Magbaton ug Maayong Salabotan—Haduol na ang Kataposan
“Ang kataposan sa tanang butang nagkahiduol na. Busa, batoni ninyo ang maayong salabotan ug magtukaw aron kamo manag-ampo.”—1 PEDRO 4:7.
1. (a) Unsang kapakyasan ang nasinati sa usa ka relihiyosong pangulo ug iyang mga sumusunod? (b) Tungod kay wala matuman ang pila ka pagdahom, unsang mga pangutana ang ikasukna?
“AKONG nadawat ang panawag sa Diyos panahon sa pangataposang pag-ampo karong gabhiona. Siya nagsulti nga 116,000 ka tawo mokayab sa langit ug ang mga lubnganan sa 3.7 milyong patayng mga magtutuo mabuksan nga tunong sa kalangitan.” Kana ang gipamulong sa usa ka pangulo sa Mission for the Coming Days sa gabii sa Oktubre 28, 1992, ang gitagna nila nga adlaw sa panudya. Ugaling lang, miabot ang Oktubre 29, walay usa ka tawo ang mikayab sa langit, ug walay lubnganan sa mga patay ang nabuksan. Imbes sakgawon sa langitnong pagbayaw, kadtong mga magtutuo sa adlaw sa panudya sa Korea nakakitag lain rang ordinaryong adlaw. Nangabot ug nanglabay ang mga gitagal nga adlaw sa panudya, apan nagpabiling dili-mahadlokon ang mga tigtagna sa adlaw sa panudya. Unsay buhaton sa mga Kristohanon? Angay ba nga mohunong sila sa pagtuo nga ang kataposan tuling nagasingabot?
2. Kinsay naghisgot ngadto sa mga apostol sa umaabot nga adlaw sa paghukom, ug ubos sa unsang mga kahimtang nga sila nahibalo niana?
2 Sa pagtubag, atong hinumdoman ang higayon nga si Jesus nakigsulting pribado uban sa iyang mga tinun-an. Didto, sa distrito sa Cesarea ni Filipo, amihanan-silangan sa Dagat sa Galilea, nga ang habog nga Bukid sa Hermon mao ang makapaukyab nga paluyo, sila nakadungog kaniya nga prangkang nag-ingon nga siya pagapatyon. (Mateo 16:21) Ubang makapahinuklog nga mga pulong ang misunod. Human pagsaysay kanila nga ang pagkatinun-an nagpasabot sa pagkinabuhi sa padayong pagsakripisyo-sa-kaugalingon, si Jesus nagpasidaan: “Ang Anak sa tawo moanhi diha sa kahimayaan sa iyang Amahan uban sa iyang mga manulonda, ug unya pagabalosan niya ang matag usa tumbas sa iyang kagawian.” (Mateo 16:27) Gihisgotan ni Jesus ang umaabot nga pag-anhi. Hinuon, nianang higayona siya mamahimong usa ka Maghuhukom. Nianang panahona ang tanan mag-agad kon kaha iyang makaplagan ang usa ka tawo nga sa kamatinumanon nagasunod kaniya o wala. Ang paghukom ni Jesus ipasukad sa kagawian, walay sapayan kon unsa ka daghan kaha o wala ing kalibotanong kabtangan ang nabatonan nianang tawhana. Kining kamatuorana kinahanglang itisok sa hunahuna sa iyang mga tinun-an. (Mateo 16:25, 26) Busa, si Jesu-Kristo mismo ang nagsulti sa iyang mga sumusunod nga paaboton ang iyang mahimayaong pag-anhi, uban ang paghukom niini.
3. Giunsa paghulagway ni Jesus ang pagkatino sa iyang umaabot nga pag-anhi?
3 Ang sunod nga gipamulong ni Jesus naghulagway sa pagkatino sa umaabot niyang pag-anhi. Siya mabulot-anong nag-ingon: “Sa pagkatinuod magaingon ako kaninyo nga sa mga nagabarog dinhi ang pipila dili gayod makatilaw ug kamatayon hangtod nga makita na nila nga ang Anak sa tawo moanhi diha sa iyang gingharian.” (Mateo 16:28) Kanang mga pulonga natuman unom ka adlaw sa ulahi. Usa ka masilakong panan-awon sa pagkabalhin sa panagway ni Jesus o transpigurasyon nakapahingangha sa iyang suod nga mga tinun-an. Sa aktuwal ilang nakita nga ang nawong ni Jesus misidlak sama sa adlaw ug ang iyang biste nag-idlak sa kaputi. Ang transpigurasyon maoy pasiunang talan-awon sa kahimayaan ug Gingharian ni Kristo. Makapalig-on gayong pamatuod sa mga tagna maylabot sa Gingharian! Pagkadakong panukmod sa mga tinun-an sa pagbaton ug maayong salabotan!—2 Pedro 1:16-19.
Kon Nganong Hinungdanon Kaayo nga Magbaton ug Maayong Salabotan
4. Nganong ang mga Kristohanon kinahanglang igmat sa espirituwal bahin sa iyang pag-anhi?
4 Walay usa ka tuig sa ulahi, atong makaplagan si Jesus nga naglingkod diha sa Bukid sa mga Olibo, nga nakigsulti na usab nga pribado sa iyang mga tinun-an. Samtang gisud-ong nila ang siyudad sa Jerusalem, iyang gisaysay kon unsa ang ilhanan sa iyang umaabot nga presensiya ug dayon mipasidaan: “Busa, magpadayon sa pagbantay kay kamo wala mahibalo unsang adlawa moanhi ang inyong Ginoo.” Ang iyang mga sumusunod kinahanglang kanunayng igmat kay ang panahon sa iyang pag-anhi wala mahibaloi. Kinahanglan nga sila kanunayng andam alang niana.—Mateo 24:42.
5. Sa unsang paagi ikahulagway ang panginahanglan sa pagtukaw?
5 Sa paagi sa iyang pag-anhi, ang Ginoo maoy sama sa kawatan. Siya nagpadayon sa pag-ingon: “Apan hibaloi ninyo ang usa ka butang, nga kon ang tagbalay nasayod pa kon unsang hugna sa pagbantay sa kagabhion moanha ang kawatan, magpabilin unta siyang nagmata ug dili niya tugotan nga malungkab ang iyang balay.” (Mateo 24:43) Ang usa ka kawatan dili magpahibalo sa tagbalay kon kanus-a siya mangawat; ang panguna niyang hinagiban mao ang kalit nga pag-abot. Busa, ang tagbalay kinahanglan nga kanunayng magbantay. Hinuon, alang sa matinumanong Kristohanon, ang malahutayong pagbantay maoy dili tungod sa mabalak-ong kahadlok. Hinunoa, itukmod kana sa maikagong pagpaabot sa pag-anhi ni Kristo diha sa kahimayaan aron pasudlon ang usa ka Milenyo nga may kalinaw.
6. Nganong kinahanglang magbaton kitag maayong salabotan?
6 Bisan pa sa tanang pagbantay, walay usa nga abanteng makapanaghap sa eksaktong adlaw sa iyang pag-anhi. Si Jesus nag-ingon: “Tungod niini kamo usab kinahanglang mangamdam, kay sa takna nga wala ninyo hunahunaa, moanhi ang Anak sa tawo.” (Mateo 24:44) Mao nga gikinahanglan ang maayong salabotan. Kon maghunahuna ang Kristohanon nga sa usa ka tinong adlaw, si Kristo dili moanhi, basin nianang adlawa mismo siya moanhi! Siyempre, ang maayog-tuyo, matinumanong mga Kristohanon sa nangagi sa sinsero misulay pagtagna kon kanus-a moabot ang kataposan. Apan, ang pasidaan ni Jesus sa masubsob napamatud-ang tinuod: “Mahitungod nianang adlawa ug taknaa walay usa nga nasayod, bisan pa ang mga manulonda sa mga langit ni ang Anak, apan ang Amahan lamang.”—Mateo 24:36.
7. Aron mahimong mga sumusunod ni Kristo, sa unsang paagi kita magkinabuhi?
7 Busa, unsa ang angay natong ihinapos? Aron mahimong mga sumusunod ni Kristo, kinahanglan nga kita kanunayng magkinabuhi nga nagtuong haduol na ang kataposan niining daotang sistema.
8. Unsa ang usa ka timaan sa mga Kristohanon sukad sa kinaunahang mga adlaw sa Kristiyanidad?
8 Kanang tinamdana sa tanang panahon maoy timaan sa mga Kristohanon, sumala sa giila sa sekular nga mga historyano ug sa mga eskolar sa Bibliya. Pananglitan, ang mga editor sa The Translator’s New Testament, ubos sa pulong “Day” diha sa ilang glossary, nag-ingon: “Ang mga Kristohanon sa B[ag-ong] T[estamento] nga panahon nagkinabuhi nga nagpaabot sa Adlaw (nga mao ang panahon) sa dihang ang presenteng kalibotan uban sa tanan niining pagkadaotan pagataposon ug si Jesus mobalik sa yuta aron sa paghukom sa tanang katawhan, mag-inagurar sa usa ka bag-ong panahon sa kalinaw ug mosugod sa iyang pagmando sa tibuok kalibotan.” Ang Encyclopædia Britannica nag-ingon: “Ang talagsaong tibuok-yutang pag-uswag sa Kristiyanidad laktud nga nalangkit sa Kristohanong pagpaabot sa panahon sa kataposan, diha sa dagway sa duol nga pagpaabot sa pagbalik ni Kristo. Ang Kristohanong pagpaabot sa panahon sa kataposan wala gayod malangkobi sa pasibo lamang nga pangandoy sa umaabot nga Gingharian sa Diyos.”
Kon Unsay Kahulogan sa Pagbaton ug Maayong Salabotan
9. Bisan pag sayop ang pipila sa mga pagdahom ni Pedro mahitungod sa Mesiyas, nganong kita makapabiling masaligon?
9 Si apostol Pedro, mga 30 ka tuig human niadtong masandurotong mga pakigkabildo ni Jesus uban sa labing suod niyang mga tinun-an, wala mohunong sa pagpaabot sa pag-abot sa kataposan. Bisan pag sayop ang iya ug sa iyang kaubang mga tinun-an nga unang mga pagpaabot sa Mesiyas, siya nagpabiling masaligon nga ang gugma ug gahom ni Jehova maoy migarantiya sa katumanan sa ilang paglaom. (Lucas 19:11; 24:21; Buhat 1:6; 2 Pedro 3:9, 10) Siya mipahayag sa punto nga kanunayng madungog diha sa tibuok Gregong Kasulatan sa nag-ingon siya: “Haduol na ang kataposan sa tanang butang.” Dayon iyang giawhag ang kaubang mga Kristohanon: “Busa, magbaton ug maayong salabotan ug magtukaw aron kamo manag-ampo.”—1 Pedro 4:7.
10. (a) Unsay kahulogan sa pagbaton ug maayong salabotan? (b) Unsay nalangkit sa pagsabot sa mga butang diha sa ilang tukmang relasyon sa kabubut-on sa Diyos?
10 Ang “pagbaton ug maayong salabotan” wala magpasabot nga pagkaalisto gikan sa kalibotanong panglantaw. Si Jehova nag-ingon: “Akong pagahanawon ang kaalam sa mga tawong manggialamon, ug ang hait nga salabotan sa mga tawong hait ug panabot akong igapadaplin.” (1 Corinto 1:19) Ang pulong nga gigamit ni Pedro mahimong magpasabot “nga magmaugdang sa hunahuna.” Kining espirituwal nga pagkaugdang nalangkit sa atong pagsimba. Busa, kay lig-on ug hunahuna, masabtan nato ang mga butang sa ilang tukmang relasyon sa kabubut-on ni Jehova; masabtan nato kon unsang mga butanga ang hinungdanon ug unsay dili. (Mateo 6:33, 34) Bisan pag haduol na ang kataposan, kita wala maganoy sa puno sa paukyab nga estilo sa kinabuhi; ni kita dili matinagdanon sa panahong atong gipuy-an. (Itandi ang Mateo 24:37-39.) Hinunoa, kita gimandoan sa kamakasaranganon ug katimbang sa panghunahuna, kinaiya, ug kagawian, nga gipahayag pag-una ngadto sa Diyos (“magtukaw aron kamo manag-ampo”) ug dayon ngadto sa atong silingan (“magbaton ug mainitong gugma alang sa usag usa”).—1 Pedro 4:7, 8.
11. (a) Unsay kahulogan nga “nabag-o sa gahom nga nagapalihok sa [atong] hunahuna”? (b) Sa unsang paagi ang bag-ong gahom sa panghunahuna motabang kanato sa paghimog maayong mga desisyon?
11 Ang pagbaton ug maayong salabotan naglangkit sa atong pagka “nabag-o sa gahom nga nagapalihok sa [atong] hunahuna.” (Efeso 4:23) Nganong nabag-o? Sanglit kita nakapanunod sa pagkadili-hingpit ug nagpuyo sa makasasalang mga silinganan, ang atong hunahuna gigamhan sa kiling nga batok sa espirituwalidad. Kanang gahoma kanunayng magduso sa mga hunahuna ug sa mga kiling tunong sa materyalistikanhon, mahakogong direksiyon. Busa, sa dihang adunay tawo nga mahimong Kristohanon, gikinahanglan niya ang bag-ong gahom, o mamandoong tinamdan sa hunahuna, nga magduso sa iyang mga hunahuna sa hustong direksiyon, sa espirituwal nga direksiyon, paingon sa kaandam nga mosakripisyo sa kaugalingon. Busa, kon papilion, pananglitan, sa edukasyon, karera, panarbaho, kalingawan, lulinghayaw, estilo sa sinina, o bisan unsa man tingali kana, ang una niyang kiling mao ang paghunahuna sa butang gikan sa espirituwal inay sa unodnon, mahakogong punto de vista. Kining bag-ong tinamdan sa hunahuna mopahimong mas sayon sa paghukom sa mga butang uban sa maayong salabotan ug uban sa kaamgohan nga haduol na ang kataposan.
12. Sa unsang paagi kita makapabiling “mahimsog sa pagtuo”?
12 Ang pagbaton ug maayong salabotan nagpasabot nga kita anaa sa maayong espirituwal nga kahimtang. Sa unsang paagi makapabilin kitang “mahimsog sa pagtuo”? (Tito 2:2) Kinahanglang pakan-on nato ang atong kaisipan sa tukmang matang sa pagkaon. (Jeremias 3:15) Ang makanunayong pagkaon sa Pulong sa Diyos sa kamatuoran nga inabagan sa paglihok sa iyang balaang espiritu motabang nato sa paghupot nga padayon sa atong espirituwal nga katimbang. Busa, ang pagkaregular sa personal nga pagtuon, ingon man sa pag-alagad sa kanataran, pag-ampo, ug Kristohanong pakig-uban, hinungdanon.
Kon sa Unsang Paagi ang Maayong Salabotan Manalipod Kanato
13. Sa unsang paagi ang pagbaton ug maayong salabotan manalipod kanato batok sa paghimog binuang nga mga sayop?
13 Ang maayong salabotan makapanalipod kanato gikan sa paghimog binuang nga sayop nga makahikaw kanato sa kinabuhing walay kataposan. Sa unsang paagi posible kini? Si apostol Pablo naghisgot mahitungod sa “ang kasugoan sa hunahuna.” Aron ang usa ka tawo magmahimsog sa pagtuo, ang maong kasugoan sa hunahuna pagamandoan sa butang nga gikalipayan niya, nga mao “ang kasugoan sa Diyos.” Tinuod, ang “kasugoan sa sala” nagapakig-away sa kasugoan sa hunahuna. Bisan pa niana, ang Kristohanon mahimong magmadaogon uban sa tabang ni Jehova.—Roma 7:21-25.
14, 15. (a) Unsang duha ka impluwensiya ang nagbugnoay sa paggahom sa hunahuna? (b) Sa unsang paagi kita makadaog sa bugno sa hunahuna?
14 Si Pablo nagpadayon pinaagi sa pagtandi sa kalainan sa hunahuna nga gimandoan sa makasasalang unod, kansang tumong mao ang kinabuhing mapatuyangon sa kaugalingon, ug sa hunahunang gimandoan sa espiritu sa Diyos, kansang tumong mao ang kinabuhing nagsakripisyo-sa-kaugalingon diha sa pag-alagad kang Jehova. Si Pablo misulat sa Roma 8:5-7: “Kadtong nagpahiuyon sa unod nagbutang sa ilang mga hunahuna sa mga butang sa unod, apan kadtong nagpahiuyon sa espiritu diha sa mga butang sa espiritu. Kay ang paghunahuna sa unod nagkahulogan sa kamatayon, apan ang paghunahuna sa espiritu nagkahulogan sa kinabuhi ug pakigdait; tungod kay ang paghunahuna sa unod nagkahulogan sa pagpakig-away sa Diyos, kay kini wala magpasakop sa kasugoan sa Diyos, ni, sa pagkatinuod, kini makapasakop.”
15 Si Pablo, sa bersikulo 11, dayon misaysay kon sa unsang paagi ang hunahuna nga makigtambayayong sa balaang espiritu makadaog sa panagbugno: “Kon, karon, ang espiritu niya nga nagbanhaw kang Jesus gikan sa mga patay nagpuyo diha kaninyo, siya nga nagbanhaw kang Kristo Jesus gikan sa mga patay magbuhi usab sa inyong himalatyong mga lawas pinaagi sa espiritu nga nagpuyo diha kaninyo.”
16. Ang pagbaton ug maayong salabotan manalipod kanato batok sa unsang mga panghaylo?
16 Busa, pinaagi sa pagbaton ug maayong salabotan, kita dili mahaylo sa nahadiindiin nga mga panghaylo niining kalibotana, nga gitiman-an sa way-sukod nga pagpatuyang-sa-kaugalingon sa tanang matang sa mga kalingawan, materyal nga mga butang, ug seksuwal nga kahilayan. Ang atong maayong salabotan momando kanato sa “pagkalagiw gikan sa pakighilawas” ug sa paglikay sa malaglagong mga sangpotanan niini. (1 Corinto 6:18) Ang atong maayong tinamdan sa hunahuna motukmod nato nga ibutang pag-una ang intereses sa Gingharian ug manalipod sa atong panghunahuna sa dihang pagatentalon kita sa mga tanyag sa sekular nga karera nga makapahuyang sa relasyon nato uban kang Jehova.
17. Sa unsang paagi gipakita sa usa ka payunir nga igsoong babaye ang maayong salabotan sa dihang giatubang niya ang mga obligasyong panalapi?
17 Pananglitan, sa usa ka nasod sa tropiko sa Habagatan-silangang Asia, adunay usa ka batan-ong igsoong babaye nga nagbutang nga kinaunhan sa hunahuna sa intereses sa Gingharian. Iyang naugmad ang gugma sa bug-os-panahong pag-alagad. Nianang nasora ang kadaghanang trabaho magkinahanglag unom o pito ka adlaw sa bug-os-panahong pagtrabaho. Human mograduwar sa unibersidad, ang iyang amahan, kinsa dili Saksi ni Jehova, nagdahom nga siya makasapig dako alang sa pamilya. Apan kay may dakong tinguhang mopayunir, siya nangitag inoras nga trabaho ug misugod pagpayunir. Tungod niadto nasuko ang iyang amahan, nga mibahad sa paglabay sa iyang mga butang sa dalan. Tungod sa sugal, siya dakog utang, ug iyang gidahom nga ang iyang anak babaye mao ang mobayad sa iyang mga utang. Ang manghod niyang lalaki nagtungha sa usa ka unibersidad, ug tungod sa mga utang, walay kuwartang ikabayad sa iyang tuwisyon. Misaad ang manghod nga lalaki nga kon ang iyang igsoong babaye motabang kaniya, siya mao ang mag-atiman sa pamilya inigkatrabaho niya. Ang iyang kasingkasing nabahin tali sa iyang gugma sa iyang manghod nga lalaki ug sa iyang gugma sa payunir nga pag-alagad. Human palandonga pag-ayo ang butang, siya mihukom nga ipadayon ang pagpayunir ug mangitag laing trabaho. Ingong tubag sa iyang mga pag-ampo, siya nakakaplag ug maayong trabaho diin siya makaarang dili lamang sa pagtabang sa iyang pamilya ug sa iyang manghod nga lalaki sa panalapi kondili makapadayon usab sa iyang unang gugma, ang payunir nga pag-alagad.
Tinguhaa ang Tabang ni Jehova sa Padayong Paghupot ug Maayong Salabotan
18. (a) Nganong ang pila ka tawo tingali mobatig kaluya? (b) Unsang mga kasulatan ang tingali makapalipay niadtong nangaluya?
18 Ang pila ka sumusunod ni Kristo basin malisdan sa pagpadayon paghupot sa ilang maayong salabotan. Nagakaupos na tingali ang ilang pailob kay kining daotang sistema sa mga butang karon nagalungtad pang mas dugay kay sa gidahom nila. Basin sila maluya bahin niini. Bisan pa niana, moabot gayod ang kataposan. Gisaad kana ni Jehova. (Tito 1:2) Ug mao man usab ang gisaad niyang yutang Paraiso. Gipasalig kana ni Jehova. (Pinadayag 21:1-5) Inig-abot sa bag-ong kalibotan, aduna unyay “usa ka kahoy sa kinabuhi” alang sa tanang nagpadayon sa paghupot sa ilang maayong salabotan.—Proverbio 13:12.
19. Sa unsang paagi padayong mahuptan ang maayong salabotan?
19 Sa unsang paagi magpadayon kita sa paghupot ug maayong salabotan? Tinguhaa ang tabang ni Jehova. (Salmo 54:4) Pabilin nga suod kaniya. Pagkadako sa atong kalipay nga gitinguha ni Jehova ang pagpakigsuod kanato! “Makigsuod kamo sa Diyos, ug siya mosuod kaninyo,” nagsulat ang tinun-ang si Santiago. (Santiago 4:8) Si Pablo nag-ingon: “Magkalipay kanunay sa Ginoo. Sa makausa pa ako magaingon, Magkalipay! Ipadayag ang inyong pagkamakataronganon sa tanang tawo. Ang Ginoo haduol na. Ayaw kamo kabalaka mahitungod sa bisan unsa, apan sa tanang butang pinaagi sa pag-ampo ug pangaliya uban ang pagpasalamat ipahibalo ang inyong mga hangyo sa Diyos; ug ang pakigdait sa Diyos nga molabaw sa tanang hunahuna manalipod sa inyong mga kasingkasing ug sa inyong mga gahom sa panghunahuna pinaagi ni Kristo Jesus.” (Filipos 4:4-7) Ug sa dihang ang mga kabug-at niining himalatyong sistema sa mga butang morag hilabihan nga dili na madaog sa pagpas-an, itugyan kana kang Jehova, ug siya mismo maglig-on kanimo.—Salmo 55:22.
20. Sa unsang dalan angay nga kita mopadayon, sumala sa 1 Timoteo 4:10?
20 Oo, ang kataposan haduol na, busa magbaton ug maayong salabotan! Kana maayong tambag 1,900 ka tuig kanhi; kini hinungdanon kaayong tambag karong adlawa. Magpadayon ta sa paggamit sa atong maayong mga katakos sa panghunahuna aron dayegon si Jehova samtang siya magpadayon sa paggiya kanatong luwas ngadto sa iyang bag-ong kalibotan.—1 Timoteo 4:10.
Unsay Imong Tubag?
◻ Unsay maayong salabotan?
◻ Nganong hinungdanon kaayo ang pagbaton ug maayong salabotan?
◻ Sa unsang paagi kita nabag-o sa gahom nga nagapalihok sa atong hunahuna?
◻ Unsang makanunayong bugno ang kinahanglang atong bugnoon diha sa atong mga hunahuna?
◻ Sa unsang paagi padayon natong mahuptan ang maayong salabotan?
[Hulagway sa panid 15]
Ang pagpakigsuod sa Diyos diha sa pag-ampo motabang kanato sa paghupot nga padayon sa maayong salabotan
[Hulagway sa panid 17]
Kay nagbaton ug maayong salabotan, kita dili mahaylo sa mga panghaylo niining kalibotana