Paghatag ug Kahayag Bahin sa Presensiya ni Kristo
“Inig-abot sa Anak sa tawo diha sa iyang himaya, . . . iyang pagalainon ang mga tawo gikan sa usag usa.”—MATEO 25:31, 32.
1. Unsay paghubad sa klero sa Kakristiyanohan sa kahulogan sa mga pulong sa Mateo 24:3?
TULO ka adlaw una pa sa kamatayon ni Jesus, upat sa iyang mga tinun-an miduol kaniya ug maikagong misukot: “Tug-ani kami, kanus-a man mahitabo kining mga butanga? ug unsa man unya ang ilhanan sa imong pag-anhi [Grego, pa·rou·siʹa], ug sa pagkatapos sa kalibotan?” Sulod sa mga siglo ang klero ug mga magsusulat sa Kakristiyanohan nagsabot niining mga pulonga nga gitumong kang Jesus sa Mateo 24:3 (King James Version) nga nagkahulogang ang tanang tawo makakita kaniya pag-usab sa unod. Busa, sila nagtudlo nga ang pagbalik ni Kristo pagaduyogan sa dakong pasunding ug dayag nga kasadyaan. Ginganlan nila kini ingong ikaduhang pag-anhi ni Kristo. Apan husto ba ang ilang mga pangagpas?
2, 3. (a) Unsang kalainan ang gipahayag sa Tomo 2 sa Studies in the Scriptures tali sa mga pulong “pag-anhi” ug “presensiya”? (b) Unsay nasabtan sa katawhan ni Jehova mahitungod sa kahulogan sa pa·rou·siʹa ni Kristo?
2 Pagka 1889, ang mga dinihogan ni Jehova, ingong ika-19ng-siglong mga tigdala sa kahayag, nakadawat ug pagtul-id bahin sa pagbalik ni Kristo. Sa Tomo 2 sa Studies in the Scriptures, mga panid 158 ngadto sa 161, si Charles T. Russell, ang unang presidente sa Watch Tower Bible and Tract Society, misulat: “Ang parousia . . . nagkahulogang presensiya, ug angay dili pagahubarong pag-anhi, sumala sa anaa sa kasagarang Bibliya . . . Ang ‘Emphatic Diaglott,’ usa ka bililhon kaayong hubad sa Bag-ong Tugon, tukmang naghubad sa parousia, presensiya . . . , dili pag-anhi, ingon nga nagpadulong, kondili presensiya, maingon nga sa pagkaabot . . . [si Jesus] miingon, ‘Maingon sa mga adlaw ni Noe, mao usab unya ang parousia [presensiya] sa Anak sa tawo.’ Matikdi, ang pagtandi dili maoy tali sa pag-anhi ni Noe ug pag-anhi sa atong Ginoo . . . Ang pagtandi sa kalainan, diay, maoy tali sa panahon sa presensiya ni Noe taliwala sa katawhan ‘sa wala pa ang lunop,’ ug ang panahon sa presensiya ni Kristo sa kalibotan, sa iyang ikaduhang pag-anhi, ‘sa wala pa ang kalayo’—ang tumang kasamok sa Adlaw sa Ginoo [Jehova] nga pinaagi niana matapos kining panahona.”—Mateo 24:37.
3 Busa ang katawhan ni Jehova sa ika-19ng siglo tukmang nakasabot nga ang pa·rou·siʹa ni Kristo maoy dili makita. Sila nakasabot usab nga ang kataposan sa Hentil nga Kapanahonan mahitabo sa tinghunlak sa 1914. Samtang miuswag ang espirituwal nga kalamdagan, sila sa ulahi nakasabot nga si Jesu-Kristo naentrono na sa langit ingong Hari sa Gingharian nianang tuiga mismo, 1914.—Proverbio 4:18; Daniel 7:13, 14; Lucas 21:24; Pinadayag 11:15.
“Ang Presensiya sa Atong Ginoo”
4. “Ang presensiya sa atong Ginoong Jesu-Kristo” nagtumong sa unsa?
4 Nan, sa atong adlaw unsay kahulogan sa Biblikanhong ekspresyong “ang presensiya sa atong Ginoong Jesu-Kristo”? (1 Tesalonica 5:23) Usa ka awtoridad mikomento nga ang pulong “presensiya,” pa·rou·siʹa, “nahimong opisyal nga termino alang sa pagduaw sa usa ka tawong taas ug ranggo, ilabina ang pagduaw sa mga hari ug mga emperador sa usa ka probinsiya.” Busa ang maong ekspresyon nagtumong sa harianong presensiya sa Ginoong Jesu-Kristo ingong Hari, sukad ug human sa 1914, human sa iyang pagkaentrono sa langit. Siya presente nga dili makita aron ‘magmando taliwala sa iyang mga kaaway,’ nga aktibong nagamando ingong Hari sa pagtuman niining matagnaong sugo. (Salmo 110:2) Sulod sa mga 79 ka tuig, ang mga tawo sa yuta nasinati sa mga epekto sa dili-makitang harianong presensiya ni Kristo.
5. Unsang mga panghitabo panahon sa pa·rou·siʹa ang pagahisgotan sa tulo ka artikulong tun-anan niining magasina?
5 Niining serye sa tulo ka artikulo, atong sublion ang tagsaong ebidensiya sa mga nahimo sa Gingharian ni Kristo sulod niining yugtoa. Una, ipadayag namo ang ubay-ubayng mga tagna sa Bibliya nga nagtagna sa mga panghitabo nga nahitabo na o nagakahitabo pa karon. Ikaduha, among batbaton ang dakong buluhaton nga ginahimo sa matinumanon ug maalamong ulipong matang nga gigamit ni Jesus sulod niining tibuok yugto sa iyang harianong presensiya. (Mateo 24:45-47) Ang ikatulong artikulo maghubit alang kanato sa dakong konklusyon, ang yugto sa “dakong kasakitan.” Kini mao ang panahon nga moabot si Jesus ingong Tiglaglag ni Jehova aron sa paglaglag sa mga tawong dili matarong ug pagluwas sa mga matarong. (Mateo 24:21, 29-31) Kanang panahona sa paglaglag gibatbat ni apostol Pablo ingong magdala “alang kaninyo nga nagaantos sa kasakitan, ug kahupayan duyog kanamo sa pagpadayag ni Ginoong Jesus gikan sa langit uban sa iyang gamhanang mga manulonda sa nagdilaab nga kalayo, samtang iyang panimaslan kadtong wala makaila sa Diyos ug kadtong wala magsugot sa maayong balita mahitungod sa atong Ginoong Jesus.”—2 Tesalonica 1:7, 8.
Ang Ilhanan
6. Unsang daghag-bahin nga ilhanan ang gibatbat sa Mateo mga kapitulo 24 ug 25?
6 Napulog-siyam ka gatos ka tuig kanhi, ang tigdala-sa-kahayag nga mga tinun-an ni Jesus nangayo kaniyag usa ka ilhanan, o ebidensiya, bahin sa iyang umaabot nga presensiya nga may Gingharianong gahom. Ang iyang tubag, nga nahitala diha sa ika-24 ug ika-25ng mga kapitulo sa Mateo, mihatag sa daghag-bahing ilhanan, nga ang tanang bahin niana karon nagakatuman sa tibuok-kalibotang gidak-on. Ang pagkatuman sa maong ilhanan nagtimaan sa usa ka panahon sa kasakitan ug sa dakong pagsulay. Si Jesus mipasidaan: “Pagbantay nga walay magpahisalaag kaninyo; kay daghan ang moabot pinasukad sa akong ngalan, nga magaingon, ‘Ako mao ang Kristo,’ ug magpahisalaag sa daghan. Kamo makadungog sa mga gubat ug mga dinungogdungog sa mga gubat; tinoa nga dili kamo mangalisang. Kay kining mga butanga kinahanglang mahitabo, apan dili pa mao ang kataposan.”—Mateo 24:4-6.
7. Unsang mga bahin sa ilhanan ang nakita natong nangatuman sukad sa 1914?
7 Si Jesus dugang mitagna nga aduna unyay mga gubat sa walay-ingong gidak-on. Ingong katumanan, duha kanila giklasipikar ingong mga gubat sa kalibotan, ang usa gikan sa 1914 hangtod sa 1918 ug ang ikaduha gikan sa 1939 hangtod sa 1945. Dugang pa, siya miingon nga aduna unyay mga kanihit sa pagkaon ug mga linog sa sunodsunod nga dapit. Ang tinuod nga mga Kristohanon grabeng pagalutoson. Katumanan sa tagna, ang mga Saksi ni Jehova, ang modernong mga tigdala sa kahayag, nakaagom ug paglutos sulod sa nangaging walo ka dekada samtang nagwali sa maayong balita sa Gingharian sa Diyos “sa tibuok gipuy-ang yuta alang sa usa ka pamatuod sa tanang nasod.” (Mateo 24:7-14) Ang matag Yearbook of Jehovah’s Witnesses nagdugang ug ebidensiya nga kining mga bahina sa ilhanan nangatuman.
8, 9. (a) Unsay nalangkit sa harianong presensiya ni Jesus? (b) Unsay gipaila sa tagna ni Jesus mahitungod sa mini nga mga Kristo kon bahin sa dapit ug paagi sa iyang presensiya?
8 Sanglit ang paghari ni Jesus magsakop sa tibuok yuta, ang matuod nga pagsimba mokaylap sa tanang kontinente. Ang iyang harianong presensiya (pa·rou·siʹa) maoy usa ka panahon sa tibuok-yutang pagsusi. (1 Pedro 2:12) Apan aduna bay usa ka siyudad nga kaulohan, o sentro, diin si Jesus makonsulta? Gitubag kini ni Jesus pinaagi sa pagtagna nga sa pagpaabot sa iyang presensiya, ang mini nga mga Kristo motungha. Mipasidaan siya: “Kon ang katawhan magaingon kaninyo, ‘Tan-awa! Siya [Kristo] atua sa kamingawan,’ ayaw kamo pag-adto; ‘Tan-awa! Siya atua sa sulod nga mga lawak,’ ayaw kamo pagtuo niana. Kay maingon nga ang kidlat magakilab sa sidlakang mga bahin ug magdan-ag sa kasadpang mga bahin, mao man usab ang presensiya [pa·rou·siʹa] sa Anak sa tawo.”—Mateo 24:24, 26, 27.
9 Labaw kay kang bisan kinsa sa yuta, si Jesus, “ang Anak sa tawo,” nasayod kon diin siya mahimutang inigsugod na gayod sa iyang presensiya. Siya dili magpahimutang dinhi o didto o sa bisan haing tinong dapit sa yuta. Siya dili magpakita sa usa ka hilit nga dapit, “sa kamingawan,” aron kadtong mangita sa Mesiyas makakonsulta kaniya nga dili makita sa mga kagamhananong awtoridad sa nasod, usa ka dapit diin ang mga sumusunod mahimong bansayon ubos sa iyang pagpangulo, nga magaandam sa paghapak sa usa ka politikanhong hapak ug magpalingkod kaniya ingong Mesiyasnong Magmamando sa kalibotan. Dugang pa, siya dili magtago sa iyang kaugalingon diha sa “sulod nga mga lawak,” nga ang iyang nahimutangan nasayran sa pipila lang ka pinili, nga didto, nga dili makita ug dili himatikdan, siya makahimog sekretong mga plano kauban sa mga komplot sa pagpukan sa mga kagamhanan sa kalibotan ug magpadihog siya ingong sinaad nga Mesiyas. Dili!
10. Sa unsang paagi ang mga kidlat sa kamatuoran sa Bibliya mikilab sa tibuok yuta?
10 Sa kasukwahi, walay bisan unsang itago mahitungod sa pag-abot ni Jesus ingong Hari, sa sinugdanan sa iyang harianong presensiya. Sumala sa gitagna ni Jesus, ang mga kidlat sa kamatuoran sa Bibliya mopadayon sa pagkilab ibabaw sa haluag kaayong dapit gikan sa sidlakang mga bahin ngadto sa kasadpang mga bahin, sa tibuok kalibotan. Sa pagkatinuod, ingong mga modernong tigdala sa kahayag, ang mga Saksi ni Jehova nagpamatuod nga maoy “kahayag sa mga nasod, mao nga ang kaluwasan [ni Jehova] makaabot hangtod sa kinatumyan sa yuta.”—Isaias 49:6.
Kalihokan sa mga Manulonda
11. (a) Sa unsang paagi ang mga panon sa manulonda gigamit sa pagpadan-ag sa kahayag sa Gingharian? (b) Kanus-a ug ngadto sa unsang grupo nga ang mga membro sa trigo nga matang natigom?
11 Ang ubang mga teksto maylabot sa presensiya ni Jesus nagbatbat nga siya giubanan, o ‘nagpadala,’ sa mga panon sa manulonda. (Mateo 16:27; 24:31) Sa sambingay sa trigo ug sa mga bunglayon, si Jesus miingon nga “ang uma mao ang kalibotan” ug “ang pag-ani mao ang konklusyon sa usa ka sistema sa mga butang, ug ang mga mag-aani mao ang mga manulonda.” Hinuon, kini wala magkahulogan nga sulod sa iyang presensiya nga may Gingharianong gahom ug himaya, siya magagamit lamang ug mga mensaherong manulonda alang sa mga yutan-ong misyon. Sugod sa 1919, ang mga manulonda ubos sa pagdumala ni Jesus naglain sa matang nga trigo sa inanak-sa-espiritung mga dinihogan sa yuta, nga natibulaag tungod sa mga panghitabo sa Gubat sa Kalibotan I, ug sila giandam alang sa dugang buluhaton diha sa ngalan sa Hari. (Mateo 13:38-43) Sa katuigang 1920 linibo pang mga tawo ang mibarog dapig sa natukod nga Gingharian sa Diyos ug nadihogan sa espiritu sa Diyos. Kining mga dinihogana epektibong nadugang sa gidaghanon sa orihinal nga nahibilin. Sa tingob, sila maoy naglangkob sa matinumanon ug maalamong ulipong matang sa atong adlaw.
12. Sa unsang paghinlo nga ang mga manulonda miapil, ug unsay sangpotanan alang sa yuta?
12 Ang laing pananglitan sa pagpakigbahin sa mga manulonda sulod sa presensiya ni Jesus human sa pagkaentrono niya sa 1914 nahitala sa Pinadayag 12:7-9: “Si Miguel [Jesu-Kristo] ug ang iyang mga manulonda nakiggubat sa dragon, ug ang dragon ug ang iyang mga manulonda nakiggubat apan wala makadaog, ni may dapit pang nakaplagan alang kanila sa langit. Busa gitambog ang dakong dragon, ang unang bitin, ang usang gitawag Yawa ug Satanas, nga nagalimbong sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.” Sa ingon, ang mga langit sa itaas hinlo na karon, nga nahibilin na lamang ang yutan-ong dominyo sa Gingharian nga bug-os pagahinloan aron mabalaaan ang ngalan ni Jehova. Niining tuig 1993, ang balaang pasidaan padayong mapadapat: “Alaot ang yuta . . . tungod kay ang Yawa nanaog nganha kaninyo, nga may dakong kasuko, kay nasayod man siya nga hamubo na lamang ang iyang panahon.”—Pinadayag 12:12.
Langitnong Pagkabanhaw
13, 14. (a) Unsay gipaila sa Kasulatan nga nagapadayon sukad sa 1918 paunahan? (b) Unsay gipadayag ni Pablo ug Juan mahitungod sa dinihogang nahibilin karong adlawa?
13 Ang laing katingalahang hitabo panahon sa presensiya ni Kristo mao ang pagsugod sa langitnong pagkabanhaw. Gipaila ni apostol Pablo nga ang mga dinihogang Kristohanon nga dugay nang nangatulog sa ilang mga lubnganan mao ang unang pagabuhion ug mopuyo uban kang Kristo Jesus sa espirituhanong dominyo. Ang ebidensiya gipadayag latas sa katuigan sa pagpakita nga kini mopatim-awng nahitabo sukad sa 1918 paunahan. Si Pablo misulat: “Diha kang Kristo ang tanan mangabuhi. Apan ang matag usa sa iyang kaugalingong matang: Si Kristo ang unang mga bunga, pagkahuman kadtong iya ni Kristo panahon sa iyang presensiya [pa·rou·siʹa].” (1 Corinto 15:22, 23) Ang pagkabanhaw sa mga dinihogan panahon sa presensiya ni Kristo gipamatud-an sa 1 Tesalonica 4:15-17: “Kini mao ang among igaingon kaninyo pinaagi sa pulong ni Jehova, nga kitang mga buhi nga mabuhi pa sa presensiya [pa·rou·siʹa] sa Ginoo dili magauna niadtong nangatulog sa kamatayon . . . Kadtong namatay nga nahiusa kang Kristo mouna sa pagbangon. Human niana kitang mga buhi nga nangabuhi pa, kauban nila, pagasakgawon sa mga panganod aron sa pagtagbo sa Ginoo sa kahanginan.” Adunay 144,000 nga iya ni Kristo ingong mga dinihogan nga sa kataposan makadawat niining kahibulongang ganti.—Pinadayag 14:1.
14 Sumala sa gipakita ni Pablo, kadtong sakop sa dinihogang nahibilin nga buhi karong adlawa dili mouna pagsulod sa Gingharian kay sa unang matinumanong dinihogang mga Kristohanong sinakit ug mga tinun-an. Si apostol Juan dugang nagbatbat niadtong sakop sa mga dinihogan nga mamatay karong adlawa sumala sa mosunod: “Malipayon ang mga patay nga namatay nga nahiusa sa Ginoo sukad niining panahona paunahan. Oo, ang espiritu nag-ingon, papahulaya sila gikan sa ilang mga pagpangabudlay, kay ang mga butang nga ilang gibuhat mokuyog uban kanila,” nga mao, sa ilang binanhaw nga kinabuhi. (Pinadayag 14:13) Ug si Pablo nag-ingon: “Tan-awa! itug-an ko kaninyo ang usa ka balaang tinagoan: Kitang tanan dili mangatulog sa kamatayon, apan kitang tanan mangausab, sa usa ka gutlo, sa usa ka pamilok sa mata, panahon sa kataposang budyong. Kay ang budyong molanog, ug ang mga patay pagabanhawon nga dili madunoton, ug kita mangausab.” (1 Corinto 15:51, 52) Pagkakatingalahang milagro!
15, 16. (a) Unsang ilustrasyon ang gihatag ni Jesus sa Lucas 19:11-15, ug sa unsang katarongan? (b) Sa unsang paagi kining tagnaa nagakatuman?
15 Kas-a sa dihang si Jesus nagwali ngadto sa usa ka pundok sa iyang mga sumusunod mahitungod sa Gingharian sa Diyos, migamit siyag usa ka sambingay sa pagtabang kanila sa pagtul-id sa sayop nilang mga ideya. Ang talaan mabasa: “Naghunahuna sila nga ang gingharian sa Diyos magpasundayag dihadiha. Busa siya miingon: ‘Ang usa ka tawong may hamiling pagkatawo mipanaw ngadto sa usa ka layong yuta aron sa pagkuhag harianong gahom alang sa iyang kaugalingon ug sa pagbalik. Sa pagtawag sa iyang napulo ka ulipon iyang gihatagan silag napulo ka mina ug giingnan sila, “Ipatigayon ninyo kini hangtod sa akong pag-abot.” . . . Sa kataposan sa dihang siya nahibalik pagkatapos makabaton ug harianong gahom, iyang gipatawag ang iyang mga ulipon nga iyang gihatagan sa salapi, sa pagsusi kon pilay ilang natubo gikan sa patigayon.’”—Lucas 19:11-15.
16 Si Jesus mao kadtong “tawo” nga miadto sa langit, ang “layong yuta” diin siya magadawat ug usa ka gingharian. Kanang Ginghariana iyang nadawat niadtong 1914. Sa wala madugay, si Kristo ingong Hari mipatawag sa nag-angkong mga sumusunod sa pagsuta kon unsay ilang gibuhat sa pag-atiman sa intereses sa Gingharian nga gipiyal kanila. Ang matinumanong pila ka sumusunod napili sa pagdawat sa pagdayeg sa agalon: “Maayong buhat, buotang ulipon! Tungod kay sa gamay kaayong butang ikaw nagmatinumanon, magbaton ug pagbulot-an ibabaw sa napulo ka siyudad.” (Lucas 19:17) Kining yugto sa presensiya ni Kristo naglangkit sa kusog nga kalihokan sa pagwali sa Gingharian, apil ang pagpahayag sa mga paghukom sa Diyos batok sa mga daotan, ug ang pagdumala niining buluhatona naapil sa pagbulot-an nga gisalig sa “maayong ulipon.”
Tibuok-Kalibotang Pagwali
17. Unsang kalipay ang nagtimaan sa pa·rou·siʹa?
17 Unsa pay mahitabo panahon sa maong pa·rou·siʹa? Kana maoy panahon sa dakong kalipay sa buluhatong pagwali ug pagtabang sa mga bag-ohan sa pagpangandam aron makalabang-buhi sa umaabot nga dakong kasakitan. Kini silang sakop sa “dakong panon,” nga nagatabang sa nahibilin, mahimong “mga sulat sa pagpaila.” (Pinadayag 7:9; 2 Corinto 3:1-3) Gihisgotan ni Pablo ang kalipay sa maong buluhaton sa pag-ani sa nag-ingon siya: “Unsa ba ang among paglaom o kalipay o purongpurong sa kasadya—aw, dili ba sa pagkatinuod kamo man?—atubangan sa atong Ginoong Jesus sa iyang presensiya [pa·rou·siʹa]?”—1 Tesalonica 2:19.
Magpabiling Hinlo ug Walay-Ikasaway
18. (a) Unsang pag-ampo ni Pablo ang nagtumong sa pa·rou·siʹa? (b) Unsang espiritu ang kinahanglang ipasundayag natong tanan niining panahona, ug sa unsang mga paagi?
18 Si Pablo miampo usab alang sa pagbalaan niadtong buhi niining panahon sa presensiya ni Kristo: “Hinaot ang Diyos mismo sa kalinaw magbalaan kaninyo sa bug-os. Ug maayo sa tanang bahin hinaot ang espiritu ug kalag ug lawas ninyong mga igsoon matipigan sa walay-ikasaway nga paagi sa presensiya [pa·rou·siʹa] sa atong Ginoong Jesu-Kristo.” (1 Tesalonica 5:23) Oo, karong adlawa, kon kaha kita sakop sa dinihogang nahibilin o sa dakong gidaghanon sa ubang mga karnero, ang espiritu sa pagtambayayongay magabugkos kanato sa kamaunongon aron kita makapadayong hinlo ug walay-ikasaway niining talagsaong panahon. Sa susamang paagi, kinahanglang kita magpakitag pailob. Si Santiago misulat: “Busa, magpakitag pailob, mga igsoon, hangtod sa presensiya [pa·rou·siʹa] sa Ginoo. . . . Lig-ona ang inyong mga kasingkasing, tungod kay ang presensiya [pa·rou·siʹa] sa Ginoo nagkahiduol na.”—Santiago 5:7, 8.
19. Unsang pasidaan ang gihatag ni Pedro mahitungod sa pa·rou·siʹa, ug unsa ang angay natong pagsanong?
19 Si apostol Pedro may ikasulti usab kanatong buhi niining panahona karon. Siya nagpasidaan kanato batok sa mga mabiaybiayon, nga adunay daghan sa tanang bahin sa yuta. Si Pedro miingon: “Kamo una nang nahibalo niini, nga sa kataposang mga adlaw moabot ang mga mabiaybiayon uban sa ilang pagbiaybiay, nga nagabuhat sumala sa ilang mga pangibog ug nagaingon: ‘Hain na ba kining gisaad nga presensiya [pa·rou·siʹa] niya? Aw, sukad sa adlaw nga nangatulog ang atong mga katigulangan sa kamatayon, ang tanang butang nagapadayon nga sama gayod sukad sa sinugdan sa paglalang.’” (2 Pedro 3:3, 4) Bisan sa pagkaylap sa mga mabiaybiayon panahon sa presensiya ni Kristo, ang katawhan ni Jehova nagpadayon sa pagdan-ag ingong kahayag sa kalibotan, alang sa kaluwasan sa daghan.
Mga Pangutana sa Pagsubli
◻ Sa unsang paagi ang katawhan ni Jehova anam-anam nga nalamdagan mahitungod sa pa·rou·siʹa?
◻ Sa unsang paagi ang Mateo 24:4-8 nagakatuman?
◻ Sa unsang paagi ang mga manulonda nakigtambayayong sa naentronong Kristo?
◻ Unsang katingalahang milagro ang morag nagauban sa pa·rou·siʹa?
◻ Unsang kalipay ang natagamtam niining panahona, ug kinsay nakaambit niini?