamatayon.—Lucas 22:43, 44.
Gigamit usab sa Diyos ang mga manulonda sa paglaglag sa mga kaaway sa iyang katawhan. Dihang ang Asiryanhong Gahom sa Kalibotan nahimong hulga sa karaang mga magsisimba sa Diyos, kini ang nahitabo: “Ug nahitabo niadtong gabhiona nga ang manulonda ni Jehova migula ug gipamatay sa kampo sa mga Asiryanhon ang usa ka gatos ug kawaloan ug lima ka libo. Ug sa pagbangon sa mga tawo sayo sa pagkabuntag, ania karon, kining tanan mga minatay.” (2 Hari 19:35) Imong makita ang dakong gahom sa mga manulonda—usa lamang ka manulonda ang mipatay sa 185,000 ka mga kaaway sa Diyos ug sa iyang katawhan!
Ang mapasipalahong Herodes usab nakaatubang sa gahom sa usa ka manulonda. Dihang misugod si Herodes sa paghunahuna sa iyang kaugalingon nga sama sa diyos, “dihadiha gihampak siya sa usa ka manulonda ni Jehova, tungod kay wala niya ihatag ang pagdayeg ngadto sa Diyos; ug gikaon siya sa mga ulod ug namatay.”—Buhat 12:21-23.
Kita gipahibalo nga sa dili madugay, dihang taposon na sa Diyos ang daotang sistema sa mga butang, gamiton na usab ang mga manulonda ingong mga tigpatay. “Ang Anak sa tawo magapadala unya sa iyang mga manulonda, ug ilang tapokon ug hakuton paggawas sa iyang gingharian ang tanang hinungdan sa pagkapandol ug ang tanang mga magbubuhat ug kadaotan, ug ilang igasalibay kini sila ngadto sa hudno nga nagadilaab.”—Mateo 13:41, 42.
Busa, ang mga manulonda lahi kaayo nianang gihanduraw sa daghang mga tawo. Ang Alemang awtor sa relihiyon si Dr. Manfred Barthel miingon: “Kon atong handurawon ang mga manulonda sa Ginoo sama sa paglantaw kanila sa mga magsusulat sa Daang Pakigtugon, una kinahanglang atong kalimtan ang kandiisong mga kerubin . . . nga ginadekorar sa atong mga kard sa pangomosta.”—What the Bible Really Says.
Sa Unsang Paagi Ikaw Naapektohan sa mga Manulonda?
Apan, ang pangutana nagapabilin: Unsay ginahimo sa mga manulonda karon? Sila ba nakaapekto kanato karon? Oo, sa tino!
Hinumdomi nga diha sa iyang tagna mahitungod sa “konklusyon sa sistema sa mga butang” si Jesus mitagna: “Inig-abot sa Anak sa tawo diha sa iyang himaya [nagalingkod sa Harianong gahom], ug ang tanang mga manulonda uban kaniya, siya molingkod diha sa iyang mahimayaong trono. Ug sa iyang atubangan pagatapokon ang tanang kanasoran, ug iyang pagalainon ang katawhan gikan sa usa ug usa.”—Mateo 24:3; 25:31, 32.
Sa unsang paagi pagabuhaton kining paglain sa katawhan? Si Jesus mitagna: “Kining maayong balita sa gingharian iwali sa tanang pinuy-anang yuta sa pagpamatuod sa tanang kanasoran; ug unya moabot ang kataposan.” (Mateo 24:14) Oo, gigamit sa Diyos ang iyang katawhan sa yuta sa paghimo niining tibuok-yutang buluhaton sa pagsangyaw.
Ang Gingharian sa Diyos mao ang kagamhanan nga mao lamang ang mopatungha sa bugtong sulbad sa mga problema sa tawo. Karon, ang balita ginawali na sa tibuok yuta pinaagi sa kapin sa tres milyones ka mga Saksi ni Jehova, nga may nagapaluyong mga manulonda kanila. “Sama unya niana ang mahitabo sa konklusyon sa sistema sa mga butang: ang mga manulonda manggula ug ang mga daotan ilang lainon gikan sa mga matarong.”—Mateo 13:49.
Kining gitultolan sa manulonda nga buluhatong pagsangyaw gidawat uban sa nagkalainlaing reaksiyon sa mga tawo. Ang uban moingon nga puliki kaayo sila aron makapamati o nagadumili sa pagpamati. Ang uban nagapanuko o maduhaduhaon. Apan, daghang matinud-anon ug kasingkasing, nga nabalaka bahin sa ilang umaabot, ang malipayong misanong. Sa unsang paagi?
Diha sa 208 ka kanasoran, ang mga Saksi ni Jehova nagadumala ug mga pagtuon sa Bibliya sa balay diha sa minilyong mga katawhan nga “mahunahunaon sa ilang espirituwal nga panginahanglan” ug ‘gigutom sa pagkamatarong.’ (Mateo 5:3, 6) Gipakita sa daghang mga eksperyensiya nga sa kasagaran ang mga manulonda mao ang miagak sa mga alagad sa Diyos aron makita kining mga matinud-anong mga tawo nga may balita sa kaluwasan. Gihubit sa Pinadayag 14:6 sa simbolikal nga paagi ang usa ka “manulonda nga naglupad sa taliwala sa kalangitan” nga may gidalang “walay kataposang maayong balita aron imantala ngadto sa mga nanagpuyo sa yuta.” Mao gayod kanay nahitabo karon! Sa unsang paagi kini makaapekto sa imong umaabot?
Mga Manulonda sa Imong Umaabot
Ang Bibliya tin-awng nagpaila sa atong panahon nga mao na “ang kataposang mga adlaw” niining presenteng sistema. (2 Timoteo 3:1-5) Ang Bibliya nagpahibalo usab kanato nga ang mga manulonda karon “nagabarog sa upat ka tumoy sa yuta nga nanagpugong sa upat ka hangin.” (Pinadayag 7:1) Unsay kahulogan niini nga simbolismo?
Ang pagkahimong anaa sa “mga tumoy” sa yuta, ang mga manulonda nagapahiluna aron sa pagbuhi sa malaglagong “mga hangin” gikan sa tanang direksiyon. Walay luna sa yuta ang labyan, nga nagkahulogang “kadaot,” kun kalaglagan, niining daotang sistema ug sa tanang mga tigsuportar niini. Busa ang mga manulonda sa Diyos gibatbat nga andam sa paglihok dihang ihatag na ang signal!—Pinadayag 7:3; 19:11-21.
Apan, ang malaglagong “kadaot,” modangat lamang sa mga tawong dili mosanong sa gipaluyohan sa manulondang mensahe nga karon ginawali sa tibuok yuta. Dili kini modaot niadtong nagapangita sa Diyos ug nagapatalinghog sa balita sa Gingharian. Sila tipigang-buhi, sumala sa gipahayag sa pulong sa Diyos: “Pangitaa si Jehova, kamong tanang mga maaghop sa yuta . . . Pangita ang pagkamatarong, pangitaa ang pagkamaaghop. Kay tingali kamo pagatagoan sa adlaw sa kasuko ni Jehova.”—Sofonias 2:3.
Unsa unyay mahitabo niining “mga maaghop”? Ang Salmo 37:11 nag-ingon: “Ang mga maaghop magapanunod sa yuta, ug sila makakaplag ug tumang kalipay diha sa kadagaya sa pakigdait.” Hangtod kanus-a? “Ang mga matarong magapanunod sa yuta, ug sila magapuyo niana sa walay kataposan.” (Salmo 37:29) Kana nagkahulogan nga ang kinabuhing dayon posible sa usa ka yuta nga pagahimoong usa ka paraiso, sumala sa gipahayag ni Jesus.—Lucas 23:43.
Busa, ang pangutana nga imong ibangon mao: ‘Unsay akong palaabuton?’ Ang tubag nagadepende sa imong pagsanong sa pagtultol sa manulonda. Magpatalinghog ka ba ug mosanong dihang ipahayag kanimo ang balita nga ilang gipaluyohan? Kon mopatalinghog ka, malakip ka niadtong makapaabot nga may pagsalig sa umaabot, nga nakabaton sa tinong saad sa Diyos: “Ang kalibotan mahanaw ug ang mga pangibog niini, apan ang nagabuhat sa kabubut-on sa Diyos magapabilin sa walay kataposan.”—1 Juan 2:17.
[Hulagway sa panid 7]
Ang mga manulonda karon ‘nagapugong sa upat ka hangin.’ Ngano?