Nahinumdom Ka Ba?

Nalingaw ka ba sa pagbasa sa dili pa dugayng mga isyu sa Ang Bantayanang Torre? Kon mao, makaplagan nimong makaiikag ang paghinumdom sa mosunod:

◻ Unsay kahulogan sa Gregong pulong pa·rou·si’a nga gigamit sa Mateo 24:3, 27, 37, 39? Ang Expository Dictionary of New Testament Words ni Vine nag-ingon: “PAROUSIA . . . nagpasabot ug pag-abot ug pagkaanaa.” Busa, dili lamang kini ang yugto sa pag-abot kondili sa pagkaanaa nga molungtad gikan sa pag-abot paunahan.​—8/15, panid 11.

◻ Sa unsang paagi ‘kadtong mga adlawa pamub-on’ aron ang “unod” maluwas sa unang siglo, ug sa unsang paagi kini mahitabo sa usa ka mas dakong sukod? (Mateo 24:22)

Niadtong 66 K.P., gipamubo nga wala damha sa mga Romano ang ilang paglikos sa Jerusalem, nga nagtugot sa Kristohanong “unod” sa pag-ikyas. Sa susama, kita makadahom nga sa usa ka paagi pamub-on ang umaabot nga pag-atake sa Dakong Babilonya. Sa ingon ang dinihogang mga Kristohanon ug ang ilang mga kauban mamaluwas gikan sa posibleng kalaglagan.​—8/15, mga panid 18-20.

◻ Unsay angay natong reaksiyon kon ang usa ka tawo mosugod sa pag-ambit sa mga emblema sa Memoryal o mohunong sa pagbuhat niana? Dili kinahanglang mabalaka ang ubang mga Kristohanon. Si Jesus miingon: “Ako ang maayong pastol, ug ako nakaila sa akong mga karnero.” Sama ka masaligon, si Jehova nakaila gayod niadtong kinsa iyang gipili ingong espirituwal nga mga anak. (Juan 10:14; Roma 8:16, 17)​—8/15, panid 31.

◻ Unsay pangunang katuyoan sa Moisesnong Balaod?

Sa panguna, kadto nagtudlo sa mga Israelinhon sa ilang panginahanglan sa Mesiyas, nga maoy maglukat kanila gikan sa ilang makasasalang kahimtang. (Galacia 3:24) Ang Balaod nagtudlo usab ug diyosnong kahadlok ug pagkamasinugtanon, ug kini nagtabang sa Israel nga magpabiling bulag gikan sa dunot nga mga batasan sa mga nasod sa palibot. (Levitico 18:24, 25)​—9/1, panid 9.

◻ Unsay katuyoan sa bag-ong pakigtugon? (Jeremias 31:31-​34)

Kini maoy aron sa pagpatunghag usa ka nasod sa mga hari ug mga saserdote nga magapanalangin sa tanang katawhan. (Exodo 19:6; 1 Pedro 2:9; Pinadayag 5:10)​—9/1, mga panid 14, 15.

◻ Nganong angay natong batasanon ang arte sa pagpangayog pasaylo?

Ang pagpangayog pasaylo makatabang sa pagpagaan sa kasakit nga gipahinabo sa pagkadili-hingpit, ug kini makaalim sa nadaot nga mga relasyon. Ang matag pagpangayo natog pasaylo maoy usa ka pagtulon-an sa pagkamapaubsanon ug magbansay kanato nga mahimong mas sensitibo sa mga pagbati sa uban.​—9/15, panid 24.

◻ Ang tibuok-yutang Lunop ba sa adlaw ni Noe usa ka makasaysayanhong kamatuoran?

Oo. Ang karaang mga sugilanon nga naghisgot sa tibuok-yutang lunop madungog sa tibuok kalibotan, gikan sa kayutaan sa Amerika ngadto sa Australia. Ang kaylap nga paglungtad niini nga tema dugang nagpanghimatuod sa kamatuoran nga nahitabo gayod ang usa ka tibuok-kalibotan nga lunop, sumala sa gitaho sa Bibliya. (Genesis 7:11-​20)​—9/15, panid 25.

◻ Unsay nalangkit sa pagkahimong maabiabihon? (Roma 12:13)

Ang “pagkamaabiabihon” gihubad gikan sa Gregong pulong nga gilangkoban ug duha ka lintunganayng mga pulong nga nagkahulogang “gugma” ug “estranghero.” Busa, ang pagkamaabiabihon sa panguna nagkahulogang “gugma sa mga estranghero.” Apan kini naglangkit ug labaw pa sa gugma nga gibase sa prinsipyo, nga gipakita tungod kay katungdanan. Kini gipasukad sa tiunay nga kahinangop, pagbati, ug pakighigala.​—10/1, panid 9.

◻ Unsa ang pangatarongan ni Pablo bahin sa kaminyoon ug pagkadili-minyo diha sa iyang unang sulat sa mga taga-Corinto, sa kapitulo 7?

Ang kaminyoon dili-supak sa balaod ug, ubos sa pipila ka kahimtang, maayo alang sa uban. Ugaling di-ikalimod nga ang pagkadili-minyo may bentaha alang sa Kristohanong lalaki o babaye nga buot moalagad kang Jehova nga may diyutay rang pagkalinga.​—10/15, panid 13.

◻ Sa unsang paagi ang usa ka ansiyano “magatagana alang kanila nga iyang kaugalingon”? (1 Timoteo 5:8)

Ang usa ka ansiyano angayng ‘motagana alang sa iyang kaugalingon’​—iyang asawa ingon man sa iyang mga anak​—sa materyal, espirituwal, ug sa emosyonal.​—10/15, panid 22.

◻ Sa unsang paagi si Jehova nagahatag ug paghupay sa iyang mga alagad?

Ang balaang espiritu sa Diyos nagalihok ingong usa ka “maghuhupay.” (Juan 14:16, potnot) Ang laing paagi nga ang Diyos nagahatag ug paghupay maoy pinaagi sa Bibliya. (Roma 15:4) Nasayod ang Diyos sa atong tinagsatagsa ka mga panginahanglan ug mogamit kanato sa paghupay sa usag usa, sama kang Pablo nga nakabatog paghupay pinaagi sa taho ni Tito bahin sa mga taga-Corinto. (2 Corinto 7:11-​13)​—11/1, mga panid 10, 12.

◻ Unsay gipasabot sa kahubitan ni Pablo bahin kang Jehova ingong “ang Amahan sa malumong mga kaluoy,” nga makita diha sa 2 Corinto 1:3?

Ang Gregong nombre nga gihubad “malumong mga kaluoy” nagagikan sa usa ka pulong nga gigamit aron ipahayag ang kasubo tungod sa pag-antos sa uban. Busa gihubit ni Pablo ang malumong mga pagbati sa Diyos alang sa tanan Niyang matinumanong mga alagad nga nagaantos sa kasakitan.​—11/1, panid 13.

◻ Unsay nahimo sa pagpuasa sa mga Israelinhon sa tinuig nga Adlaw sa Pagtabon-sa-Sala? (Levitico 16:29-​31; 23:27)

Ang pagpuasa nagpalihok sa mga tawo sa Israel sa paghunahuna ug maayo sa ilang pagkamakasasala ug ang panginahanglan sa pagtubos. Pinaagi niana gipakita nila ang kasubo sa ilang mga sala ug ang paghinulsol atubangan sa Diyos.​—11/15, panid 5.

◻ Unsay gipasabot sa sugo sa mga batan-on: “Hinumdomi, karon, ang imong Dakong Maglalalang”? (Ecclesiastes 12:1)

Usa ka awtoridad nag-ingon nga ang Hebreohanong pulong nga gihubad ug “hinumdomi” kasagarang nagpasabot “sa pagbati sa hunahuna ug sa lihok nga duyog sa paghinumdom.” Busa ang pagsugot niining sugoa nagkahulogan ug labaw pa kay sa paghunahuna lamang bahin kang Jehova. Kini naglangkit sa lihok, sa pagbuhat sa butang makapahimuot kaniya.​—12/1, panid 16.