Duna Ka bay Anghel dela Guwardiya?

Ang Bibliya wala magtudlo nga ang matag tawo dunay anghel dela guwardiya. Tinuod nga si Jesus miingon: “Dili ninyo tamayon ang usa niining mga gagmay [mga disipulo ni Kristo]; kay sultihan ko kamo nga ang ilang mga manulonda sa langit kanunayng makakita sa nawong sa akong Amahan nga anaa sa langit.” (Mateo 18:10) Pero kini wala magpasabot nga ang matag tawo dunay anghel dela guwardiya. Gusto lang ipasabot ni Jesus nga ang mga anghel interesado sa matag usa sa iyang mga disipulo. Busa, dili ipameligro sa matuod nga mga magsisimba ang ilang kinabuhi sa pagtuo nga panalipdan sila sa mga anghel sa Diyos.

Nagpasabot ba kana nga ang mga anghel dili motabang sa mga tawo? Wala. (Salmo 91:11) Ang uban nagtuo nga sila napanalipdan ug natabangan sa Diyos pinaagig anghel. Si Kenneth, nga gihisgotan sa sinugdanan sa artikulo, nagtuo usab niana. Dili ta makaseguro, pero tingalig husto siya. Ang mga Saksi ni Jehova kanunayng makaeksperyensiya sa tabang sa mga anghel diha sa ilang pagsangyaw. Apan kay dili man makita ang mga anghel, dili nato maseguro kon asa kutob sila gamiton sa Diyos sa pagtabang sa mga tawo. Busa angay lang nga atong pasalamatan ang Labing Makagagahom sa bisan unsang tabang nga iyang ihatag kanato.​—Colosas 3:15; Santiago 1:17, 18.