Si Jesu-Kristo nagtudlog importanteng mga prinsipyo bahin sa kaminyoon. Pananglitan, siya miingon: “‘Ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’ . . . Busa, kon unsay gihiusa pagyugo sa Diyos ayaw ipabulag ni bisan kinsang tawo.” (Mateo 19:5, 6) Dinhi, dunay duha ka importanteng prinsipyo.

“KON UNSAY GIHIUSA PAGYUGO SA DIYOS.” Ang kaminyoon maoy sagradong panaghiusa. Kon ingon ana ang panglantaw sa magtiayon, maningkamot sila nga palig-onon ang ilang kaminyoon. Dili sila mangitag paagi aron magbulag kon dunay mga problema. Ang ilang gugma lig-on ug malahutayon. Kana nga gugma “moantos sa tanang butang,” nga makatabang sa pagsulbad sa mga problema aron molampos ang kaminyoon.