Kinsay Nagawali sa Maayong Balita?

“ . . . igawali sa tibuok gipuy-ang yuta.”—MATEO 24:14.

ANG maayong balita ginawali sa mga Saksi ni Jehova. Gibuhat nila kini sa lainlaing paagi. Ang usa maoy pinaagi sa . . .

Pagpakigsulti. Sama kang Jesus ug sa iyang mga tinun-an, gidala sa mga Saksi ni Jehova ngadto sa mga tawo ang maayong balita. (Lucas 8:1; 10:1) Dili kay maghulat lang sila nga duolon sa mga tawo. Ang tanang Saksi—nga kapin na sa pito ka milyon—nagpamatuod sa mga tawo bahin sa Gingharian sa Diyos. Sila nagwali sa kabalayan, sa kadalanan, pinaagig telepono, ug sa uban pang mga paagi. Sa miaging tuig, ang mga Saksi migugol ug kapin sa usa ug tunga ka bilyong oras sa pagsangyaw.

Sila nagtudlo sa mga tawo dili lamang bahin sa Gingharian sa Diyos kondili bahin usab sa ‘tanang butang nga gisugo ni Jesus.’ (Mateo 28:20) Sila regular nga nagdumala ug kapin sa walo ka milyon ka libreng mga pagtuon sa Bibliya.

Ang mga Saksi nagawali sa tibuok kalibotan—sa 236 ka kayutaan. Sila magwali sa tanang matang sa mga tawo. Sila magwali sa kabanikahan ug sa siyudad, sa kalasangan sa Amazon ug Siberia, sa mga desyerto sa Aprika ug sa Kabukiran sa Himalaya. Sila walay suweldo ug nagsakripisyo sa ila mismong salapi ug panahon alang niini nga buluhaton tungod sa ilang gugma sa Diyos ug sa ilang silingan. Sila usab nagsangyaw sa maayong balita pinaagi sa . . .

Pinatik nga Basahon. Kini nga magasin, nga ang kompletong ulohan maoy Ang Bantayanang Torre Nagapahayag sa Gingharian ni Jehova, karon gipatik sa 185 ka pinulongan ug may sirkulasyon nga kapin sa 42 ka milyong kopya matag gula. Ang kaubang magasin nga Pagmata!, nga nagmantala usab sa Gingharian, gipatik sa 83 ka pinulongan ug may sirkulasyon nga kapin sa mga 40 ka milyong kopya matag gula.

Ang mga libro, brosyur, tract, CD/MP3, ug DVD nga nagpatin-aw sa mga pagtulon-an sa Bibliya mabatonan sa 540 ka pinulongan. Gihimo ug giapod-apod sa mga Saksi ang kapin sa 20 ka bilyon niini sulod lamang sa milabayng napulo ka tuig, nga nag-aberids ug tulo ka kopya sa matag tawo niining yutaa!

Ang mga Saksi ni Jehova nagpatik o nagpaimprenta usab ug lainlaing mga hubad sa Bibliya. Ang Bag-ong Kalibotang Hubad sa Balaang Kasulatan—nga gihubad, gipatik, ug giapod-apod sa mga Saksi—karon mabatonan sa katibuk-an o sa bahin diha sa 96 ka pinulongan. Kapin sa 166 ka milyong kopya ang naapod-apod. Ang mga Saksi nagpaambit usab sa maayong balita sa Gingharian . . .

Diha sa Kristohanong mga Tigom. Ang senemanang mga tigom sa mga Kingdom Hall dili lamang kay relihiyosong mga serbisyo, kondili kini gidisenyo usab aron sa pagtudlo. Ang mga pakigpulong may mga tema nga pinasukad sa Bibliya, ug gitun-an ang Bibliya pinaagi sa tabang sa magasing Bantayanang Torre ug ubang mga publikasyon. Sa mga tigom, ang mga Saksi gibansay usab aron mahimong epektibong magmamantala sa maayong balita.

Gitun-an sa mga Saksi ang samang materyal sa kapin sa 107,000 ka kongregasyon sa tibuok yuta, nga nakaamot sa ilang panaghiusa. Kini nga mga tigom bukas alang sa publiko. Walay koleksiyon nga himoon. Apan walay pulos kining tanan kon ang mga Saksi dili magpadapat sa ilang giwali. Busa, ilang girekomendar ang maayong balita . . .

Pinaagi sa Personal nga Panig-ingnan. Sila naningkamot nga mahimong sulondan sa ilang Kristohanong panggawi, nga magbuhat kutob sa ilang mahimo sumala sa kon unsay buot nilang buhaton sa uban kanila. (Mateo 7:12) Bisan tuod sila dili hingpit ug usahay masayop, tim-os nilang tinguha nga magpakitag gugma sa tanang tawo dili lamang sa pagsangyaw sa maayong balita kondili pinaagi usab sa pagtabang sa laing paagi kon posible.

Ang mga Saksi ni Jehova wala maningkamot nga kombertihon ang kalibotan pinaagi sa ilang pagwali. Apan, kon sa tan-aw ni Jehova igo na kaniya ang maong buluhaton, nan ang kataposan moabot, sumala sa tagna ni Jesus. Unsay kahulogan niini alang sa yuta ug sa mga tawo nga nagpuyo niini?

[Hulagway sa panid 7]

Ang maayong balita ginawali sa mga Saksi ni Jehova sa tibuok kalibotan

Unsa “ang Kataposan”?

“. . . ug unya moabot ang kataposan.”—MATEO 24:14.

DAW walay puas ang paghisgot bahin sa kataposan sa kalibotan. Nagkadaiya ang gihubit sa mga libro, salida, ug magasin bahin sa adlaw sa kalaglagan. Ang uban kataw-anan ug ang uban siyentipikanhon. Lakip niini ang bug-os nga kalaglagan pinaagig nukleyar nga gubat, panagbangga sa asteroid, makamatay nga virus, grabeng pagkadaot sa klima, o ang pagsulong sa mga kaaway gikan sa laing planeta.

Lainlain usab ang relihiyosong mga panglantaw. Daghan ang nagtudlo nga “ang kataposan” magtapos sa tanang kinabuhi sa yuta. Sa pagkomento bahin sa Mateo 24:14, usa ka teologo ang misulat: “Kining bersikuloha maoy usa sa labing hinungdanon sa tanang bahin sa Bibliya . . . Ang atong kaliwatan posibleng makaagom ug bug-os nga kalaglagan ug pipila lang kanato ang gustong maghanduraw sa maong mangilngig nga kamatuoran.”

Sagad wala makita sa maong panglantaw kining hinungdanong kamatuoran: Si Jehova “lig-ong nagtukod” sa yuta; siya “wala maglalang niini sa wala lamay kapuslanan, [apan] nag-umol niini aron pagapuy-an.” (Isaias 45:18) Busa sa dihang gihisgotan ni Jesus “ang kataposan,” wala niya ipasabot nga ang yuta pagalaglagon; ni iyang gipasabot nga ang katawhan puohon. Iyang gipasabot nga ang mga daotan—kadtong tig-ang nagdumili nga magkinabuhi ubos sa paggiya ni Jehova—pagalaglagon.

Tagda kining usa ka ilustrasyon. Pananglitan duna kay nindot kaayo nga balay ug gipapuy-an nimo kini nga libre. Ang uban sa mga nagpuyo niini makigdaiton sa usag usa ug nag-atiman sa imong balay. Apan, ang uban, walay laing gihimo kondili kasamok, nag-awayay, ug nangabuso sa maayong mga tawo nga nagpuyo niini. Ilang gidaot ang imong kabtangan ug wala gayod maminaw sa imong pagbadlong kanila.

Unsay imong himoon? Gub-on ba nimo ang imong balay? Dili gayod. Lagmit imong papahawaon ang daotang mga tawo nga nagpuyo niini ug ayohon ang ilang gipangdaot.

Ingon usab niana ang himoon ni Jehova. Iyang giinspirar ang salmista sa pagsulat: “Ang mga mamumuhat ug daotan pagaputlon, apan ang mga nagalaom kang Jehova mao ang magapanag-iya sa yuta. Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:9-11.

Gihisgotan ni apostol Pedro ang samang butang. Ubos sa pag-inspirar, siya misulat: “Dihay mga langit gikan sa kakaraanan ug usa ka yuta nga nagbarog nga lig-on gikan sa tubig ug sa taliwala sa tubig pinaagi sa pulong sa Diyos, ug pinaagi niini ang kalibotan niadtong panahona nakaagom sa kalaglagan sa dihang kini gilunopan sa tubig.” (2 Pedro 3:5, 6) Dinhi ang gitumong sa apostol mao ang Lunop sa adlaw ni Noe. Ang kalibotan sa dili-diyosnong katawhan nalaglag, apan ang yuta wala malaglag. Ang maong tibuok yutang Lunop naghatag “ug sumbanan alang sa mga tawong dili-diyosnon labot sa mga butang nga moabot.”—2 Pedro 2:6.

Unya si Pedro nagpadayon: “Ang mga langit ug ang yuta nga naglungtad karon gitagana alang sa kalayo.” Kon mohunong ta dinhi, masayop ang atong pagsabot. Matikdi nga ang bersikulo nagpadayon: “Ug sa kalaglagan sa mga tawong dili-diyosnon.” Ang laglagon dili ang yuta kondili ang mga tawong dili-diyosnon. Unsay sunod? Si Pedro misulat: “Adunay bag-ong mga langit [Mesiyanikong Gingharian sa Diyos] ug usa ka bag-ong yuta [usa ka matarong nga katilingban sa mga tawo] nga atong ginapaabot sumala sa iyang saad, ug niini magpuyo ang pagkamatarong.”—2 Pedro 3:7, 13.

Gipakita usab sa tagna sa Bibliya nga ang panahon sa “kataposan” haduol na. Basaha ang Mateo 24:3-14 ug 2 Timoteo 3:1-5 aron imong makita ang mga panghitabo nga nagpamatuod nga kini tinuod.a

Matingala ka ba nga daghan ang naglibog sa Mateo 24:14, usa ka teksto nga bisan ang usa ka bata makasabot? Dunay mga rason niini. Gibutaan ni Satanas ang mga tawo sa bililhong mga kamatuoran nga anaa sa Bibliya. (2 Corinto 4:4) Usab, gililong sa Diyos ang iyang mga katuyoan gikan sa mga mapahitas-on ug gipadayag kini ngadto sa mga mapainubsanon. Niining bahina, si Jesus miingon: “Ako sa dayag nagadayeg kanimo, Amahan, Ginoo sa langit ug sa yuta, tungod kay gitago mo kining mga butanga gikan sa mga maalamon ug sa mga makinaadmanon ug gipadayag kini ngadto sa mga bata.” (Mateo 11:25) Pagkadakong pribilehiyo nga mahilakip sa mga mapainubsanon nga nakasabot kon unsa gayod ang Gingharian sa Diyos ug makabaton sa mga panalangin nga ihatag ngadto sa tanan nga nagpaluyo niini!