Mga Pangutana Gikan sa mga Magbabasa

◼Nagtuo ba ang mga Kristohanon sa unang siglo nga ang kataposan niining daotang sistema moabot sa panahon sa ilang kinabuhi?

Ang mga sumusunod ni Jesus sa unang siglo maikagon kaayo nga moabot na ang kataposan. Sumala sa makita nato, ang pipila nila mihinapos nga ang kataposan duol na, nga moabot dayon kana. Kinahanglang matul-id ang ilang hunahuna. Apan tino nga dili daotan nga ang mga Kristohanon, niadto o karon, sinserong magtuo nga ang gitagnang kataposan pagaisipon nga duol na ug sa pagkinabuhi matag adlaw uban nianang kaamgohan.

Sa pagtubag sa pangutana sa iyang mga tinun-an mahitungod sa “ang ilhanan” sa iyang presensiya, si Jesus nagpasidaan kanila: “Busa, magtukaw kamo, tungod kay wala kamo mahibalo kon unsang adlawa moabot ang inyong Ginoo.” (Mateo 24:3, 42) Ang maong kaigmat angay magaapektar sa ilang mga lihok, kay si Kristo midugang: “Tagda ang inyong kaugalingon nga ang inyong mga kasingkasing dili gayod mabug-atan sa sobrang pagkaon ug kusog nga pag-inom ug sa mga kabalaka sa kinabuhi, ug sa hinanali kanang adlawa mahidangat kaninyo . . . Busa, magtukaw kamo, nga sa tanang panahon mangaliyupo aron kamo molampos sa pag-ikyas niining tanang butang nga tinong mahitabo, ug sa pagbarog sa atubangan sa Anak sa tawo.”​—Lucas 21:34-36.

Matikdi nga gihatag ni Jesus kining tambaga tapos gayod sa paglaraw sa mga hitabo nga maglangkob sa “ang ilhanan.” Busa ang mga apostol gipasidan-an sa kamatuoran nga ang pila ka butang kinahanglang mahitabo nga makasaysayanhon sa dili pa ang kataposan. Bisan pa niana, pila ka semana sa ulahi, sila nangutana sa nabanhawng si Jesus: “Ginoo, ipasig-uli mo ba ang gingharian sa Israel karong panahona?” Siya mitubag: “Dili inyo ang pagkahibalo sa mga panahon o mga yugto sa panahon nga gimbut-an sa Amahan.”​—Buhat 1:6, 7.

Atong makita gikan niini nga ang labing suod nga mga sumusunod ni Jesus maikagon kaayo nga moabot dayon ang kataposan nga nahikalimot sila sa bag-o pa niyang gisulti kanila mahitungod sa pisikal nga ebidensiya nga nahitabo panahon sa iyang presensiya sa dili pa ang maong kataposan.

Makaplagan nato ang laing timailhan sa ilang kaikag diha sa mga sulat ni apostol Pablo ngadto sa mga Kristohanon sa Tesalonica. Mga 50 K.P. siya misulat: “Mahitungod sa mga panahon ug sa mga yugto sa panahon, mga igsoon, dili kinahanglan nga pagasulatan kamo. Kay kamo mismo nahibalo nga ang adlaw ni Jehova magaabot nga sama gayod sa usa ka kawatan sa kagabhion. Busa, dili kita mangatulog sama sa uban, apan magpabilin kitang magtukaw ug magmabinantayon.” (1 Tesalonica 5:1, 2, 6) Gisabot sa pila niadtong dinihogan-sa-espiritung mga Kristohanon nga ang presensiya ni Jesus (uban sa adlaw ni Jehova sa paglaglag sa mga daotan) moabot dayon niadto, nga dihadiha.

Apan dili kana tinuod. Ngani, gisulatan sila ni Pablo sa ikaduhang sulat: “Mahitungod sa presensiya sa atong Ginoong Jesu-Kristo ug atong pagkatigom nganha kaniya, nagahangyo kami kaninyo nga dili daling matarog gikan sa inyong pangatarongan ni maukyaban tungod kaha sa usa ka dinasig nga kapahayagan o pinaagig binabang mensahe o pinaagig usa ka sulat nga daw gikan kanamo, maylabot nga ang adlaw ni Jehova ania na. Ayaw itugot nga kamo matental sa bisan unsang paagi, tungod kay kini dili moabot gawas nga moabot una ang pagbulag sa pagtuo ug ang tawo sa kalapasan mapadayag.”​—2 Tesalonica 2:1-3.

Kini wala magkahulogan nga dili kaayo nila ibutang sa buot ang presensiya ni Jesus ug ang kataposan sa sistema. Sa paglabay sa matag tuig, ang pasidaan ni Jesus nahimong labi pang makapatandog: “Busa, magpabiling nagatukaw tungod kay kamo wala mahibalo kon unsang adlawa moabot ang inyong Ginoo.”

Busa, mga lima ka tuig tapos sa pagsulat sa Ikaduhang Tesalonica, si Pablo misulat: “Takna na nga kamo mahigmata gikan sa pagkatulog, kay karon ang atong kaluwasan labi pang haduol kay sa panahon nga kita nahimong mga magtutuo. Ang gabii halalom na kaayo; ang adlaw nagkahiduol na. Busa atong isalikway ang mga buhat nga iya sa kangitngit ug atong isul-ob ang mga hinagiban sa kahayag.” (Roma 13:11, 12) Tapos sa lima pa ka tuig, si Pablo nagtambag sa Hebreohanong mga Kristohanon: “Gikinahanglan ninyo ang pagkamainantoson, aron nga, tapos ninyo mabuhat ang kabubut-on sa Diyos, kamo makadawat sa katumanan sa saad. Kay ‘sa makadiyut,’ ug ‘siya nga moanhi moabot ug dili magalangan.’” (Hebreohanon 10:36, 37) Dayon, diha sa bersikulo una ang kataposan sa Pinadayag, si apostol Juan misulat: “Ang nagapamatuod niining mga butanga nagaingon, ‘Oo; ako moanha sa madali.’ Amen! Umari ka, Ginoong Jesus.”​—Pinadayag 22:20.

Sa walay duhaduha, ang usa ka Kristohanon niadto dili ingong dili makataronganon nga mobati nga ang kataposan moabot sa panahon sa iyang kinabuhi. Ug kon pinaagi sa aksidente o kinaiyanhong mga palakaw, siya namatay man ugaling sa wala pa ang kataposan, siya nagkinabuhi gayod uban ang angay nga pagbati sa pagkadinalian nga gipatungha ni Jesus ug sa dinasig nga Kasulatan.

Kining tanan labi pang mapadapat kanato, sa ulahing takna nga atong ginapuy-an. Sa pagpahayag pag-usab sa mga pulong ni Pablo, dili kita makalimod nga ‘karon ang atong kaluwasan haduol na kay sa panahon nga ang unang mga Kristohanon nahimong mga magtutuo ug bisan kay sa panahong kita nahimong mga magtutuo. Ang gabii halalom na; ang adlaw nagkahiduol na.’

Kita nakakita diha sa kasaysayan sugod sa Gubat sa Kalibotan I sa pisikal nga ebidensiya nga nagbuntaog, sa ebidensiya nga nagapamatuod nga kita ania na sa konklusyon sa sistema sa mga butang. Inay mapuliki sa pagtaghap kon kanus-a mahitabo ang kataposan, kita angay mapuliki sa pagwali sa maayong balita, nga makaluwas sa atong mga kinabuhi ug sa kinabuhi sa daghan pang uban.​—1 Timoteo 4:16.

Kita may igong katarongan sa pagdahom nga kining pagwaliha matapos sa atong panahon. Nagkahulogan ba kini sa dili pa sa sinugdan sa bag-ong bulan, bag-ong tuig, bag-ong dekada, bag-ong siglo? Walay tawong nahibalo, kay si Jesus miingon nga ‘bisan ang mga manulonda sa mga langit’ wala mahibalo niana. (Mateo 24:36) Dugang pa, dili kinahanglan nga kita mahibalo, samtang kita nagapadayon sa pagbuhat kon unsay gisugo kanato sa Ginoo nga niana itumong nato ang bug-os nga pagtagad. Ang labing hinungdanon mao nga ang kabubut-on ug buluhaton sa Diyos matuman ug kita makabaton sa labing bug-os nga bahin niana. Sa ingon kita “basin molampos sa pag-ikyas niining tanang butang nga mahitabo, ug sa pagbarog sa atubangan sa Anak sa tawo.”​—Lucas 21:36.