Kita Adunay Bililhong Bahandi nga Ikapaambit Ngadto sa Uban
1 Ang Pulong sa Diyos punog espirituwal nga mga bahandi nga atong gipabilhan. (Sal. 12:6; 119:11, 14) Usa ka higayon niana, si Jesus migamit ug mga ilustrasyon sa paghulagway sa lainlaing bahin sa Gingharian, ug dayon nangutana sa iyang mga tinun-an: “Nasabtan ba ninyo ang diwa niining tanang butanga?” Human sila motubag ug oo, siya miingon kanila: “Kay mao man kana, ang matag magtutudlo sa publiko, sa dihang natudloan bahin sa gingharian sa mga langit, maoy sama sa usa ka tawo, usa ka tagbalay, nga magpagawas gikan sa iyang tipiganan sa bahandi sa mga butang nga bag-o ug daan.”—Mat. 13:1-52.
2 Ang kamatuoran nga atong nakat-onan sa dihang una kitang nagtuon sa Bibliya nahisamag karaang mga bahandi. Tungod sa personal nga pagtuon sa mas lawom nga mga butang sa Pulong sa Diyos, atong nakaplagan ang uban pang kamatuoran sa Bibliya, nga giisip nato ingong bag-ong kaplag nga mga bahandi. (1 Cor. 2:7) Dugang pa, pinaagi sa “matinumanon ug maalamong ulipon,” atong nabatonan o nasabtan ang maong mga bahandi.—Mat. 24:45.
3 Atong gipabilhan pag-ayo ang bag-o ug karaang espirituwal nga mga bahandi. Busa, kita molihok sa pagpangita niini aron kita mabansay ug mas mahanas ingong magtutudlo sa Pulong sa Diyos, nga makugihon sa pagtudlo sa uban bahin sa bililhong kamatuoran nga atong nakat-onan.
4 Pagkat-on Gikan sa Panig-ingnan ni Jesus: Gipakita ni Jesus nga bililhon kaniya kining maong mga bahandi pinaagi sa masibotong pagsangyaw ngadto sa uban. Bisan sa dihang gikapoy siya, wala siya mohunong sa pagpaambit niini nga mga bahandi gikan sa iyang “tipiganan.”—Juan 4:6-14.
5 Tungod kay gihigugma ni Jesus ang mga kabos sa espirituwal, iyang gipaambit sa uban ang nagahatag-ug-kinabuhi nga kamatuoran sa Diyos. (Sal. 72:13) Siya naluoy niadtong gigutom sa espirituwal ug natukmod sa “pagtudlo kanila ug daghang butang.”—Mar. 6:34.
6 Sundoga si Jesus: Kon kita nagpabili pag-ayo sa mga bahandi nga atong nabatonan, kita magmasiboton gayod sama kang Jesus sa pagpakita sa mga tawo sa espirituwal nga mga mutya diha mismo sa Bibliya. (Prov. 2:1-5) Bisag kapoyon kita usahay, kita kinasingkasing ug madasigong mosangyaw sa kamatuoran. (Mar. 6:34) Ang atong lawom nga pagpabili sa mga bahandi nga atong nabatonan magpalihok kanato sa pagkugig maayo diha sa ministeryo ug sa pagpakigbahin niini sa bug-os.