Pilay Imong Ibayad Niini?

MAY nasayran ka bang bililhon kaayong butang nga andam nimong isakripisyo ang tanang nimong kabtangan aron maangkon kana? Gihimo kana ni Jesus, ug gisulti niya kana ngadto sa iyang mga sumusunod.

Siya miingon: “Ang gingharian sa mga langit sama sa usa ka nagapanawng magpapatigayon nga nangitag hamiling mga mutya. Sa pagkakaplag niya ug usa ka mutya nga bililhon kaayo, milakaw siya ug gibaligya dayon ang tanan niyang kabtangan ug gipalit kana.”​—Mateo 13:45, 46.

Ang maong magpapatigayon andam mosurender sa tanang butang aron maangkon ang “mutya,” ang Gingharian sa Diyos. Ngano? Tungod kay walay bisan unsa niining kalibotana ang sama niini. Ang Gingharian sa Diyos mosulbad sa mga suliran nga wala masulbad sa tawo, sama sa gubat, kagutmanan, krimen, ug pagdaogdaog. (Salmo 72:4-8, 13, 14) Ilalom sa Gingharian, bisan ang sala, sakit, ug kamatayon mawala na. (Pinadayag 21:4, 5) Dili katingad-ang ang ikaduhang hangyo sa Pag-ampo sa Ginoo (ang “Amahan Namo”) mao, “Umanhi ang imong gingharian!”​—Mateo 6:9, 10.

Pilay imong ibayad aron makaambit sa mga panalangin sa Gingharian? Sa pagkatinuod, libre ang mga panalangin. Apan aron kapahimuslan kana sila, kinahanglang mahibalo ka kon unsa ang Gingharian, motuo nga kini usa ka kamatuoran, ug hatagan kinig unang dapit sa imong kinabuhi. Mahimo ba nimo kana? Adunay impormasyon diha sa Bibliya nga motabang kanimo. Nganong dili itugot nga ang mga Saksi ni Jehova magtabang nimo sa pagkat-on mahitungod sa Gingharian sa Diyos ug pagkaplag kon sa unsang paagi kini makahatag nimog kaayohan bisan karon.