BALING

Usa ka galamiton sa pagpangisda nga guyoron sa ilalom sa tubig aron sa pagsikop ug isda. (Eze 26:​5, 14; 47:10) Sa karaang Ehipto, ang mga baling ginama sa mga lambo nga lino ug may mga pabug-at nga tingga sa ilalom ug mga boya nga kahoy sa ibabaw. Lagmit nga ang mga baling nga gigamit sa mga Israelinhon susama ra usab.

Ang mga paagi sa pagpamaling ug isda nga gigamit sa karaang panahon lagmit nga kaamgid kaayo sa gigamit sa Tungang Sidlakan sa mas bag-o pang kapanahonan. Ang baling ilagak gikan sa mga sakayan aron liyokan ang usa ka pundok sa isda, ug ang tag-as nga mga pisi nga gitaod diha sa magkaatbang nga mga tumoy sa baling bitaron paingon sa baybayon, diin ubay-ubayng mga tawo nga maghawid sa matag pisi ang inanayng magbitad sa pukot ug magpormag katunga sa sirkulo paingon sa baybayon. (Mat 13:​47, 48) Ang laing paagi mao ang paglikos ug dayon dungan nga bitaron ang baling hangtod nga moanam kagamay ang sirkulo. Dayon ang mga mangingisda mosalom sa tubig ug bitaron ang sidsid niini nga may pabug-at, sa ingon maporma ang usa ka hanig. Human niini, ang baling o pukot bitaron ug ikarga sa usa ka sakayan o mga sakayan. (Luc 5:​6, 7) Usahay ang baling o pukot guyoron una ngadto sa mas mabaw nga tubig sa dili pa habwaan sa kuha.​—Itandi ang Ju 21:​8, 11.

Sa Kasulatan, ang baling gigamit sa mahulagwayong paagi maylabot sa pagpanigom sa mga tawo. (Mat 13:​47, 48) Gigamit usab kini sa paglarawan sa kasingkasing sa usa ka imoral nga babaye (Ecc 7:26) maingon man sa mga laraw sa paglit-ag sa uban. (Miq 7:2) Dugang pa, ang pagsakop nga himoon sa mga sundalo gipakasama sa pagpangisda ginamit ang usa ka baling.​—Hab 1:15-17.