Kinabuhi ug Ministeryo ni Jesus

Ang Labing Bantogang Wali nga Gikahatag Sukad

ANG esena mao ang usa sa labing halandomon sa kasaysayan sa Bibliya: Si Jesus naglingkod sa daplin sa bukid, nga nagpahayag sa iyang bantogang Wali sa Bukid. Duol sa Dagat sa Galilea ang lugar, tingali kanait sa Capernaum. Tibuok gabiing nag-ampo si Jesus sa Diyos, ug sa pagkasunod buntag mipili siyag 12 sa iyang mga tinun-an nga mahimong mga apostoles. Dayon, uban kanilang tanan, milugsong siya ning patag nga dapit sa bukid.

Sa pagkakaron, imong mahanduraw, nga kapoy na kaayo si Jesus ug gusto nang matulog. Apan miabot ang dakong panon sa katawhan, ang uban gikan pa sa Judea ug Jerusalem, 60 ngadto sa 70 ka milya (100 ngadto sa 110 km) ang kalay-on. Ang uban gikan pa sa kabaybayonan sa Tyre ug Sidon sa amihanan. Sila nangabot sa pagpamati kang Jesus ug mapaayo sa ilang mga sakit. Gani duna pay mga tawo nga gisamok sa daotang mga espiritu.

Sa milugsong si Jesus, miduol kaniya ang mga tawong masakiton aron makahikap kaniya, ug iyang giayo silang tanan. Tapos niadto, mitungas si Jesus sa mas taas nga dapit sa bukid. Didto milingkod siya ug misugod sa pagpanudlo sa panon sa katawhan nga nagkatag sa patag nga dapit sa iyang atubangan. Ug hunahuna lang kana! Karon wala nay bisan usa ka tawo sa enterong tumatambong ang nag-antos sa grabeng balatian!

Ang mga tawo naghinamhinam sa pagpamati sa magtutudlo nga naghimo ning katingalahang mga milagro. Apan, si Jesus mihatag sa iyang wali alang sa kaayohan sa iyang mga disipulo, nga tingali nagpundok duol kaniya. Aron makapahimulos usab kita, gitala kini ni Mateo ug Lucas.

Ang asoy ni Mateo sa wali maoy mga upat ka pilo nga mas taas kay sa kang Lucas. Dugang pa, ang mga bahin nga girekord ni Mateo, gipadayag ni Lucas nga gipamulong ni Jesus sa laing higayon sa yugto sa iyang ministeryo, sumala sa makita kon itandi ang Mateo 6:9-13 sa Lucas 11:1-4, ug ang Mateo 6:25-34 sa Lucas 12:22-31. Apan dili kini katingalahan. Dayag nga gitudlo ni Jesus kining butanga sa makadaghan, ug mipili si Lucas sa pagtala sa pipila ning mga pagtulon-ana sa lahi nga esena.

Ang nakapahimong bililhon sa wali ni Jesus dili lamang ang diwa sa espirituwal nga unod niini kondili sa pagkayano ug pagkatin-aw sa paagi sa iyang pagpadayag sa mga kamatuoran. Iyang gigamit ang ordinaryong mga kasinatian ug migamit ug mga butang nga pamilyar sa katawhan, busa nagpahimo sa iyang mga ideya nga daling masabtan sa tanang nagpangitag mas maayong kinabuhi sa paagi sa Diyos. Sa atong mosunod nga mga gula atong susihon ang pila sa mga butang nga iyang gipamulong. Lucas 6:12-20; Mateo 5:1, 2.

◆ Diin gipahayag ang halandomong wali ni Jesus, ug kinsa ang presente didto, ug unsay nahitabo una pa sa iyang paghatag niini?

◆ Nganong dili katingalahan nga nagrekord si Lucas sa pipila ka pagtulon-an sa lahi nga palibot?

◆ Unsay nakapahimong bililhon sa wali ni Jesus?