Ang Ilhanan​—Ikaw ba Nagapatalinghog Niini?

“MAOY among tinguha nga ang tanang nasod makapahimulos ug kauswagan, kaayohan ug kalipay. Ang kalamposan niini makita sa pagbaton ug walay nukleyar, dili-mapintas nga kalibotan.”​—Perestroika, sa pangulo sa Sobyet si Mikhail Gorbachev.

Makataronganon, daghan ang nagduhaduha sa katakos sa tawo sa pagpatunghag maong mga kahimtang sa kalibotan. Laing pangulo, si Jesu-Kristo, misaad ug mas dako nga butang​—usa ka paraisong yuta nga diin ibaliskad ang paagi sa kamatayon. (Mateo 5:5; Lucas 23:43; Juan 5:28, 29) Sa pagkamatuod, ang paagi nga kini makab-ot namo ang pagpangilabot sa Diyos. Ingong tubag sa pangutanang “kanus-a” moabot ang maong pagpangilabot, si Jesus miingon: “Ang gingharian sa Diyos moabot nga dili pagaubanan sa mga ilhanan nga mapaniid.” Sa una, ang maayong mga tigpaniid lang nga may mahulagwayong mata sa agila ang makamatikod niana. (Lucas 17:20, 37) Ngano man?

Kon Nganong Nagkinahanglan Kitag Ilhanan

Sukad sa iyang pagkayab sa langit, si Jesu-Kristo “nagpuyo sa kalayo nga dili maduol, ug walay nakakita ug dili arang makita sa mga tawo.” (1 Timoteo 6:16) Busa, ang literal nga mga mata sa tawo dili makakita kaniya pag-usab. Si Jesus miingon bahin sa kataposan sa iyang yuntan-ong kinabuhi: “Hamubo na lamang ang panahon ug unya ang kalibotan dili na makakita kanako.” (Juan 14:19) Siya makita lamang sa mahulagwayong paagi.​—Efeso 1:18; Pinadayag 1:7.

Apan, si Jesus miingon nga imposible alang sa iyang mga disipulo sa pagsabot kon kanus-a magsugod ang pagmando sa Gingharian sa Diyos. Sa unsang paagi? Pinaagi sa usa ka ilhanan. Sa pagtubag sa pangutana, “Unsay ilhanan sa imong presensiya?” Gilatid ni Jesus ang makitang ebidensiya sa iyang umaabot dili-makitang pagmando.​—Mateo 24:3.

Lakip sa ilhanan mao ang usa ka sambingay nga nagpakita kon unsang matanga sa mga tawo ang makapahimulos gikan niana. “Diin gani ang mga patay,” miingon si Jesus, “anaa usab didto managtapok ang mga agila.” (Mateo 24:28) Ang tanan nga buot maluwas sa kataposan sa presenteng sistema sa mga butang ngadto sa bag-ong kalibotan sa Diyos kinahanglan ‘makigtigom’ ug pahimuslan ang espirituwal nga pagkaon uban sa samag-agila nga “mga pinili” ni Kristo.​—Mateo 24:31, 45-47.

Pagbantay Batok sa Pagkadili-mapailobon

Walay tawo ang makahibalo sa kataposan sa presente daotang sistema. “Mahitungod sa maong adlaw o takna,” miingon si Jesus, “walay nasayod niini, bisan pa ang mga manulonda sa langit, bisan ang anak sa Tawo, gawas sa Amahan lamang.”​—Marcos 3:32, 33.

Mahimo ba nga ang ilhanan mahitabo sa gilawigon sa daghang tawhanong mga kaliwatan? Dili. Ang ilhanan mahitabo sa usa ka partikular nga kaliwatan. Ang samang kaliwatan nga nagpakakita sa sinugdanan sa ilhanan makasaksi usab sa kinatayoktokan niini diha sa “dakong kasakitan nga wala pa mahitabo sukad sa sinugdan sa kabuhatan.” Ang tulo ka manalaysay, si Mateo, Marcos, ug Lucas, mirekord sa pasalig ni Jesus bahin niini.​—Marcos 13:19, 30; Mateo 24:13, 21, 22, 34; Lucas 21:28, 32.

Apan, dunay kapeligrohan nga mahimong dili-mapailobon. Kapitoan-ug-upat na ka tuig ang milabay sukad sa pagsugod sa Gubat Sa Kalibotan I sa 1914. Sumala sa tawhanong panglantaw, daw dugay ra kaayo kini nga panahon. Apan ang ubang mga Kristohanon nga dunay samag agila nga mata nga nakakita sa Gubat sa Kalibotan I buhi pa. Ang ilang kaliwatan wala pa mahanaw.

Sa dihang iyang gihatag ang ilhanan, si Jesus mipasidaan sa kapeligrohan sa pagkahimong dili-mapailobon. Siya naghisgot bahin sa mga indibiduwal nga moingon sa ilang kasingkasing: “Magdugay pa ang akong agalon.” Si Jesus mipakita nga ang maong mga pagbati, kon dili masumpo, motultol ug binuang nga buhat. (Mateo 24:48-51) Ang mga apostoles ni Kristo dunay dugang ikasulti bahin niini.

“Mga Mayubiton”

Sumala sa magsusulat sa Bibliya nga si Judas, gipalanog sa apostoles ni Kristo ang mosunod nga pasidaan: “Sa kataposang mga adlaw may manungha nga mga mayubiton, nga managpahiuyon sa ilang kaugalingong dili-diyosnon nga mga pangibog.”​—Judas 17, 18.

Ang pangibog sa kinabuhi diha sa mahinlo bag-ong kalibotan dali nga mapulihan sa “dili-diyosnon nga mga pangibog.” Ilabinang peligroso kini karong adlawa tungod sa mga paagi sa ekspresyon ug sa komunikasyon sa kalibotan. Wala pa sukad sa tawhanong kasaysayan nga ginaparada ang kapintasan, espiritu, ug seksuwal nga imoralidad sa ingon nga sukod. Sila sagad mao ang tama ug sila makita diha sa daghang mga programa sa TV, sa mga video, ug paanunsiyo, mga libro, ug mga magasin.

Ang ilhanan nagtudlo sa kataposan sa maong pagkadili-diyosnon. Siyempre, ang ubang mga tawo nga dunay pangibog sa dili-diyosnong mga butang moyubit sa ilhanan. Sumala sa gitagna, sila mangatarongan nga ang “tanang butang nagapabilin nga mao ra gihapon sukad pa sa pagkatukod sa kalibotan.”​—2 Pedro 3:3, 4.

“Mobugnaw ang Gugma”

Dili pa dugay, usa ka 75-anyos nga Amerikanong awtor, si Paul Bowles, giinterbiyo sa magasaing Newsweek. Mitubag sa pangutana, “Unsay imong panglantaw sa kalibotan?” si Bowles mitubag: “Ang kalibotan nabungkag sa moral nga diwa. Wala nay matinud-anon sama sa 60 ka tuig kanhi. Ginatamod niadto ang sibilisadong kinabuhi; bililhong kinaiya kadto sa atong Kasadpang kultura. Karong panahona wala nay [nagtagad]. Dunay hingaping pasiugda usab karon sa salapi.”

Kining kahimtanga sama gayod sa gitagna sa Bibliya. Si Jesus mitagna: “Tungod kay mosanay man ang kadaotan mobugnaw ang gugma sa kadaghanan.” (Mateo 24:12; 2 Timoteo 3:1-5) Sa dihang mouswag ang kagalo ug kahakog, ang gugma sa Diyos mokunhod. Dugang ug dugang mga tawo nagapakita nga ilang giuna ang ilang kaugalingong mga pangibog kay sa mga balaod sa Diyos pinaagi sa pag-apil sa kriminal nga mga buhat, terorismo, malimbongong mga batasan sa negosyo, seksuwal nga imoralidad, ug pag-abuso sa droga.

Ang uban nakaamgo sa katumanan sa ilhanan apan napakyas sa paglihok maylabot niana tungod kay nalinga kaayo sila sa pagpahimuot sa ilang kaugalingon. Sa laing bahin, ang pagpatalinghog sa ilhanan nagkinahanglan sa paglahutay sa pagpakitag dili-mahakogong gugma sa Diyos ug sa silingan.​—Mateo 24:13, 14.

“Mga Kabalaka sa Kinabuhi”

Si Jesus mipasidaan usab nga, gawas sa dalo nga kalingawan, ang makataronganon pisikal nga mga panginahanglan makapalinga sa pipila nga sa ingon ilang mapasagdan ang ilhanan. Siya midasig: “Magbantay kamo sa inyong kaugalingon basi sa inyong kasingkasing mahiluwan ang pagpatuyang ug ang pagkahubog ug ang mga kabalaka sa kinabuhi, ug unya kadtong adlawa moabot kaninyo nga wala damha ingon sa lit-ag. Kay kini moabot man gayod unya sa tanang nanagpuyo sa ibabaw sa tibuok nga yuta.”​—Lucas 21:34, 35.

Ang Bibliya, hinunoa, nagaawhag ug malipayong panimalaynong kinabuhi. (Efeso 5:24–6:4) Kasagaran kini nagaaghat nga ang ulo sa pamilya dunay usa ka matang sa trabaho o negosyo aron makatagana alang sa iyang asawa ug mga anak. (1 Timoteo 5:8) Apan, mubo nga panglantaw ang pagtugot nga masentro ang kinabuhi sa usa diha lamang sa pamilya, sa negosyo, ug sa materyal nga mga butang. Tungod ning maong kapeligrohan, si Jesus mipasidaan: “Maingon sa nahitabo kaniadto sa mga adlaw ni Noe, maingon man usab unya sa mga adlaw sa Anak sa tawo: sila nanagpangaon, sila nanagpang-inom, ang mga lalaki nanagpangasawa, ang mga babaye nanagpamana, hangtod sa adlaw sa pagsulod ni Noe sa arka, ug ang lunop miabot ug niini gilaglag silang tanan. . . . Maingon man usab unya niini sa adlaw nga igapadayag na ang Anak sa tawo.”​—Lucas 17:26-30; Mateo 24:36-39.

“Kuhaon” o “Biyaan”?

Kahaponon na. Sa dili madugay, ang Gingharian sa Diyos mangilabot sa pagtul-id sa mga butang. Unya ang tanang tawo maapektohan sa usa sa duha ka paagi. Sumala sa gisaysay ni Jesus: “Anha sa uma ang duha ka lalaki: ang usa kuhaon ug ang usa biyaan; duha ka babaye nagagaling diha sa ligsanan: ang usa kuhaon ang usa biyaan.”​—Mateo 24:40, 41.

Sa dihang moabot kanang maong kritikal nga panahon, unsa unyay imong baroganan? Biyaan ba unya ikaw sa kalaglagan, o kuhaon ka alang sa kaluwasan? Aron matultolan ka sa hustong direksiyon, palandonga pag-usab ang usa ka ilustrasyon nga gihatag ni Jesus: “Diin gani ang patay, atua usab didto managtapok ang mga agila.”​—Lucas 17:34-37; Mateo 24:28.

Busa gipasiugda ni Jesus ang panginahanglan sa paglantaw sa layo, nahiusang aksiyon. Kadtong kuhaon alang sa kaluwasan mao sila kadtong regular nga nakigtigom ug nakapahimulos gikan sa espirituwal nga pagkaon nga gitagana sa Diyos. Minilyon ang nakasinati nga ang among espirituwal nga pagpakaon makuha pinaagi sa suod nga pagpakig-uban sa usa sa kapin sa 55,000 ka kongregasyon sa mga Saksi ni Jehova ug pinaagi sa pagtuod sa gipasukad sa Bibliya nga mga publikasyon sama niining imong gibasa.

Kapin sa tulo ka milyong mga Saksi ni Jehova nagapakitag pagtuo sa ilhanan pinaagi sa pakigbahin “maayong balita sa gingharian” uban sa ilang mga silingan. (Mateo 24:14) Ikaw ba positibong nagasanong sa maayong balita? Kon mao, makasalig ka sa saad nga maluwas ngadto sa usa ka yutan-ong paraiso.

[Hulagway sa panid 5]

Daghan kaayo ang nalinga sa mga kalingawan nga ilang napasagdan na lang ang ilhanan

[Hulagway sa panid 6]

Ang pagpatalinghog sa ilhanan nalangkit sa pakigtigom aron sa pagkaon sa Pulong sa Diyos