Pagsalig Diha sa Dili-Hingpit nga Kalibotan

“ANG maayo nga buot ko wala ko buhata, apan ang daotan nga dili ko buot mao ang akong ginabuhat.” Nakaplagan mo bang tinuod kini sa imong bahin? Madasig sa pagkasayod nga si apostol Pablo may samang suliran; apan siya usa ka tawo sa talagsaong Kristohanong integridad. Dili ba kini panagsumpaki? Sa iyang sulat sa mga Kristohanon sa Roma, si Pablo nagsusi sa suliran: “Kon, karon, ang dili ko buot mao ang akong ginabuhat, ang usang nagahimo niining malampos dili na ako, apan ang sala nga nagapuyo kanako.” Unsang salaa ang iyang gipunting, ug giunsa niya pagbuntog kana aron mahimong usa ka tawo sa integridad?​—Roma 7:​19, 20.

Sayosayo sa iyang sulat, si Pablo misulat: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.” Ang “usa ka tawo” mao si Adan. (Roma 5:​12, 14) Ang Adanikong sala​—ang sala sa unang tawo, si Adan​—mao ang hinungdan sa napanunod nga mga pagkadili-hingpit sa tawhanong rasa ug ang nagpaluyong rason kon nganong ang paghupot sa integridad maoy usa ka tinuod nga hagit.

Ang panglantaw ni Pablo sa “orihinal nga sala,” ingon sa pagtawag niana sa una, dili kaylap nga gidawat karong adlawa tungod kay ang asoy sa Bibliya sa kalalangan gisalikway sa teolohikanhong pagtuon pabor sa mga teoriya sa ebolusyon. “Ang mga eskolar nagsalikway sa tibuok asoy” sumala pa sa usa ka modernong komentaryo sa Roma 5:​12-​14. Apan usa ka gatos ka tuig kanhi, ang mga komentaryo sa Bibliya kanunayng nagsaysay nga “sa dihang si Adan nakasala . . . gimansahan niya nianang salaa ug sa mga resulta niini ang tanan niyang kaliwat.”a

Unang Pagkawala sa Integridad

Sama nga ang paglungtad ni Adan, ang unang tawo, gipanghimakak sa daghan karong adlawa, mao usab si Satanas, ang Yawa, gisalindot ingong mitolohiya.b Apan ang labawng awtoridad nga si Jesu-Kristo nag-ingon kanato nga kining usa wala “mobarog nga lig-on diha sa kamatuoran,” sa laing pagkasulti, siya dili kasaligan. (Juan 8:​44) Ug maoy sa pagsulsol ni Satanas nga si Adan ug ang iyang asawa, si Eva, mirebelde batok kang Jehova ug nagbungkag sa ilang integridad ubos sa pagsulay.​—Genesis 3:​1-​19.

Sanglit kitang tanan naggikan kang Adan, kitang tanan nakapanunod sa kiling sa pagpakasala. Ang maalamong tawong si Solomon miingon: “Walay tawong matarong sa yuta nga padayong nagabuhat ug maayo ug dili makasala.” (Ecclesiastes 7:20) Sa gihapon, ang bisan kinsang tawo mahimong kasaligan. Sa unsang paagi kini posible? Sanglit dili kinahanglang hingpit ang usa ka tawo aron mahuptan ang integridad.

Ang Pasikaranan sa Integridad

Si Haring David sa Israel nakahimog daghang sayop, lakip na ang iyang dokumentado-kaayong mapanapawong relasyon uban kang Batseba. (2 Samuel 11:​1-​27) Ang daghang kapakyasan ni David nagsilbi aron ipasiugda nga siya dili gayod hingpit. Apan, unsa may nakita ni Jehova diha kaniya? Nga nakigsulti sa anak ni David, si Solomon, si Jehova miingon: “Lakaw sa akong atubangan, sama sa paglakaw ni David nga imong amahan, uban ang integridad sa kasingkasing ug uban ang katul-id.” (1 Hari 9:4) Luyo sa iyang daghang kasaypanan, ang pasukaranang pagkakasaligan ni David giila ni Jehova. Ngano?

Gihatag ni David ang tubag sa dihang iyang giingnan si Solomon: “Si Jehova nagasusi sa tanang kasingkasing, ug nakasabot sa matag kiling sa mga hunahuna.” (1 Cronicas 28:9) Si David nakahimog mga kasaypanan, apan siya mapainubsanon, ug siya buot nga mobuhat kon unsay matarong. Kanunay niyang gidawat ang pagbadlong ug pagtul-id​—oo, iyang gipangayo kana. “Susiha ako, Oh Jehova, ug ibutang ako sa pagsulay; putlia ang akong mga rinyon ug ang akong kasingkasing” mao ang iyang hangyo. (Salmo 26:2) Ug si David naputli gayod. Ang mga pagpig-ot gumikan sa iyang sala kang Batseba, pananglitan, mipadayon hangtod sa kataposan sa iyang kinabuhi. Sa gihapon, wala gayod sulayi ni David pagpakamatarong ang iyang kasal-anan. (2 Samuel 12:​1-​12) Mas hinungdanon, wala gayod siya mobiya sa putling pagsimba. Tungod niining katarongana, ug tungod sa tiunay, kinasingkasing nga pagbasol ug paghinulsol ni David, si Jehova andam sa pagpasaylo sa iyang mga sala ug nagdawat kaniya ingong tawo sa integridad.​—Tan-awa usab ang Salmo 51.

Kasaligan Ilalom sa Pagsulay

Gisulayan si Jesus ni Satanas nga Yawa sa paningkamot nga bungkagon ang iyang integridad. Kinahanglang huptan niya ang iyang integridad latas sa mga kalisdanan ug pag-antos, nga lahi kang Adan, kansang pagkamasinugtanon ingong usa ka hingpit nga tawo nasulayan lamang pinaagi sa pagsugo kaniya nga mosunod sa balaang balaod. Dugang pa, si Jesus napig-otan sa pagkasayod nga nagdepende sa iyang integridad ang katubsanan sa tawhanong pamilya.​—Hebreohanon 5:​8, 9.

Si Satanas, nga determinado sa pagbungkag sa integridad ni Jesus, miduol kaniya sa dihang si Jesus anaa sa iyang kinaluyahang kahimtang​—human siya mogugol ug 40 ka adlaw sa pagpamalandong ug pagpuasa didto sa kamingawan. Tulo ka higayon nga iyang gitental si Jesus​—himoong tinapay ang mga bato; molukso sa ibabawng bahin sa paril sa templo, nagpasalig nga ang manulondaong pagpangilabot magluwas kaniya ug sa ingon maghatag ug milagrosong ilhanan sa pagpamatuod sa iyang pagka-Mesiyas; ug sa pagdawat ug pagmando sa tanang gingharian niining kalibotana isip baylo sa usa lamang ka “buhat sa pagsimba” ngadto kang Satanas. Apan gisalikway ni Jesus ang matag tentasyon, nga naghupot sa iyang integridad kang Jehova.​—Mateo 4:​1-​11; Lucas 4:​1-​13.

Ang Integridad ni Job

Ang pagbarog ni Job, nga naghupot sa iyang integridad ilalom sa pagsulay, ilado kaayo. Makapainteres, si Job wala makasabot kon nganong ang katalagman midangat kaniya. Wala siya masayod nga si Satanas nagpasangil ug sayop nga mga motibo nganha kaniya, namasangil nga si Job nag-alagad sa Diyos tungod sa hakog nga mga rason ug nangangkon nga aron maluwas ang iyang kaugalingong kinabuhi, si Job andam sa pagbungkag sa iyang integridad. Gitugotan sa Diyos nga si Job makaagom sa pila ka labing masulayong mga kasinatian aron ipakita nga si Satanas sayop.​—Job 1:​6-​12; 2:​1-8.

Ang tulo ka mini nga mga higala miapil usab. Sila sa tinuyo sayop nga nagrepresentar sa mga sukdanan ug mga katuyoan sa Diyos. Bisan ang asawa ni Job, nga wala usab makasabot sa isyu, napakyas sa pagdasig sa iyang bana sa iyang panahon sa grabeng panginahanglan. (Job 2:​9-​13) Apan si Job mibarog nga lig-on. “Hangtod ako mamatay dili ko gayod isalikway ang akong integridad gikan kanako! Ang akong pagkamatarong akong pagahuptan, ug dili ko kini buhian; ang akong kasingkasing dili magatamay kanako bisan hain sa akong mga adlaw.”​—Job 27:​5, 6.

Ang talagsaong panig-ingnan ni Job, duyog sa integridad sa daghang matinumanong mga lalaki ug babaye, ingon sa gitala sa Bibliya, nagpamatuod nga si Satanas usa ka bakakon.

Integridad ug ang Kristohanong Ministeryo

Ang integridad ba maoy hiyas nga gitamod ni Jehova alang lamang sa iyang kaugalingong katagbawan? Dili. Ang integridad adunay kinaiyanhong bili alang kanatong mga tawo. Maoy alang sa atong kaayohan nga si Jesus nagpahimangno kanato sa ‘paghigugma kang Jehova nga atong Diyos sa atong tibuok nga kasingkasing ug sa atong tibuok nga kalag ug sa atong tibuok nga hunahuna.’ Sa pagkatinuod, kini mao “ang kinadak-an ug unang sugo,” ug nanginahanglan kinig usa ka lalaki, babaye, o bata sa integridad aron tumanon kini. (Mateo 22:​36-38) Unsay nalangkit niini, ug unsay mga ganti?

Ang usa ka tawo sa integridad kasaligan, dili lamang sa iyang isigkatawo apan, ilabina, sa Diyos. Ang kaputli sa iyang kasingkasing makita diha sa iyang mga binuhatan; nahigawas siya sa pagkasalingkapaw. Dili siya malipoton o dunot. Gipamulong kini ni apostol Pablo niining paagiha: “Kami mibiya na sa sinuwitik nga mga butang nga angayng ikaulaw, wala magalakaw pinaagig lipatlipat, ni nagasambog sa pulong sa Diyos, apan pinaagi sa paghimong dayag sa kamatuoran nagarekomendar sa among kaugalingon ngadto sa matag tawhanong tanlag diha sa panan-aw sa Diyos.”​—2 Corinto 4:2.

Matikdi nga gihisgotan ni Pablo ang mga tinamdan maylabot sa Kristohanong ministeryo. Unsaon man sa usa ka Kristohanong ministro sa pag-alagad sa uban kon ang iyang binuhatan dili putli, kon siya dili tawo sa integridad? Ang pangulo sa usa ka relihiyosong orden sa Irlandia kinsa miretiro di pa dugay nag-ilustrar pag-ayo niining puntoha. Iyang giangkon nga iyang “gitugotan ang usa ka pedopilyang pari nga mopadayon sa pagtrabaho uban sa mga bata dugay pa human nga ang iyang pang-abuso sa bata nayagyag,” sumala pa sa mantalaan nga The Independent. Ang asoy nagsaysay nga ang pang-abuso milungtad ug kapin sa 24 ka tuig. Napriso ang pari ug upat ka tuig, apan hunahunaa ang pag-antos nga gipahamtang sa mga bata nga iyang giamong-amongan sulod sa maong mga tuig tungod kay ang iyang superyor nakulangan sa moral nga integridad sa paglihok!

Integridad​—Ang mga Ganti

Usa ka isog nga tawo si apostol Juan. Gumikan sa ilang mainitong kasibot, si Jesus nagtawag kaniya ug sa iyang igsoong si Santiago nga “Mga Anak sa Dalugdog.” (Marcos 3:17) Usa ka tawo sa talagsaong integridad, si Juan, duyog kang Pedro, misaysay ngadto sa Hudiyohanong mga magmamando nga siya ‘dili makahunong sa pagsulti’ bahin sa mga butang nga iyang nakita ug nadungog samtang siya uban pa kang Jesus. Usa usab si Juan sa mga apostol nga miingon: “Kinahanglang among sugton ang Diyos ingong magmamando inay kay sa mga tawo.”​—Buhat 4:​19, 20; 5:​27-32.

Maorag sa dihang si Juan hapit nang mag-edad ug 100 anyos, siya gidestiyero sa Isla sa Patmos “tungod sa pagpamulong bahin sa Diyos ug sa pagpanaksi bahin kang Jesus.” (Pinadayag 1:9) Sa iyang edad, siya tingali naghunahuna nga ang iyang ministeryo natapos na. Apan ang usa ka tawo lamang nga may integridad nga sama kaniya ang masaligan sa asaynment sa pagsulat sa kulbahinam nga panan-awon sa Pinadayag. Niini, si Juan matinumanon. Pagkadakong pribilehiyo kadto alang kaniya! Ug duna pay dugang nga moabot. Sa ulahi, dayag nga sa palibot sa Efeso, gisulat niya ang iyang asoy sa Ebanghelyo ug tulo ka sulat. Pagkadakong mga pribilehiyo nga malampos ang 70 ka tuig sa matinumanon, kasaligan nga pag-alagad!

Ang pagkahimong usa ka tawo sa integridad sa kinatibuk-ang paagi nagahatag ug halalom nga katagbawan. Ang pagkakasaligan sa panan-aw sa Diyos magdalag walay kataposang mga ganti. Karong adlawa, ang “usa ka dakong panon” sa matuod nga mga magsisimba ginaandam aron mosulod sa bag-ong kalibotan sa pakigdait ug kahusay, uban ang palaaboton nga kinabuhing walay kataposan. (Pinadayag 7:9) Ang integridad sa hinungdanong mga butang sa moralidad ug pagsimba kinahanglang ituboy, luyo sa mga pagsulay niining sistemaha sa mga butang ug sa daghang kakulian nga ikapahamtang ni Satanas. Magmasaligon nga sa gahom nga ihatag ni Jehova, ikaw magmalamposon!​—Filipos 4:13.

Sa paghisgot sa presente ug sa umaabot, ang salmistang David nagpasalig pag-usab kanatong tanan sa dihang siya miingon, diha sa pag-ampo sa pagpasalamat kang Jehova: “Alang kanako, tungod sa akong integridad ikaw nagabayaw kanako, ug ikaw magpahiluna kanako sa imong atubangan sa panahong walay tino. Bulahan si Jehova . . . Amen ug Amen.”​—Salmo 41:​12, 13.

[Mga footnote]

[Hulagway sa panid 4]

Bisan pa sa iyang mga kasaypanan, si David napamatud-ang takos sa pagsalig

[Hulagway sa panid 5]

Si Jesus nagbilin kanato sa labing maayong panig-ingnan sa pagkakasaligan

[Hulagway sa panid 7]

Ang pagkakasaligan nagadalag dakong katagbawan