Gikan sa Among mga Magbabasa

Bakasyon Diha sa Balay Ang inyong artikulo (Hunyo 22, 1990) daw gisulat alang ra gayod kanako. Ang tanang mga rekomendasyon maayo kaayo, sama sa pagtrabaho duyog sa uban, pagtrabaho diha sa balay, pagpatahom sa akong kuwarto, pagduaw sa lokal nga mga dapit nga matahom, ug sa pagbasa sa Bibliya. Sanglit nag-eskuyla pa man ako, may bakasyon ako nga pito ka semana karong ting-init. Salamat sa inyong tabang, akong ipalabay kining panahona sa maalamong paagi.

M. K., Pederal nga Republika sa Alemanya

Bugno sa Turo Ang inyong artikulo bahin sa bugno sa turo (Hulyo 8, 1990) makapukaw sa pagtagad. Ang kadaghanang batan-on sa Espanya mas gustong moadto sa dula sa soccer kay sa pagtan-awg kaguliyang, apan ang mga ahente sa pagbiyahe moinsister sa pagpaadto sa mga turista ngadto sa bugno sa turo. Ang ang-ang sa bugno, sa dihang modasdas ang mga toreador sa turo, mas mabangis pa kay sa inyong gihubit, kay ang mga kabayong gamiton kasagaran man nga masamdan.

C. M., Pederal nga Republika sa Alemanya

Pranses nga Rebolusyon Salamat sa inyong artikulo bahin sa Pranses nga Rebolusyon. (Disyembre 22, 1989) Sanglit usa ka Amerikano nga Pranses ug kaliwat, akong nakita ang artikulo nga impormatibo ug makaiikag kaayo. Giapresyar ko ang nagkalainlaing mga artikulo nga nagagula sa Pagmata!

J. F. S., Tinipong Bansa

Lupus Nagmasakiton ako hapit unom ka bulan, ug ang mga doktor wala mahibalo kon unsay deperensiya kanako. Apan pila ka adlaw human nakabasa sa inyong artikulo bahin sa lupus (Mayo 8, 1990), ang paghiling nagkompirmar nga ako adunay lupus usab. Kon dili pa niining artikuloha, wala gayod unta akoy hibangkaagan kon unsay giingon sa mga doktor. Sanglit may nahibaloan akog diyutay bahin sa sakit, nakabangon akog mga pangutana nga dili unta nako mapangutana. Salamat kaayo kaninyo sa paghatag kanakog kadan-agan.

K. S., Inglaterra

Mga Dinosaur Ingong usa ka arkeologo ug geolohista, nalingaw kaayo ako sa mga artikulo sa Pagmata! mahitungod sa mga dinosaur. (Pebrero 8, 1990) Maylabot sa panahon sa ilang pagkawagtang, ang mga artikulo nag-ingon nga ang tawhanong mga fossil anaa diha sa mga sapaw nga bato nga ibabaw nianang nahimutangan sa mga fossil sa dinosaur ug nga adunay mga sapaw nga bato sa taliwala niini. Diha sa kadaghanang bahin sa kalibotan, kining napatunga nga mga sapaw nga bato, o strata, adunay mga fossil usab. Daghang bag-ong mga klase, o mga matang, sa mga mananap makita niining mga sapawa, sama sa mga elepante, espadahog-ngipong mga iring, ug daghang mga klase sa dili-makalupad dumadagan nga mga langgam. Kini kusganong nagsugyot nga ang Diyos padayong naglalang ug bag-ong mga mananap human nga nangawagtang ang mga dinosaur ug nga ang mga dinosaur nangawagtang sa panahon sa ikaunom nga yugto sa paglalang.

G. S., Canada

Ang Bibliya wala maghisgot ug panahon sa paglalang man o sa pagkawagtang sa mga dinosaur. Bisan pa niana, ang mga komento ni G. S., makaiikag.​—ED.

Pagkinabuhi Uban sa Patol Mahitungod sa patol (Hunyo 22, 1990), akong nakita nga daghan ang wala makasabot niana. Sultihan ako sa mga tawo nga tunlon ko ang akong dila, apan ang mga doktor nag-ingon nga kini sa pisikal imposible. Gisultihan usab ako nga giyawaan ako tungod nianang gipamulong sa Bibliya diha sa Mateo 4:24. Tungod sa pagpihig, ang mga tawo nagadumili sa pagtugot sa mga patolon sa pagbuhat ug pila ka mga butang. Apan sa pagkamatuod, diyutay ra kaayong mga butang ang imposible alang kanamo.

V. E., Australia

Dakong sayop nga pagsabot ang nahimo mahitungod sa Mateo 4:​24, nga naghinugilon mahitungod sa pag-ayo ni Jesus sa “mga tawong giyawaan ug patolon ug paralitiko.” Hinunoa, ang mainampingong pagbasa sa konteksto mopakita nga ang Bibliya sa pagkamatuod nagpadayag ug kalainan tali sa giyawaan ug sa pisikal nga mga sakit, sama sa patol.​—ED.