Nahinumdom Ka Ba?

Nakaplagan ba nimo ang dili pa dugayng mga isyu sa Ang Bantayanang Torre nga dunay praktikal nga bili kanimo? Nan nganong dili sulayan ang imong panumdoman sa mosunod nga mga pangutana:

◻ Unsang duha ka pangutana ang nakatabang sa daghang Kristohanon nga nag-atubang sa mga desisyon sa panarbaho nga makab-ot ang personal nga desisyon?

Ang unang yawing pangutana mao: Ang sekular nga trabaho mismo gihukman ba sa Bibliya? Ang ikaduhang pangutana mao: Ang paghimo ba niining maong trabaho maghimo sa usa nga kaanib sa usa ka hinukman nga buluhaton?​—4/15, panid 28.

◻ Sa unsang paagi “ang kalalangan gipailalom sa pagkawalay-pulos”? (Roma 8:20)

Kita “gipailalom sa pagkawalay-pulos” tungod sa mga kalihokan sa atong orihinal nga mga ginikanan, si Adan ug Eva. “Dili pinaagi sa [atong] kaugalingong kabubut-on” o ingong resulta sa personal indibiduwal nga pagpili nga kini nahitabo. Napanunod nato kini. Sa kamaluluy-on, bisan tuod ang atong orihinal nga mga ginikanan makapasa lamang ug pagkadili-hingpit, sala, ug kamatayon, gitugotan gihapon sila ni Jehova nga makapatungha ug mga anak. Ang kamatayon mikaylap sa tanang tawo, busa nianang maong diwa ang Diyos ‘nagpailalom sa kalalangan sa pagkawalay-pulos.’​—5/1, panid 5.

◻ Nganong makataronganon ang pag-ingon nga adunay umaabot nga ‘pagbarog diha sa balaang dapit’ sa “dulumtanang butang”? (Mateo 24:15)

Sa karaang sumbanan, ‘ang dulumtanang butang nga nagbarog diha sa balaang dapit’ gilambigit sa pag-atake sa Romano ubos ni Heneral Gallus sa 66 K.P. Ang modernong-adlaw nga katumbas sa maong pag-atake​—ang pagsugod sa “dakong kasakitan”—​anaa pa sa unahan. (Mateo 24:21) Busa “ang dulumtanang butang nga magpahinabog pagkaawaaw” dayag nga motindog pa diha sa balaang dapit.​—5/1, mga panid 16, 17.

◻ Sa unsang paagi kaha ang nagtrabahong amahan ug inahan makakaplag ug panahon alang sa ilang mga anak?

Ang inahan nga lapoy na kaayo human sa tibuok adlaw nga pagtrabaho makahangyo sa iyang mga anak sa pagtabang kaniya sa pagluto. Ang amahan nga adunay listahan nga puno sa mga butang nga pagahimoon sa mga hinapos sa semana makaatiman niining mga buluhatona uban sa iyang mga anak.​—5/15, panid 6.

◻ Unsay kinahanglang buhaton niadtong ‘nagalakaw diha sa dalan ni Jehova’? (Jeremias 7:23)

Ang paglakaw diha sa dalan ni Jehova nagkinahanglan ug pagkamaunongon​—usa ka determinasyon nga moalagad lamang kaniya. Nagkinahanglan kinig pagsalig​—bug-os nga pagtuo nga ang mga saad ni Jehova kasaligan ug matinuod. Ang paglakaw diha sa dalan ni Jehova nagkinahanglag pagkamasinugtanon​—pagsunod sa iyang mga balaod nga dili motipas ug paghupot sa iyang taas nga mga sukdanan. (Salmo 11:7)​—5/15, panid 14.

◻ Unsay upat ka hinungdanong mga katungdanan nga matuman sa “mga gasa nga mga tawo”? (Efeso 4:8)

Sila malulotong makapasibo ug balik kanato, mahigugmaong magpalig-on kanato, makaamot ngadto sa atong panaghiusa uban sa kongregasyon, ug maisogong magpanalipod kanato. (Efeso 4:12-14)​—6/1, panid 14.

◻ Unsay atong makat-onan gikan sa pagpakig-uban ni Pablo sa mga usa ka gatos ka indibiduwal nga gihisgotan diha sa mga Buhat ug diha sa iyang mga sulat?

Kita kinahanglan nga kanunayng mag-alagad uban sa organisasyon sa Diyos, uban sa atong lokal nga kongregasyon, ug uban sa atong mga isigkamagtutuo. Kinahanglan nato ang ilang tabang, pagpaluyo, ug paghupay sa maayong mga panahon ug sa malisod nga mga panahon.​—6/1, panid 31.

◻ Unsang tulo ka matang sa pangatarongan ang mahimong gamiton sa pagtabang sa uban sa paghunahuna bahin sa Maglalalang?

Ang pagkatakdo nga makita sa halapad nga uniberso, ang sinugdanan sa kinabuhi dinhi sa yuta, ug ang dili-ikapangulipas nga katalagsaon sa utok sa tawo, uban sa lainlaing katakos niini.​—6/15, panid 18.

◻ Ngano man nga ang pagsabot sa kahulogan sa personal nga ngalan sa Maglalalang hinungdanon kaayo?

Ang ngalan sa Diyos nagkahulogang “Siya Nagpahinabo” ug nagpasiugda nga siya may katuyoan ug motuman niana. Pinaagi sa atong pagkahibalo ug paggamit sa iyang ngalan, mas masabtan nato nga siya nagatuman sa mga saad ug aktibong nagpahinabo sa iyang katuyoan.​—6/15, panid 21.

◻ Sa unsang paagi malangkit ang mga bata diha sa pagtuon sa Bibliya sa pamilya?

Kon posible, hikaya nga ang matag bata dunay iyang kaugalingong Bibliya ug publikasyon nga tun-anan. Ang bata mahimong pasaysayon sa mga hulagway nga makita diha sa materyal nga ginatun-an, ug ang bata mahimong itudlo nang daan sa pagbasa sa usa ka teksto. Ang gulanggulang na mahimong itudlo sa paghisgot sa mga kahigayonan alang sa praktikal nga kapadapatan sa materyal nga ginatun-an.​—7/1, panid 15.

◻ Unsa ang pipila ka tumong nga mahimong ilakip sa usa ka pamilya sa pagpangandam alang sa mga tigom sa kongregasyon?

(1) Matag usa diha sa pamilya andam sa pagkomento sa mga tigom; (2) matag usa maningkamot sa pagkomento diha sa iyang kaugalingong mga pulong; (3) maglakip ug mga kasulatan diha sa mga komento; ug (4) mag-analisar sa materyal uban sa tuyo nga ipadapat sa personal.​—7/1, panid 20.

◻ Unsa ang usa ka yawi sa maayong kaminyoon?

Aron mabuksan ug masinati ang bililhong mga kalipay sa maayong kaminyoon, ang usa ka kinahanglanon mao ang maayong komunikasyon. Kini naglangkit sa pag-ambitay sa mga pagbati ug mga ideya. Ug ang maayong komunikasyon naglakip sa mga butang nga makapalig-on, makapalagsik, ligdong, dalayegon, ug makahupay. (Efeso 4:29-32; Filipos 4:8)​—7/15, panid 21.

◻ Unsa ang ‘dalan ni Jehova’? (Salmo 25:8, 9, 12)

Kanang dalana mao ang dalan sa gugma. Gipasukad kini sa pagbuhat kon unsay matarong sumala sa mga sukdanan sa Diyos. Ang Bibliya nagtawag niining pagpadapat sa gibase-sa-prinsipyong gugma nga “nagalabaw gayod nga paagi.” (1 Corinto 12:31)​—8/1, panid 12.