Apokalipsis—Kanus-a?

SAMA ra kinig nagbasa sa bag-ong pamantalaan​—mga gubat, linog, kamatay, sakit, kagutmanan, krimen, ug kahadlok! Kining tanang mga hitaboa ug daghan pa gitagna sa Bibliya. Sila nagtudlo sa panahon diin kitang tanan nagkinabuhi sa “kataposang mga adlaw.” Kini nagkahulogan sa panahon nga nagatultol sa haduol ug sa gisaad nga apokalipsis. Sa unsang paagi makatino ka niini?

Nagpakakita ka sa katumanan sa mga tagna sa Bibliya karon. “Kinahanglang imong atubangon ang mga kamatuoran,” miingon ang Bibliya, nga “ang kataposang yugto niining kalibotana maoy panahon sa kalisod. Walay lain ang higugmaon sa tawo kondili ang salapi ug ang ilang kaugalingon; sila mapahitas-on, hambogiro, ug mapanamastamason; walay pagtahod sa mga ginikanan, dili mapasalamaton, walay puangod, walay kinaiyanhong pagbati; sila . . . walay hibangkaagan sa tanang kaayo, . . . nangaburot sa pagtagad sa kaugalingon. Ilang unahon ang kalingawan imbes ang Diyos, nga may panagway nga relihiyoso, apan nagapanghimakak sa kamatuoran.” (2 Timoteo 3:1-5, The New English Bible) Wala ka ba makakita niining mga kahimtanga karon?

Daghang buhi karon, tingali usa usab ikaw, nga makahinumdom sa panahon nga dili sama niini ka grabe ang mga kahimtang kaniadto. Ang mga tawo mas masinabuton sa usag usa. Ang mga kabataan mas matinahuron sa ilang mga ginikanan ug sa mga tigulang. Ang mga lalaki, mga babaye, ug kabataan dili mahadlok sa paglakaw sa dalan, bisan sa gabii. Apan kalit nga nabag-o ang panahon. Bisag ang uban niining mga kahimtanga dili kaylap sa imong dapit, siempre ang posibilidad sa usa ka nukleyar nga gubat​—gumikan sa magarbohong pangagpas sa mga tawo ug gahom​—makaapektar sa tanan.

Oo, sama nga ang Diyos pinaagi sa iyang Pulong, ang Bibliya, dayag nga nagtagna bahin sa “kataposang adlaw niining kalibotana,” sa ingon, kita iyang gihatagan ug impormasyon mahitungod sa panahon sa apokalipsis, inig-abot ni Jesus sa pagpakanaog sa silot.

Haduol na Kay sa Gihunahuna sa Uban

“Bag-ong mga butang karon ang akong itagna,” miingon ang Diyos. “Ug sa dili pa sila motungha ako magasulti kaninyo bahin kanila.” (Isaias 42:9, The Jerusalem Bible) Oo, iyang gigambalay alang kanato diha sa Bibliya ang pangunang mga hitabo nga mahitabo sa dili pa ang apokalipsis.

Pananglitan, naghisgot si Jesus ug balita nga ipalanog sa tibuok yuta ug gilangkit kini sa apokalipsis. Siya miingon: “Kining maayong balita sa gingharian iwali sa tanang ginapuy-ang yuta; ug dayon moabot ang kataposan.” (Mateo 24:14) Lakip nianang maong “kataposan” ang apokalipsis. Karon, ang mga Saksi ni Jehova nagagugol ug ginatos ka milyong oras sa usa ka tuig nga makugihong nagasangyaw nianang maong balita sa Gingharian gikan sa pultahan ug pultahan ug sa ubang paagi, kapin sa 200 ka kayutaan sa tibuok globo!

Nagpakitag kaamgiran alang sa kaayohan sa iyang mga sumusunod, gitandi ni Jesus ang panahon nga motultol sa apokalipsis sa panahon sa wala pa ang Lunop sa adlaw ni Noe. Sa mga adlaw ni Noe ang mga tawo okupado kaayo sa pagkaon ug sa pag-inom ug sa paglulinghayaw nga “sila wala magpakabana” sa balita ni Noe bahin sa haduol nga kalaglagan. Sila wala magtagad sa iyang mga pasidaan.​—Mateo 24:37-39.

Pagkadakong kaamgiran sa atong panahon sa mga kahimtang sa wala pa ang Lunop! Ang mga tawo okupado kaayo sa ilang adlaw-adlawng mga buluhaton nga wala sila magpatalinghog sa mga pasidaan ug sa ebidensiya sa nagsingabot nga apokalipsis.

Sa gihapon, ang apokalipsis duol na kaayo kay sa gihunahuna sa uban. Mahitungod sa ilhanan sa kataposang mga adlaw, si Jesus miingon nga “kining kaliwatana dili mahanaw hangtod nga mahitabo kining mga butanga.” (Mateo 24:34) Unsa nga kaliwatan ang gihisgotan ni Jesus?

Ang Kaliwatan sa 1914

Nagpunting sa “malinawon ug mauswagong panahon ni Victoria sa Gran Britanya,” ang miaging Primer Ministro si Harold Macmillan miingon nga iyang gilantaw ‘ang kalibotan nga iyang natawhan’ nga “mas moarang-arang pa.” Apan “sa kalit, ug wala dahoma, sa usa ka buntag sa 1914 ang tanan midangat sa kataposan.” Nagtawag niadto nga kataposan sa “100 ka tuig sa kalinaw ug kauswagan,” si Macmillan nanumdom kon sa unsang paagi ang Gubat sa Kalibotan I nagtimaan sa “kataposan sa usa ka yugto” ug nga “sinugdanan sa kagubot nga padayong nagakahitabo.” Daghan pang uban, ilabina kadtong nakalabang sa 1914 ug buhi gihapon karon, nasayod nga tinuod kini.

Oo, gikuha niining magasina ang pagtagad sa mga magbabasa niini sa nangaging katuigan, sa ebidensiya nga nagtudlo sa 1914 nga kaliwatan sa katawhan ingon nga mao ang kaliwatan nga gihisgotan ni Jesus.a Busa, “kining kaliwatana dili mahanaw hangtod nga mahitabo kining mga butanga” lakip sa apokalipsis.

Bisag kapin na sa 70 ka tuig ang miagi sukad sa 1914, adunay mga tawo nga buhi gihapon nga nakaagi niadtong panahona. Sumala sa The American Legion Magazine sa Disyembre 1984, sa Tinipong Bansa duolan sa 272,000 ka beterano sa Gubat sa Kalibotan I ang buhi gihapon, ug sama usab kini sa ubang mga dapit. Bisan pa, tulin nga nagkakunhod ang ilang gidaghanon. Busa unsa pa kadugaya hangtod nga mangahanaw sa kasaysayan ang kataposang beterano sa Gubat sa Kalibotan I?

Samtang gikuha ang atong pagtagad niining kaihapana sa kataposang mga gutlo sa kaliwatan sa 1914, makatino ba kita bahin sa eksaktong panahon sa apokalipsis?

“Kawatan sa Kagabhion”

Ang Bibliya nagpasidaan: “Ug mahitungod sa mga panahon ug sa mga tempo, . . . nasayod na kamo nga ang adlaw ni Jehova moabot sama sa kawatan sa kagabhion.” (1 Tesalonica 5:1, 2) Sa makataronganon makalaom ka ba nga padalhan ka sa kawatan ug telegrama sa pagpahibalo kon kanus-a siya nagplano sa paglungkab sa imong balay?

Nan, sa tukma, gitambagan kita ni Jesus mahitungod sa eksaktong takna: “Padayon kamo sa pagbantay, padayon sa pagtukaw, kay kamo wala masayod kon kanus-a moabot ang tinudlong panahon.” (Marcos 13:32-37) Bisan pa, kita nahibalo nga nagbatbat si Jesus ug nagkalainlaing mga hitabo nga nagpunting sa kaliwatan sa 1914. Ug gibatbat sa Bibliya ang umaabot nga mga hitabo nga magtimaan sa haduol nga apokalipsis. Unsay atong mapaabot?

Kausaban sa mga Hitabo

Si apostol Pablo miingon: “Sa diha ang mga tawo magakanayon: ‘Kalinaw ug kasegurohan!’ nan sa kalit moabot kanila ang kalaglagan maingon sa pagbati sa kasakit nga moabot sa babaye nga talianak; ug sila dili makaikyas.” (1 Tesalonica 5:3) Busa sa nagapadulong kita sa kinatumyan niining “kataposang mga adlaw,” makalaom kita ug dakong pagtagad nga ihatag sa “Kalinaw ug kasegurohan!” sa katumanan sa mga pulong ni Pablo. Dayon unsa?

Ang mga tagna sa Bibliya nagpakita nga ang relihiyon sa kalibotan, nga gitawag nga “Babilonyang Bantogan,” sa kalit atakehon sa politikal nga mga gahom sa yuta ug modangat sa iyang kalit nga kataposan! (Pinadayag 17:5, 16; 18:10, 17) Kini magtimaan sa sinugdanan sa “dakong kasakitan nga ang ingon wala pa mahitabo sukad sa pagkatukod sa kalibotan hangtod karon.” (Mateo 24:21) Apan sa unsang paagi magaapektar kini niadtong ‘padayong nagtukaw’ ug nagbantay sa apokalipsis?

Ang tinuod nga mga Kristohanon makasalig nga luwason sila ni Jehova. (2 Pedro 2:9) Oo, basta ilhon nila si Jehova ug sa dili mahakogon mag-alagad kaniya, wala silay angay nga kahadlokan sa dihang ang Diyos ug si Kristo moabot sa pagpakig-away sa gubat sa Armageddon.​—Pinadayag 11:17, 18; 16:14, 16.

Sunod, ang apokalipsis moagak sa paglain kang Satanas nga Yawa ug sa iyang dili-makitang panon nga gikan sa katawhan. (Pinadayag 20:2, 3) Oo, ang kasuko nga umaabot mosaylo pa sa pagwala gikan sa yuta sa mga tawong dili buot moalagad sa Diyos. Bisan ang daotang mga espiritu nga karon nagaimpluwensiya sa kalibotan sa atong palibot laglagon. (2 Tesalonica 1:6-9) Nagkahulogan kinig walay kataposang panalangin alang sa mga mangaluwas sa apokalipsis.

Apokalipsis—Pasiunsa sa Paraiso

Mahitungod sa molupyo sa yuta, ang basahon sa Pinadayag (Ang Apokalipsis, Douay) nagsugilon kanato nga ang Diyos “magapahid sa mga luha sa ilang mga mata. Wala na unyay kamatayon ni pagbalata ni paghilak ni kasakit, kay ang daang kahikayan sa mga butang mahanaw na.” (Pinadayag 21:4, New International Version) Imbes usa ka mangiob nga dangatan sa apokalipsis, gipadayag sa Bibliya nga ang tawo makahimo sa pagkinabuhi sa walay kataposan sa paraisong yuta.​—Salmo 37:9-11, 29.

Paraiso? Walay kataposang kinabuhi sa yuta? Hunahunaa lang, hingpit ug mahimsog, malipayong katawhan sa tanang rasa makatagamtam sa kinabuhi sa kabug-osan! ‘Sa unsang paagi moresulta kini sa apokalipsis?’ tingali mangutana ka. Ang Diyos mao ang mipasalig. Sama kini sa pakiglabot sa Diyos sa Israel, nga “walay saad nga napakyas gikan sa tanang maayong saad nga gihimo ni Jehova . . . ; kining tanan nangatuman.”​—Josue 21:45.

Busa, mahitungod sa eksaktong adlaw ug oras sa apokalipsis walay tawo ang nasayod, apan ang ebidensiya nagpakita nga kita nagkinabuhi na sa yugto sa apokalipsis. Kon moabot kini, hinaot nga makaplagan kitang nagmata ug “nagtukaw.” Kay “ang kalibotan mahanaw ug ang mga pangibog niini, apan siya nga nagabuhat sa kabubut-on sa Diyos magapabilin sa walay kataposan.”​—Marcos 13:33, 37; 1 Juan 2:17; Mateo 24:36.

[Mga footnote]