Kinabuhi ug Ministeryo ni Jesus

Sambingay Mahitungod sa Kombira sa Kasal

PINAAGI sa duha ka sambingay, giyagyag ni Jesus ang mga eskriba ug ang pangulong mga saserdote, ug nagtinguha sila sa pagpatay kaniya. Apan si Jesus wala pa matapos kanila. Siya mipadayon sa pagsulti kanila ug lain pa nga sambingay, nga nagaingon:

“Ang gingharian sa langit sama sa usa ka hari nga naghimog kombira sa kasal alang sa iyang anak nga lalaki. Ug nagsugo siya sa iyang mga sulogoon sa pagtawag sa mga dinapit sa kombira sa kasal, apan nanagdumili sila sa pagtambong.”

Si Jehova nga Diyos mao ang Hari nga nag-andam sa kombira sa kasal alang sa iyang Anak, si Jesu-Kristo. Sa ulahi, ang iyang pangasaw-onon nga 144,000 ka dinihogang mga sumusunod mahiusa uban kaniya sa langit. Ang mga ginsakpan sa Hari mao ang mga tawo sa Israel, kinsa, sa dihang gidala ngadto sa Balaod sa pakigtugon sa 1513 W.K.P., nakadawat ug higayon nga mahimong “usa ka gingharian sa mga saserdote.” Busa, niadtong okasyona, sila ang unang gidapit sa kombira sa kasal.

Apan, ang unang pagpanawag ug mga dinapit wala moadto hangtod sa tinghunlak sa 29 K.P., sa dihang si Jesus ug ang iyang mga disipulo (ang mga sulogoon sa hari) misugod sa ilang buluhaton sa pagsangyaw sa Gingharian. Apan ang kinaiyanhong mga Israelitas nga maoy nakadawat niining pagpanawag nga gihimo sa mga sulogoon gikan sa 29 K.P. ngadto sa 33 K.P., dili gustong moadto. Busa gihatagan sa Diyos ang nasod sa mga dinapit ug laing higayon, sama sa giasoy ni Jesus:

“Ug nagpaadto na usab siya ug uban pang mga sulogoon, nga nagaingon, ‘Ingna ang mga dinapit: “Tan-awa! nahikay ko na ang akong kombira, naihaw na ang akong mga baka ug ang akong mga hayop nga pinatambok, ug andam na ang tanan. Pangadto na kamo sa kombira.”’” Kining ikaduha ug kataposang pagpanawag alang niadtong mga dinapit nagsugod sa Pentekostes 33 K.P., sa dihang gibubo ang balaang espiritu diha sa mga sumusunod ni Jesus. Kini maong pagpanawag nagpadayon hangtod sa 36 K.P.

Ang kinabag-an sa mga Israelitas, hinunoa, mibalibad usab niini nga panawag. “Nanglakaw hinoon sila,” miingon si Jesus, “ang usa paingon sa iyang uma, lain paingon sa iyang patigayon; samtang ang nahibilin, nanagdakop sa iyang mga sulogoon, ug ilang gipangdagmalan ug gipapatay sila.” “Apan,” si Jesus mipadayon, “ang hari nasuko, ug iyang gipadala ang iyang mga kasundolhan ug gisunog ang ilang siyudad.” Kini nahitabo sa 70 K.P., sa dihang gisunog sa mga Romanhon ang Jerusalem, ug kini nga mga mamumuno gipamatay.

Unya giasoy ni Jesus ang nahitabo sa kasamtangan: “Unya [ang hari] miingon sa iyang mga sulogoon, ‘Andam na gayod ang kombira sa kasal, apan dili takos kadtong mga dinapit. Busa pangadto hinoon kamo sa kadalanan paingon sa gawas sa siyudad, ug bisan kinsay inyong ikahibalag didto dapita ninyo sila sa kombira.’” Gihimo kini sa mga sulogoon, ug “ang lawak nga himoan sa seremonya sa kasal napuno sa mga tawo nga nanagsandig sa lamisa.”

Kining buluhaton sa pagtigom sa mga dinapit gikan sa kadalanan paingon sa gawas sa siyudad sa mga dinapit nagsugod sa 36 K.P. Ang Romanhong opisyal sa kasundalohan si Cornelio ug ang iyang pamilya mao ang una sa mga dili-sirkunsadong mga dili-Hudiyo ang gitigom. Ang pagtigom niining mga dili-Hudiyo, tanan maoy kapuli niadtong mibalibad sa panawag, nagpadayon hangtod niining ika-20ng siglo.

Sa panahon sa ika-20ng siglo nga napuno ang lawak nga himoan sa seremonya sa kasal. Unya si Jesus miasoy kon unsay nahitabo, nga nagaingon: “Ug sa pag-abot sa hari sa pagsusi sa mga dinapit nakita niya didto ang usa ka tawo nga wala magsul-ob ug besti alang sa kombira sa kasal. Busa siya miingon kaniya, ‘Migo, naunsa ba nga misulod ka man dinhi nga wala magsul-ob ug besti sa kasal?’ Ug ang tawo wala makatingog. Unya ang hari miingon sa iyang mga sulogoon, ‘Gaposa ninyo siya sa tiil ug kamot ug ilabay ninyo siya ngadto sa kangitngit sa guwa. Diin didto siya mohilak ug mokagot sa iyang mga ngipon.’”

Ang tawo nga walay besti sa kasal naglarawan sa mini nga mga Kristohanon sa Kakristiyanohan. Kini nga mga Diyos wala gayod ilha nga nakabaton sa tukmang identipikasyon isip espirituwal nga mga Israelitas. Wala gayod sila dihogi sa Diyos sa balaang espiritu ingong mga manununod sa Gingharian. Busa gilabay sila sa guwa ngadto sa kangitngit diin didto sila mag-antos sa kalaglagan.

Gitapos ni Jesus kini nga sambingay pinaagi sa pag-ingon: “Kay daghan ang gipanawag, apan diyutay ra ang pagapilion.” Oo, daghan ang gidapit sa nasod sa Israel aron mahimong sakop sa pangasaw-onon ni Kristo, apan diyutay lamang sa kinaiyanhong mga Israelitas ang gipili. Ang kadaghanan sa 144,000 ka dinapit nga nakadawat sa langitnong ganti nakita nga mao ang mga dili-Israelitas. Mateo 22:1-14; Exodo 19:1-6; Pinadayag 14:1-3.

◆ Kinsa ang unang gidapit sa kombira sa kasal, ug kanus-a sila gidapit?

◆ Kanus-a misugod ang unang pagpanawag sa mga dinapit, ug kinsa ang mga sulogoon nga gisugo sa pagpanapit?

◆ Kanus-a gisugdan ang ikaduhang pagpanawag, ug kinsa sa ulahi ang gidapit?

◆ Kinsay gilarawanan sa tawo nga walay besti sa kasal?

◆ Kinsa kadtong daghan nga gipanawag, ug ang diyutay nga gipili?