Ang Kataposang mga Adlaw—Unsay Sunod?

“Ako magaingon kaninyo sa kamatuoran, kining kaliwatana dili gayod mahanaw hangtod mahitabo kining tanang butanga.”—Jesu-Kristo, Mateo 24:34, New International Version.

SI Jesus, sa nagsaysay sa “ilhanan . . . sa konklusyon sa sistema sa mga butang,” miingon ngadto sa iyang natingalang mga tinun-an sa mga pulong gikutlo sa ibabaw. (Mateo 24:3) Unsa ba gayod ang iyang gipasabot sa pulong “kaliwatan”? Ug unsang mga hitabo ang mosangko sa kataposan sa sistema sa mga butang? Sa laing mga pulong, unsang mga hitabo ang angay natong pangitaon sa duol nga umaabot?

Unsay Gidugayon Mahimong Molungtad ang Usa ka Kaliwatan?

Ang The American Legion Magazine mipunting nga 4,743,826 ka U.S. nga mga lalaki ug mga babaye ang mientra sa Gubat sa Kalibotan I. Apan niadtong 1984 kapin lamang sa 272,000 ang nagpabiling buhi, ug sila nagkamatay sa aberids nga siyam kada oras. Nagkahulogan ba diay nga ang kaliwatan sa 1914 nagkahanaw na?

Ang Gregong pulong alang sa kaliwatan maoy geneá, nga gigamit ni Mateo, Marcos, ug Lucas sa ilang mga talaan sa mga pulong ni Jesus. Kini mahimong magbaton ug lainlaing kapadapatan sumala sa konteksto. Bisan pa niana, ang The New International Dictionary of New Testament Theology nagabatbat niini ingong: “Kadtong natawo sa samang panahon . . . Nalangkit niini mao ang kahulogan: ang pundok sa mga katalirongan, usa ka panahon.” Ang A Greek-English Lexicon of the New Testament nagaingon: “Ang katibuk-ang gidaghanon niadtong nangatawo sa samang panahon, nga padak-on sa pag-apil sa tanan niadtong buhi sa usa ka panahong kaliwatan, mga katalirongan.” Kining mga kabatbatana nagaapil niadtong tanan nga natawo duolduol sa panahon sa usa ka makasaysayanhong hitabo ug sa tanang buhi sa maong panahon.

Si J. A. Bengel nag-ingon diha sa iyang New Testament Word Studies: “Ang mga Hebreohanon . . . nagaisip sa setentaisingko anyos ingong usa ka kaliwatan, ug ang mga pulong, dili mahanaw, nagapasabot nga sa pagkamatuod ang dakong bahin niadtong kaliwatan [sa adlaw ni Jesus], apan dili ang tibuok niana, ang mahanaw una mamatuman ang tanan.” Kini natuman sa pagkatuig 70 K.P. sa diha nga gilaglag ang Jerusalem.

Sa susama karong adlawa, ang kadaghanan sa kaliwatan sa 1914 nahanaw na. Ugaling, may minilyon pa sa yuta nga nangatawo nianang tuiga o una niana. Ug bisan pag nagkadiyutay na ang ilang gidaghanon, ang mga pulong ni Jesus mamatuman, “kining kaliwatana dili mahanaw hangtod mahitabo kining tanang butanga.” Kini lain pang katarongan sa pagtuo nga haduol na ang samag-kawatan nga adlaw ni Jehova. Busa, unsang mga hitabo ang angay bantayan sa igmat nga mga Kristohanon?

“Kalinaw ug Kasegurohan” sa Dili Madugay?

“Kamo mismo nahibalo nga ang adlaw ni Jehova moabot sama gayod sa usa ka kawatan sa kagabhion. Sa diha nga sila magaingon: ‘Kalinaw ug kasegurohan!’ unya mahitabo dihadiha kanila ang kalit nga kalaglagan.”—1 Tesalonica 5:2, 3.

Sukad gayod sa pagkatapos sa Gubat sa Kalibotan II sa 1945, ang katawhan nagkilingkiling sa ngilit sa gubat samtang ang duha ka magkaatbang nga mga gahom, ang Tinipong Bansa ug Unyon Sobyet, nagbisogay sa usag usa. Ang Cubanong krisis bahin sa missile sa 1962 maoy usa ka peligrosong direktang pag-atubangay. Apan ang Unyon Sobyet nagsibog sa mga missile niini gikan sa Cuba, ug ang Tinipong Bansa mahilomong nagkuha sa mga missile niini gikan sa Turkey. Kadto usa ra sa daghang timailhan sa Bugnaw nga Gubat.

Ang disarmamento o pagmenos sa armas nahimong ulohan sa panaglantugi sa mga dekada ug kasagarang natapos ingong ehersisyo sa propaganda alang sa duha ka nasod. Karon, sa nagkadiyutayng mga bulan sa tagal ni Presidente Reagan ug sa nagkatunaw nga atmospera sa glasnost (pagkaprangka) nga polisa ni Sekretaryo Gorbachev, mopatim-aw nga may seryosong pag-estoryahay bahin sa paghupay sa situwasyon sa armas nukleyar. Kon kaha kini pasiuna sa pagpatungha sa kalinaw ug kasegurohan kono alang sa kalibotan sa katibuk-an, dili ta makakita daan niana. Apan sumala sa tagna sa Bibliya, kana ang gipangita sa mga Kristohanon. Kon kana mahitabo, nan unsa man?

Ang mainampingong mga estudyante sa Bibliya dili malimbongan “sa diha nga sila magaingon: ‘Kalinaw ug kasegurohan!’”—kon kaha kini magagikan sa Hiniusang Kanasoran o kinaugalingon gikan sa dagkong mga gahom mismo. Ang Bibliya tin-awng nagapakita nga ang tinuod nga kalinaw ug kasegurohan moabot lamang gikan sa matarong nga pagmando, ang Ginghariang kagamhanan sa Diyos pinaagi ni Kristo.

Tungod niana ang umaabot tibuok-yutang pahibalo sa kalinaw ug kasegurohan pinaagi sa mga pangulo sa kalibotan mao unyay signal aron ang Diyos molihok, “nga sama gayod sa kawatan sa kagabhion,” nga magsorpresa sa kalibotang walay pagtuo. Oo, ang “kalit nga kalaglagan” mahitabo unya sa eklesiastikanhon ug politikanhong mga gahom nga nagsalikway kang Jehova ug sa iyang mga saksi. Nganong nasayod man kita niini?

Mahukmanong Lihok sa Nagsakay sa Kabayo nga Maputi

Sa pagbalik ngadto sa panan-awon sa upat ka nagkabayo sa Apocalipsis, adunay usa ka nagkabayo nga wala pa nato mahisgoti—ang nahauna, nga nagsakay sa usa ka kabayo nga maputi. Ang magsusulat sa Bibliya nagabatbat kaniya: “Nakita ko, ug, tan-awa! usa ka kabayo nga maputi; ug ang usang nagsakay niana may pana; ug gihatag kaniya ang usa ka purongpurong, ug siya milakaw aron sa pagpanaog ug sa paghuman sa iyang pagpanaog.” Kini mao gihapon ang gibatbat diha sa kapitulo 19 sa Pinadayag: “Tan-awa! usa ka kabayo nga maputi. Ug ang nagsakay niini gitawag Matinumanon ug Matuod, ug siya nagahukom ug nagapakiggubat diha sa pagkamatarong. . . . Ug gikan sa iyang baba nagagula ang usa ka mahait nga hataas nga pinuti, aron siya makasamad sa kanasoran pinaagi niana, ug siya magabantay kanila pinaagi sa usa ka baras nga puthaw.” Ug kinsa ba siya? Ang samang asoy nagasugid kanato nga siya adunay usa ka ngalan nga nahisulat, “Hari sa mga hari ug Ginoo sa mga ginoo.” Kini mao ang gibanhawng Anak sa Diyos, si Kristo Jesus.—Pinadayag 6:2; 19:11-16.

Nan, unsay nagapalihok sa maong “Hari sa mga hari”? Ang usa ka punto naabot diin “ang hari sa amihanan” (batok kapitalistang kampo) ug “ang hari sa habagatan” (ang kapitalistang kanasoran ilalom sa payong sa Tinipong Bansa), nga gipasiugda sa Daniel kapitulo 11, nahidangat sa pagkatabla. (Sumala sa gitagna sa Daniel 11:40, “ang hari sa amihanan” nakaawas na ngadto sa daghang kayutaan, ilabina sukad 1945.)a

Busa, unsa pa ang kinahanglang mahitabo una taposon sa mahukmanong pagbalda sa Diyos ang presenteng sistema sa mga butang?

Ang tagna sa Bibliya nagapaila nga sa usa ka punto ang radikal politikanhong mga elemento sa Tinipong Bansa mobalitok sa hilabtanong mga relihiyon sa kalibotan ug magyagyag kanila, nga magalaglag sa ilang gahom ug pagkontrolar sa katawhang matuotuohon.—Pinadayag 17:16, 17.b

Kining pagkalaglag sa mga elemento sa bakak nga relihiyon sa kalibotan pihong mosangpot sa usa ka pag-atake diha sa mga Saksi ni Jehova. Kini sa baylo mopasugod sa usa ka sumbalik-atake pinaagi sa Hari ni Jehova, ang Nagsakay sa kabayo nga maputi. (Ezekiel 38:10-12, 21-23) Ug unsay ginaingon sa Daniel 2:44 mahitungod sa sangpotanan? “Sa mga adlaw nianang mga haria [politikanhong mga gahom karon] ang Diyos sa langit magatukod sa usa ka gingharian nga dili gayod malaglag. . . . Kini magadugmok ug magalaglag niining tanang gingharian, ug kini mismo mobarog sa mga panahong walay katinoan.” Oo, ang gubat sa Diyos sa Armageddon batok sa makitang politikanhong mga elemento ni Satanas sa yuta mosangpot sa bug-os nga kadaogan alang kang Jehova ug sa iyang Hari sa mga hari.—Pinadayag 16:14-16; 19:17-21.

Unsay mosunod? Aw, ang dugay-nang gitinguha sa mahigugmaon-sa-kalinaw, mahadlokon-sa-Diyos nga mga Kristohanon—ang Milenyong Pagmando sa Ginghariang kagamhanan sa Diyos ibabaw sa masinugtanong katawhan! Dayon mamatuman ang mahimayaong mga saad sa Pinadayag 21:3, 4: “Tan-awa! ang balongbalong sa Diyos magauban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”

Kon buot mo ang dugang impormasyon mahitungod nianang talagsaong mga tagna sa Bibliya ug kon unsay kahulogan niana kanila alang kanato sa tinagsatagsa, palihog pakigkontak sa mga Saksi ni Jehova diha sa inyong dapit o pagsulat ngadto sa mga magpapatik niining magasina diha sa inyong nasod.

[Mga footnote]

[Blurb sa panid 14]

Kaliwatan—“Ang katibuk-an niadtong mangatawo sa samang panahon, nga padak-on sa pag-apil sa tanang buhi sa usa ka panahon.”—“A Greek-English Lexicon of the New Testament”

[Blurb sa panid 16]

Tagna sa Bibliya nagapailang ang radikal politikanhong mga elemento sa Tinipong Bansa mobalitok sa hilabtanong mga relihiyon sa kalibotan

[Letrato sa panid 15]

Human sa Armageddon, sa bag-ong kalibotan sa Diyos sa kalinaw ug pagkamatarong, ‘ang unang mga butang miagi na.’—Pinadayag 21:3, 4