Malipayon Kadtong Nagagamit sa Gahom sa Hustong Paagi!
“Si Jehova mahinay sa kasuko ug dako sa gahom, dili gayod siya magahawid sa pagpanimalos.”—NAHUM 1:3.
1. Nganong dili katarongang magpasigarbo ang tawo nga may usa ka matang sa gahom?
ADUNAY daghang matang sa gahom nga magamit sa intelihenting mga linalang sa hustong paagi. Tungod sa kinaiyanhong gasa o tungod sa mga kahimtang, tingali nakabaton kita ug partikular nga gahom sa usa ka matang. Apan katarongan na ba kini sa pagpasigarbo? Dili gayod. Unsay atong mabasa sa Jeremias 9:23? “Pasagdi nga dili magpasigarbo ang tawong maalam sa iyang kaalam ni magpasigarbo ang kusgan sa iyang kusog ni ang dato sa iyang bahandi.” (New International Version) Nganong dili? Si apostol Pablo naghatag laing maayong tubag diha sa 1 Corinto 4:7: “Kay kinsa bay naghimo kanimo nga lahi sa uban? Kay unsa may anaa kanimo nga dili nimo dinawat? Ug kon kini dinawat man, nganong magpasigarbo man ikaw nga morag dili kini hinatag?”
2. Nganong kinahanglang magbantay kita kon bahin na sa paggamit sa gahom?
2 Nganong kinahanglan magbantay kita batok sa pag-abuso sa gahom nga tingali atong nabatonan? Tungod kay “ang kiling sa kasingkasing sa tawo daotan sukad pa sa iyang pagkabata.” (Genesis 8:21) Sanglit napanunod natong tanan ang kiling sa pagkahakog, angay gayod kitang magbantay sa tanang panahon aron atong magamit sa hustong paagi ang gahom nga atong nabatonan. Gipahayag sa usa ka magbabalak kining hunahunaa: “Walay bahandi nga wala magkinahanglag pag-amping. Walay gahom nga walay nagpanghiping lit-ag nga malalangon.” Oo, tungod sa napanunod nga pagkadili hingpit, anaa kanunay ang kiling sa paggamit sa gahom sa mahakogong paagi.
Si Jehova—Makagagahom, Apan Maalamon ug Makataronganon Usab
3. Unsang mga matang sa gahom ang nahuptan ni Jehova?
3 Walay lain gawas sa Maglalalang, si Jehova nga Diyos, ang naghatag kanato ug maayo, oo, hingpit, nga pananglitan sa paggamit sa gahom. Dili siya madalidalion kondili mahinay sa kasuko bisag may dako nang panginahanglan sa pagpakita sa iyang gahom. (Nahum 1:3) Walay lain ang may dakong gahom kay sa Diyos, nga tungod sa maong katarongan atong gitawag siya nga ang Usa nga labing-gamhanan. Siya tukma sa titulong “Labing Makagagahom” sa iyang kaugalingon. (Genesis 17:1) Dili lamang may bug-os siyang gahom sa diwa nga nakabaton sa walay kinutubang kusog, kondili supremo usab ang iyang gahom sa pagkaagi nga nabatonan niya ang tanang awtoridad tungod sa iyang katungdanan ingong Soberanong Ginoo sa uniberso, nga iyang gilalang. Maoy hinungdan nga walay makaarang sa ‘pagsusi sa iyang kamot kun sa pagsulti kaniya, “Unsay imong gibuhat?”’—Daniel 4:35.
4. Nganong dalan sa kaalam ang pagkahadlok kang Jehova?
4 Tungod sa pagkalabing makagagahom ni Jehova nga Diyos, dalan sa kaalam alang kanato ang pagkahadlok sa pagpasuko kaniya. Oo, “ang pagkahadlok kang Jehova maoy sinugdan sa kaalam, ug ang kahibalo sa Usa nga Labing Balaan mao ang pagsabot.” (Proverbio 9:10) Nagpasidaan si Pablo kanato sa dili paghagit kang Jehova nga Diyos sa pagpangabugho pinaagi sa pakigbahin sa tanang porma sa idolatriya tungod kay “labi pa ba kitang kita kusgan kay kaniya?” Dili gayod! (1 Corinto 10:22) Apan, ang tanan nga motuyo sa paglapas sa matarong nga mga sugo sa Diyos nagalihok nga daw sila mas kusgan kay kang Jehova! Ang dugang pulong ni Pablo nagpasiugda ning puntoha: “Ang atong Diyos maoy usa ka kalayong nagaut-ot.”—Hebreohanon 12:29.
5. Nganong dili kita angay mahadlok kang Jehova tungod sa iyang pagkamakagagahom?
5 Tungod ning mga kamatuorana tingali bation kitag kahadlok kun kalisang kon wala pa gitimbang sa hingpit ni Jehova ang iyang dakong gahom uban sa iyang tulo ka pangunang mga hiyas: kaalam, hustisya, ug gugma. Ang iyang paggamit sa gahom sa mapait nga paagi kanunayng nahiangay, kun nagkauyon, niining mga hiyasa. Pananglitan, ang Lunop sa mga adlaw ni Noe maoy dakong pagpasundayag sa gahom ni Jehova. Apan ang paggamit ba sa Diyos sa gahom dili matarong o dili mahigugmaon? Dili gayod! Gidaot sa hilabihan sa katawhan ang iyang dalan nga naguol ang Diyos sa iyang nakita. (Genesis 6:5-11) Sanglit giabusohan niadtong mga daotan sa wala pay lunop ang mga panalangin sa Diyos, milihok siya sa tukmang paagi pinaagi sa paglaglag kanila gikan sa yuta, ilabina kay wala sila manumbaling sa mga pasidaan sa “magwawali sa pagkamatarong,” nga si Noe.—2 Pedro 2:5.
6. Unsay gipakita sa pagtagad ni Jehova sa Sodoma ug Gomorra?
6 Sa gipakita sa mga pomuluyo sa Sodoma ug Gomorra ang ilang sobra ka pagkamakasasala, pinaagi sa pag-abuso sa mga panalangin nga ilang gitagamtam, ingong bahin sa katawhan, diha sa kamot ni Jehova, siya mihukom nga laglagon ang mga molupyo. Tungod sa iyang higalang si Abraham, gisultihan ni Jehova kanang tawhana sa pagtuo sa Iyang katuyoan bahin sa Sodoma ug Gomorra. Gituohan ni Abraham nga daw dakong pag-abuso kini sa gahom busa iyang gipangutana si Jehova: “Dili ba ang Maghuhukom sa tibuok yuta magabuhat sa matarong?” Apan, nasayop si Abraham sa pagsabot. Sa kataposan, miuyon siya nga ang hukom ni Jehova tinuod nga matarong, kay walay nakita bisan napulo na lang ka kalag nga matarong diha sa duha ka siyudad. Sa pagkatinuod nagpakita kini sa pagkamabinantayon ni Jehova nga Diyos sa paggamit sa iyang gahom sa matarong nga paagi.—Genesis 18:17-33; Isaias 41:8.
7. Nganong takos si Paraon sa pagdawat sa malaglagong pagpakita sa gahom ni Jehova?
7 Sa ulahi, sa miabot ang panahon sa pagluwas sa mga Israelitas gikan sa dili makataronganong pagkaulipon sa Ehipto, gihatagan ni Jehova si Paraon ug higayon sa pagtabang. Sa ingon walay kadaot nga modangat kang Paraon ug sa iyang katawhan. Apan kanang haria sa pagkamapahitas-on ug sa pagkagahig-ulo wala mosugot sa hangyo ni Jehova. Busa gipakita sa Diyos kang Paraon ang iyang gahom pinaagi sa sunodsunod nga Napulo ka Hampak diha sa Ehipto. (Exodo 9:16) Sa misugot si Paraon sa pagpalakaw sa mga Israelitas, siya sa pagkagahig-ulo mipadayon sa paghagit kang Jehova pinaagi sa paggukod sa mga Israelitas. Busa, gigamit ni Jehova sa makataronganon ang iyang dakong gahom sa paglaglag kang Paraon ug sa iyang kasundalohan sa Pulang Dagat. (Salmo 136:15) Tagda, nga sa matag hitabo, gigamit usab ni Jehova ang iyang dakong gahom sa pagtipig sa iyang matinumanong mga alagad: si Noe ug ang iyang pamilya, si Lot ug ang iyang duha ka anak nga babaye, ug ang nasod sa Israel.—Genesis 19:16.
8. Sa unsang maayong rason nga gitagad ni Jehova si Sennacherib sumala sa iyang gihimo?
8 Sa milabay ang kasiglohan, sa panahon ni Haring Ezekias, si Jehova nga Diyos nagpakita sa iyang dakong gahom sa labing tagsaon ug matarong nga paagi sa dihang nameligro ang Jerusalem sa hari sa Asiria nga si Sennacherib. Ang katawhan ni Jehova, uban sa mahadlokon sa Diyos ug maunongong Haring Ezekias sa ilang ulohan, mihangyo Kaniya ug panabang. Sila nag-alagad kaniya nga matinumanon, busa milihok ang Diyos alang kanila. Ang sinugo ni Haring Sennacherib, sa laing bahin, mipasiatab: ‘Ayaw pagpatalinghog kang Ezekias, ayaw siya palimbonga kaninyo pinaagi sa pagsaad nga si Jehova magaluwas kaninyo. Aduna bay usa sa mga diyos sa mga nasod nga nakaluwas sa iyang katawhan gikan sa kamot ni Sennacherib? Sanglit wala may usa niining mga diyosa ang nakaluwas, nganong maghunahuna kamo nga makaluwas si Jehova kaninyo?’ (Isaias 36:13-20) Tungod sa maong pagpasiatab, kinahanglang gamiton sa Diyos ang iyang dakong gahom, nga mipahinabog kamatayon sa 185,000 ka sundalo sa usa ka gabii, nga nagpamatuod nga adunay kalainan tali sa mga diyosdiyos sa mga nasod ug kang Jehova.
9. Unsang ubang mga panig-ingnan ang makutlo nga nagpakita nga mabinantayon si Jehova sa iyang paggamit sa gahom?
9 Tagda ang dugang pang mga pananglitan nga ikahatag. Sa gihampak ni Jehova si Miriam ug sanla, kadto maoy bug-os nga matarong ug maalamong pasundayag sa iyang gahom. Takos si Miriam sa maong silot tungod sa pagsulting mapangahason batok sa iyang igsoong si Moises, ang usa nga tinudlo sa Diyos. (Numeros 12:1-15) Sama kadto sa nahitabo sa dihang si Haring Uzzias sa pagkawalay pagtahod misulod sa sangtuwaryo sa balaang templo ug nangahas sa paghalad ug insenso diha sa bulawang halaran, nga sa mapahitas-on wala magpatambag sa mga saserdoteng Levihanon. Gipakita ni Jehova ang iyang gahom pinaagi sa matarong nga pagsilot sa hari ug sanla. (2 Cronicas 26:16-21) Bisan ug dili managsama ang kabug-at sa ilang mga sala, nagkalainlain usab ang silot ni Jehova kanila: temporaryo ang sanla ni Miriam, apan namatay si Uzzia nga sanlahon. Busa atong nakita nga sa tanang panahon mainampingon si Jehova sa paggamit sa iyang gahom sa maalamon ug makataronganong paagi, nga makahimo sa pagtipig sa matinumanon nga nahigugma kaniya ug sa paglaglag sa daotan.—Salmo 145:20.
Ang Pananglitan ni Jesu-Kristo
10, 11. Unsang mga hitabo ang nagpakita nga nagtagad sa Jesus sa paggamit sa gahom sa hustong paagi?
10 Ang Anak sa Diyos maoy tinuod gayod nga maayong manunundog sa iyang Amahan sa paggamit sa gahom. Ang usa sa labing unang mga panig-ingnan mao ang panahon sa dihang nakiglalis si Satanas kaniya bahin sa lawas ni Moises. Makabadlong unta dayon ang Logos kang Satanas. Apan, ang Logos, mihatag ug higayon, pagaingnon pa, aron ang pagbadlong magagikan kang Jehova mismo.—Judas 8, 9.
11 Ang unang pagsulay nga gitanyag ni Satanas kang Jesus sa kamingawan may kalabotan niining pag-abuso sa gahom. Gisulayan ni Satanas si Jesus sa paggamit sa iyang labaw sa kinaiyahang gahom alang sa mahakogong katuyoan, sa paghimo sa mga tinapay nga pagkaon. Dako kini nga pagsulay tungod kay si Jesus wala makakaon sulod sa 40 ka adlaw, ug “siya gigutom.” Gitanyag ni Satanas kining pagsulaya sa usa ka paagi nga mabitik si Jesus sa pagsubay sa mahakogong dalan, kay siya misugod sa, “KON ikaw anak sa Diyos, sugoa kining mga bato nga mahimong mga tinapay.” Siya sa walay duhaduha nagpaabot nga motubag si Jesus, ‘Oo anak ako sa Diyos, ug sa pagpamatuod niini akong himoon kining mga bato nga tinapay.’ Si Jesus, imbes nagpasulay kun nagpabitik sa paglihok nga mahakogon o sa binuang nga paagi, mitubag: “Nahisulat na, ‘Ang tawo mabuhi dili sa tinapay lamang, kondili sa matag pulong nga magagula sa baba ni Jehova.’” (Mateo 4:1-4) Wala niya tagda ang pasumbingay nga siya anak sa Diyos, ug midumili sa pag-abuso sa gahom nga gihatag sa Diyos kaniya.
12. Sa unsang paagi dugang nagpakita si Jesus nga siya dili hakog ug gahom?
12 Sa ulahi, tapos nga gipakaon ni Jesus ang 5,000 ka lalaki gawas pa sa daghang babaye ug mga bata, gusto ang mga Hudiyo sa paghimo kaniyang hari. Kon iya pang gidawat ang ilang tanyag, kadto maoy pag-abuso unta sa gahom nga iyang nabatonan sa pag-impluwensiya sa mga tawo pinaagi sa iyang mga milagro. Siya nasayod nga kinahanglang magpabilin siyang neyutral may labot sa politika sa kalibotan ug sa paghulat kang Jehova nga Diyos sa paghatag kaniya sa iyang pagkahari. (Juan 6:1-15) Sa ulahi pa niana, dihang miduol kaniya ang panon sa katawhan aron prisohon siya, makahimo siya sa pagpangayog 12 ka panon sa mga manulonda ug busa mapugngan nga dili siya mabilanggo. Apan, kadto maoy pag-abuso unta sa gahom, kay sa kabubut-on sa iyang Amahan nga siya magpasakop.—Mateo 26:39, 53.
Ang Uban nga Wala Mag-abuso sa Gahom
13, 14. (a) Unsang maayong panig-ignan ang gihatag ni Gideon, nga nagpakita nga dili hakog ug wala mag-abuso sa iyang gahom? (b) Sa unsang paagi nagpakitag maayong panig-ingan si Saul sa sinugdan sa iyang pagkahimong hari?
13 Taliwala sa dili hingpit nga mga tawo nga misukol sa pagsulay sa pag-abuso sa gahom, si Maghuhukom Gideon kinahanglang hisgotan. Tapos nga iyang giluwas ang Israel gikan sa mga kamot sa mga Midianhon, gusto sa mga tawo nga mahimo siya nga ilang hari. Mibalibad si Gideon, tukmang miingon: “Ako dili maghari kaninyo, ni ang akong mga anak maghari kaninyo. Si Jehova ang magahari kaninyo.” Oo, ang pagkamapaubsanon nga iyang gipakita sa sinugdan sa iyang katungdanan ingong maghuhukom makita gihapon. Ug ang tubag ni Gideon nagpabanaag sa gibati ni Jehova bahin sa pagbaton sa Israel ug tawhanong hari. Atong makita kana diha sa tubag sa Diyos sa pagpangayo sa Israel ug hari sa panahon ni propetang Samuel.—Maghuhukom 8:23; 6:12-16; 1 Samuel 8:7.
14 Apan, sa napili ang usa ka hari, si Saul sa sinugdan mihatag ug maayong pananglitan sa pagpugong sa paggamit sa gahom. Ang walay biling mga tawo miingon: “‘Unsaon niining tawhana sa pagluwas nato?’ Ug ilang gitamay siya . . . Apan nagpakahilom siya.” Makalihok unta dayon siya, uban sa iyang harianong gahom, apan wala. Maingon man, tapos nga nakadaog si Saul sa Amonihanon, nagtuo ang uban niyang katawhan nga maayo kining panahon sa pagpanimalos niadtong mitamay kang Saul. Busa miingon sila kaniya: “Kinsa siya nga miingon, ‘Si Saul—ba ang maghari kanato?’ Dad-a ang mga tawo, aron kami magapatay kanila.” Apan, wala nianang hunahunaa si Saul. Siya mitubag: “Walay usa ka tawo nga pagpatyon niining adlawa, kay niining adlawa si Jehova naghimo ug kaluwasan sa Israel.” Atong nakita nga maayo ang pagsugod ni Saul ug sa pagkamapaubsanon. (1 Samuel 9:21; 10:20-23, 27; 11:12, 13) Pagkamakapasubo nga misugod siya sa pag-abuso sa iyang gahom sa pagkahari ug busa nahimong daotan sa kataposan.—1 Samuel 28:6; 31:3-6.
15, 16. (a) Si Maghuhukom Samuel nakahatag ug unsang pamatuod mahitungod sa iyang paggamit sa gahom sa paghukom? (b) Unsang samang panig-ingnan ang gihatag ni Haring David?
15 Si Samuel, ang propeta nga naghukom usab sa Israel, naghatag maayong panig-ingnan. Gigamit siya ni Jehova gikan sa iyang sayo nga pagkabatan-on. Makataronganong naghukom si Samuel sa iyang katawhan ug mihatag kaluwasan kanila. Iya bang gipahimuslan ang iyang posisyon alang sa hakog nga ganasiya? Wala gayod! Siya miingon sa iyang panamilit nga pakigpulong sa katawhan: “Ako nagpatalinghog sa tanan ninyong gipamulong kanako, ug naghimo ug usa ka hari sa ibabaw ninyo . . . Ania ako. Saksi kamo batok kanako sa atubangan ni Jehova ug sa atubangan sa iyang usa nga dinihogan: Kinsang baka ang akong nakuha kun kinsang asno akong gikuha kun kinsa ang akong gilupigan kun kinsa ang akong gilimbongan kun gikan kang kinsang kamot nga ako nagdawat ug hiphip aron sa pagbuta sa akong mga mata diha niana?” Miadmiter ang iyang katawhan nga walay buling ang dalan ni Samuel niining mga butanga. Wala niya abusohi ang gahom sa iyang pagkamaghuhukom.—1 Samuel 12:1-5.
16 Ug dili usab nato kalimtan ang maayong panig-ingnan nga gihatag ni David. Makaduha ka beses nga mahimo unta niyang mapatay si Saul. Tingali nakapataronganan si David: ‘Nagtinguha si Saul sa pagpatay kanako, busa iyang kinabuhi o akoa.’ O tingali sa mahakogon siya nakapangatarongan: ‘Sanglit gidihogan ako ni Samuel nga mahimong umaabot nga hari sa Israel, tingali mao ra usab unyay dangatan niini sa ulahi. Nganong dili na lang karon?’ Dili, mapailobong naghulat si David hangtod nga panahon na ni Jehova sa paghatag kaniya sa gingharian. (1 Samuel 24:1-22; 26:1-25) Apan, ikasubong isulti, tapos nga nahimong hari si David, sa duha ka okasyon iyang giabusohan ang iyang gahom: sa pagpahinabo sa kamatayon ni Uria ug sa pag-ihap sa kasundalohan sa Israel.—2 Samuel 11:15; 24:2-4, 12-14.
17. Sa unsang paagi gipakita ni Pablo nga dili siya hakog ni wala niya abusohi ang iyang gahom?
17 Taliwala sa mga sumusunod ni Jesu-Kristo, si apostol Pablo naghatag maayong panig-ingnan niining bahina. Makahimo siya sa pagpangayog sustento sa mga kongregasyon sa iyang gialagaran. Apan, wala niya pahimusli kini. Iyang gisultihan ang mga ansiano sa Efeso: “Wala akoy gikaibgan nga salapi ni bisan kinsa o bulawan o bisti. Kamo gayod nasayod nga kining mga kamota ang mialagad sa akong mga panginahanglan ug sa akong mga kauban.” (Buhat 20:33, 34) Sa nagsulat sa kongregasyon sa Corinto, mas maugdang nga mipahayag ang apostol bahin ning puntoha. (1 Corinto 9:1-18) May katungod siya sa dili pagtrabaho, kay kinsa bang sundaloha ang moalagad nga mao ray magagasto alang sa iyang kaugalingon? Dili ba miingon si Moises nga ayaw pagbusali ang baba sa baka nga nagagiok? “Apan,” si Pablo miingon, “Wala gayod ako magpahimulos bisan usa niining mga taganaha.” Unsay iyang ganti? “Nga sa akong pagwali sa maayong balita nga ikahatag ko nga walay bayad, aron dili ko kapahimuslan ang akong awtoridad sa maayong balita.”
18. (a) Unsay atong pagbati bahin sa maayong paggamit ni Jehova sa gahom? (b) Nganong kadtong nagasundog kaniya ning bahina ikaingon nga malipayon?
18 Tinuod nga kini ang ikaingon, ‘Malipayon kadtong tanang wala magaabuso sa ilang gahom.’ Unsa ka halandong ngalan ang nabatonan ni Jehova nga Diyos tungod sa paghatag ning maayong panig-ingnan, sa pagtugot sa iyang dakong gahom sa tanang panahon nga matimbang pinaagi sa iyang ubang mga hiyas sa kaalam, hustisya, ug gugma! Busa, kita, makaingon duyog kang salmistang David: “Bulahan si Jehova, Oh kalag ko, ug ang tanan nga ania sa sulod nako, ang iyang balaang ngalan.” (Salmo 103:1) Ang tanang misunod sa panig-ingnan ni Jehova sa hustong paggamit sa gahom tinuod nga malipayon. Ang mga panig-ingnan nga atong natagad gikan sa Kasulatan nagpamatuod nga bisag dili kita hingpit nga mga tawo, kita, usab, makagamit sa hustong paagi sa gahom nga atong nabatonan. Sa pagbuhat niini, kita makabaton dili lamang usa ka mahinlong konsensiya kondili pag-uyon usab sa Diyos ug pagtahod sa atong isigkatawo.
Makahinumdom Ka Ba?
◻ Nganong kinahanglan ang tambag bahin sa pag-abuso sa gahom?
◻ Unsang mga panig-ingnan ang nagpakita nga gigamit ni Jehova nga Diyos ang iyang gahom sa hustong paagi?
◻ Nganong ikaingon nga mabinantayon si Jesus sa dili pag-abuso sa gahom?
◻ Kinsa sa Hebreohanong Kasulatan nga nagpadayag nga wala nila abusohi ang gahom?
◻ Sa unsang paagi gipakita ni apostol Pablo ang iyang kaugalingon nga sulondan sa paggamit sa gahom?
[Hulagway sa panid 9]
Ang dagkong mga hiyas ni Jehova hingpit nga pagkatimbang
Gugma Gahom Hustisya Kaalam
[Mga Letrato sa panid 10]
Ang Diyos makataronganong nakapakita sa iyang gahom:
pinaagi sa Lunop
sa Sodoma ug Gomorra
sa Pulang Dagat