Nagapamatuod Ngadto sa “Tanang Kanasoran”

“Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”​—MATEO 24:14.

1. Nganong ang mga pulong ni Jesus nga natala sa Mateo 24:14 makapakurat gayod sa iyang mga sumusunod?

MAKAKURAT gayod ang mga pulong ni Jesus sa ibabaw alang sa iyang mga tinun-ang Hudiyo! Ang ideya lamang labot sa gibalaang mga Hudiyo nga makig-estorya sa “mahugaw” nga mga Hentil, “mga tawo sa kanasoran,” langyaw gayod alang sa usa ka Hudiyo, gani kana dulumtanan pa.a Aw, ang usa ka masundanon sa tanlag nga Hudiyo dili gani mosulod sa balay sa usa ka Hentil! Kadtong tinun-ang mga Hudiyo daghan pag pagatun-an bahin kang Jesus, sa iyang gugma, ug sa iyang sugo. Ug sila daghan pag pagatun-an bahin sa pagkadili-mapihigon ni Jehova.​—Buhat 10:28, 34, 35, 45.

2. (a) Unsa ka makaylapon ang ministeryo sa mga Saksi? (b) Unsang tulo ka pangunang butang ang nakatabang sa pag-uswag sa mga Saksi?

² Ang mga Saksi ni Jehova nakawali na sa maayong balita taliwala sa kanasoran, lakip sa modernong-adlaw nga Israel, ug nagamantala niini karon sa mas daghang nasod kay kaniadto. Sa 1994 kapin sa upat ug tunga ka milyong mga Saksi ang nagawali sa mga 230 ka kayutaan. Sila nagadumala ug mga upat ug tunga ka milyong mga pagtuon sa Bibliya diha sa balay uban sa mga tawong interesado. Ginahimo kini atubangan sa tibuok-kalibotang pagpihig, sagad gumikan sa kawalay-alamag bahin sa mga pagtulon-an ug mga motibo sa mga Saksi. Maingon sa gikasulti bahin sa unang mga Kristohanon, ikasulti usab kini bahin kanila: “Sa pagkamatuod mahitungod niini nga sekta nahibaloan namo nga sa bisan diin kini ginasultihan ug pagbatok.” (Buhat 28:22) Nan sa unsa nato ikapasidungog ang ilang malamposong ministeryo? Adunay labing menos tulo ka butang nga maoy hinungdan sa ilang pag-uswag​—nagasunod sa mga pagtultol sa espiritu ni Jehova, nagasundog sa praktikal nga mga paagi ni Kristo, ug nagagamit sa haom nga mga instrumento alang sa epektibong pagpahayag.

Ang Espiritu ni Jehova ug ang Maayong Balita

3. Nganong dili kita makapangandak bahin sa kon unsay nalampos?

³ Ang mga Saksi ba ni Jehova nangandak sa ilang kalamposan, nga daw kini maoy tungod sa linain nga mga abilidad nga ilang nabatonan? Wala, kay ang mga pulong ni Jesus mapadapat: “Sa dihang mabuhat na ninyo ang tanang butang nga gipabuhat kaninyo, umingon, ‘Kami maoy mga walay-silbi nga ulipon. Unsay among nabuhat mao ang angay namong mabuhat.’” Ingong dedikado, bawtismadong mga Kristohanon, ang mga Saksi ni Jehova boluntaryong midawat sa kaakohan sa pag-alagad sa Diyos, bisan unsa pay ilang personal nga mga kahimtang. Alang sa uban, kana nagkahulogan ug bug-os-panahong pag-alagad ingong mga misyonaryo o ingong mga boluntaryo sa sangang mga buhatan ug sa mga pasilidad nga imprintahanan sa Kristohanong mga publikasyon. Alang sa uban ang maong Kristohanong pagkamainandamon nagtultol kanila sa buluhatong pagpanukod sa relihiyosong mga tinukod, ngadto sa bug-os-panahong pagwali ingong mga payunir nga ministro, o sa part-time nga pagwali ingong mga magmamantala sa maayong balita diha sa lokal nga mga kongregasyon. Walay mausa kanato ang may katarongang manghambog bahin sa pagbuhat sa atong obligasyon, ‘kon unsay angay natong mabuhat.’​—Lucas 17:10; 1 Corinto 9:16.

4. Sa unsang paagi nabuntog ang tibuok-kalibotang pagsupak sa Kristohanong ministeryo?

⁴ Ang bisan unsang kalamposan nga atong mabatonan mahimong ikapasidungog sa espiritu, o aktibong gahom ni Jehova. Tinuod kini nga isulti karon sama sa mga adlaw ni manalagnang Zacarias: “Mao kini ang gipamulong ni Jehova ngadto kang Zerubbabel, nga nagaingon, ‘Dili pinaagi sa militaryong kusog, ni pinaagi sa gahom, kondili pinaagi sa akong espiritu,’ nag-ingon si Jehova sa mga panon.” Busa, ang tibuok-kalibotang pagsupak sa pagwali nga buluhaton sa mga Saksi nabuntog, dili pinaagi sa tawhanong paningkamot, kondili pinaagi sa direksiyon ug proteksiyon ni Jehova.​—Zacarias 4:6.

5. Unsay bahin ni Jehova diha sa pagpakaylap sa mensahe sa Gingharian?

⁵ Mahitungod niadtong kinsa nagasanong sa mensahe sa Gingharian, si Jesus nag-ingon: “Kini nahisulat diha sa mga Propeta, ‘Ug silang tanan tudloan ni Jehova.’ Ang matag usa nga nakadungog gikan sa Amahan ug nakakat-on moari kanako. . . . Walay usa nga makaari kanako gawas kon kini itugot kaniya sa akong Amahan.” (Juan 6:45, 65) Si Jehova makabasa sa mga kasingkasing ug mga hunahuna, ug siya nahibalo kon kinsa kadtong malagmit mosanong sa iyang gugma bisan tuod wala pa sila makaila kaniya. Gigamit usab niya ang iyang mga manulonda sa pagdumala niining talagsaong ministeryo. Mao nga diha sa panan-awon si Juan nakakita sa pagpakigbahin sa manulonda ug misulat: “Nakita ko ang laing anghel nga nagalupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan.”​—Pinadayag 14:6.

Mahunahunaon sa Espirituwal nga Panginahanglan

6. Unsang sukaranang tinamdan ang gikinahanglan sa usa ka tawo aron mosanong sa maayong balita?

⁶ Ang laing hinungdan sa paghatag ni Jehova sa usa ka tawo ug higayon sa pagdawat sa maayong balita mao kanang gipahayag ni Jesus: “Malipayon kadtong mahunahunaon sa ilang espirituwal nga panginahanglan, sanglit ilaha ang gingharian sa mga langit.” (Mateo 5:3) Ang tawong kontento-sa-kaugalingon o ang usa nga wala magapangitag kamatuoran dili magmahunahunaon sa espirituwal nga panginahanglan. Siya maghunahuna lamang sa materyal, unodnong mga paagi. Ang pagkatagbaw sa kaugalingon mahimong babag. Busa, sa dihang isalikway sa daghan nga atong mahibalag samtang magaduaw sa balay ug balay ang mensahe, kinahanglang atong konsiderahon ang tanang nagkalainlaing hinungdan kon nganong ang mga tawo nagasanong sa ingon.

7. Nganong daghan ang wala mosanong sa kamatuoran?

⁷ Daghan ang dili maminaw tungod kay sila sa pagkagahig-ulo magpabilin sa relihiyon nga ilang napanunod ug dili gustong makigsulti. Ang uban nadani sa relihiyon nga mohaom sa ilang personalidad​—ang pila gustog mistisismo, ang uban nagasanong sa emosyonalismo, ang uban pa interesado sa sosyal nga mga kalihokan sa ilang simbahan. Daghan karon ang mipili sa estilo-sa-kinabuhi nga nahisupak sa mga sukdanan sa Diyos. Tingali imoral ang ilang kinabuhi, nga maoy ilang katarongan sa pag-ingon, “Dili ako interesado.” Ang uban pa, nga nangangkong edukado ug siyentipikanhon, nagasalikway sa Bibliya ingong sobra ra ka yano.​—1 Corinto 6:9-11; 2 Corinto 4:3, 4.

8. Nganong ang pagsalikway dili angay makapaluya sa atong kasibot? (Juan 15:18-20)

⁸ Ang pagsalikway ba sa daghan makapaluya sa atong pagtuo ug kasibot diha sa nagaluwas ug kinabuhi nga ministeryo? Makakuha kitag kahupayan gikan sa mga pulong ni Pablo ngadto sa mga taga-Roma: “Nan, unsa ang kahimtang? Kon may pipilang wala mopahayag ug pagtuo, ang ilang kawalay pagtuo kaha magpahimong walay epekto sa pagkakasaligan sa Diyos? Dili gayod unta kana mahitabo! Apan pakaplaging matuod ang Diyos, bisan ug ang tanang tawo makaplagang bakakon, maingon gayod sa nahisulat: ‘Aron mapamatud-an kang matarong sa imong mga pulong ug makadaog dihang ikaw ginahusay.’”​—Roma 3:3, 4.

9, 10. Unsay ebidensiya nga ang pagsupak nabuntog sa daghang kayutaan?

⁹ Madasig kita gikan sa daghang pananglitan sa mga nasod sa tibuok kalibotan nga daw dili gayod masanongon ug bisan pa, sa ulahi, napamatud-ang kasukwahi gayod sa tinuod. Si Jehova ug ang mga manulonda nahibalo nga adunay makaplagan nga maayog mga kasingkasing​—apan ang mga Saksi ni Jehova kinahanglang magpadayon ug magmalahutayon sa ilang ministeryo. Tagda, pananglitan, ang pipila ka nasod diin ang Katolisismo tin-awng naghatag ug dili-mabuntog nga babag sa 50 ka tuig kanhi​—Argentina, Brazil, Colombia, Espanya, Irlandia, Italya, Mexico, ug Portugal. Diyutay pa ang mga Saksi balik niadtong 1943, 126,000 lamang sa tibuok kalibotan, nga ang 72,000 niini anaa sa Tinipong Bansa. Ang kawalay-alamag ug pagpihig nga giatubang sa mga Saksi daw sama sa usa ka paril nga tisa nga dili malagbas. Apan, karon ang pipila sa labing malamposong mga resulta sa pagwali nahitabo niining mga nasora. Mao usab ang nahitabo sa daghang nasod nga kanhi Komunista. Niadtong 1993 ang 7,402 nga nabawtismohan sa Kiev, Ukraine, nagpamatuod niini.

¹⁰ Unsang mga paagi ang gigamit sa mga Saksi aron ipahayag ang maayong balita ngadto sa ilang mga silingan? Migamit ba sila ug materyal nga pangdani aron makakabig, nga maoy gipatuo sa pipila? Ang ila bang giduaw mga kabos lamang ug dili edukado, ingon sa gipangangkon sa uban?

Malamposong mga Paagi sa Paghatod sa Maayong Balita

11. Unsang maayong panig-ingnan ang gipakita ni Jesus sa iyang ministeryo? (Tan-awa ang Juan 4:6-26.)

¹¹ Si Jesus ug iyang mga tinun-an naghimog sumbanan nga gisunod sa mga Saksi hangtod karong adlawa diha sa ilang buluhatong paghimog-tinun-an. Si Jesus miadto bisag asa nga may mga tawo, dato o kabos​—ngadto sa mga balay, sa publikong mga dapit, sa kadaplinan sa lanaw, sa kabukiran, bisan sa mga sinagoga.—Mateo 5:1, 2; 8:14; Marcos 1:16; Lucas 4:15.

12, 13. (a) Sa unsang paagi naghatag si Pablo ug sumbanan alang sa mga Kristohanon? (b) Sa unsang paagi gisunod sa mga Saksi ni Jehova ang panig-ingnan ni Pablo?

¹² Bahin sa iyang kaugalingong ministeryo, si apostol Pablo tukmang nakaingon: “Kamo nahibalo pag-ayo kon sa unsang paagi sukad pa sa unang adlaw nga ako mitunob sa distrito sa Asia ako nakig-uban kaninyo sa tibuok nga panahon, nga nagpaulipon sa Ginoo . . . , samtang ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay.”​—Buhat 20:18-20.

¹³ Ang mga Saksi ni Jehova ilado sa tibuok kalibotan tungod sa ilang pagsunod sa apostolikanhong sumbanan, ang balay-ug-balay nga ministeryo. Inay hatagag pagtagad ang mahal, walay-hinungdan, ug dili-linawas nga ministeryo sa TV, ang mga Saksi nagaduol sa mga tawo, dato ug kabos, ug nagaatubang kanila nawong-sa-nawong. Naningkamot sila sa pagpakigsulti bahin sa Diyos ug sa iyang Pulong.b Wala sila maningkamot sa paghimog mga Kristohanon sa mga tawong nag-apas lamang sa materyal nga bentaha, mangomberti pinaagi sa paghatag ug materyal nga mga butang. Alang niadtong mamatig katarongan, ilang ipatin-aw nga ang bugtong sulbad sa mga suliran sa katawhan mao ang pagmando sa Gingharian sa Diyos, nga mag-usab sa mga kahimtang ibabaw sa atong yuta alang sa ikaayo.​—Isaias 65:17, 21-25; 2 Pedro 3:13; Pinadayag 21:1-4.

14. (a) Sa unsang paagi gipahiluna sa daghang misyonaryo ug mga payunir ang lig-ong pundasyon? (b) Unsay atong makat-onan gikan sa kasinatian sa mga Saksi ni Jehova sa Hapon?

¹⁴ Aron mahimo ang buluhaton diha sa daghang kayutaan kutob sa mahimo, ang mga misyonaryo ug mga payunir nagtukod ug panukaran diha sa daghang kanasoran. Sila nakapahilunag pundasyon, ug unya ang lokal nga mga Saksi ang nagapadayon. Busa, wala kini magkinahanglag daghang langyaw nga mga Saksi sa pagpadayon sa pagwali ug sa paghimo niining organisado kaayo. Usa ka talagsaong pananglitan mao ang Hapon. Balik niadtong ulahing bahin sa katuigang 1940, sa kinadak-an mga Australasian ug Britanikong mga misyonaryo ang nangadto didto, nagtuon sa pinulongan, nagpasibo sa daw karaang mga kahimtang niadtong panahon liwas sa gubat, ug misugod sa pagwali sa balay ug balay. Sa panahon sa Gubat sa Kalibotan II, ang mga Saksi gidili ug gilutos sa Hapon. Busa nangabot ang mga misyonaryo nga nakakitag maihap lamang nga aktibong mga Saksi nga Hapon. Apan karon sila miuswag ngadto sa kapin sa 187,000 diha sa kapin sa 3,000 ka kongregasyon! Unsa ang sekreto sa ilang sayo nga kalamposan? Usa ka misyonaryo nga nakaalagad didto ug 25 ka tuig miingon: “Importante kaayong makakat-on sa pagpakig-estorya sa mga tawo. Pinaagi sa pagkahibalo sa ilang pinulongan, nakaarang kami sa pagpaangay kanila, sa pagsabot ug pag-apresyar sa ilang paagi sa kinabuhi. Kinahanglang ipakita namo nga gihigugma namo ang mga Hapones. Kami mapaubsanong naningkamot nga mahimong bahin sa lokal nga komunidad nga dili, siyempre, ikompromiso ang among Kristohanong mga sukdanan.”

Kristohanong Paggawi Usa Usab ka Pamatuod

15. Sa unsang paagi gipakita sa mga Saksi ang Kristohanong paggawi?

¹⁵ Apan, ang mga tawo wala mosanong sa mensahe lamang sa Bibliya. Nakita usab nila ang Kristiyanidad sa buhat. Ilang nakita ang gugma, panag-uyonay, ug panaghiusa sa mga Saksi bisan ubos sa labing masulayong mga kahimtang, sama sa mga giyera sibil, panag-away sa tribo, ug etnikong pagdumtanay. Ang mga Saksi nakapabilin sa tin-awng baroganan sa Kristohanong neyutralidad taliwala sa tanang mga panagbangi ug nakatuman sa mga pulong ni Jesus: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”​—Juan 13:34, 35.

16. Unsang kasinatian ang nagailustrar sa praktikal nga Kristohanong gugma?

¹⁶ Ang gugma sa silingan giilustrar sa kaso sa usa ka tigulang nga lalaki kinsa misulat sa usa ka lokal nga mantalaan bahin kang “Gn. ug Gng. Buotan.” Matud niya nga maayo kaniya ang iyang mga silingan sa dihang hapit nang mamatay ang iyang asawa. “Sukad nga siya namatay . . . sila labaw pang maayo,” misulat siya. “Sukad niadto ‘gisagop’ nila ako . . . , nga nagtrabaho sa tanang matang sa buluhaton sa balay ug nagtabang sa pagsulbad sa mga problema sa 74-anyos nga retirado. Ang nakapalabaw niini nga talagsaon mao nga sila mga itom, ako puti. Sila mga Saksi ni Jehova, ako miundang na sa pagka-Katoliko.”

17. Unsang dalan ang kinahanglan natong likayan?

¹⁷ Kining maong eksperyensiya nag-ilustrar nga kita makapamatuod sa daghang paagi, lakip na sa atong adlaw-adlaw nga paggawi. Sa pagkamatuod, gawas kon ang atong paggawi sama kang Kristo, ang atong ministeryo mahimong sama sa mga Pariseo, walay epekto. Dili nato gustong mahisama niadtong gihubit ni Jesus: “Ang tanang butang nga ilang isulti kaninyo, buhata ug sunda, apan ayaw pagbuhat sumala sa ilang mga buhat, kay sila nagapanulti apan dili mohimo.”​—Mateo 22:37-39; 23:3.

Ang Ulipong Matang Nagatagana ug Hustong mga Galamiton

18. Sa unsang paagi ang literatura sa Bibliya nagsangkap kanato sa pagtabang sa mga tawong matinud-anon ug kasingkasing?

¹⁸ Laing importanteng butang sa pagwali sa maayong balita ngadto sa tanang kanasoran mao ang pagkadaling mabatonan sa mga basahon sa Bibliya nga gigama sa Watch Tower Bible and Tract Society. Kita adunay mga libro, mga brosyur, mga tract, ug mga magasin nga makatubag sa hapit tanang sinserong tawo nga mangutana. Kon makahibalag kitag Muslim, Hindu, Buddhist, Taoist, o Hudiyo, magamit nato ang librong Pagpangita sa Katawhan sa Diyos o ang lainlaing mga tract ug mga pulyeto aron masugdan ang kabildohay ug malagmit ang pagtuon sa Bibliya. Kon mangutana ang ebolusyonista bahin sa paglalang, magamit nato ang librong Life​—How Did It Get Here? By Evolution or by Creation? Kon mangutana ang usa ka batan-on, ‘Unsay katuyoan sa kinabuhi?’ ikapunting nato siya sa librong Mga Pangutanang Gisukna sa mga Batan-on​—Mga Tubag nga Mosaler. Kon ang usa naapektohan kaayo sa personal nga mga problema​—depresyon, kalapoy, paglugos, diborsiyo​—kita adunay mga magasin nga naghisgot niining mga ulohana sa praktikal nga paagi. Walay duhaduha, ang kasaligang ulipong matang nga gitagna ni Jesus nga magataganag “pagkaon sa hustong panahon” nagatuman sa papel niini.​—Mateo 24:45-47.

19, 20. Sa unsang paagi kusog nga miuswag ang buluhaton sa Gingharian sa Albania?

¹⁹ Apan aron maabot ang kanasoran, kinahanglan nga kining basahona himoon sa daghang pinulongan. Sa unsang paagi nahimong posible ang paghubad sa Bibliya ug Kasulatanhong mga basahon ngadto sa kapin sa 200 ka pinulongan? Ang lakbit nga pagtagad sa usa ka pananglitan, sa Albania, nag-ilustrar kon sa unsang paagi ang matinumanon ug kasaligang ulipong matang nakapalambo sa maayong balita bisan pa sa dakong kalisdanan ug walay modernong Pentekostes sa paghatag ug dihadiha nga pagkahibalog mga pinulongan.​—Buhat 2:1-11.

²⁰ Sa pipila ka tuig lamang nga milabay, ang Albania gilantaw gihapon ingon nga mao ang bugtong ateyista nga Komunistang nasod. Ang magasing National Geographic nag-ingon niadtong 1980: “Gidili sa Albania [ang relihiyon], nga nagproklamar niadtong 1967 ingong ‘ang unang ateyistang estado sa kalibotan.’ . . . Ateyismo lamang ang nahibaloan sa bag-ong mga tubo sa Albania.” Karon nga napukan na ang Komunismo, ang mga taga-Albania nga nakaamgo sa ilang espirituwal nga panginahanglan nagasanong sa gihimong pagwali didto sa mga Saksi ni Jehova. Usa ka diyutayng pundok sa mga maghuhubad nga gilangkoban sa batan-ong mga Saksi nga may kahibalo sa Italyano ug Ingles giporma sa Tiranë niadtong 1992. Gitudloan sila sa kuwalipikadong mga igsoon nga nagaduaw gikan sa ubang kayutaan sa paggamit sa laptop nga mga kompiyuter aron isulod diha ang mga hinubad sa pinulongang Albaniano. Nagsugod sila sa paghubad sa mga tract ug sa magasing Bantayanang Torre. Samtang nagadugang ang ilang eksperyensiya, ilang hubaron ang ubang bililhong pinasukad sa Bibliya nga mga publikasyon. Sa pagkakaron adunay duolan sa 200 ka aktibong mga Saksi sa maong gamayng nasod (nga may populasyong 3,262,000), ug 1,984 ang mitambong sa Memoryal sa 1994.

Kitang Tanan Adunay Responsabilidad

21. Sa unsang yugto kita nagkinabuhi?

²¹ Ang mga panghitabo sa kalibotan nagapaingon na sa kinapungkayan. Uban sa pagdaghan sa krimen ug kapintasan, ang pagpatay ug panglugos diha sa lokal nga mga gubat, ang naglungtad nga haluag nga moralidad ug ang mga sakit nga napasa sa pagpakigsekso ingong bunga niini, ang kawalay pagtahod sa tinuod nga awtoridad, ang kalibotan mopatim-aw nga nagapaingon sa pagkahimong walay-balaod, nga dili na mamandoan. Kita nagkinabuhi sa samang yugto sa wala pa ang Lunop nga gihubit sa Genesis: “Nakita ni Jehova nga ang pagkadaotan sa tawo sa yuta dako ug nga ang tanang kiling sa mga hunahuna sa iyang kasingkasing lunlon nga pagkadaotan lamang. Ug si Jehova nagbasol nga iyang gihimo ang tawo sa yuta, ug nakapasubo kini sa iyang kasingkasing.”​—Genesis 6:5, 6; Mateo 24:37-39.

22. Unsang Kristohanong responsabilidad ang nabatonan sa tanang mga Saksi ni Jehova?

²² Sama sa mga adlaw ni Noe, si Jehova molihok. Apan tungod sa iyang hustisya ug gugma, buot niya nga mawali una ang maayong balita ug ang nagapasidaang mensahe ngadto sa tanang kanasoran. (Marcos 13:10) Niining bahina ang mga Saksi ni Jehova adunay responsabilidad​—sa pagpangita niadtong kinsa takos sa kalinaw sa Diyos ug sa pagtudlo kanila sa iyang mga dalan sa pakigdait. Sa dili madugay, sa gitagal nga panahon sa Diyos, ang tinudlong buluhaton sa pagwali malamposong matapos. “Unya moabot ang kataposan.”​—Mateo 10:12, 13; 24:14; 28:19, 20.

[Mga footnote]

[Kahon sa panid 19]

NASOD AKTIBONG MGA SAKSISA 1943 SA 1993

Argentina 374 102,043

Brazil 430 366,297

Chile 72 44,668

Colombia ?? 60,854

Pransiya Gubat sa Kalibotan II-walay rekord 122,254

Irlandia 150? 4,224

Italya Gubat sa Kalibotan II-walay rekord 201,440

Mexico 1,565 380,201

Peru Walay rekord sa kalihokan 45,363

Pilipinas Gubat sa Kalibotan II-walay rekord 116,576

Polandia Gubat sa Kalibotan II-walay rekord 113,551

Portugal Walay rekord sa kalihokan 41,842

Espaniya Walay rekord sa kalihokan 97,595

Uruguay 22 9,144

Venezuela Walay rekord sa kalihokan 64,081

[Hulagway sa panid 17]

Ang mga Saksi ni Jehova nagkadaghan diha sa daghang Katolikong mga nasod, sama sa Espanya

[Hulagway sa panid 18]

Ang mga Saksi ni Jehova aktibo sa mga nasod sa tibuok kalibotan