Unsay Kahulogan sa Pukot ug sa Isda Alang Kanimo?

“Kaninyo gitugot ang pagkasabot sa balaang mga tinagoan sa gingharian sa mga langit.”​—MATEO 13:11.

1, 2. Nganong angay kitang maikag sa mga sambingay ni Jesus?

MALIPAY ka bang mahibalo ug usa ka tinagoan o makasulbad ug usa ka tanghaga? Komusta kon ang pagbuhat mo niana motabang kanimo nga makita nga mas tin-aw pa ang imong bahin sa katuyoan sa Diyos? Makalilipay, makabaton ka niana nga pribilehiyo sa pagsabot pinaagi sa usa ka sambingay nga gihatag ni Jesus. Kini nakapakutaw sa daghan nga nakadungog niini ug nakapalibog sa daghan pa sukad niadto, apan mahimong masabtan mo kini.

² Matikdi ang giingon ni Jesus diha sa Mateo kapitulo 13 mahitungod sa iyang paggamit ug mga sambingay. Ang iyang mga tinun-an nangutana: “Nganong nakigsulti ka kanila pinaagig mga sambingay?” (Mateo 13:10) Oo, nganong migamit si Jesus ug mga sambingay nga dili masabtan sa kadaghanang tawo? Siya mitubag diha sa mga bersikulo 11 ngadto sa 13: “Kaninyo gitugot ang pagkasabot sa balaang mga tinagoan sa gingharian sa mga langit, apan kanila wala kini itugot. . . . Mao kini ang hinungdan ngano nga magasulti ako kanila pinaagig mga sambingay, kay bisan tuod sila magapangita, sila dili makakita, ug bisan tuod sila magapaminaw, sila dili makabati ni makasabot niana.”

3. Sa unsang paagi ang pagkasabot sa mga sambingay ni Jesus mohatag kanatog kaayohan?

³ Unya gipadapat ni Jesus ang Isaias 6:9, 10, nga naghubit bahin sa usa ka katawhang bungol ug buta sa espirituwal. Kita, hinunoa, dili kinahanglang mahisama niana. Kon kita nakasabot ug molihok nga uyon sa iyang mga sambingay, kita mahimong magmalipayon kaayo​—karon ug ngadto sa walay kataposang umaabot. Si Jesus nagtanyag kanato niining mainitong pasalig: “Malipayon ang inyong mga mata tungod kay makakita man kini, ug ang inyong mga dalunggan kay makabati man kini.” (Mateo 13:16) Nalangkit niana nga pasalig ang tanang mga sambingay ni Jesus, apan tagdon lang nato ang mubong sambingay bahin sa pukot, nga narekord sa Mateo 13:47-50.

Usa ka Sambingay nga May Halalom nga Kahulogan

4. Unsay giasoy ni Jesus sa paaging sambingay, ingon sa girekord sa Mateo 13:47-50?

⁴ “Ang gingharian sa mga langit nahisama sa usa ka pukot nga gitaktak ngadto sa dagat ug nakakuhag nagkalainlaing matang sa mga isda. Sa dihang napuno na kini, gibutad nila kini ngadto sa baybayon ug, nanglingkod, ilang gipili ang maayong mga isda ug gibutang kini sa mga sudlanan, apan ang mga walay pulos ilang gilabay. Sama unya niana ang mahitabo sa konklusyon sa sistema sa mga butang: ang mga manulonda mogula ug ang mga daotan ilang lainon gikan sa mga matarong ug ilang itambog kini ngadto sa hudno nga nagadilaab. Diin didto sila managhilak ug managkagot sa ilang mga ngipon.”

5. Unsang matang sa mga pangutana ang mobangon labot sa kahulogan sa sambingay sa pukot?

⁵ Ikaw tingali nakakita na ug mga tawong namukot, labing menos sa salida sa sine o sa telebisyon, busa ang sambingay ni Jesus dili lisod nga handurawon. Apan komusta man ang mga detalye ug ang kahulogan? Pananglitan, si Jesus miingon nga kini nga sambingay maoy mahitungod “sa gingharian sa mga langit.” Apan, tinong wala niya ipasabot nga ang “nagkalainlaing matang” sa tawo, ang maayo ug ang walay-pulos, o daotan, mahiadto sa Gingharian. Usab, kinsa ang mangisda? Kini ba nga pagpangisda ug paglainlain nahitabo sa mga adlaw ni Jesus, o sa ato nga panahon lamang, “sa konklusyon sa sistema sa mga butang”? Nakita ba nimo ang imong kaugalingon diha niini nga sambingay? Sa unsang paagi malikayan mo nga mahiuban taliwala sa nanaghilak ug nagpangagot sa ilang mga ngipon?

6. (a) Nganong magmaikagon kaayo kita nga makasabot sa sambingay sa pukot? (b) Unsa ang yawi sa pagkasabot niini?

⁶ Ang maong mga pangutana nagpakita nga kini nga sambingay dili diay yano. Ayawg kalimot, hinunoa: “Malipayon ang inyong mga mata tungod kay makakita man kini, ug ang inyong mga dalunggan kay makabati man kini.” Tan-awon nato kon atong matugkad ang kahulogan niini aron ang atong mga dalunggan makadungog ug ang atong mga mata makakita sa kahulogan niini. Sa pagkatinuod, kita aduna nay hinungdanong yawi sa pagbadbad sa kahulogan niini. Ang nag-unang artikulo naghisgot bahin sa pagdapit ni Jesus sa taga Galilea nga mga mangingisda sa pagbiya sa maong trabaho ug sa pagkuha ug espirituwal nga buluhaton ingong “mga mangingisdag mga tawo.” (Marcos 1:17) Siya miingon kanila: “Sukad karon mangisda na kamog mga tawo nga buhi.”​—Lucas 5:10.

7. Unsay giilustrar ni Jesus sa gihisgotan niya ang isda?

⁷ Nahiuyon niana, ang isda niini nga sambingay naghulagway sa mga tawo. Busa, sa dihang gihisgotan sa bersikulo 49 ang paglain sa daotan gikan sa matarong, kini nagpasabot, dili sa matarong o daotan buhing mga linalang sa dagat, kondili ngadto sa matarong o daotang mga tawo. Sa susama, ang bersikulo 50 dili angay mopahunahuna kanato bahin sa mga hayop sa dagat nga nagahilak o nagapangagot sa ilang mga ngipon. Dili. Kini nga sambingay maoy bahin sa pagpanigom sa mga tawo ug sa ilang umaabot nga paglainlain, nga seryoso kaayo, ingon sa gipakita sa sangpotanan.

8. (a) Unsay atong makat-onan bahin sa dangatan sa walay-pulos nga isda? (b) Tungod sa gipamulong maylabot sa walay-pulos nga isda, unsay atong ikahinapos bahin sa Gingharian?

⁸ Matikdi nga ang walay-pulos nga mga isda, sa ato pa, ang mga daotan, itambog ngadto sa nagdilaab nga kalayo, diin didto sila managhilak ug managkagot sa ilang mga ngipon. Sa laing bahin gilangkit ni Jesus ang maong panaghilak ug panagkagot sa mga ngipon sa pagkahimong gawas sa Gingharian. (Mateo 8:12; 13:41, 42) Diha sa Mateo 5:22 ug 18:9, siya naghisgot pa gani sa “nagdilaab nga Gehenna,” nga nagpasabot sa walay kataposang kalaglagan. Dili ba kana nagpakita kon unsa ka hinungdanon nga masabtan ang kahulogan niini nga sambingay ug molihok nga nahiuyon niana? Kitang tanan nasayod nga walay mga daotan sa Gingharian sa Diyos. Busa, sa dihang si Jesus miingon nga “ang gingharian sa mga langit sama sa usa ka pukot,” mao gayod kanay iyang gipasabot labot sa Gingharian sa Diyos, nga may bahin nga sama sa usa ka pukot nga gitaktak aron matigom ang nagkalainlaing matang sa mga isda.

9. Sa unsang paagi nalangkit ang mga manulonda sa sambingay sa pukot?

⁹ Human nga gitaktak ang pukot ug natigom na ang mga isda, dunay buluhatong paglainlain. Kinsay giingon ni Jesus nga nalangkit? Gipaila sa Mateo 13:49 kining mga mangingisda-tiglainlain ingong mga manulonda. Busa si Jesus nag-asoy kanato bahin sa manulondaong pagdumala sa usa ka instrumento sa yuta nga gamiton sa pag-ila sa mga tawo​—ang pipila maayo ug takos alang sa Gingharian sa langit, ang uban nagpamatuod nga dili takos alang sa maong pagkatinawag.

Ang Pagpangisda​—Kanus-a?

10. Pinaagi sa unsang pangatarongan nga atong matino nga ang pagpangisda ginapadayon sa igoigong yugto sa panahon?

¹⁰ Ang konteksto motabang kanato nga makita kon kanus-a kini ikapadapat. Sayosayo pa niini, si Jesus mihatag ug usa ka sambingay mahitungod sa pagpugas sa maayong binhi, apan unya ang mga bunglayon gipugas usab diha sa umahan, nga naghulagway sa kalibotan. Iyang gipatin-aw diha sa Mateo 13:38 nga ang maayong binhi naghawas “sa mga anak sa gingharian; apan ang mga bunglayon mao ang mga anak sa usa nga daotan.” Kini dungan nga mitubo sa daghang kasiglohan, hangtod sa pagpangani sa konklusyon sa sistema sa mga butang. Unya ang mga bunglayon gilain ug human niana gisunog. Sa pagtandi niini uban sa sambingay mahitungod sa pukot, atong makita nga ang pagpanigom sa mga linalang ngadto sa pukot moabot pa ug hataas nga yugto sa panahon.​—Mateo 13:36-43.

11. Sa unsang paagi ang internasyonal nga pagpangisda nagsugod sa unang siglo?

¹¹ Sumala sa sambingay ni Jesus, ang mga isda tigomon nga walay-pilipili, sa ato pa, ang pukot nakakuhag maayo ug walay-pulos nga mga isda. Samtang buhi pa ang mga apostol, ang mga manulonda nga nagdumala sa pagpangisda migamit sa Kristohanong organisasyon sa Diyos sa pagpanikop ug “mga isda” nga nahimong dinihogang mga Kristohanon. Ikaw hayan moingon nga sa wala pa ang Pentekostes 33 K.P., ang pagpangisda ni Jesus sa mga tawo nakakuhag 120 ka tinun-an. (Buhat 1:15) Apan sa dihang natukod na ang kongregasyon sa dinihogang mga Kristohanon, ang pagpangisda uban sa pukot nga instrumento nagsugod, ug libolibong maayong mga isda ang nakuha. Gikan sa 36 K.P., ang pagpangisda mikaylap ngadto sa internasyonal nga katubigan, samtang ang mga Hentil nakabig ngadto sa Kristiyanidad ug nahimong mga membro sa dinihogang kongregasyon ni Kristo.​—Buhat 10:1, 2, 23-48.

12. Unsay miugmad human nga namatay ang mga apostol?

¹² Sa kasiglohan human nawala sa esena ang mga apostol ni Kristo, dihay nagpadayong pipila ka mga Kristohanon nga naningkamot sa pagkaplag ug paghupot sa balaang kamatuoran. Labing menos ang pipila kanila nakabaton sa pag-uyon sa Diyos, ug iyang gidihogan sila sa balaang espiritu. Apan, ang kamatayon sa mga apostol nagwagtang sa nagapugong nga impluwensiya, nga nagtugot sa kaylap nga pag-ugmad sa apostasiya. (2 Tesalonica 2:7, 8) Usa ka organisasyon ang mitubo nga sa pagkadili-takos miangkon nga mao ang kongregasyon sa Diyos. Kini sa bakak nangangkon nga mao ang balaang nasod nga gidihogan sa espiritu sa Diyos aron magmando uban kang Jesus.

13. Nganong ikaingon nga ang Kakristiyanohan adunay papel sa pagpalakaw sa pukot?

¹³ Nagtuo ka ba nga ang di-matinumanong mga magtutudlo sa Kristiyanidad dunay bisan unsang bahin sa sambingay sa pukot? Buweno, dunay katarongan sa pagtubag ug, oo, sila dunay bahin. Ang simbolikong pukot naglakip sa Kakristiyanohan. Tinuod, sa daghang katuigan ang Katolikong Iglesya naningkamot sa pagtago sa Bibliya gikan sa ordinaryong mga tawo. Bisan pa, latas sa kasiglohan ang mga membro sa Kakristiyanohan dunay dakong papel sa paghubad, pagkopya, ug pag-apod-apod sa Pulong sa Diyos. Sa ulahi ang mga Iglesya nagtukod ug misuportar sa mga sosyedad sa Bibliya, nga naghubad sa Bibliya ngadto sa mga pinulongan sa hilit nga kayutaan. Sila usab nagpadalag medikal nga mga misyonaryo ug mga magtutudlo, aron makakabig ug mga tawong nahimong mga Kristohanon tungod kay may madawat nga materyal nga mga kaayohan. Kini nakatigom ug daghang walay-pulos nga mga isda, kinsa wala makabaton sa pag-uyon sa Diyos. Apan labing menos kini nagpasinati sa milyon-milyong dili mga Kristohanon sa Bibliya ug sa usa ka matang sa Kristiyanidad, bisag dunot.

14. Sa unsang paagi ang pagpangisda sa maayong mga isda natabangan pinaagi sa pipila ka buluhaton nga nahimo sa mga iglesya sa Kakristiyanohan?

¹⁴ Kasamtangan, ang nagkatibulaag nga mga matinumanon nga nagsunod sa Pulong sa Diyos naningkamot sa ilang kaugalingon kutob sa ilang maarangan. Sa maong panahon, sila ang milangkob sa matuod dinihogang kongregasyon sa Diyos sa yuta. Ug kita makaseguro nga sila usab nanakop ug mga isda, o mga tawo, diin ang kadaghanan gilantaw sa Diyos nga maayo ug gidihogan sa iyang espiritu. (Roma 8:14-17) Kining maayong mga magtutudlo sa Kristiyanidad nakahimo sa pagdala sa kamatuoran sa Bibliya ngadto sa daghang nahimong mga Kristohanon tungod kay may madawat nga materyal nga mga kaayohan o nakabatog limitadong kahibalo sa Bibliya gikan sa mga Kasulatan nga gihubad ngadto sa ilang kaugalingong mga pinulongan pinaagi sa mga sosyedad sa Bibliya sa Kakristiyanohan. Tinuod, ang pagpanigom sa maayong mga isda nagapadayon, bisan tuod nga labing daghan ang natigom sa Kakristiyanohan nga walay-pulos sa baroganan sa Diyos.

15. Sa laktod, unsay gihawasan sa pukot sa sambingay?

¹⁵ Busa ang pukot naghulagway sa usa ka yutan-ong instrumento nga nagaangkong mao ang kongregasyon sa Diyos ug nga nagapanigom ug mga isda. Nalakip niini ang Kakristiyanohan ug ang kongregasyon sa dinihogang mga Kristohanon, ang ulahi nagpadayon sa pagpanigom ug maayong mga isda, ubos sa di-makitang pagtultol sa mga manulonda, nga nahiuyon sa Mateo 13:49.

Atong Panahon Maoy Linain

16, 17. Nganong ang atong panahon nga gikinabuhian karon hinungdanon kaayo sa katumanan sa sambingay ni Jesus bahin sa pukot?

¹⁶ Tagdon nato karon ang gidugayon sa panahon. Sa daghang kasiglohan ang pukot nga instrumento nakatigom ug maayong isda ug daghang walay-pulos nga mga isda, o mga daotan. Unya miabot ang panahon nga nalangkit ang mga manulonda sa pagbuhat sa hinungdanong buluhaton sa paglainlain. Kanus-a? Buweno, ang bersikulo 49 sa tin-aw nag-ingon nga kini maoy sa panahon “sa konklusyon sa sistema sa mga butang.” Kini mosibo sa giingon ni Jesus diha sa sambingay sa mga karnero ug sa mga kanding: “Inig-abot na sa Anak sa tawo diha sa iyang himaya, ug ang tanang mga manulonda uban kaniya, unya siya molingkod diha sa iyang mahimayaong trono. Ug sa iyang atubangan pagatapokon ang tanang kanasoran, ug iyang pagalainon ang usa gikan sa usa, maingon sa magbalantay sa mga hayop nga magalain sa mga karnero gikan sa mga kanding.”​—Mateo 25:31, 32.

¹⁷ Busa, nahiuyon sa Mateo 13:47-50, ang usa ka hinungdanong buluhaton sa paglainlain ubos sa pagtultol sa manulonda nagapadayon sukad sa pagsugod “sa konklusyon sa sistema sa mga butang” sa 1914. Kini ilabinang nadayag human sa 1919, sa dihang ang nahibilin sa mga dinihogan gipagawas gikan sa temporaryong espirituwal nga pagkaulipon, o pagkabihag, ug nahimong mas epektibo pang instrumento aron matuman ang buluhatong pagpangisda.

18. Sa unsang paagi ang maayong mga isda ginatigom diha sa mga sudlanan?

¹⁸ Unsay nahitabo sa gilain nga maayong mga isda? Ang bersikulo 48 nag-ingon nga ang manulondang mga mangingisda-tiglainlain “nagtigom sa maayong [mga isda] diha sa mga sudlanan, apan ang mga walay-pulos ilang gilabay.” Ang mga sudlanan mao ang nagapanalipod nga mga butanganan sa maayong mga isda. Kini ba nahitabo sa atong panahon? Tino gayod. Samtang ang mahulagwayong mga isda ginadakop nga buhi, sila ginatigom diha sa mga kongregasyon sa matuod nga mga Kristohanon. Kining samag-sudlanang mga kongregasyon nakatabang sa pagpanalipod ug sa pagtagana kanila alang sa balaang pag-alagad, dili ba? Sa gihapon, mahimong maghunahuna ang usa, ‘Maayo kaayo, apan unsa may labot niana sa akong kinabuhi karon ug sa akong umaabot?’

19, 20. (a) Nganong hinungdanon karon nga masabtan ang diwa niini nga sambingay? (b) Unsang hinungdanong buluhatong pagpangisda ang ginahimo sukad sa 1919?

¹⁹ Ang katumanan sa gihulagway dinhi dili kay limitado lamang sa mga kasiglohan sa panahon sa mga apostol ug sa 1914. Sulod sa maong yugto, ang pukot nga instrumento miabot sa pagpanigom sa bakak ug matuod nga mga magtutudlo sa Kristiyanidad. Oo, kadto maoy pagpanigom sa walay-pulos ug sa maayong mga isda. Dugang pa, ang buluhatong paglainlain nga gibuhat sa mga manulonda wala matapos balik sa 1919. Wala, wala gayod. Sa pipila ka bahin kini nga sambingay sa pukot aplikado hangtod sa atong panahon. Kita nalangkit ug ingon man ang atong umaabot. Hinungdanong makasabot kita kon sa unsang paagi ug nganong nahimong ingon niana kon buot nato nga kining mga pulonga mobatbat kanato: “Malipayon ang inyong mga mata kay makakita man kini, ug ang inyong mga dalunggan kay makabati man kini” uban ang pagsabot.​—Mateo 13:16.

²⁰ Tingali ikaw nasayod nga human sa 1919 ang dinihogang nahibilin nagmapuliki sa buluhatong pagsangyaw uban sa tabang sa mga manulonda, kinsa nagpadayon sa paggamit sa mahulagwayong pukot sa pagbutad sa mga isda ngadto sa baybayon, sa paglain sa maayo gikan sa mga walay-pulos. Ang kaihapan sa maong panahon nagpakita nga ang pagpanakop ug maayong mga isda aron dihogan sa espiritu sa Diyos nagpadayon hangtod ang kataposang membro sa 144,000 gitigom diha sa mahulagwayong pukot. (Pinadayag 7:1-4) Apan sa tungatunga sa mga tuig 1930, ang pagpanigom sa maayong isda aron dihogan sa balaang espiritu sa paninugdan natapos. Gidispatsar ba sa kongregasyon sa dinihogang nahibilin niadto ang pukot, ingnon ta, ug sa yano naglingkod na lamang, nagpaabot sa ilang langitnong ganti? Wala gayod!

Imong Kalangkitan sa Pagpangisda

21. Unsang ubang pagpangisda ang nahitabo sa atong panahon? (Lucas 23:43)

²¹ Ang sambingay ni Jesus sa pukot nasentro sa maayong isda kinsa gantihan ug usa ka dapit diha sa Gingharian sa mga langit. Apan, gawas pa niana nga sambingay, dunay laing mahulagwayong pagpangisda ang nagakahitabo sa mas dako pa nga sukod, ingon sa giilustrar sa nag-unang artikulo. Kini nga pagpangisda, dili alang sa maayong dinihogang mga isda nga gihisgotan sa sambingay ni Jesus, kondili alang sa mahulagwayong mga isda nga makuhang buhi ug hatagan sa kahibulongang paglaom sa kinabuhi diha sa paraiso sa yuta.​—Pinadayag 7:9, 10; itandi ang Mateo 25:31-46.

22. Unsang malipayong sangpotanan ang atong matagamtaman, ug unsa ang kapilian?

²² Kon abiabihon mo ang maong paglaom, nan ikaw malipay nga gitugotan ni Jehova ang nagaluwas-kinabuhing buluhaton sa pagpangisda nga magpadayon hangtod karon. Gihatagan ka niinig higayon nga imong mabatonan ang kahibulongang palaaboton. Palaaboton? Oo, kana maoy tukmang pulong nga gamiton, sanglit ang sangpotanan unya maoy depende man sa atong pagpadayon nga matinumanon ngadto sa Usa nga maoy nagadumala sa nagapadayong buluhaton sa pagpangisda. (Sofonias 2:3) Hinumdomi gikan sa sambingay nga dili tanang isda nga nakuha sa pukot makasinati ug maayong sangpotanan. Si Jesus miingon nga ang walay-pulos, o mga daotan, pagalainon gikan sa mga matarong. Alang sa unsang katuyoan? Sa Mateo 13:50, gihubit ni Jesus ang seryosong sangpotanan alang sa mga walay-pulos, o daotang mga isda. Kini sila itambog ngadto sa nagdilaab nga hudno, nga nagkahulogan sa walay kataposang kalaglagan.​—Pinadayag 21:8.

23. Unsay nakapahimong hinungdanon kaayo sa buluhatong pagpangisda karon?

²³ Alang sa maayo dinihogang mga isda, ingon man sa mahulagwayong mga isda nga mabuhing walay kataposan sa yuta, adunay mahimayaong umaabot. Nan, uban sa maayong katarongan ginatino sa mga manulonda nga karon mismo usa ka malamposong pagpangisda ang ginahimo sa tibuok globo. Ug pagkadaghang isda ang nakuha! Ikaw husto sa pag-ingon nga sa kaugalingong paagi niini, kini sama ra ka milagrosong pagkakuha sa mga apostol ug literal nga isda sa dihang ilang gitaktak ang pukot sumala sa gisugo ni Jesus.

24. Unsay atong kinahanglang buhaton labot sa espirituwal nga pagpangisda?

²⁴ Ikaw ba adunay aktibong pakig-ambit kutob sa imong mahimo niining nagaluwas-kinabuhing buluhaton sa espirituwal nga pagpangisda? Bisan unsa pa ka dako ang atong indibiduwal nga pagpakig-ambit hangtod niining adlawa, ang matag usa kanato makabatog kaayohan sa paglantaw sa nahimo na sa tibuok yuta diha sa dakong pagpangisda ug sa nagaluwas-kinabuhing buluhaton nga ginahimo karon. Ang pagbuhat niana angay modasig kanato sa dugang kasibot sa pagtaktak sa mga pukot aron makakuhag daghan pa sa mga adlaw nga anaa sa unahan!​—Itandi ang Mateo 13:23; 1 Tesalonica 4:1.

Makahinumdom Ka ba Niining mga Puntoha?

◻ Unsay gihawasan sa duha ka matang sa isda diha sa sambingay ni Jesus bahin sa pukot?

◻ Diha sa unsang diwa ang mga iglesya sa Kakristiyanohan nalangkit sa pagpalakaw sa pukot?

◻ Nganong ang pagpangisda nga gihimo sa atong panahon hinungdanon kaayo?

◻ Ang sambingay bahin sa pukot kinahanglang moagak sa matag usa kanato sa paghimog unsang pagtuki sa kaugalingon?

[Hulagway sa panid 18]

Ang pagpangisda ginahimo na sa Dagat sa Galilea sa daghang kasiglohan

[Credit Line]

Pictorial Archive (Near Eastern History) Est.